ཀུའུ་ཐི་ལོས་སི་ཡིས་བརྙན་ལམ་གྱི་ལོ་གསར་བའི་ཞུ་ཚིག་ཕུལ་ནས་རྒྱལ་ཁབ་སོ་སོས་སེམས་ཤུགས་གཅིག་སྒྲིལ་གྱིས་མགོ་རྩོམ་ས་གསར་བ་བསུ་དགོས་པའི་འབོད་སྐུལ་བཏང་།

མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཀུའུ་ཐི་ལོས་སི་ཡིས་ཚེས30ཉིན2025ལོའི་བརྙན་ལམ་གྱི་ལོ་གསར་བའི་ཞུ་ཚིག་ཕུལ་ནས། རྒྱལ་ཁབ་སོ་སོས་སེམས་ཤུགས་གཅིག་སྒྲིལ་གྱིས་2025ལོ་དེ་མགོ་རྩོམ་ས་གསར་བ་ཞིག་ཏུ་འགྱུར་བར་བྱེད་དགོས་ཟེར།

ཀུའུ་ཐི་ལོས་སི་ཡིས་བཤད་རྒྱུར། 2024ལོར། འཐབ་འཁྲུག་གིས་དཀའ་སྡུག་ཆེན་པོ་བཟོས་ནས་ཡུལ་འཁྱམས་བྱེད་དུ་བཅུག་པ་དང་། འདྲ་མཉམ་མིན་པ་དང་ཁ་བྲལ་གྱི་སྣང་ཚུལ་གང་སར་མཐོང་ཐུབ་ལ། ཛ་དྲག་དང་ཡིད་རྟོན་མེད་པའི་སྣང་ཚུལ་ཇེ་དྲག་ཏུ་འགྲོ་བཞིན་ཡོད། ཡིན་ཡང་ཆེས་སྨག་མུན་གྱི་འཚོ་བའི་ནང་ནས་ཀྱང་། ང་ཡིས་བཅོས་བསྒྱུར་གྱི་རེ་བ་མཐོང་བྱུང་ཟེར། ཁོས་བཤད་རྒྱུར། ང་ཡིས་མི་ཆོས་རིང་ལུགས་ཀྱི་དཔའ་བོའི་ལུས་སྟེང་ནས་རེ་བ་མཐོང་བ་དང་། ཁོ་ཚོས་བཀག་རྒྱ་ཆེན་པོ་བསལ་ནས་ཆེས་ཉམ་ཞན་གྱི་མང་ཚོགས་ལ་རོགས་རམ་བྱེད་བཞིན་ཡོད། ང་ཡིས་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ནས་རེ་བ་མཐོང་བ་དང་། དེ་དག་གིས་དངུལ་ལོར་དང་ནམ་ཟླའི་དྲང་གཞག་འཚོལ་ཞིབ་བྱེད་ཆེད་འབད་འབུངས་བྱེད་བཞིན་ཡོད་ཟེར།

ཁོས་བཤད་རྒྱུར། ང་ཚོས་ལོ་བཅུའི་རིང་གི་དྲོད་ཚད་མཐོན་པོ་བརྒྱུད་མ་ཐག་ཡིན། ཁོས་རྒྱལ་ཁབ་སོ་སོས་2025ལོར་ཐཱན་གྱི་ཕྱིར་གཏོང་གི་ཚད་ལྡབ་འགྱུར་གྱིས་ཇེ་ཉུང་དུ་གཏོང་དགོས་པའི་སྐུལ་མ་བཏང་བ་དང་། དེ་ནི་དགོས་ངེས་ཀྱི་དོན་ཞིག་དང་བསྒྲུབ་ཐུབ་པ་ཞིག་ཡིན་ཟེར།

ཀུའུ་ཐི་ལོས་སི་ཡིས་བཤད་རྒྱུར། ད་ལོའི་ཟླ9བར་འཛམ་གླིང་ཡོངས་ཀྱི་རྒྱལ་ཁབ་སོ་སོའི་མགོ་ཁྲིད་པས་མཉམ་དུ་མ་འོངས་པའི་ཆིངས་ཡིག་བཀོད་པ་དང་། དེ་ལས་ཀྱང་མི་རྣམས་ལ་རེ་བ་མཐོང་དུ་བཅུག་ཡོད། མ་འོངས་པའི་ཆིངས་ཡིག་ལས་དམག་ཉུང་འཕྲིར་སྐུལ་འདེད་གཏོང་བ་དང་ཞི་བདེ་འཛུགས་སྐྲུན་བྱེད་པ། འཛམ་གླིང་ཡོངས་ཀྱི་དངུལ་ལོར་མ་ལག་བཅོས་བསྒྱུར་བྱེད་པ། བུད་མེད་དང་ན་གཞོན་ལ་གོ་སྐབས་སྔར་ལས་མང་བོ་བརྩོན་ལེན་བྱེད་པ། དེ་ལས་གཞན་སྔར་བཞིན་དུ་མི་རྣམས་ཀྱིས་འགྲོ་མིའི་ཐོབ་ཐང་དང་། རྒྱལ་སྤྱིའི་བཅའ་ཁྲིམས་དང་མཉམ་འབྲེལ་རྒྱལ་ཚོགས་ཀྱི་སྒྲིག་ཡིག་ལས་མངོན་པའི་རིན་ཐང་ལྟ་བ་དང་རྩ་དོན་རྒྱུན་འཁྱོངས་བྱེད་དགོས་ཟེར།

ཁོས་རྒྱལ་ཁབ་སོ་སོས་སེམས་ཤུགས་གཅིག་སྒྲིལ་གྱིས་འཛམ་གླིང་ཧྲིལ་བོ་ཁ་ཐོར་དགུ་ཐོར་ལ་འགྲོ་རུ་མི་འཇུག་པར་མཉམ་འབྲེལ་བྱས་ཏེ། 2025ལོ་དེ་མགོ་རྩོམ་ས་གསར་བ་ཞིག་ཏུ་འགྱུར་བར་བྱེད་དགོས་པའི་འབོད་སྐུལ་བཏང་།