ཁྲིམས་ལ་བརྟེན་ནས་རང་ཞིང་གི་འཕང་འབྲས་ཐོན་ལས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་།

ཟླ11པའི་ཚེས27ཉིན། མཚོ་སྔོན་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཚོགས་སྐབས་བཅུ་བཞི་པའི་གྲོས་ཚོགས་ཐེངས་བཅུ་གཅིག་པས་མཚོ་སྔོན་ཞིང་ཆེན་གྱི་འཕང་འབྲས་ཐོན་ལས་འཕེལ་རྒྱས་འགྲོ་བར་སྐུལ་འདེད་གཏོང་བའི་སྲོལ་ཡིག་ལ་བརྡས་ཐག་བཅད་ནས་གྲོས་འཆམ་བྱུང་བ་དང་། སྲོལ་ཡིག་དེ2025ལོའི་ཟླ2པའི་ཚེས1ཉིན་ནས་བཟུང་ལག་བསྟར་བྱ་རྒྱུ་རེད།

རྒྱུས་ལོན་བྱུང་བ་ལྟར་ན། ལོ་ངོ་མང་པོའི་འཕེལ་རྒྱས་བརྒྱུད། རང་ཞིང་དེ་རྒྱལ་ནང་གི་གཞི་ཁྱོན་ཆེས་ཆེ་བའི་འཕང་འབྲས་གཅིག་སྡུད་འདེབས་འཛུགས་ཁུལ་དང་སྐྱེ་ལྡན་འཕང་འབྲས་ཐོན་སྐྱེད་རྟེན་གཞིར་གྱུར་ཡོད། འཕང་འབྲས་ཐོན་ལས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྔར་ལས་སྐུལ་འདེད་གཏོང་བ་དང་། ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་ཁུལ་འཛུགས་སྐྲུན་བྱེད་པར་རོགས་ཤུགས་འདོན་པ། ཕྱོགས་ཡོངས་ནས་རང་ཞིང་གི་འཕང་འབྲས་ཐོན་ལས་འཕེལ་རྒྱས་ཀྱི་ཁེ་ཕན་དང་ཁྲོམ་རའི་འགྲན་རྩོད་ནུས་པ་ཇེ་ཆེར་གཏོང་ཆེད། མཚོ་སྔོན་ཞིང་ཆེན་གྱི་འཕང་འབྲས་ཐོན་ལས་འཕེལ་རྒྱས་འགྲོ་བར་སྐུལ་འདེད་གཏོང་བའི་སྲོལ་ཡིག་འདོན་པའི་དགོས་གལ་ཆེ། ད་ལྟའི་དུས་རིམ་གྱི་ཚོང་རྟགས་ཀྱི་མི་ལེགས་ས་དང་། ལས་སྣོན་འཕེལ་རྒྱས་ནུས་པའི་མི་འདང་ས། ཐོན་ལས་ཕྲེང་འབྲེལ་གྱི་འབྲེལ་ཐག་ཅུང་ཐུང་བ་སོགས་ཀྱི་གནད་དོན་ལེགས་སྒྱུར་བྱས་ཏེ། ཁྲིམས་ལ་བརྟེན་ནས་རང་ཞིང་གི་འཕང་འབྲས་ཐོན་ལས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས།

སྲོལ་ཡིག་ལ་བསྡོམས་པས་ལེའུ་དྲུག་དང་དོན་ཚན་ཞེ་གཉིས་ཡོད་ལ། གཙོ་བོ་སྤྱིའི་རྩ་དོན་དང་། ཐོན་ཁུལ་སྲུང་སྐྱོབ་དང་འདེབས་འཛུགས་ལས་སྣོན། སྤུས་ཚད་བདེ་འཇགས་འགན་སྲུང་། ཚོང་རྟགས་འཛུགས་སྐྲུན་དང་སྲུང་སྐྱོབ། རྒྱབ་སྐྱོར་དང་ལྟ་སྐུལ། ཞར་བྱུང་དོན་ཚན་བཅས་འདུ།

སྲོལ་ཡིག་ལས་འཕང་འབྲས་ཐོན་ལས་དང་འབྲེལ་བའི་རིམ་པ་སོ་སོའི་མི་དམངས་སྲིད་གཞུང་དང་འབྲེལ་ཡོད་སྡེ་ཁག་ལ་འཕང་འབྲས་གཞི་ཁྱོན་ཅན་གྱི་འདེབས་འཛུགས་དང་འཕང་འབྲས་འབྲས་བཟང་འདེབས་འཛུགས་དང་སྐྱེ་ལྡན་འདེབས་འཛུགས་བྱེད་སྟངས་ཁྱབ་གདལ་གཏོང་བ། ལས་སྣོན་ཞིབ་མོ་བྱེད་པ་སོགས་ཀྱི་ཕྱོགས་ལ་རྒྱབ་སྐྱོར་དང་ཁྲིད་སྟོན་བྱེད་པའི་འགན་འཁྲི་ཡོད། སྤུས་ཚད་ཀྱི་ཚད་གཞིའི་མ་ལག་ཐད་ནས། སྲོལ་ཡིག་ལས་སྤུས་ཚད་བདེ་འཇགས་འགན་སྲུང་གི་ཆེད་དམིགས་ལེའུ་གཅིག་བཀོད་སྒྲིག་བྱས་ཏེ། འབྲེལ་ཡོད་སྡེ་ཁག་གི་ལས་འགན་ཁ་གསལ་བཟོས་ཤིང་། ཚད་ལྡན་ཅན་གྱི་ཐོན་ལས་དང་ལྗང་མདོག་སྔོན་འགོག འཁྱགས་ཟས་ཕྲེང་འབྲེལ་གྱི་དངོས་རྒྱུག སྤུས་ཚད་བདེ་འཇགས་ཀྱི་ཁུངས་འདེད་མ་ལག་སོགས་ཀྱི་ཐད་ནས་གཏན་འབེབས་གསལ་བོ་བྱས། དེ་དང་མཉམ་དུ། སྲོལ་ཡིག་ལས་ལས་སྣོན་ལག་རྩལ་གསར་གཏོད་དང་ཚན་རྩལ་འདེགས་སྐྱོར། ལས་སྣོན་ཐོན་རྫས་ཞིབ་བཟོ་བཅས་ལ་རྒྱབ་སྐྱོར་བྱ་རྒྱུ་གཏན་འཁེལ་གསལ་བོ་བྱས་ཤིང་། ཚོང་རྟགས་འཛུགས་སྐྲུན་དང་སྲུང་སྐྱོབ་ཀྱི་ལེའུ་གཅིག་ཆེད་དུ་བཀོད་སྒྲིག་བྱས་ནས། འཕང་འབྲས་ཐོན་སྐྱེད་ཚོང་གཉེར་བས་སྐྱེ་ལྡན་རྟེན་གཞི་ངོས་འཛིན་དང་སྐྱེ་ལྡན་ཐོན་རྫས་བདེན་དཔང་བྱེད་པར་སྐུལ་མ་དང་རྒྱབ་སྐྱོར་བྱས།