ཨུ་རུ་སི་དང་ཐུར་ཁེའི་ཙུང་ཐུང་གིས་ཁ་པར་བརྒྱུད་དེ་སི་རི་ཡཱའི་གནས་བབ་ལ་གྲོས་བསྡུར་བྱས།

ཨུ་རུ་སིའི་ཙུང་ཐུང་ཕུའུ་ཅིན་དང་ཐུར་ཁེའི་ཙུང་ཐུང་ཨེ་ཨར་ཏའོ་ཨན་གྱིས་ཚེས་གསུམ་ཉིན་ཁ་པར་བརྒྱུད་དེ་སི་རི་ཡཱའི་གནས་བབ་ལ་གྲོས་བསྡུར་བྱས།

ཨུ་རུ་སིའི་ཙུང་ཐུང་དྲ་ཚིགས་ཀྱིས་ཚེས3ཉིན་སྤེལ་བའི་གནས་ཚུལ་ལྟར་ན། ཨུ་རུ་སི་དང་ཐུར་ཁེ་རྒྱལ་ཁབ་གཉིས་ཀྱི་མགོ་ཁྲིད་པས་སི་རི་ཡཱའི་མིག་སྔའི་ཛ་དྲག་གི་གནས་བབ་ལ་ཞིབ་ཏུ་གྲོས་བསྡུར་བྱས་པ་དང་། ཨུ་རུ་སིའི་ཕྱོགས་ཀྱིས་ངེས་པར་དུ་ཐལ་སྤྱོད་རྩ་འཛུགས་ཀྱིས་སི་རི་ཡཱའི་འཇིགས་སྐུལ་རིང་ལུགས་ཀྱི་བཙན་འཛུལ་ལ་བཀག་འགོག་བྱེད་དགོས་པ་ནན་བཤད་བྱས་པར་མ་ཟད། ཤུགས་ཆེན་པོས་སི་རི་ཡཱའི་སྲིད་གཞུང་གིས་རྒྱལ་ཡོངས་ཀྱི་གཏན་འཇགས་དང་རྩ་ཁྲིམས་སྒྲིག་ལམ་སླར་གསོ་བྱེད་པའི་བྱ་བར་རྒྱབ་སྐྱོར་བྱེད་དགོས་ཟེར།

གསལ་སྒྲོག་ལས་བཤད་རྒྱུར། རྒྱལ་ཁབ་གཉིས་ཀྱི་ཙུང་ཐུང་གིས་ཕྱོགས་གཉིས་དང་ཨ་སི་ཐཱ་ནཱའི་འཕེལ་རིམ་གྱི་སྒྲོམ་གཞིའི་ནང་གི་མཉམ་ལས་ལ་ཤུགས་སྣོན་བྱེད་དགོས་པའི་འབོད་སྐུལ་བཏང་ཡོད་ཟེར།

གསལ་སྒྲོག་ལས་ཨུ་རུ་སི་དང་ཐུར་ཁེ། དབྱི་ལིང་བཅས་ཀྱིས་རོགས་ལས་དམ་ཟབ་བྱས་ནས་སི་རི་ཡཱའི་གནས་བབ་ཀྱི་རྒྱུན་ལྡན་ཅན་ལ་སྐུལ་འདེད་གཏོང་བའི་ཐད་ནུས་པ་གལ་ཆེན་འདོན་སྤེལ་བྱེད་རྒྱུ་ནན་བཤད་བྱས།

གསལ་སྒྲོག་ལས་བཤད་རྒྱུར། རྒྱལ་ཁབ་གཉིས་ཀྱི་ཙུང་ཐུང་གིས་མུ་མཐུད་དུ་འབྲེལ་འདྲིས་སྲུང་འཛིན་བྱས་ནས་ཉམས་ཉེན་ཞི་འཇགས་སུ་འགྲོ་བར་སྐུལ་འདེད་གཏོང་བའི་བྱེད་ཐབས་འཚོལ་ཞིབ་བྱེད་རྒྱུ་རེད་ཟེར།

དེ་ལས་གཞན་རྒྱལ་ཁབ་གཉིས་ཀྱི་ཙུང་ཐུང་གིས་ད་རུང་ཨུ་རུ་སི་དང་ཐུར་ཁེའི་གཉིས་ཕན་མཉམ་ལས་ཀྱི་འབྲེལ་ཡོད་གནད་དོན་དང་། ཁྱད་པར་དུ་དཔལ་འབྱོར་ཉོ་ཚོང་དང་ནུས་ཁུངས་ཁྱབ་ཁོངས་ཀྱི་མཉམ་ལས་ལ་གྲོས་བསྡུར་བྱས།