མི་སྒེར་གྱིས་སྒོ་འགྲམ་དུ་བརྙན་ལེན་འཕྲུལ་ཆས་སྒྲིག་སྦྱོར་བྱེད་ཆོག་གམ།

གཅིག སུ་ཞིག་གིས་བརྙན་ལེན་འཕྲུལ་ཆས་སྒྲིག་སྦྱོར་བྱེད་ཆོག་པ་དང་དོ་དམ་ཇི་ལྟར་བྱེད་དགོས།     

ཉེ་བའི་ལོ་ཤས་རིང་སྤྱི་པའི་བདེ་འཇགས་གྱི་བརྙན་ལམ་པར་རིས་ཆ་འཕྲིན་མ་ལག་གིས་སྤྱི་ཚོགས་བདེ་འཇགས་སྒྲིག་ལམ་སྲུང་སྐྱོང་དང་། ཁྲིམས་འགལ་ཉེས་གསོག་སྔོན་འགོག་དང་བཀག་སྡོམ། སྤྱི་ཚོགས་བཅོས་སྐྱོང་སྐུལ་འདེད་གཏོང་བ་སོགས་ཀྱི་ཐད་ནུས་པ་གལ་ཆེན་འདོན་སྤེལ་བྱས་ཡོད། དེ་དང་ཆབས་ཅིག་བསྐྱར་ཟློས་འཛུགས་སྐྲུན་དང་། ཁྲིམས་འགལ་གྱིས་བརྙན་ལེན་འཕྲུལ་ཆས་གང་བྱུང་དུ་འཛུགས་པ།    དེ་བཞིན་བརྙན་ལམ་པར་རིས་ཆ་འཕྲིན་གང་བྱུང་དུ་བསྡུ་རུབ་དང་། གསང་ཤོར། གང་བྱུང་དུ་སྤྱོད་པ་སོགས་ཀྱི་གནད་དོན་ཐོན་ནས་སྤྱི་པའི་བདེ་འཇགས་དང་། མི་སྒེར་གྱི་གསང་བ། མི་སྒེར་གྱི་ཆ་འཕྲིན་བདེ་འཇགས་ལ་མངོན་མེད་རྐྱེན་ངན་བཟོས་ཡོད།     

ཡང་སྙིང་སུ་ཞིག་གིས་འཛུགས་སྐྲུན་བྱེད་ཐུབ་པ་དང་། སུས་དོ་དམ་བྱེད་པ། ཇི་ལྟར་དོ་དམ་བྱེད་པ་བཅས་ལ་ཀྲུང་གོ་མི་དམངས་སྤྱི་བདེ་སློབ་ཆེན་མྱུལ་ཞིབ་སློབ་གླིང་གི་དགེ་རྒན་ཆེ་མོ་བ་ལིའུ་ཝེ་ཅུན་གྱིས་འདི་ལྟར་ངོ་སྤྲོད་བྱས་ཏེ། སྒྲིག་སྲོལ་གསར་པའི་ནང་འཛུགས་སྐྲུན་བྱེད་པོ་དེ་སྲིད་གཞུང་ཀྱི་འབྲེལ་ཡོད་སྡེ་ཁག་དང་། གཉེར་སྐྱོང་དོ་དམ་ཚན་པ། བདེ་འཇགས་འགོག་ཟོན་ཀྱི་འོས་འགན་ཡོད་པའི་ཚན་པའམ་ཡང་ན་མི་སྒེར་བཅས་གཏན་འཁེལ་བྱས་ཡོད་པ་ལས་འབྲེལ་མེད་ཚན་པ་དང་མི་སྒེར་གྱིས་སྤྱི་པའི་བདེ་འཇགས་བརྙན་ལམ་པར་རིས་ཆ་འཕྲིན་མ་ལག་འཛུགས་སྐྲུན་བྱེད་མི་ཆོག་པ་རེད། དམག་དོན་བཀག་སྡོམ་ཁུལ་དང་། དམག་དོན་དོ་དམ་ཁུལ། རྒྱལ་ཁབ་ལས་ཁུངས་སོགས་གསང་བའི་སྡེ་ཚན་གྱི་མཐའ་འཁོར་དུ་མ་ལག་འཛུགས་སྐྲུན་བྱེད་པར་འབྲེལ་ཡོད་སྡེ་ཚན་གྱི་མོས་མཐུན་ཐོབ་དགོས།

