སི་རི་ལན་ཁས་གྲོས་ཁང་འདེམ་བསྐོའི་བྱེད་སྒོ་སྤེལ།

ཚེས14ཉིན་སི་རི་ལན་ཁས་གྲོས་ཁང་འདེམ་བསྐོའི་འདེམ་ཤོག་འཕེན་པའི་བྱེད་སྒོ་སྤེལ་བ་དང་། གྲོས་མི་ཉིས་བརྒྱ་ཉེར་ལྔ་ཡིས་གྲུབ་པའི་སྐབས་གསར་པའི་གྲོས་ཁང་འདེམ་རྒྱུ་རེད།

ཐེངས་འདིའི་འདེམ་བསྐོ་ལས་འདེམ་དམངས་བྱེ་བ་གཅིག་དང་ས་ཡ་བདུན་ལས་བརྒལ་ཡོད་ཅིང་། སི་རི་ལན་ཁའི་རྒྱལ་ཡོངས་སུ་བསྡོམས་པས་འདེམ་ཤོག་འཕེན་ས་ཁྲི་གཅིག་དང་སྟོང་གསུམ་ལྷག་བཙུགས་ཡོད། ས་གནས་དེའི་དུས་ཚོད་ཚེས14ཉིན་གྱི་དུས་ཚོད་བདུན་གྱི་སྟེང་འདེམ་ཤོག་འཕེན་མགོ་བརྩམས་པ་དང་། ཉིན་དེའི་དུས་ཚོད་བཅུ་དྲུག་སྟེང་མཇུག་བསྒྲིལ་རྒྱུ་རེད།

བསྡོམས་པས་འདེམ་སྒུག་པ་སྟོང་བརྒྱད་ལྷག་ཐེངས་འདིའི་འདེམ་བསྐོའི་ཁྲོད་ཞུགས་ཡོད་ཅིང་། འདེམ་ཞུགས་སྲིད་ཏང་གཙོ་བོར་ཙུང་ཐུང་ཏིས་སཱ་ན་ཡ་ཁི་ཡིས་འགོ་ཁྲིད་པའི་རྒྱལ་ཁབ་མི་དམངས་སྟོབས་ཤུགས་ཏང་དང་། སྐབས་སྔོན་པའི་གྲོས་ཁང་ཁྲོད་གོ་གནས་མང་པོ་ཟིན་པའི་མི་དམངས་འཐབ་ཕྱོགས་ཏང་། གཙོ་རྒོལ་ཏང་རྒྱལ་དམངས་གཅིག་གྱུར་སྟོབས་ཤུགས་ཏང་། ཙུང་ཐུང་ཟུར་པ་ཝེ་ཁི་ལ་མཱ་ཞིན་ཧཱ་ཡིས་རྒྱབ་སྐྱོར་བྱེད་པའི་དམངས་གཙོ་འཐབ་ཕྱོགས་གསར་བ་བཅས་འདུས་ཡོད།

སི་རི་ལན་ཁའི་གྲོས་ཁང་ནི་གྲོས་ཁང་གཅིག་ཅན་ལམ་ལུགས་ཀྱི་གྲོས་ཁང་ཡིན། སྐབས་སྔོན་མའི་གྲོས་ཁང་དེ2020ལོའི་ཟླ8པར་བཙུགས་པ་དང་། ད་ལོའི་ཟླ9ཚེས24ཉིན། ཙུང་ཐུང་ཏིས་ས་ནཱ་ཡ་ཁི་ཡིས་དམིགས་བསལ་ཁྱབ་བསྒྲགས་སྟེང་མིང་བཀོད་དེ་གྲོས་ཁང་གཏོར་བ་དང་། ཟླ11ཚེས14ཉིན་སྐབས་གསར་པའི་གྲོས་ཁང་འདེམ་རྒྱུ་ཡིན་པ་ཁྱབ་བསྒྲགས་བྱས།