ཀ་ཧྲ་བྱང་རྒྱུད་ཀྱི་སློབ་གྲྭ་གཉིས་ལ་འཇབ་རྒོལ་ཕོག་པ།

ཀ་ཧྲ་བྱང་རྒྱུད་ཀྱི་སློབ་གྲྭ་གཉིས་ལ་འཇབ་རྒོལ་ཕོག་པ།

ས་གནས་དེ་གའི་དུས་ཚོད་ཟླ8ཚེས4ཉིན། ཀ་ཧྲ་ས་རྒྱུད་བྱང་ཕྱོགས་ཀྱི་ཀ་ཧྲ་གྲོང་གི་ཡུལ་གྱར་བ་བཀོད་སྒྲིག་བྱས་པའི་སློབ་གྲྭ་གཉིས་ལ་དབྱི་སི་རལ་དམག་གི་འཇབ་རྒོལ་ཕོག་ནས། མི30རྐྱེན་ལམ་དུ་ཤོར་བ་དང་མི་མང་པོ་ཞིག་ལ་རྨས་སྐྱོན་བཟོས་ཡོད། 

དེའི་ཐད་དབྱི་སི་རལ་རྒྱལ་སྲུང་དམག་གིས་ཚེས4ཉིན་གསལ་བསྒྲགས་སྤེལ་ནས། དབྱི་སི་རལ་དམག་དཔུང་དང་དབྱི་སི་རལ་རྒྱལ་ཁབ་བདེ་འཇགས་སྤྱི་ཁྱབ་ཅུས(ཞིན་པེ་ཐེ)ཀྱིས་ཉིན་དེར་གསང་འཕྲིན་གཞིར་བཟུང་། ཕ་ལི་སི་ཐན་དབྱི་སི་ལམ་འགོག་རྒོལ་ལས་འགུལ་ཧ་མ་སིའི་མཛུབ་སྟོན་དང་ཚོད་འཛིན་ལྟེ་གནས་ནང་ཁུལ་དུ་བྱ་འགུལ་སྤེལ་བཞིན་པའི་དྲག་ཆས་མི་སྣར་འཇབ་རྒོལ་བྱས་ཤིང་། ལྟེ་གནས་དེ་དག་ཀ་ཧྲ་གྲོང་གི་སློབ་གྲྭ་གཉིས་ཀྱི་ནང་དུ་གནས་ཡོད་ཅེས་བརྗོད་འདུག 

ཤེས་རྟོགས་བྱུང་བར་གཞིགས་ན། འཇབ་རྒོལ་ཕོག་པའི་སློབ་གྲྭ་དེ་ཀ་ཧྲ་གྲོང་ལྷོ་རྒྱུད་ཀྱི་ནཱ་སའེ་ཨར་སྡེ་ཁུལ་དུ་གནས་ཤིང་། དེ་གར་ཡུལ་གྱར་མང་ཚོགས་འབོར་ཆེན་བསྡུ་ཉར་བྱས་ཡོད་པ་རེད། 

དབྱི་སི་རལ་དམག་གིས་གསལ་བསྒྲགས་སྤེལ་ནས། ཧ་མ་སིས་སློབ་གྲྭ་དེ་དག་ཁོ་ཚོའི་དྲག་ཆས་མི་སྣ་གབ་སྡོད་བྱེད་སར་སྤྱོད་བཞིན་ཡོད་ལ། དེ་གར་དབྱི་སི་རལ་ལ་དམིགས་པའི་འཇབ་རྒོལ་ཇུས་འགོད་དང་ལག་བསྟར་བྱེད་ཀྱི་ཡོད། དབྱི་སི་རལ་གྱིས་གནད་འཁེལ་འཕུར་མདེལ་སྤྱོད་པ་སོགས་ཀྱི་བྱ་ཐབས་མང་པོར་བརྟེན་ནས་མང་ཚོགས་ལ་གནོད་འཚེ་ཕོག་སྲིད་པའི་ཉེན་ཁ་ཆུང་དུ་བཏང་ཡོད་ཅེས་བསྟན་འདུག