ཨེ་ཤ་ཡཱའི་སྤྱི་ཕན་གླེང་སྟེགས་སྐབས་གཉིས་པ་ཧེ་ཁུག་ནས་སྤེལ།

ཟླ11པའི་ཚེས27ཉིན། ཨེ་ཤ་ཡཱའི་སྤྱི་ཕན་གླེང་སྟེགས་སྐབས་གཉིས་པ་ཧེ་ཁུག་ནས་སྤེལ། གླེང་སྟེགས་ནས་སྣེ་མང་མཉམ་ལས་དང་རྒྱུན་མཐུད་འཕེལ་རྒྱས་བརྗོད་སྙིང་དུ་བཟུང་ཡོད་ཅིང་། དྲ་ཐོག་དང་ཡུལ་དངོས་ཟུང་དུ་འབྲེལ་བའི་ཐབས་ཀྱིས་སྤེལ་བ་དང་། ཚེས་སུམ་ཅུའི་བར་ཚོགས་རྒྱུ་རེད། རྒྱལ་ཁབ་དང་ས་ཁུལ་གྱི་སྤྱི་ཕན་དགེ་སྒྲུབ་རྩ་འཛུགས18དང་དེ་མིན་རྒྱལ་སྤྱིའི་རྩ་འཛུགས24ནས་ཡོང་བའི་ཀྲུང་གོའི་ཕྱི་ནང་གི་སྐུ་མགྲོན400ཙམ་མཉམ་དུ་འཛོམས་ནས། ཨེ་ཤ་ཡཱའི་སྤྱི་ཕན་འཕེལ་རྒྱས་ཀྱི་འཕེལ་ཕྱོགས་གསར་བ་དང་འགན་འཁྲི་གསར་བའི་ཐད་ནས་མཉམ་དུ་གྲོས་བསྡུར་དང་བརྗེ་རེས་བྱས།

ཚོགས་མགོ་རྩོམ་པའི་མཛད་སྒོའི་སྟེང་། ཚོགས་ཞུགས་སྐུ་མགྲོན་མང་བོས་བརྗེ་རེས་གཏམ་བཤད་སྤེལ་ཏེ། འཛམ་གླིང་ཡོངས་ཀྱི་འཕེལ་རྒྱས་གྲོས་འགོ་དངོས་འབེབས་བྱེད་པ་དང་། སྔར་ལས་ལྷག་པའི་སྒོ་ནས་ཨེ་ཤ་ཡཱའི་སྤྱི་ཕན་མཉམ་ལས་གཏིང་ཟབ་ཏུ་སྤེལ་བའི་ཐད། དངོས་གཉེར་མཉམ་ལས་ལ་ཤུགས་སྣོན་བྱས་ཏེ་སྤྱི་ཕན་གྲུབ་འབྲས་མཉམ་སྤྱོད་བྱེད་པ་དང་། རིག་གནས་བརྗེ་རེས་ལས་བསམ་བློའི་གཅིག་སྒྲིལ་བྱེད་པའི་ཐུན་མོང་ལྟ་ཚུལ་དར་སྤེལ་བྱེད་པ། ན་གཞོན་གྱི་ཟབ་ཞུགས་ལ་ཤུགས་སྣོན་པ་དང་སྤྱི་ཕན་བྱ་སྤྱོད་རྒྱུན་འཛིན་བྱེད་པ། སྤྱི་ཕན་རྣམ་པ་གསར་གཏོད་བྱས་ཏེ་སྤྱི་ཚོགས་ཀྱི་སྟོབས་ཤུགས་སྐུལ་སྤེལ་བྱེད་པ་སོགས་ཀྱི་གྲོས་གཞི་བཏོན།

