འཇར་མན་གྱི་ཙུང་ལི་ཧྲའོ་ཨར་ཚི་ཡིས་ཝུའུ་ཁི་ལན་ལ་འཚམས་འདྲི་བྱས།

ཝུའུ་ཁི་ལན་གྱི་ཙུང་ཐུང་དྲ་ཚིགས་ཀྱིས་ཚེས2ཉིན་གྱི་དགོང་མོར་སྤེལ་བའི་གནས་ཚུལ་ལྟར་ན། ཝུའུ་ཁི་ལན་གྱི་ཙུང་ཐུང་ཙེ་ལེན་སི་ཅི་ཡིས་ཉིན་དེར་རྒྱལ་ས་ཅི་ཧྥུའུ་རུ་འཚམས་འདྲིར་འབྱོར་བའི་འཇར་མན་གྱི་ཙུང་ལི་ཧྲའོ་ཨར་ཚི་དང་གྲོས་མོལ་བྱས་པ་དང་། ཕྱོགས་གཉིས་ཀྱིས་གཙོ་བོ་ཝུའུ་ཁི་ལན་གྱིས་གཡུལ་ས་དང་ཕྱི་འབྲེལ་ཐད་ནས་སྟོབས་ཤུགས་ཇི་ལྟར་མཐོར་འདེགས་གཏོང་ཚུལ་སོགས་ཀྱི་གནད་དོན་ཐད་ནས་གྲོས་བསྡུར་བྱས།

ཙེ་ལེན་སི་ཅི་ཡིས་བཤད་རྒྱུར། འཇར་མན་ནི་ཝུའུ་ཁི་ལན་གྱི་ཡོ་རོབ་གླིང་གི་མཁའ་སྲུང་དྲག་ཆས་རོགས་སྐྱོར་རྒྱལ་ཁབ་གཙོ་བོ་ཡིན་ཞིང་། འཇར་མན་གྱིས་ཝུའུ་ཁི་ལན་ལ་འདོན་སྤྲོད་བྱས་པའི་རྒྱལ་གཅེས་རིང་ལུགས་པའི་འཕུར་མདེལ་འགོག་རྒོལ་མ་ལག་དང་། IRIS-Tམཁའ་སྲུང་མ་ལག  མཁའ་སྲུང་ཐན་ཁེ་བཅས་ཀྱིས་བྱེད་ནུས་གལ་ཆེན་འདོན་སྤེལ་བྱས། ཁོས་འཇར་མན་གྱིས་ཟླ་འདིར་ཝུའུ་ཁི་ལན་ལ་སྐོར་གསར་བའི་ཡོབ་སྒོར་དུང་ཕྱུར་དྲུག་དང་བྱེ་བ་ལྔའི་དམག་དོན་རོགས་སྐྱོབ་འདོན་སྤྲོད་བྱ་རྒྱུ་ཡིན་པར་བཀའ་དྲིན་ཞུས་པ་ཡིན་ཟེར། 

ཧྲའོ་ཨར་ཚི་ཡིས་བཤད་རྒྱུར། ཨུ་རུ་སི་དང་ཝུའུ་ཁི་ལན་བར་འགལ་བ་བྱུང་བའི་ཚུན་ལ། འཇར་མན་གྱིས་ཝུའུ་ཁི་ལན་ལ་ཡོབ་སྒོར་ཐེར་ཆེན་གཉིས་དང་ཐེར་འབུམ་བརྒྱད་ལྷག་ལ་ཉེ་བའི་རོགས་སྐྱོར་འདོན་སྤྲོད་བྱས་པ་ཡིན། 2025ལོར། འཇར་མན་གྱིས་མུ་མཐུད་དུ་ཝུའུ་ཁི་ལན་ཕྱོགས་ལ་མཁའ་སྲུང་མ་ལག་དང་མེ་སྒྱོགས། མི་མེད་གནམ་གྲུ་དང་ཐད་འཕུར་གནམ་གྲུ་སོགས་དྲག་ཆས་སྒྲིག་ཆས་འདོན་སྤྲོད་བྱ་རྒྱུ་ཡིན་ཟེར།

ཧྲའོ་ཨར་ཚི་ཚེས2ཉིན་གྱི་ཞོགས་པར་ཅི་ཧྥུའུ་ལ་འབྱོར་བ་དང་། འདི་ནི་ཨུ་རུ་སི་དང་ཝུའུ་ཁི་ལན་བར་འགལ་བ་བྱུང་བའི་ཚུན་ལ། ཧྲའོ་ཨར་ཚི་ཡིས་ཐེངས་གཉིས་པར་ཅི་ཧྥུའུ་ལ་འཚམས་འདྲི་བྱས་པ་རེད།