ཨ་མེ་རི་ཁའི་ཙུང་ཐུང་གཞོན་པ་ཝན་སི་ཡིས་ཚེས28ཉིན་ཀི་ལིན་ལན་གླིང་ཕྲན་དུ་འཚམས་འདྲི་བྱེད་རྒྱུ་རེད།

ཨ་མེ་རི་ཁའི་ཙུང་ཐུང་གཞོན་པ་ཝན་སི་ཡིས་ཚེས25ཉིན་གྱི་ཕྱི་དྲོར་དྲ་ཐོག་ཏུ་བརྙན་རིས་གཏམ་བཤད་སྤེལ་ཏེ། ཁོས་ཚེས28ཉིན་ལྕམ་མོ་ཝུའུ་ཧྲ་དང་མཉམ་དུ་ཀི་ལིན་ལན་གླིང་ཕྲན་དུ་འཚམས་འདྲི་བྱེད་རྒྱུ་ཡིན་ཟེར།

ཝན་སི་ཡིས་བཤད་རྒྱུར། ཁོས་ཀི་ལིན་ལན་གླིང་ཕྲན་དུ་སྡོད་པའི་ཨ་མེ་རི་ཁའི་དམག་མིར་སྐོར་བརྒྱག་རྒྱུ་ཡིན་པ་དང་། ཀི་ལིན་ལན་གླིང་ཕྲན་གྱི་བདེ་འཇགས་གནས་ཚུལ་ལ་རྟོག་ཞིབ་བྱེད་རྒྱུ་ཡིན་ཟེར།

ཝུའུ་ཧྲའི་གཞུང་སྒྲུབ་ཁང་གིས་ཚེས23ཉིན་ཁྱབ་བསྒྲགས་བྱས་དོན། ཁོ་མོ་ཚེས27ཉིན་ལམ་ལ་ཆས་ཏེ། འཐུས་ཚབ་ཚོགས་པ་ཁྲིད་དེ་ཀི་ལིན་ལན་གླིང་ཕྲན་དུ་འཚམས་འདྲི་བྱེད་རྒྱུ་ཡིན་ཟེར།

ཨ་མེ་རི་ཁའི་སྨྱན་བྱད་ཀྱིས་བསྒྲགས་པ་ལྟར་ན། ཨ་མེ་རི་ཁའི་ཙུང་ཐུང་གི་རྒྱལ་ཁབ་བདེ་འཇགས་ལས་དོན་གྱི་ལས་རོགས་པ་ཧྭ་ཨར་ཙི་དང་ནུས་ཁུངས་པུའུ་ཀྲང་ལའེ་ཐི་གཉིས་ཀྱིས་མཉམ་དུ་འཚམས་འདྲི་བྱེད་རྒྱུ་རེད།

འཚམས་འདྲིའི་འཆར་གཞི་དེར་ཏན་མག་སྲིད་གཞུང་དང་ཀི་ལིན་ལན་གླིང་ཕྲན་གྱི་མགོ་ཁྲིད་པས་སྐྱོན་བརྗོད་དང་བཀག་འགོག་བྱས། ཏན་མག་གི་དབུ་བཞུགས་བློན་ཆེན་ཧྥོ་ལོས་ཙེ་ལི་ཁི་སིན་གྱིས་ཚེས25ཉིན་ཏན་མག་རྒྱང་སྒྲོག་ཀུང་ཟིའི་བཅར་འདྲི་དང་ལེན་བྱེད་སྐབས་བཤད་རྒྱུར། ཨ་མེ་རི་ཁའི་ཙུང་ཐུང་གཞོན་པའི་ལྕམ་མོ་དང་དཔོན་པོ་མང་བོས་ཀི་ལིན་ལན་གླིང་ཕྲན་དུ་འཚམས་འདྲི་བྱེད་རྒྱུ་ཡིན་པ་དེ་ནི་དང་ལེན་བྱེད་ཐབས་མེད་པའི་གནོན་ཤུགས་ཤིག་ཡིན་པ་དང་། ཏན་མག་སྲིད་གཞུང་གིས་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན་ཟེར། ཀི་ལིན་ལན་རང་སྐྱོང་སྲིད་གཞུང་གི་ཙུང་ལི་ཨེ་ཀི་ཏི་ཡིས་ཚེས23ཉིན་གྱི་དགོང་མོར་སྨྱན་བྱད་ལ་གསལ་བོར་བསྟན་དོན། ཝུའུ་ཧྲ་སོགས་གྲོས་མོལ་གང་རུང་ལ་ཞུགས་པར་གདན་ཞུ་བྱས་མེད་ཟེར། ཨེ་ཀི་ཏི་ཡིས་ཨ་མེ་རི་ཁ་ཕྱོགས་ཀྱི་བཀོད་སྒྲིག་དེ་ནི་གནོན་ཤུགས་སྟེར་བ་དང་དཀྲུག་འཕེན་བྱ་སྤྱོད་ཅིག་ཡིན་པས་དཔུང་འཇུག་གི་རང་བཞིན་ངེས་ཅན་ལྡན་པར་སྐྱོན་འཛུགས་བྱས།

ཀི་ལིན་ལན་གླིང་ཕྲན་དེ་མེ་གླིང་བྱང་མའི་བྱང་ཤར་ཕྱོགས་སུ་གནས་པ་དང་། འཛམ་གླིང་སྟེང་ཆེས་ཆེ་བའི་གླིང་ཕྲན་ཞིག་ཡིན། གླིང་ཕྲན་དེ་ནི་ཏན་མག་གི་རང་སྐྱོང་ས་ཁོངས་ཤིག་ཡིན་ལ་ཚད་མཐོའི་རང་སྐྱོང་དབང་ཆ་ལྡན། རྒྱལ་སྲུང་དང་ཕྱི་འབྲེལ་ལས་དོན་ལ་ཏན་མག་སྲིད་གཞུང་གིས་དོ་དམ་བྱེད་བཞིན་ཡོད། ཨ་མེ་རི་ཁར་མིག་སྔར་ཀི་ལིན་ལན་གླིང་ཕྲན་དུ་དམག་དོན་རྟེན་གཞི་གཙོ་བོ་ཞིག་ཡོད། ན་ནིང་ཨ་མེ་རི་ཁའི་ཙུང་ཐུང་འདེམ་བསྐོ་བྱས་རྗེས། ཨ་མེ་རི་ཁའི་ཙུང་ཐུང་ཐི་ལིང་ཕུའུ་ཡིས་ཐེངས་མང་བོར་ཀི་ལིན་ལན་གླིང་ཕྲན་གྱི་ཚོད་འཛིན་དབང་ཆ་འཕྲོག་ལེན་བྱེད་འདོད་ཡོད་པའི་སེམས་འདུན་བསྟན་པར་མ་ཟད། དམག་དོན་དང་དཔལ་འབྱོར་གྱི་འཇིགས་སྐུལ་བྱེད་ཐབས་ལ་བརྟེན་ནས་གླིང་ཕྲན་གྱི་ཚོད་འཛིན་དབང་ཆ་འཕྲོག་ལེན་བྱེད་ཀྱང་སྲིད་ཟེར།