གླེང་སྟེགས་ཀྱི་ཡུལ་དངོས་ནས་ཀྲུང་གོའི་གྲོང་གསེབ་འཕེལ་རྒྱས་ཐེབས་རྩ་ཚོགས་པའི་རྒྱལ་སྤྱིའི་འཛུམ་ལྡན་བྱིས་པའི་ལས་གཞི་དང་། ཀྲུང་གོའི་རྒྱ་གྲམ་དམར་པོའི་ཐེབས་རྩ་ཚོགས་པ་དང་མཉམ་འབྲེལ་རྒྱལ་ཚོགས་ཡུལ་གྱར་བའི་ལས་དོན་ཁང་གི་ཨ་ཧྥུའུ་ཧན་གྱི་ཉམས་ཉེན་ཐག་གཅོད་འགུལ་སྐྱོད། ཨེ་ཏི་ཐེབས་རྩ་ཚོགས་པའི་རྒྱལ་སྤྱིའི་ཆུ་རྒྱུན་འགུལ་སྐྱོད་སོགས་ཨེ་ཤ་ཡཱའི་སྤྱི་ཕན་ལས་གཞིའི་མིག་དཔེ་ཆེན་མོ་གསུམ་དང་། དེ་མིན་ཨེ་ཤ་ཡཱའི་ཐེབས་རྩ་ཚོགས་པའི་བཀག་རྒྱ་མེད་པའི་མ་འོངས་པ་སྟེ་ཀྲུང་གོ་དང་ཁམ་ཕུ་ཀྲེའི་འགྲིམ་འགྲུལ་རྨང་གཞིའི་འཛུགས་སྐྲུན་གྱི་དབང་བོ་སྐྱོན་ཅན་ལ་བྱམས་སྐྱོང་བྱེད་པའི་ལས་གཞི་སོགས་ཨེ་ཤ་ཡཱའི་སྤྱི་ཕན་ལས་གཞིའི་དཔེ་གཞི་དགུ་ཁྱབ་སྤེལ་བྱས་པར་མ་ཟད། ཨེ་ཡཱའི་སྤྱི་ཕན་མི་སྣ་བརྒྱད་ལ་རྟགས་མ་བྱིན།

གླེང་སྟེགས་ཀྱི་སྐབས་སུ་ད་རུང་གླེང་སྟེགས་གཞན་པ་བཅུ་གཉིས་དང་མཐའ་ཚོགས་གཉིས་སྤེལ་ནས། འཛམ་གླིང་ཡོངས་ཀྱི་དབུལ་སེལ་དང་དམངས་སེམས་གཅིག་སྦྲེལ་ཅེས་པ་དང་། 2030ལོའི་བཞུད་ལམ་གྱི་ཆུ་དང་རྒྱུན་མཐུད་འཕེལ་རྒྱས། གཞི་གྲངས་དུས་རབས་ཀྱི་བྱིས་པའི་སྲུང་སྐྱོབ་ཀྱི་འགྲན་རྩོད་གསར་བ། སྐྱེ་དངོས་སྣ་མང་ཅན་གྱི་སྲུང་སྐྱོབ། ནམ་ཟླའི་འགྱུར་ལྡོག་ཐག་གཅོད་བྱེད་པའི་སྣེ་མང་འགུལ་སྐྱོད་སོགས་གྲོས་གཞི་མང་བོར་དམིགས་ཏེ་གྲོས་བསྡུར་དང་བརྗེ་རེས་བྱས།

ཨེ་ཤ་ཡཱའི་སྤྱི་ཕན་གླེང་སྟེགས་ནི་ཧེ་ནན་ཨེ་ཤ་ཡཱའི་སྤྱི་ཕན་ཞིབ་འཇུག་ཁང་གིས་སྣེ་ཁྲིད་དེ་སྤེལ་བའི་འཛམ་གླིང་རང་བཞིན་གྱི་སྤྱི་ཕན་བྱ་འགུལ་ཅིག་ཡིན་ཞིང་། མཉམ་འབྲེལ་རྒྱལ་ཚོགས་ཀྱི་རྒྱུན་མཐུད་འཕེལ་རྒྱས་ཀྱི་དམིགས་འབེན་ལ་དམིགས་ཏེ། འཛམ་གླིང་ཡོངས་ཀྱི་ཆེས་ཤུགས་རྐྱེན་ལྡན་པའི་དགེ་སྒྲུབ་པ་དང་ཁེ་ལས་པ། རིག་གཞུང་ལས་རིགས་ཀྱི་ཕུལ་བྱུང་མི་སྣ། སྤྱི་ཕན་རྩ་འཛུགས་ཀྱི་འགན་ཁུར་བ་སོགས་ལ་བསམ་བློ་བརྗེ་རེས་བྱེད་པའི་སྟེགས་བུ་དང་ལག་ལེན་མཉམ་ལས་བྱེད་པའི་འབྲེལ་ཟམ་བསྐྲུན་ཡོད།