ཕཱ་ཁི་སི་ཐན་གྱི་དཔོན་རིགས་ཀྱིས་ཟླ11པའི་ཚེས30ཉིན་བཤད་རྒྱུར། རྒྱལ་ཁབ་དེའི་ནུབ་བྱང་ཕྱོགས་ཀྱི་ཁའེ་པའོ་ཨར་ཕུའུ་ཧྲི་ཐུའུ་ཞིང་ཆེན་དུ་ཉེ་སྔོན་ཆོས་ལུགས་གྲུབ་མཐའི་བར་གྱི་འཁྲུག་རྩོད་བྱུང་ནས་མི124རྐྱེན་ལམ་དུ་ཤོར་ཟེར།
རྒྱུས་ལོན་བྱུང་བ་ལྟར་ན། སྐོར་ཐེངས་འདིའི་ཆོས་ལུགས་གྲུབ་མཐའི་བར་གྱི་འཁྲུག་རྩོད་དེ་ཧྲི་ཡེ་ཕྱོགས་ཁག་གི་མུའུ་སི་ལིན་དྲུད་པའི་འགྲུལ་སྐྱེལ་རླངས་འཁོར་གསུམ་ལ་ཟླ11པའི་ཚེས21ཉིན་ཁའེ་པའོ་ཨར་ཕུའུ་ཧྲི་ཐུའུ་ཞིང་ཆེན་གྱི་ཀུའུ་ལེ་མུའུ་ས་ཁུལ་དུ་འཇབ་རྒོལ་ཐེབས་ནས། ཉུང་མཐར་ཡང་བུད་མེད་དང་བྱིས་པ་འདུས་པའི་མི52རྐྱེན་ལམ་དུ་ཤོར་བ་ལས་བྱུང་བ་ཡིན་ལ། དོན་དེ་ལས་ས་ཁུལ་དེར་ཧྲི་ཡེ་ཕྱོགས་ཁག་དང་ཞོན་ནེ་ཕྱོགས་ཁག་གི་མུའུ་སི་ལིན་བར་དྲག་ཆས་འཁྲུག་རྩོད་བྱུང་བ་རེད།
ཕཱ་ཁི་སི་ཐན་སྨྱན་བྱད་ཀྱིས་ཚེས30ཉིན་ཁའེ་པའོ་ཨར་ཕུའུ་ཧྲི་ཐུའུ་ཞིང་ཆེན་གྱི་དཔོན་རིགས་ཀྱི་སྐད་ཆ་དྲངས་ནས་བཤད་རྒྱུར། འདས་པའི་ཉིན་གཅིག་གི་ནང་ཀུའུ་ལེ་མུའུ་ས་ཁུལ་དུ་དྲག་ཆས་འཁྲུག་རྩོད་བྱུང་ནས་ཉུང་མཐར་ཡང་མི16རྐྱེན་ལམ་དུ་ཤོར་བ་དང་། མི170ལ་རྨས་ཕོག རྨས་མ་མང་ཆེ་བ་སྨན་ཁང་དུ་བསྐྱལ་ནས་གསོ་བཅོས་བྱེད་བཞིན་ཡོད་ལ། རྨས་མ་སྐོར་ཞིག་གི་གནས་ཚུལ་ཚབས་ཆེན་རེད་ཟེར།
ཀུའུ་ལེ་མུའུ་ས་ཁུལ་གྱི་ཆེད་དོན་པ་གཞོན་པ་མཱ་ཧཱ་སུའུ་ཏི་ཡིས་བཤད་རྒྱུར། འཇབ་རྒོལ་བྱུང་རྗེས། ཁའེ་པའོ་ཨར་ཕུའུ་ཧྲི་ཐུའུ་ཞིང་ཆེན་སྲིད་གཞུང་གིས་མཐོ་རིམ་འཐུས་ཚབ་ཚོགས་པ་ཡུལ་དེར་མངག་སྟེ། ས་དེའི་ཚོ་བའི་མགོ་བའི་བར་མཐུན་སྦྱོར་བྱས་ནས་ཕྱོགས་གཉིས་ཀྱིས་འཁྲུག་རྩོད་མཚམས་འཇོག་པའི་གྲོས་མཐུན་བཀོད་ཀྱང་། དེའི་རྗེས་སུ་ཕྱོགས་གཉིས་ཀྱིས་གྲོས་མཐུན་དེ་ལག་བསྟར་བྱེད་རྒྱུ་ཁས་ལེན་མ་བྱས་པར་དྲག་ཤུགས་འཁྲུག་རྩོད་མུ་མཐུད་དུ་སྤེལ་བཞིན་ཡོད་ཟེར།
རྒྱུས་ལོན་བྱུང་བ་ལྟར་ན། དོན་རྐྱེན་དེ་ལས་བྱུང་བའི་ཛ་དྲག་གི་གནས་བབ་ལས་ས་དེའི་འགྲིམ་འགྲུལ་ལ་གཏོར་བརླག་ཐེབས་པ་དང་། འབར་རྫས་དང་སྨན་རྫས་དཀོན་ལ། དྲ་རྒྱའི་འཕྲིན་གཏོང་ཞབས་ཞུ་གནས་སྐབས་སུ་མཚམས་བཞག་པ་སོགས་ཀྱི་གནད་དོན་བྱུང་སྟེ། ས་དེའི་མང་ཚོགས་ཀྱི་འཚོ་བར་ཤུགས་རྐྱེན་ཆེན་པོ་ཐེབས་ཡོད།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注