ཨུ་རུ་སི་དང་ཨ་མེ་རི་ཁས་ཨུ་རུ་སི་དང་ཝུའུ་ཁི་ལན་གྱི་ནུས་ཁུངས་སྒྲིག་ཆས་ལ་ཆམ་ཕབ་གཏོང་མཚམས་འཇོག་པའི་གསལ་ཁྲ་བཀོད་ཡོད་པའི་ཚུལ་བསྟན།

ཨུ་རུ་སིའི་ཁི་ལིན་མུའུ་ལིན་ཕོ་བྲང་གིས་ཚེས25ཉིན་དྲ་ཐོག་ཏུ་གནས་ཚུལ་སྤེལ་ཏེ། ཨུ་རུ་སི་དང་ཨ་མེ་རི་ཁས་ཨུ་རུ་སི་དང་ཝུའུ་ཁི་ལན་གྱི་ནུས་ཁུངས་སྒྲིག་ཆས་ལ་ཆམ་ཕབ་གཏོང་མཚམས་འཇོག་པའི་གསལ་ཁྲ་བཀོད་ཡོད་ཟེར།

བསྒྲགས་པ་ལྟར་ན། གསལ་ཁྲའི་ནང་འདུས་པའི་ནུས་ཁུངས་སྒྲིག་ཆས་ལ་རྡོ་སྣུམ་བཙོ་སྦྱང་བཟོ་གྲྭ་དང་། སྣུམ་རླངས་སྦུག་ལམ་དང་གསོག་ཉར་སྒྲིག་ཆས། གློག་འདོན་བཟོ་གྲྭ། གློག་བསྒྱུར་ས་ཚིགས། གནོན་བསྒྱུར་འཕྲུལ་ཆས་སོགས་འདུས་པའི་གློག་འདོན་དང་གློག་འདྲེན་གྱི་རྨང་གཞིའི་སྒྲིག་ཆས། ཉིང་རྡུལ་ནུས་པའི་གློག་འདོན་ས་ཚིགས། ཆུ་གློག་ས་ཚིགས་ཀྱི་ཆུ་རགས་ཆེན་མོ་སོགས་ཡོད་ཟེར།

བསྒྲགས་པ་ལྟར་ན། ཆམ་ཕབ་གཏོང་མཚམས་འཇོག་པའི་བྱེད་ཐབས་དེ་ཟླ3པའི་ཚེས18ཉིན་ནུས་ལྡན་དུ་གྱུར་བ་དང་། ནུས་ལྡན་ཡུན་ཚད་ཉིན30ཡིན་ལ། ཕན་ཚུན་གྲོས་མོལ་བྱས་ཏེ་ཡུན་ཚད་ཇེ་རིང་དུ་བཏང་ཆོག གལ་ཏེ་ཕྱོགས་གཅིག་བྱེད་ཐབས་དེར་འགལ་ན། ཕྱོགས་གཞན་པས་འབྲེལ་ཡོད་ཀྱི་འོས་འགན་བརྩི་སྲུང་མི་བྱེད་པའི་དབང་ཆ་ཡོད་ཟེར།

ཨུ་རུ་སི་དང་ཨ་མེ་རི་ཁའི་འཐུས་ཚབ་ཚོགས་པས་ཚེས24ཉིན་སོ་ཏི་ཨ་རབ་ཀྱི་རྒྱལ་ས་ལེ་ཡཱ་ཏི་ནས་གྲོས་མོལ་བྱས། ཁི་ལི་མུའུ་ལིན་ཕོ་བྲང་གིས་ཚེས25ཉིན་ཁྱབ་བསྒྲགས་བྱས་པའི་སྤྱི་སྒྲོག་ལྟར་ན། གྲོས་མོལ་གྱི་གྲུབ་འབྲས་ལ་རིགས་སྣ་ཆེན་པོ་ལྔ་འདུས་པ་དང་། དེའི་ནང་གི་གཅིག་ནི་ཨུ་རུ་སི་དང་ཨ་མེ་རི་ཁས་ཨུ་རུ་སི་དང་ཝུའུ་ཁི་ལན་གྱི་ནུས་ཁུངས་སྒྲིག་ཆས་ལ་ཆམ་ཕབ་བྱེད་མཚམས་འཇོག་པའི་ཆེད་དུ་གཏན་འབེབས་བྱས་པའི་བྱེད་ཐབས་དེ་རེད།