ཀྲའོ་ལི་ཅི་གསེར་གྱོམ་རྒྱལ་ཁབ་ཀྱི་གྲོས་ཁང་གླེང་སྟེགས་སྐབས་བཅུ་པར་ཞུགས།

ཀྲའོ་ལི་ཅི་གསེར་གྱོམ་རྒྱལ་ཁབ་ཀྱི་གྲོས་ཁང་གླེང་སྟེགས་སྐབས་བཅུ་པར་ཞུགས།

སྐབས་བཅུ་པའི་གསེར་གྱོམ་རྒྱལ་ཁབ་ཀྱི་གྲོས་ཁང་གླེང་སྟེགས་ཚེས11ཉིན་ནས་ཚེས12ཉིན་བར་ཨུ་རུ་སིའི་ཧྲིན་པི་ཏི་པའོ་རུ་བསྡུས། ཀྲུང་གོའི་རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཀྲའོ་ལི་ཅི་གླེང་སྟེགས་སུ་ཞུགས་པར་མ་ཟད་གསུངས་བཤད་གནང་།

ཚེས11ཉིན། ཀྲའོ་ལི་ཅི་གླེང་སྟེགས་ཀྱི་ཚང་འཛོམས་གྲོས་ཚོགས་སུ་ཞུགས་སྐབས་བསྟན་དོན། སྐབས་འདིའི་གླེང་སྟེགས་ནི་གསེར་གྱོམ་གྱི་ཁོངས་མི་ཇེ་མང་དུ་བཏང་རྗེས་བསྡུས་པའི་གྲོས་ཁང་གླེང་སྟེགས་ཐོག་མ་ཡིན་པ་དང་། དེས“གོ་ལ་ཧྲིལ་པོའི་འཕེལ་རྒྱས་སུ་འགྲོ་བཞིན་པའི་རྒྱལ་ཁབ”ཀྱི་མཐུན་སྒྲིལ་རང་སྟོབས་ཀྱི་དབྱར་མཚོ་རྒྱས་པ་ལྟ་བུའི་འཕེལ་ཕྱོགས་དང་མཉམ་དུ་འཕེལ་རྒྱས་དོན་གཉེར་བྱེད་པའི་བློ་བརྟན་འགྱུར་མེད་ཀྱི་འདོད་བློ་མཚོན་ཡོད་ཅེས་གསུངས།

ཀྲའོ་ལི་ཅི་ཡིས་ནན་གྱིས་བསྟན་དོན། གསེར་གྱོམ་རྒྱལ་ཁབ་ཀྱི་ཁྲིམས་འཛུགས་སྒྲིག་གཞིས་འགན་ནུས་ངེས་གནས་ལ་གཞི་ཚུགས་ཏེ་སྒོ་འབྱེད་བསྐྱེད་ཡངས་དང་མཉམ་ལས་མཉམ་རྒྱལ་གྱི་གསེར་གྱོམ་སྙིང་སྟོབས་དར་སྤེལ་གཏོང་བ་དང་། གསེར་གྱོམ་གྱི་མཐུན་སྒྲིལ་སྲ་བརྟན་དུ་གཏོང་བ། དངོས་སྒྲུབ་མཉམ་ལས་ལ་སྐུལ་འདེད་གཏོང་བ། གསེར་གྱོམ་མཉམ་ལས་རྐྱེན་སྲོལ་གྱི་སྤུས་ཚད་མཐོ་བའི་འཕེལ་རྒྱས་ལ་རོགས་རམ་བཅས་བྱེད་དགོས། ཐོག་མའི་བསམ་འདུན་བརྟན་སྲུང་བྱས་ནས་གསེར་གྱོམ་རྒྱལ་ཁབ་ཀྱི་ཐུན་མོང་ཁེ་ཕན་ལ་སྲུང་སྐྱོང་བྱེད་དགོས། ཁྲིམས་འཛུགས་སྒྲིག་གཞིའི་བརྗེ་རེས་དང་མཉམ་ལས་གཏིང་ཟབ་ཏུ་གཏོད་བ་དང་། ཕན་ཚུན་དོ་ཁུར་བྱེད་པའི་ལྟེ་བའི་གནད་དོན་ཐད་ཕན་ཚུན་རྒྱབ་སྐྱོར་བྱས་ཏེ་གསེར་གྱོམ་མཉམ་ལས་ཀྱི་ཆབ་སྲིད་ཐད་ཀྱི་ཕན་ཚུན་ཡིད་ཆེས་ཟམ་མི་ཆད་པར་སྲ་བརྟན་དུ་གཏོང་དགོས། གནས་བབ་དང་བསྟུན་ནས་མདུན་སྐྱོད་བྱས་ཏེ“གསེར་གྱོམ་ཆེན་པོའི་མཉམ་ལས”བརྟན་པོའི་ངང་ཡུན་རིང་གོང་དུ་སྤེལ་བར་ཞབས་འདེགས་ཞུ་དགོས། ཁྲིམས་འཛུགས་ལས་ཁུངས་ཀྱིས་ཕྱོགས་མང་རིང་ལུགས་རྒྱུན་འཁྱོངས་དང་ཐུན་མོང་འཕེལ་རྒྱས་ལ་སྐུལ་འདེད་གཏོང་བའི་འབོད་སྐད་ཆེན་པོ་བཏང་ནས“འབྲེལ་ཐག་གཅོད་པར”ངོ་རྒོལ་བྱེད་དགོས། བརྗེ་རེས་གཏིང་ཟབ་ཏུ་བཏང་ནས་གསེར་གྱོམ་མཉམ་ལས་ཀྱི་དམངས་འདོད་རྨང་གཞི་སྲ་བརྟན་དུ་གཏོང་དགོས། སྒོ་འབྱེད་བསྐྱེད་ཡངས་བྱས་ནས་ཁྲིམས་འཛུགས་སྒྲིག་གཞིའི“གསེར་གྱོམ”མཉམ་ལས་རྒྱ་ཆེར་གཏོང་དགོས་ཞེས་གསུངས།

