ཅཱ་ཧྲ་ས་ཁུལ་གྱི་འཕྲོད་བསྟེན་སྡེ་ཁག་གིས་གཟའ་འཁོར་གཉིས་རིང་དབྱི་སི་རལ་གྱི་དམག་དཔུང་གི་འཇབ་རྒོལ་ལས་མི་སྟོང་ལྷག་རྐྱེན་ལམ་དུ་ཤོར་ཡོད་པའི་ཚུལ་བསྟན།

ཕཱ་ལེ་སི་ཐན་ཅཱ་ཧྲ་ས་ཁུལ་གྱི་འཕྲོད་བསྟེན་སྡེ་ཁག་གིས་ཟླ3པའི་ཚེས31ཉིན་གསལ་སྒྲོག་སྤེལ་ཏེ། ཟླ3པའི་ཚེས18ཉིན་གྱི་ཚུན་ལ། དབྱི་སི་རལ་ཕྱོགས་ཀྱིས་ཅཱ་ཧྲའི་ས་ཁུལ་མང་བོར་བསྟུད་མར་འཇབ་རྒོལ་བྱས་ནས། ཉུང་མཐར་ཡང་མི་སྟོང་གཅིག་ལྷག་རྐྱེན་ལམ་དུ་ཤོར་བ་དང་། མི་སྟོང་གཉིས་དང་སུམ་བརྒྱ་ང་དགུར་རྨས་ཕོག་ཡོད་ཟེར།

གསལ་སྒྲོག་ལས་བཤད་རྒྱུར། འདས་པའི་དུས་ཚོད་ཞེ་བརྒྱད་ནང་། ཅཱ་ཧྲ་ས་ཁུལ་གྱི་སྨན་ཁང་སོ་སོས་བསྡོམས་པས་འདས་པོའི་བེམ་པོ་བརྒྱད་ཅུ་དང་རྨས་མ་སུམ་བརྒྱ་དང་ལྔ་དང་ལེན་བྱས་ཡོད། མིག་སྔར་མི་མང་བོ་སྔར་བཞིན་ཞིག་རོའི་འོག་ཏུ་མནན་ཡོད་ལ། རྒུད་སྐྱོབ་མི་སྣས་སྐྱོབ་ཐབས་མེད་ཟེར།

གཞན་ཡང་ཕཱ་ལེ་སི་ཐན་འཕྲིན་གཏོང་ཁང་གིས་ཚེས31ཉིན་བསྒྲགས་པ་ལྟར་ན། དབྱི་སི་རལ་གྱི་དམག་དཔུང་གིས་ཚེས30ཉིན་གྱི་དགོང་མོ་ནས་ཚེས31ཉིན་གྱི་ཞོགས་པའི་བར་ཅཱ་ཧྲའི་ས་ཁུལ་མང་བོར་འགས་གཏོར་བཏང་བ་དང་། འདས་པོའི་གྲས་སུ་བུད་མེད་དང་བྱིས་པ་རེ་འགའ་ཡོད་ཟེར།

དབྱི་སི་རལ་གྱི་དམག་དཔུང་གིས་གནས་སྐབས་སུ་རྣམ་འགྱུར་ཅི་ཡང་བསྟན་མེད།