སྲོལ་ཡིག་གི་བླང་བྱ་ལྟར་ན། སྤྱི་པའི་བདེ་འཇགས་བརྙན་ལམ་མ་ལག་དོ་དམ་ཚན་པས་བརྙན་རིས་འཚོལ་བསྡུ་སྒྲིག་ཆས་སྒྲིག་སྦྱོར་བྱེད་གནས་དང་། ཟུར་ཚད། འཚོལ་བསྡུ་ཁྱབ་ཁོངས་བཅས་ལུགས་མཐུན་ངང་གཏན་འཁེལ་བྱེད་དགོས་པ་མ་ཟད། མངོན་གསལ་དོད་པའི་དྲན་སྐུལ་བཀོད་སྒྲིག་བྱེད་དགོས། 

སྤྱི་དམངས་ཀྱིས་ཇི་ལྟར་ཉེ་འགྲམ་གྱི་སྒྲིག་འགལ་བརྙན་ལེན་སྒྲིག་ཆས་ལྟ་སྐུལ་བྱེད་དགོས་སམ། ལིའུ་ཝེ་ཅུན་གྱིས་ངོ་སྤྲོད་བྱས་པར་གཞིགས་ན། སྤྱིར་བཏང་གནས་ཚུལ་འོག་མང་ཚོགས་ཀྱིས་“ཁྱེད་རང་བརྙན་ལམ་ལྟ་སྐུལ་ཚོད་འཛིན་ཁུལ་དུ་སླེབས་ཡོད”ཞེས་པའི་དྲན་སྐུལ་མཐོང་ཐུབ། གལ་ཏེ་མངོན་གསལ་གྱི་རྟགས་མཚན་མེད་ཚེ་མང་ཚོགས་ཀྱིས་སྤྱི་བདེ་ལས་ཁུངས་ཐེར་འདོན་བྱེད་ཆོག་པ་དང་། སྤྱི་བདེ་ལས་ཁུངས་ཀྱིས་ངེས་པར་དུ་ཐག་གཅོད་བྱེད་དགོས།

 གཉིས། ས་ཁོངས་འདི་དག་ལ་བརྙན་ལེན་འཕྲུལ་ཆས་སྒྲིག་སྦྱོར་བྱེད་མི་ཆོག  

 སྲོལ་ཡིག་ནང་གཤམ་གྱི་དམིགས་བསལ་གྱི་ས་ཁོངས་སུ་པར་རིས་འཚོལ་བསྡུ་སྒྲིག་ཆས་དང་འབྲེལ་ཡོད་སྒྲིག་ཆས་སྒྲིག་སྦྱོར་བྱེད་མི་ཆོག་པ་གཏན་འབེབས་བྱས་ཡོད་དེ།  

1.མགྲོན་ཁང་དང་། ཟ་ཁང་། སྣེ་ལེན་ཁང་། ཁྱིམ་ཚང་མགྲོན་ཁང་སོགས་སྣེ་ལེན་ཞག་སྡོད་གནས་ཡུལ་གཉེར་སྐྱོང་བྱེད་པའི་མགྲོན་ཁང་ནང་ངམ་ཟུར་ཁང་ནང་ཁུལ།   

2.སློབ་མའི་ཉལ་ཁང་གི་ཁང་པའི་ནང་དུའམ་ཡང་ན་སྡེ་ཚན་གྱིས་ནང་ཁུལ་གྱི་མི་སྣ་ལ་ཞག་སྡོད་དང་ངལ་གསོའི་ཞབས་ཞུ་མཁོ་འདོན་བྱེད་པའི་ཁང་པའི་ནང་ཁུལ།    

3.སྤྱི་པའི་ཁྲུས་ཁང་དང་། གསང་སྤྱོད་ཁང་། གྱོན་ཆས་བརྗེ་རེའི་ཁང་། ནུ་སྣུན་ཁང་། གྱོན་ཆས་ཚོད་ལྟ་ཁང་བཅས་ཀྱི་ནང་ཁུལ།     

4.པར་རིས་འཚོལ་བསྡུ་སྒྲིག་ཆས་སྒྲིག་སྦྱོར་བྱས་རྗེས་མི་གཞན་གྱི་གསང་དོན་ལ་པར་ལེན་དང་།    ལྐོག་ལྟ། ལྐོག་ཉན་བཅས་བྱེད་ཐུབ་པའི་ས་ཁོངས་གཞན་དག   

