ཧྥ་རན་སིའི་དཔོན་རིགས་ཀྱིས་ཨ་མེ་རི་ཁས་ཧྥ་རན་སིའི་ཁེ་ལས་ལ་ཐེ་གཏོགས་བྱས་པར་ཧ་ལས་པའི་ཚུལ་བསྟན།

ཧྥ་རན་སིའི་ཕྱི་ཕྱོགས་ཉོ་ཚོང་གི་འགན་ཁུར་བའི་པུའུ་ཀྲང་རིམ་པའི་འཐུས་མི་ཧྲིན་མཱ་ཏེན་གྱིས་ཟླ3པའི་ཚེས31ཉིན་ཧྥ་རན་སིའི་སྨྱན་བྱད་ལ་བསྟན་དོན། ཨ་མེ་རི་ཁའི་གཞུང་ཚབ་ཁང་གིས་ཧྥ་རན་སིའི་ཁེ་ལས་ལ་ཐེ་གཏོགས་བྱས་པ་དང་། ཧྥ་རན་སིའི་ཁེ་ལས་ཀྱིས་ཐི་ལིང་ཕུའུ་སྲིད་གཞུང་གི་འབྲེལ་ཡོད་སྲིད་ཇུས་གསར་བ་བརྩི་སྲུང་བྱེད་དགོས་པའི་རེ་བ་བཏོན་པར་ཧ་ལས་ཡོད་ཟེར།

ཧྥ་རན་སི་རུ་སྡོད་པའི་ཨ་མེ་རི་ཁའི་གཞུང་ཚབ་ཁང་གིས་ཉེ་སྔོན་ཨ་མེ་རི་ཁའི་སྲིད་གཞུང་བར་མཉམ་ལས་འབྲེལ་བ་ཡོད་པའི་ཧྥ་རན་སིའི་ཁེ་ལས་མང་བོར་འཕྲིན་ཡིག་བསྐུར་ནས། ཁེ་ལས་དེ་དག་གིས་རང་ངོས་ནས་སྣེ་མང་ཅན་དང་འདྲ་མཉམ། དཀྱེལ་ཡངས་རིག་གནས་བཅས་ཀྱི་ལས་གཞིར་སྐུལ་འདེད་བཏང་པ་སྟེ་ཨ་མེ་རི་ཁའི་དམངས་གཙོ་ཏང་གིས་བཏོན་པའི་དབང་མཉམ་སྲིད་ཇུས་ལག་བསྟར་བྱས་མེད་པ་བདེན་དཔང་བྱེད་དགོས་པའི་རེ་བ་བཏོན་པ་དང་། དེ་ལྟ་མིན་ཚེ་ཨ་མེ་རི་ཁ་རྒྱལ་ཕྲན་མཉམ་འབྲེལ་གྱི་མཐོང་ཆུང་ལ་ངོ་རྒོལ་བྱེད་པའི་བཅའ་ཁྲིམས་དང་འགལ་བའི་དོགས་གཞི་ཡོད་ཟེར། འཕྲིན་ཡིག་ནང་ཨ་མེ་རི་ཁའི་ཙུང་ཐུང་ཐི་ལིང་ཕུའུ་ཡིས་ཨ་མེ་རི་ཁ་རྒྱལ་ཕྲན་མཉམ་འབྲེལ་གྱིས་དབང་མཉམ་སྲིད་ཇུས་གཏན་འགོག་བྱེད་པའི་སྲིད་འཛིན་བཀའ་རྒྱ་དེ་ཨ་མེ་རི་ཁའི་སྲིད་གཞུང་གི་མཁོ་འདོན་ཚོང་བ་དང་ཞབས་ཞུའི་འདོན་སྤྲོད་ཕྱོགས་ཁག་ཚང་མར་འཚམ་པ་ཡིན་ལ། དེའི་རྒྱལ་ཁོངས་གར་གཏོགས་དང་བྱེད་སྒོ་རྒྱལ་ཁབ་གང་དུ་སྤེལ་ཡང་ཁྱད་མེད་ཟེར།

ཧྲིན་མཱ་ཏེན་གྱིས་བསྟན་དོན། ཧྥ་རན་སིའི་སྲིད་གཞུང་གིས་ཨ་མེ་རི་ཁའི་གཞུང་ཚབ་ཁང་བར་འཕྲིན་ཡིག་དེའི་དོན་ལ་གྲོས་བསྡུར་བྱེད་རྒྱུ་ཡིན་པ་དང་། ཧྥ་རན་སིའི་ཕྱོགས་ཀྱིས་བྱ་སྤྱོད་དེའི་དོན་དངོས་ཀྱི་དགོས་པར་རྒྱུས་ལོན་བྱེད་འདོད་ཡོད། ཁོས་ད་རུང་འབྲེལ་ཡོད་ཀྱི་ཁེ་ལས་དག་གིས་ཧྥ་རན་སིའི་བཅའ་ཁྲིམས་དང་རིན་ཐང་ལྟ་བུའི་ཐད་ནས་ཀུ་ཡངས་གཏོང་མི་རུང་བའི་འབོད་སྐུལ་བཏང་།

ཧྥ་རན་སིའི་དཔལ་འབྱོར་དང་ནོར་སྲིད་པུའུ་ཀྲང་ཨེ་ལི་ཁི་ལུང་པཱ་ཨར་གྱིས་ཀྱང་ཟླ3པའི་ཚེས31ཉིན་བྱ་འགུལ་ཅིག་ལ་ཞུགས་སྐབས་བསྟན་དོན། ཨ་མེ་རི་ཁའི་གཞུང་ཚབ་ཁང་གི་འཕྲིན་ཡིག་དེའི་བཅའ་ཁྲིམས་དོན་སྙིང་གསལ་བོ་མིན་པ་དང་། ཧྥ་རན་སིའི་དཔལ་འབྱོར་དང་ནོར་སྲིད་པུའུ་ཡིས་དོན་དེར་དཔྱད་འཇོག་བྱེད་བཞིན་ཡོད་ལ། ང་ཚོས་ནན་ཏན་གྱིས་དོན་དེ་ཐག་གཅོད་བྱེད་རྒྱུ་མ་ཟད། ཧྥ་རན་སིའི་ཁེ་ལས་ལ་རྒྱབ་སྐྱོར་བྱེད་རྒྱུ་ཡིན་ཟེར།