ཝུའུ་ཁི་ལན་གྱི་ཙུང་ཐུང་གིས་རང་གི་ནུས་ཁུངས་སྒྲིག་ཆས་ལ་ཨུ་རུ་སིའི་དམག་དཔུང་གི་བར་སྣང་འཇབ་རྒོལ་ཐེབས་ཡོད་པའི་ཚུལ་བསྟན།

ཝུའུ་ཁི་ལན་གྱི་ཙུང་ཐུང་ཙེ་ལེན་སི་ཅི་ཡིས་ཚེས25ཉིན་དྲ་ཐོག་ཏུ་རྩོམ་ཡིག་སྤེལ་ནས་བཤད་རྒྱུར། ཨུ་རུ་སིའི་དམག་ཕྱོགས་ཀྱིས་ཉིན་དེར་ཝུའུ་ཁི་ལན་ལ་གཞི་རྒྱ་ཆེ་བའི་འཕུར་མདའ་དང་མི་མེད་གནམ་གྲུའི་འཇབ་རྒོལ་སྤེལ་བ་དང་། དེའི་དམིགས་འབེན་ནི་ཝུའུ་ཁི་ལན་གྱི་ནུས་ཁུངས་སྒྲིག་ཆས་རེད་ཟེར།

ཙེ་ལེན་སི་ཅི་ཡིས་བཤད་རྒྱུར། ཐོག་མར་བསྒྲགས་པའི་གནས་ཚུལ་ལྟར་ན། ཨུ་རུ་སིའི་དམག་དཔུང་གིས་འཕུར་མདའ་བདུན་ཅུ་ལྷག་དང་དཔུང་འཇུག་རང་བཞིན་གྱི་མི་མེད་གནམ་གྲུ་བརྒྱ་ལྷག་གཏོང་འཕེན་བྱས་ཡོད་པ་དང་། ཝུའུ་ཁི་ལན་གྱི་མཁའ་སྲུང་མེ་ཤུགས་ཀྱིས་འཕུར་མདའ་ལྔ་བཅུ་དང་མི་མེད་གནམ་གྲུ་མང་ཆེ་བ་བཀག་ཡོད་ཀྱང་། རེ་འགའ་དམིགས་འབེན་ལ་ཕོག་ཡོད། མིག་སྔར་ཝུའུ་ཁི་ལན་གྱི་མངའ་སྡེ་མང་བོར་གློག་ཆད་ཡོད་པ་དང་། ས་དེའི་གློག་ཤུགས་བཟོ་བས་གློག་ཤུགས་མཁོ་འདོན་སླར་གསོ་བྱེད་པར་བརྩོན་བཞིན་ཡོད་ཟེར།

ཉིན་དེར་ཝུའུ་ཁི་ལན་གྱི་ནུས་ཁུངས་པུའུ་ཀྲང་ཅཱ་ལུའུ་ཞན་ཁི་ཡིས་དྲ་ཐོག་ཏུ་རྩོམ་ཡིག་སྤེལ་ཏེ། ཨུ་རུ་སིའི་དམག་དཔུང་གིས་ཝུའུ་ཁི་ལན་གྱི་ནུས་ཁུངས་སྒྲིག་ཆས་ལ་གཞི་རྒྱ་ཆེ་བའི་བར་སྣང་འཇབ་རྒོལ་བྱས་པ་དང་། ཝུའུ་ཁི་ལན་གྱི་གློག་ཤུགས་ཁོངས་གཏོགས་ཀྱི་ཚོང་གཉེར་བས་དགོས་ངེས་ཀྱི་བཀག་འགོག་བྱེད་ཐབས་སྤྱད་ནས་གློག་དྲའི་བདེ་འཇགས་ལ་སྲུང་སྐྱོབ་བྱས་ཡོད་ཟེར། ཝུའུ་ཁི་ལན་གྱི་ཆེས་ཆེ་བའི་སྒེར་གཉེར་གློག་ཤུགས་ཁེ་ལས་ཀྱིས་བཤད་རྒྱུར། ཁེ་ལས་དེའི་མེ་ཤུགས་གློག་འདོན་བཟོ་གྲྭ་མང་བོར་ཨུ་རུ་སིའི་དམག་དཔུང་གི་བར་སྣང་འཇབ་རྒོལ་ཐེབས་ཏེ་སྒྲིག་ཆས་ལ་གཏོར་བརླག་ཚབས་ཆེན་ཐེབས་ཡོད་ཟེར། སྒེར་གཉེར་གློག་ཤུགས་ཁེ་ལས་དེས་ཝུའུ་ཁི་ལན་གྱི་རྒྱལ་ས་ཅི་ཧྥུའུ་དང་ཨོ་ཏི་སཱ་གྲོང་ཁྱེར་འདུས་པའི་གློག་འདོན་མཚམས་འཇོག་པའི་འཆར་གཞི་ཁྱབ་བསྒྲགས་བྱས་པ་རེད།

ཝུའུ་ཁི་ལན་གྱི་ཧཱ་ཨར་ཁི་ཧྥུའུ་གྲོང་ཁྱེར་གྱི་ཧྲི་ཀྲང་ཅེ་ལེ་ཧའོ་ཧྥུའུ་ཡིས་ཀྱང་ཉིན་དེར་དྲ་ཐོག་ཏུ་རྩོམ་ཡིག་སྤེལ་ཏེ། ཧཱ་ཨར་ཁི་ཧྥུའུ་གྲོང་ཁྱེར་ལ་ཉིན་དེར་གཞི་རྒྱ་ཆེ་བའི་འཕུར་མདའི་འཇབ་རྒོལ་ཐེབས་པ་དང་། ས་ཁོངས་མང་བོར་འགས་གཏོར་བྱུང་ཡོད། བར་སྣང་འཇབ་རྒོལ་ལས་མི3ལ་རྨས་ཕོག་ཡོད་པ་དང་། དེའི་ནང་མི་གཉིས་ཀྱི་རྨས་སྐྱོན་ཚབས་ཆེན་རེད་ཟེར།

གཞན་ཡང་ཝུའུ་ཁི་ལན་གྱི་རྒྱལ་སྤྱིའི་གློག་འཕྲིན་འཕྲིན་གཏོང་ཁང་གིས་བསྒྲགས་པ་ལྟར་ན། ཚེས25ཉིན་གྱི་སྔ་དྲོར། ཝུའུ་ཁི་ལན་ནུབ་ཕྱོགས་ཀྱི་དབྱེ་ཝན་ནོའུ་དང་ཧྥོ་ལན་ཁི་ཧྥུའུ་སི་ཁི་མངའ་སྡེ་ལ་འཕུར་མདའི་འཇབ་རྒོལ་ཐེབས་ནས། ས་ཁུལ་སྐོར་ཞིག་ལ་གློག་ཆད་ཡོད་ཟེར།