 ལྐོག་ཏུ་པར་ལེན་སྒྲིག་ཆས་སྒྲིག་སྦྱོར་བྱས་པའི་མི་སྣ་ལ་ཆད་པ་གཅོད་དགོས་པ་མ་ཟད། མགྲོན་ཁང་གིས་མགྲོན་ཁང་ཁང་བའི་ནང་དུ་པར་ལེན་བརྙན་ལེན་འཕྲུལ་ཆས་ལྐོག་ཏུ་སྒྲིག་སྦྱོར་བྱས་ཡོད་པ་ལ་འགན་འཁུར་དགོས་སམ། སྲོལ་ཡིག་ནང་གསར་དུ་གཏན་འབེབས་བསྣན་ཡོད་དེ། གཉེར་སྐྱོང་དོ་དམ་གྱི་འགན་འཁྲི་ཡོད་པའི་ཚན་པའམ་ཡང་ན་མི་སྒེར་གྱིས་ངེས་པར་དུ་རྒྱུན་གཏན་གྱི་དོ་དམ་དང་ཞིབ་བཤེར་བྱེད་ཤུགས་ཆེ་རུ་གཏོང་བ་དང་། ཁང་བའི་ནང་དུ་པར་རིས་འཚོལ་བསྡུ་སྒྲིག་ཆས་དང་འབྲེལ་ཡོད་སྒྲིག་ཆས་སྒྲིག་སྦྱོར་བྱས་ཚེ་འཕྲལ་མར་སྤྱི་བདེ་ལས་ཁུངས་ལ་སྙན་སེང་ཞུ་ནས་ཐག་གཅོད་བྱེད་དགོས།     

ལིའུ་ཝེ་ཅུན་གྱིས་ངོ་སྤྲོད་བྱས་པར་གཞིགས་ན། གལ་ཏེ་གཉེར་སྐྱོང་དོ་དམ་པ་ཡིས་འོས་འགན་ལག་བསྟར་མ་བྱས་དབང་གིས་མགྲོན་ཁང་གི་ཁང་བའི་ནང་དུ་མི་གཞན་གྱིས་ཁྲིམས་འགལ་ངང་པར་རིས་འཚོལ་བསྡུ་སྒྲིག་ཆས་སྒྲིག་སྦྱོར་བྱས་ཚེ་མགྲོན་ཁང་གིས་དེ་མཚུངས་ཀྱི་བཅའ་ཁྲིམས་འགན་འཁྲི་འགན་ལེན་བྱེད་དགོས།   

 གསུམ། སུ་ཞིག་གིས་བརྙན་ལམ་པར་རིས་ཀྱི་ཆ་འཕྲིན་བཀོལ་སྤྱོད་བྱེད་ཆོག་པ།    

བརྙན་ལམ་ཆ་འཕྲིན་གང་བྱུང་དུ་སྤྱོད་པ་དང་མི་སྒེར་གྱི་གསང་བ་བཙན་གནོད་བྱེད་པར་སྔོན་འགོག་བྱེད་ཆེད་སྲོལ་ཡིག་ནང་སྤྱི་པའི་བདེ་འཇགས་བརྙན་ལམ་མ་ལག་གི་བེད་སྤྱོད་ཚད་གཞི་གཏན་འབེབས་བྱས་ཡོད་དེ།   

1.བརྙན་ལམ་པར་རིས་ཀྱི་ཆ་འཕྲིན་ནི་སྤྱི་པའི་བདེ་འཇགས་སྲུང་སྐྱོང་དང་། ཁྲིམས་འཛིན་གྱོད་སྐྲུལ། གློ་བུར་དུ་བྱུང་བའི་ལས་དོན་ཐག་གཅོད་སོགས་ཁྲིམས་བཀོད་ཀྱི་དམིགས་ཡུལ་ཁོ་ནར་བཀོལ་དགོས།   

2.བརྙན་ལམ་པར་རིས་ཆ་འཕྲིན་གྱི་ཉར་ཚགས་ཡུན་ཚད་ལོན་ཚེ་ཐག་གཅོད་དམིགས་ཡུལ་མངོན་འགྱུར་བྱས་ཟིན་པ་དག་བསུབ་དགོས།     

 སྲོལ་ཡིག་ནང་རྒྱལ་ཁབ་ལས་ཁུངས་དང་མི་སྒེར་གྱིས་བརྙན་ལམ་པར་རིས་ལ་ལྟ་ཀློག་བྱེད་པའི་དབང་ཚད་དང་གོ་རིམ་ཐད་བླང་བྱ་ནན་པོ་བཏོན་ཡོད། སྤྱི་པའི་བདེ་འཇགས་བརྙན་ལམ་མ་ལག་སྒྲིག་སྦྱོར་བྱེད་པའི་དམིགས་ཡུལ་དང་། སྒྲིག་སྦྱོར་གནས་ཡུལ། ཆ་འཕྲིན་འཚོལ་བསྡུ། གསོག་འཇོག ལྟ་ཞིབ། བེད་སྤྱོད་བཅས་ཀྱི་ལྷུ་ཚིགས་ཚང་མར་གཏན་འབེབས་ནན་མོ་བཟོས་ནས་མི་སྒེར་གྱི་གསང་བ་དང་ཆ་འཕྲིན་ཁེ་དབང་ལ་སྲོང་སྐྱོབ་ཀྱི་འབྲེལ་ཐག་ཆ་ཚང་ཞིག་ཆགས་ཡོད།      