ཚེས12ཉིན། ཀྲའོ་ལི་ཅི་གླེང་སྟེགས་ཀྱི་རྒྱ་བསྐྱེད་ཚོགས་འདུར་ཞུགས་སྐབས་བསྟན་དོན། ཀྲུའུ་ཞི་ཞི་ཅིན་ཕིང་གིས་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་། གོ་ལ་ཧྲིལ་པོའི་བདེ་འཇགས་ཀྱི་གྲོས་འགོ། གོ་ལ་ཧྲིལ་པོའི་དཔལ་ཡོན་གྱི་གྲོས་འགོ་བཅས་བཏོན་ནས་མིའི་རིགས་ཀྱི་ལས་སྐལ་གཅིག་མཐུན་ཚོགས་པ་བསྐྲུན་རྒྱུར་སྐུལ་འདེད་བཏང་ཡོད་ལ། གྲོས་འགོ་གལ་ཆེན་དེ་དག་ལ་རྒྱལ་སྤྱིའི་སྤྱི་ཚོགས་ཀྱི་ཡོངས་ཁྱབ་ཀྱི་བསྔགས་བརྗོད་དང་རྒྱབ་སྐྱོར་ཐོབ་ཡོད། ཀྲུང་གོ་ཕྱོགས་ཀྱིས་གསེར་གྱོམ་སྤུན་ཟླ་དང་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་དང་མཉམ་དུ་ཞི་བདེ་མཉམ་གནས་ཀྱི་རྩ་དོན་ལྔ་རྒྱུན་འཛིན་དར་སྤེལ་གཏོང་བ་དང་། མིའི་རིགས་ཀྱི་ལས་སྐལ་གཅིག་མཐུན་ཚོགས་པ་བསྐྲུན་པའི་དུས་རབས་ཀྱི་འགན་འཁྲི་མཉམ་དུ་འཁུར་འདོད་ཡོད་ཅེས་གསུངས།

སྐབས་འདིའི་གླེང་སྟེགས་ཀྱི་བརྗོད་དོན་གཙོ་བོ་ནི“གྲོས་ཚོགས་ཀྱིས་ཕྱོགས་མང་རིང་ལུགས་དང་གོ་ལ་ཧྲིལ་པོའི་དྲང་གཞག་འཕེལ་རྒྱས་དང་བདེ་འཇགས་ལ་སྐུལ་འདེད་གཏོང་བའི་ཐད་ཀྱི་ནུས་པར་ཤུགས་སྣོན་བརྒྱག་དགོས”ཞེས་པ་དེ་རེད། ཨུ་རུ་སིའི་ཙུང་ཐུང་ཕུའུ་ཅིང་ཚེས11ཉིན་གླེང་སྟེགས་ཀྱི་རྒྱ་བསྐྱེད་ཚོགས་འདུར་ཞུགས་པར་མ་ཟད་གཙོ་དོན་གཏམ་བཤད་གནང་།

གླེང་སྟེགས་སྐབས་སུ་ཀྲའོ་ལི་ཅི་ཡིས་ཨེ་ཅིབ་ཀྱི་གྲོས་ཁང་འོག་མའི་གྲོས་དཔོན་ཅཱ་པ་ལི་དང་ཧཱ་སག་སི་ཐན་གྱི་གྲོས་ཁང་གོང་མའི་གྲོས་དཔོན་ཨ་ཞི་མུའུ་པཱ་ཡེ་ཧྥུའུ་ལ་མཇལ་འཕྲད་གནང་།