ཨ་རབ་ཀྱི་ཆུ་དོན་གྲོས་ཚོགས་སྐབས་དྲུག་པ་ནས་ཆུའི་ཐོན་ཁུངས་ཀྱི་རྒྱུན་མཐུད་འཕེལ་རྒྱས་མངོན་འགྱུར་བྱེད་དགོས་པའི་འབོད་སྐུལ་བཏང་།

ཨ་རབ་ཀྱི་ཆུ་དོན་གྲོས་ཚོགས་སྐབས་དྲུག་པ་ཚེས27ཉིན་ཅོར་ཏན་གྱི་སི་ཧེ་ས་ཁུལ་ནས་ཚོགས་མགོ་བརྩམས། གྲོས་ཚོགས་ནས་ཆུའི་ཐོན་ཁུངས་ཀྱི་རྒྱུན་མཐུད་འཕེལ་རྒྱས་དང་བཅོས་སྐྱོང་མངོན་འགྱུར་བྱེད་པ་བརྗོད་སྙིང་དུ་བཟུང་ཡོད་ལ། དམིགས་ཡུལ་ནི་ཨ་རབ་རྒྱལ་ཁབ་དག་གིས་མཉམ་དུ་ཆུའི་ཐོན་ཁུངས་ལ་འབྲེལ་བའི་འགྲན་རྩོད་ཐག་གཅོད་བྱེད་པར་སྐུལ་འདེད་གཏོང་ཆེད་རེད།

ཅོར་ཏན་གྱི་ཆུ་བེད་བློན་ཆེན་སཱ་ཝུའུ་ཏི་ཡིས་གྲོས་ཚོགས་མགོ་རྩོམ་པའི་མཛད་སྒོའི་སྟེང་བཤད་རྒྱུར། འཛམ་གླིང་ཧྲིལ་བོ་ཇེ་དྲོར་སོང་བ་དང་། ཆུའི་ཐོན་ཁུངས་ཇེ་ཉུང་དུ་སོང་བ། ས་ཁུལ་གྱི་འཁྲུག་རྩོད་དང་དེ་ལས་བྱུང་བའི་ཡུལ་གྱར་བའི་རླབས་རྒྱུན་སོགས་ཀྱི་ཤུགས་རྐྱེན་དབང་གིས་ཨ་རབ་རྒྱལ་ཁབ་དག་གི་ཆུ་དཀོན་པའི་གནད་དོན་ཉིན་རེ་བཞིན་ཚབས་ཆེན་དུ་འགྱུར་བཞིན་ཡོད་ཟེར། ཁོས་ཨ་རབ་རྒྱལ་ཁབ་དག་གིས་མཉམ་དུ་འབད་བརྩོན་བྱས་ནས་ཐག་གཅོད་ཇུས་གཞི་འཚོལ་ཞིབ་བྱེད་དགོས་པ་དང་། མང་ཚོགས་ཀྱིས་ཆུ་གྲོན་ཆུང་བྱེད་པའི་འདུ་ཤེས་ཇེ་དྲག་ཏུ་གཏོང་ལ། ཚན་རིག་ཞིབ་འཇུག་ལས་ཁུངས་ཀྱི་ནུས་པ་འདོན་སྤེལ་བྱས་ནས། འབྲུ་རིགས་དང་ཆུ། ཁོར་ཡུག་བདེ་འཇགས་བཅས་ཀྱི་གཞི་གཅིག་ཅན་མངོན་འགྱུར་བྱེད་དགོས་པར་མ་ཟད། ཨ་རབ་རྒྱལ་ཁབ་ཀྱི་ཆུའི་བདེ་འཇགས་ལ་འགན་སྲུང་བྱེད་པའི་མཉམ་འབྲེལ་འཐབ་ཇུས་གཏན་འབེབས་བྱེད་དགོས་པའི་འབོད་སྐུལ་བཏང་།

ཁོས་མཚམས་སྦྱོར་བྱས་དོན། ཅོར་ཏན་གྱིས་ཆུའི་དོ་དམ་ལེགས་བཅོས་བྱེད་པ་དང་ཆུ་ཆུད་ཟོས་སུ་གཏོང་བ་ཇེ་ཉུང་དུ་གཏོང་བ། ཆུའི་སྤྱོད་སྒོ་རྒྱ་བསྐྱེད་པ་སོགས་ཀྱི་ཐད་ནས་ངེས་པ་དོན་གྱི་གྲུབ་འབྲས་བླངས་ཡོད་པ་དང་། མཚོ་དམར་མཚོ་ཁོངས་ཀྱི་མཚོ་ཆུའི་གཤིས་བསྒྱུར་གྱི་འཐབ་ཇུས་ལས་གཞི་མྱུར་མོར་ཡོངས་འགྲུབ་བྱས་ཏེ། ཆུ་གཏོང་གི་ཕན་ནུས་མཐོར་འདེགས་དང་རིམ་པ་སོ་སོའི་ཆུའི་གྲོན་ཆུང་གི་འདུ་ཤེས་ལ་ཤུགས་སྣོན་བྱེད་བཞིན་ཡོད་ཟེར།

ཨ་རབ་རྒྱལ་ཁབ་མནའ་འབྲེལ་གྱི་དཔལ་འབྱོར་ལས་དོན་གྱི་འགན་ཁུར་བའི་དྲུང་ཡིག་ཆེན་མོའི་ལས་རོགས་པ་མཱ་ལེ་ཅི་ཡིས་ཞུ་ཚིག་འབུལ་སྐབས་ཨ་རབ་རྒྱལ་ཁབ་སོ་སོའི་མཉམ་ལས་ལ་ཤུགས་སྣོན་བྱེད་པའི་གལ་ཆེན་རང་བཞིན་ནན་བཤད་བྱས་པ་དང་། ཆུའི་ཐོན་ཁུངས་ཀྱི་རྒྱུན་མཐུད་རང་བཞིན་ལ་འགན་སྲུང་བྱས་ཏེ། ཨ་རབ་རྒྱལ་ཁབ་ཀྱི་ཆུ་བེད་པུའུ་ཀྲང་གིས་མཉམ་ཞུགས་གྲོས་ཚོགས་དང་སྡེ་ཁག་བརྒལ་བའི་ཐག་གཅོད་ཇུས་གཞི་ལག་བསྟར་བྱེད་སྐབས་ནུས་པ་གལ་ཆེན་འདོན་སྤེལ་བྱེད་དགོས་པའི་འབོད་སྐུལ་བཏང་།

ཐེངས་འདིའི་གྲོས་ཚོགས་ཀྱི་ཚོགས་ཡུན་ཉིན་གཉིས་ཡིན་པ་དང་། ཨ་རབ་རྒྱལ་ཁབ་ཀྱི་ཆུ་བེད་པུའུ་ཀྲང་དང་འཐུས་མི། འབྲེལ་ཡོད་རྒྱལ་སྤྱིའི་རྩ་འཛུགས་དང་ཆུའི་ཁྱབ་ཁོངས་ཀྱི་ཆེད་མཁས་པ་མང་བོ་གྲོས་ཚོགས་ལ་ཞུགས། གྲོས་ཚོགས་ཀྱི་གྲོས་རིམ་ལ་ཚང་འཛོམས་གྲོས་ཚོགས་དང་ཡན་ལག་ཚོགས་རའི་སྙན་ཞུ། གྲོས་བསྡུར། འགྲེམ་སྟོན་སོགས་འདུས།