བཞི། མི་སྒེར་གྱིས་སྒོ་འགྲམ་དུ་བརྙན་ལེན་འཕྲུལ་ཆས་སྒྲིག་སྦྱོར་བྱེད་ཆོག་གམ།     

 སྲོལ་ཡིག་ནང་མི་མང་འདུ་འཛོམ་བྱ་ཡུལ་མིན་པར་པར་རིས་འཚོལ་བསྡུ་སྒྲིག་ཆས་སྒྲིག་སྦྱོར་བྱས་ཚེ་སྤྱི་པའི་བདེ་འཇགས་ལ་གནོད་འཚེ་མི་བྱེད་པ་དང་། མི་གཞན་གྱི་ཁྲིམས་མཐུན་ཁེ་དབང་ལ་བཙན་གནོད་བྱེད་མི་ཆོག ཁྲིམས་འགལ་ངང་ཕྱི་ཕྱོགས་སུ་སྤྱི་པའི་བདེ་འཇགས་དང་། མི་སྒེར་གྱི་གསང་བ། མི་སྒེར་གྱི་ཆ་འཕྲིན་བཅས་དང་འབྲེལ་ཡོད་ཀྱི་བརྙན་ལམ་པར་རིས་ཆ་འཕྲིན་མཁོ་འདོན་བྱེད་པའམ་ཡང་ན་ཡོངས་བསྒྲགས་ངང་ཁྱབ་སྤེལ་བྱེད་མི་ཆོག མི་སྒེར་གྱིས་སྒོ་འགྲམ་དུ་བརྙན་ལེན་འཕྲུལ་ཆས་སྒྲིག་སྦྱོར་བྱེད་སྐབས། གཤམ་གྱི་དོན་ཚན་དག་ལ་དོ་སྣང་བྱེད་དགོས།    

སྒྲིག་སྦྱོར་སྔོན་ལ་ལེགས་ཤོས་ཡིན་ན་ཁྱིམ་མཚེས་ཀྱི་མོས་མཐུན་ཐོབ་པའམ་ཡང་ན་ཁྱིམ་མཚེས་ལ་སེམས་བཟང་དྲན་སྐུལ་བྱེད་དགོས།    

སྒྲིག་སྦྱོར་བྱེད་སྐབས། སྒྲིག་སྦྱོར་བྱེད་གནས་ཞིབ་ཚགས་ངང་འདེམས་དགོས་པ་མ་ཟད་ཟུར་ཚད་ལེགས་སྒྲིག་བྱས་ཏེ། པར་ལེན་གྱི་ཁྱབ་ཁོངས་ནི་སྒོ་འགྲམ་གྱི་དགོས་ངེས་ཀྱི་ས་ཁོངས་ཁོ་ན་ཡིན་དགོས།    གཞན་ཡང་རང་འགུལ་རྗེས་འདེད་དང་སྒྲ་ཕབ་སོགས་བྱེད་ནུས་སྒོ་རྒྱག་གང་ཐུབ་བྱེད་དགོས།     

སྒྲིག་སྦྱོར་བྱས་རྗེས་ངེས་པར་དུ་གསང་སྲུང་ནན་པོ་བྱེད་དགོས། ཆ་འཕྲིན་ཕྱིར་ཤོར་སྔོན་འགོག་ལས་ཁྲིམས་འགལ་གྱིས་ཕྱི་ཕྱོགས་ལ་འདོན་སྤྲོད་དང་ཡོངས་བསྒྲགས་ངང་ཁྱབ་སྤེལ་བྱེད་མི་ཆོག 

 གལ་ཏེ་བརྙན་ལེན་འཕྲུལ་ཆས་ཀྱིས་ཁྱིམ་མཚེས་ཀྱི་ངོ་གདོང་དང་དེ་བཞིན་ཁྱིམ་མཚེས་ཀྱི་སྒོ་འགྲམ་གྱི་མི་སྣ་འགྲོ་འོང་གནས་ཚུལ་ཐད་ཀར་པར་ལེན་ཐུབ་ཚེ། “རང་ངོས་ཀྱི་མི་ལུས་བདེ་འཇགས་སྲུང་སྐྱོང་དང་རྒྱུ་ནོར་སྲུང་སྐྱོང”གི་བཅའ་ཁྲིམས་གཏན་འབེབས་ཀྱི་དགོས་ངེས་ཚད་གཞི་ལས་བརྒལ་སོང་བས་ཁྱིམ་མཚེས་ཀྱི་གསང་དོན་ལ་བཙན་གནོད་བྱེད་པའི་དོགས་པ་ཡོད་པ་རེད།