སི་རི་ཡའི་རྒྱལ་སའི་གྲོང་མིའི་སྡོད་གནས་སུ་དབྱི་སི་རལ་གྱིས་མཁའ་རྒོལ་བྱས་པ་ལས་མི15རྐྱེན་ལམ་དུ་ཤོར་བ་དང་མི16ལ་རྨས་ཕོག

ཚེས14ཉིན།  སི་རི་ཡའི་དམག་ཕྱོགས་ཀྱིས་གསལ་བསྒྲགས་སྤེལ་ནས་བཤད་རྒྱུར། ཉིན་དེར་རྒྱལ་ས་ཏ་མ་སི་ཁུ་ཡི་མའེ་ཙེ་ས་ཁུལ་དང་ཁུའུ་ཏེ་ས་ཡའི་གྲོང་འདབས་ཀྱི་སྡོད་ཁང་ཁ་ཤས་ལ་དབྱི་སི་རལ་གྱིས་མཁའ་རྒོལ་བྱས་པ་ལས་མི15རྐྱེན་ལམ་དུ་ཤོར་བ་དང་མི16ལ་རྨས་ཕོག   དེའི་ནང་བུད་མེད་དང་བྱིས་པ་ཡང་ཡོད་ཟེར།

གསལ་བསྒྲགས་ནང་བཤད་རྒྱུར། ས་དེའི་དུས་ཚོད་ཚེས14ཉིན་གྱི་དུས་ཚོད་15དང་སྐར་མ20ཡོལ་ཙམ་ལ་དབྱི་སི་རལ་གྱིས་བཙན་བཟུང་བྱས་པའི་ཀ་ལན་མཐོ་ས་ནས་ཏ་མ་སི་ཁུའི་མའེ་ཙའེ་ས་ཁུལ་དང་ཁུའུ་ཏེ་ས་ཡའི་གྲོང་འདབས་ཀྱི་སྡོད་ཁང་ཁ་ཤས་ལ་མཁའ་རྒོལ་བྱས་པས་མི་སྣ་ཤི་རྨས་བྱུང་བར་མ་ཟད། ད་དུང་འཇབ་རྒོལ་ཐེབས་པའི་བཟོ་སྐྲུན་དང་མི་སྒེར་གྱི་རྒྱུ་ནོར་ལ་གཏོར་སྐྱོན་ཚབས་ཆེན་ཐེབས་ཡོད་ཅེས་བསྟན།

གཞན་ཡང་སི་རི་ཡའི་རྒྱལ་ཁབ་བརྙན་འཕྲིན་ལས་ཁུངས་ཀྱིས་སྤེལ་བའི་གནས་ཚུལ་ལྟར་ན། མའེ་ཙའེ་ས་ཁུལ་གྱི་ཁང་བརྩེགས་གསུམ་ལ་ཉིན་དེར་དབྱི་སི་རལ་གྱིས་མཁའ་དབྱིངས་འཇབ་རྒོལ་བྱས་ཡོད་པ་དང་།  ཁུའུ་ཏེ་ས་ཡར་ཡོད་པའི་སློབ་གསོའི་ཕྱོགས་བསྡུས་ཐོག་ཁང་ཞིག་ལའང་འཇབ་རྒོལ་ཐེབས་ཟེར།

2011ལོར་སི་རི་ཡའི་ནང་འཁྲུག་ལངས་རྗེས།  དབྱི་སི་རལ་དམག་དཔུང་གིས་དབྱི་ལིང་གི་དམག་དོན་སྒྲིག་ཆས་ལ་རྡུང་རྡེག་གཏོང་བར་ཁ་གཡར་ནས།  སི་རི་ཡའི་མངའ་ཁོངས་སུ་མཁའ་དབྱིངས་འཇབ་རྒོལ་ཐེངས་མང་བྱས་ཡོད། སི་རི་ཡ་དང་དབྱི་ལིང་སྲིད་གཞུང་གིས་དབྱི་ལིང་ལ་སི་རི་ཡར་བཅའ་སྡོད་བྱེད་པའི་དམག་དཔུང་ཡོད་པ་ཁས་མ་བླངས། ན་ནིང་གི་ཟླ10པར་ཕ་ལེ་སི་ཐན་དང་དབྱི་སི་རལ་གྱི་བར་གསར་དུ་གདོང་ཐུག་བྱུང་རྗེས།  དབྱི་སི་རལ་གྱིས་སི་རི་ཡའི་ས་ཁོངས་ཀྱི་དམིགས་འབེན་ལ་འཇབ་རྒོལ་བྱེད་ཚད་སྔར་བས་ཇེ་མང་དུ་སོང་ཡོད།