དབྱི་རག་གིས་དབུས་ཤར་ས་ཁུལ་ནས་ཕྱོགས་ཡོངས་ཀྱི་དམག་འཁྲུག་བརྒྱབ་ན་མཇུག་འབྲས་ཚབས་ཆེན་བཟོ་སྲིད་པའི་ཐ་ཚིག་བསྒྲགས།

དབྱི་རག་སྲིད་གཞུང་གི་མགྲིན་ཚབ་པ་ཨ་ཝ་ཏིས་ཀྱིས་ཚེས14ཉིན་བཤད་རྒྱུར། དབུས་ཤར་ས་ཁུལ་སྔར་བཞིན་ཕྱོགས་ཡོངས་ཀྱི་དམག་འཁྲུལ་རྒྱག་པའི་མཐའ་མཚམས་སུ་གནས་ཡོད་སྟབས། གལ་ཏེ་ཕྱོགས་ཡོངས་ཀྱི་དམག་འཁྲུག་བརྒྱབ་པ་ཡིན་ན་མཇུག་འབྲས་ཚབས་ཆེན་བཟོ་སྲིད་པའི་ཐ་ཚིག་བསྒྲགས།

དབྱི་རག་འཕྲིན་གཏོང་ཁང་གིས་ཨ་ཝ་ཏིས་ཀྱི་སྐད་ཆ་དྲངས་ནས་བཤད་རྒྱུར། དབུས་ཤར་ས་ཁུལ་དེ་ནུབ་ཕྱོགས་བར་དང་ཉོ་ཚོང་ཐད་ཀྱི་འགྲོ་འོང་དང་། དངུལ་གཏོང་འབྲེལ་བ། ནུས་ཁུངས་མཉམ་ལས་བཅས་ཀྱི་འབྲེལ་འདྲིས་དམ་ཟབ་ཡོད་ཅིང་། འཛམ་གླིང་ཧྲིལ་བོ་དང་དམ་ཟབ་ཏུ་འབྲེལ་ཡོད་པས། གལ་ཏེ་ཕྱོགས་ཡོངས་ཀྱི་དམག་འཁྲུག་བརྒྱབ་ན་ནུས་ཁུངས་ཉམས་ཉེན་དང་ཡུལ་གྱུར་བའི་ཉམས་ཉེན་ལ་འཕྲད་སྲིད་ཅིང་། ལྡོག་ཕྱོགས་ཀྱི་ཤུགས་རྐྱེན་དེ་དབུས་ཤར་ས་ཁུལ་དང་ཐ་ན་འཛམ་གླིང་ལ་ཁྱབ་སྲིད་ཟེར།

ཨ་ཝ་ཏིས་ཀྱིས་བསྟན་དོན། དམག་འཁྲུག་གི་ཁྱབ་རྒྱ་མུ་མཐུད་ཆེ་རུ་སོང་ན། འཕེལ་རྒྱས་ལ་རེ་བ་ཅི་ཡང་མེད། དབྱི་རག་གིས་འབྲེལ་ཡོད་ཕྱོགས་སོ་སོས་བཟོད་སྒོམ་སྲུང་འཛིན་བྱས་ནས། ཕ་ལེ་སི་ཐན་གྱི་གནད་དོན་ཐག་གཅོད་པའི་ནུས་ལྡན་བྱེད་ཐབས་ཤིག་འཚོལ་ཞིབ་བྱེད་པའི་འབོད་སྐུལ་བཏང་བ་དང་། ཕ་ལེ་སི་ཐན་གནད་དོན་གྱི་ཐག་གཅོད་ཇུས་གཞི་ནི་སྐབས་བསྟུན་བྱེད་ཐབས་ཤིག་དང་གནས་སྐབས་ཀྱི་བྱེད་ཐབས་ཤིག་མིན་པས། ངེས་པར་དུ་རྩ་བའི་སྟེང་དང་ནུས་ལྡན། དོན་དངོས་བཅས་ཀྱི་སྒོ་ནས་ཕ་ལེ་སི་ཐན་མི་དམངས་ཀྱི་ཁྲིམས་མཐུན་ཁེ་དབང་འགན་སྲུང་བྱེད་དགོས་པ་ནན་བཤད་བྱས།

ཕ་ལེ་སི་ཐན་ཅ་ཧྲ་ས་ཁུལ་གྱི་འཕྲོད་བསྟེན་སྡེ་ཁག་གིས་གཞི་གྲངས་གསར་པ་ཁྱབ་བསྒྲགས་བྱས་པ་ལྟར་ན། ན་ནིང་གི་ཟླ10པར་ཕ་ལེ་སི་ཐན་དང་དབྱི་སི་རལ་བར་གསར་དུ་འགལ་བ་བྱུང་བའི་ཚུན་ལ། དབྱི་སི་རལ་གྱིས་ཅ་ཧྲ་ས་ཁུལ་དུ་དམག་དོན་འགུལ་སྐྱོད་སྤེལ་བ་ལས་ཕ་ལེ་སི་ཐན་གྱི་མི་ཁྲི་བཞི་དང་སྟོང་སུམ་ལྷག་རྐྱེན་ལམ་དུ་ཤོར་བ་དང་། མི་འབུམ་གཅིག་ལྷག་ལ་རྨས་ཕོག་ཡོད།