ཁྲིམས་འགལ་ངང་གོང་མོ་སོཊ་ཉོ་ཚོང་བྱས་པས་ཁྲིམས་ཆད་ཕོག

མཚོ་སྔོན་གྱི་སྐྱེས་པ་ཞིག་གིས་སྒེར་ཕན་དོན་དུ་གོང་མོ་དང་སྤྱང་ཀིའི་ལྕེ། སྐྱ་ཀ ཤིང་རྟ་མོ་སོགས་བྱེས་སྐྱེས་སྲོག་ཆགས་དང་དེ་བཞིན་བཟོས་རྫས་ཁྲིམས་འགལ་ངང་ཉོ་ཚོང་བྱས་ཡོད། ཟླ11པའི་ཚེས7ཉིན། གསར་འགོད་པས་ཀྲུང་གོ་ཁྲིམས་གཅོད་ཡིག་རིགས་དྲ་བ་ནས་ཤེས་རྟོགས་བྱས་པར། ཉེ་ཆར་མཚོ་སྔོན་ཞིང་ཆེན་མཚོ་ཤར་གྲོང་ཁྱེར་གྲོ་ཚང་ཆུས་མི་དམངས་ཁྲིམས་ཁང་གིས་རྩ་ཆེ་ལ་སྟོངས་ཉེར་ཡོད་པའི་བྱེས་སྐྱེས་སྲོག་ཆགས་ལ་གནོད་འཚེ་བཏང་བའི་གྱོད་གཞི་ཞིག་ལ་འདྲི་གཅོད་དང་པོའི་བཅད་ཁྲ་ཁྱབ་བསྒྲགས་བྱས་པ་སྟེ། མ་ཆེ་གེ་མོས་རྒྱལ་ཁབ་ཀྱི་རིམ་པ་དང་པོ་དང་རིམ་པ་གཉིས་པ་ཡིན་ཞིང་འབྱུང་ཁམས་དང་ཚན་རིག སྤྱི་ཚོགས་བཅས་ཀྱི་རིན་ཐང་ཆེན་པོ་ལྡན་པའི་སྐམ་འཚོའི་བྱེས་སྐྱེས་སྲོག་ཆགས་དང་དེ་ཚོའི་བཟོས་རྫས་ཁྲིམས་འགལ་ངང་ཉོ་སྒྲུབ་བྱས་པར་བརྟེན། དུས་བཀག་བཙོན་འཇུག་ལོ་གཉིས་དང་ཁྲིམས་ཆད་ཕྱིར་འགྱངས་ལོ་གསུམ་བྱས་པ་དང་འབྲེལ་དངུལ་ཆད་སྒོར་ཁྲི་2བཅད་པ་རེད།

མ་ཆེ་གེ་མོ་ནི1955ལོའི་ཟླ10པའི་ཚེས1ཉིན་སྐྱེས་ཤིང་། མཚོ་སྔོན་ཡ་རྫི་རྫོང་གི་སྒེར་གཉེར་དུད་ཚང་ཞིག་ཡིན། རྩ་ཆེ་ལ་སྟོངས་ཉེར་ཡོད་པའི་བྱེས་སྐྱེས་སྲོག་ཆགས་ལ་གནོད་འཚེ་བཏང་བའི་ཉེས་པ་དང་འབྲེལ་བ་ཡོད་པའི་རྐྱེན་གྱིས2023ལོའི་ཟླ10པའི་ཚེས13ཉིན་ཡ་རྫི་རྫོང་སྤྱི་བདེ་ཅུས་ཀྱིས་ཁོ་པ་ཉེས་དོན་བཀག་ཉར་བྱས་པ་དང་། དེ་རྗེས་ཁག་ཐེག་པ་བཙལ་ནས་ཞུ་བ་ལེན་རྒྱུ་བསྒུགས་བསྡད་ཡོད། 

གཞུང་གཏུག་ལས་ཁུངས་ཀྱིས། མ་ཆེ་གེ་མོས་པགས་ནད་བཅོས་པའི་གསང་བའི་སྨན་དང་ལུས་ཁམས་གསོ་ཚིས་འཚོང་སྐབས། སྐད་འཕྲིན་ནས་འབྲེལ་བ་བྱེད་པ་སོགས་ཀྱི་བྱ་ཐབས་བརྒྱུད། ཡ་རྫིའི་ས་ཁོངས་དང་དེ་བཞིན་ཡ་རྫི་རྫོང་དང་ས་མཚམས་འབྲེལ་བའི་ཀན་སུའུ་ཞིང་ཆེན་ཀ་ཇུ་གྲོང་ཁྱེར་གྱི་མི་གཞན་གྱི་ས་ནས་ཁྲིམས་འགལ་ངང་གོང་མོ་དང་སྤྱང་ཀིའི་ལྕེ། སྐྱ་ཀ ཤིང་རྟ་མོ་སོགས་བྱེས་སྐྱེས་སྲོག་ཆགས་དང་དེ་བཞིན་བཟོས་རྫས་ཉོ་སྒྲུབ་བྱས་རྗེས་རང་ཁྱིམ་གྱི་འཁྱགས་སྒམ་ནང་ཉར་ནས་དགོས་མཁོ་ཡོད་མཁན་ལ་འཚོང་རྩིས་ཡོད་པ་དང་། དེའི་ཁྲོད་ནས་ཁེ་བཟང་རག་ཐབས་བྱས་ཡོད་ཅེས་ཞུ་གཏུག་བརྒྱབ་ཡོད།

གཞུང་གཏུག་ལས་ཁུངས་ཀྱིས། མ་ཆེ་གེ་མོས་པགས་ནད་བཅོས་པའི་གསང་བའི་སྨན་དང་ལུས་ཁམས་གསོ་ཚིས་བཙོང་བའི་བརྒྱུད་རིམ་ཁྲོད་རྒྱལ་ཁབ་ཀྱིས་གཙོ་གནད་ཐོག་སྲུང་སྐྱོབ་བྱེད་པའི་རྩ་ཆེ་ཞིང་སྟོངས་ཉེར་ཡོད་པའི་སྲོག་ཆགས་ཀྱི་ཐོན་རྫས་ཁྲིམས་འགལ་ངང་ཉོ་སྒྲུབ་བྱས་པ་དང་། གྱོད་འབྲེལ་སྲོག་ཆགས་ཀྱི་རོ་དང་དེ་ཚོའི་བཟོས་རྫས་ནི་རྒྱལ་ཁབ་ཀྱི་རིམ་པ་དང་པོ་དང་གཉིས་པའི་སྲོག་ཆགས་ཡིན་པ་དང་རིན་ཐང་སྒོར119900ཡིན། ཁོ་པའི་བྱ་སྤྱོད་ནི་ཉེས་ཁྲིམས་ཀྱི་གཏན་འབེབས་དང་འགལ་ཡོད་པས། རྩ་ཆེ་ལ་སྟོངས་ཉེར་ཡོད་པའི་སྲོག་ཆགས་ལ་གནོད་འཚེ་བཏང་བའི་ནག་ཉེས་ཐོག་ནས་ཉེས་དོན་འགན་འཁྲི་བདའ་འདེད་གཏོང་དགོས། མ་ཆེ་གེ་མོས་རང་ཉེས་དྲང་ཞུ་བྱས་པ་དང་རང་འགུལ་ངང་ཉེས་པ་ངོས་ལེན་བྱས་པས། དུས་བཀག་བཙོན་འཇུག་ལོ་གཉིས་དང་འབྲེལ་དངུལ་ཆད་སྒོར་ཁྲི་2གཅོད་རྒྱུའི་གྲོས་འགོ་བཏོན་པ་དང་ཉེས་ཆད་ཕྱིར་འགྱངས་བྱེད་ཆོག་པའི་ངོས་འཛིན་བྱས་ཡོད།

མ་ཆེ་གེ་མོས་རང་ཉེས་དྲང་ཞུ་བྱས་པ་དང་རང་འགུལ་ངང་ཉེས་པ་ངོས་ལེན་བྱས་པར་གཞིགས་ནས། ཁྲིམས་ཁང་གིས་མ་ཆེ་གེ་མོས་རྩ་ཆེ་ལ་སྟོངས་ཉེར་ཡོད་པའི་བྱེས་སྐྱེས་སྲོག་ཆགས་ལ་གནོད་འཚེ་བཏང་བའི་ཉེས་པ་བསགས་པར་དུས་བཀག་བཙོན་འཇུག་ལོ་གཉིས་དང་ཁྲིམས་ཆད་ཕྱིར་འགྱངས་ལོ་གསུམ་བྱ་རྒྱུའི་ཁྲིམས་ཐག་བཅད་པ་དང་འབྲེལ་དངུལ་ཆད་སྒོར་ཁྲི2གཏོང་རྒྱུའི་ཁྲིམས་ཐག་བཅད་པ་རེད།