ཞིང་ཆེན་འཕེལ་རྒྱས་བཅོས་སྒྱུར་ཨུ་ཡོན་ལྷན་ཁང་གིས་དམངས་གཉེར་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་འགག་སྒྲོལ་འགུལ་སྐྱོད་ལག་བསྟར་བྱེད་མགོ་བརྩམས།

ཟླ4པའི་ཚེས2ཉིན། མཚོ་སྔོན་ཞིང་ཆེན་འཕེལ་རྒྱས་དང་བཅོས་སྒྱུར་ཨུ་ཡོན་ལྷན་ཁང་གིས་གནས་ཚུལ་བསྒྲགས་པ་ལྟར་ན། དམངས་གཉེར་དཔལ་འབྱོར་འཕེལ་རྒྱས་ལ་འཕྲད་པའི་དཀའ་ཁག་དང་འགྲན་རྩོད་ལ་དམིགས་ནས། ཞིང་ཆེན་འཕེལ་རྒྱས་བཅོས་སྒྱུར་ཨུ་ཡོན་ལྷན་ཁང་གིས་མཚོ་སྔོན་ཞིང་ཆེན་གྱི་དམངས་གཉེར་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་འགག་སྒྲོལ་འགུལ་སྐྱོད་ཀྱི་ཇུས་གཞི་པར་འགྲེམས་བྱས་པ་དང་། དམངས་གཉེར་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་འགག་སྒྲོལ་འགུལ་སྐྱོད་ལག་བསྟར་བྱེད་མགོ་བརྩམས།

འགག་སྒྲོལ་འགུལ་སྐྱོད་སྤེལ་སྐབས་གསལ་བོར་བསྟན་དོན། ཞིང་ཆེན་ཡོངས་ཀྱི་གོང་འོག་ཚང་མས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་བྱས་ནས་གོ་བ་གཏིང་ཟབ་ལེན་པ་དང་། བསམ་བློ་དང་བྱ་སྤྱོད་གཉིས་ཏང་ཀྲུང་དབྱང་གི་ཇུས་ཆོད་བཀོད་སྒྲིག་སྟེང་གཅིག་གྱུར་བྱེད་པ། ཡིད་ཆེས་ཇེ་བརྟན་དང་དངོས་སྒྲུབ་སྔོན་བརྩོན་བྱེད་པ། ཁྱོན་ཡོངས་ཀྱི་འདུ་ཤེས་དང་མ་ལག་གི་ལྟ་ཚུལ། ཁྲིམས་སྐྱོང་དགོངས་པ་བཅས་ཇེ་དྲག་ཏུ་གཏོང་བ། ཁྲིམས་ལྟར་འདྲ་མཉམ་གྱིས་ཐོན་སྐྱེད་རྒྱུ་རྐྱེན་བེད་སྤྱོད་བྱེད་པ་དང་འདྲ་མཉམ་གྱིས་ཁྲིམས་རའི་འགྲན་རྩོད་ལ་ཞུགས་པའི་བཀག་རྒྱ་སྣ་ཚོགས་མཐའ་གཅིག་ཏུ་སེལ་བ། དམངས་གཉེར་ཁེ་ལས་ཀྱི་མ་དངུལ་ཆད་འགྱངས་གནད་དོན་ཐག་གཅོད་པར་སྐུལ་འདེད་གཏོང་བ། ཁྲིམས་ལྟར་དམངས་གཉེར་ཁེ་ལས་དང་དམངས་གཉེར་ཁེ་ལས་པའི་ཁྲིམས་མཐུན་ཁེ་དབང་ལ་སྲུང་སྐྱོབ་བྱེད་པ་དང་། སྲིད་ཇུས་ཀྱི་བྱེད་ཐབས་སྣ་ཚོགས་དངོས་འབེབས་ནན་མོ་བྱེད་ལ། སྲིད་ཚོང་གི་འབྲེལ་བ་ཟབ་མོ་བཙུགས་ཏེ། སེམས་ཤུགས་ཡོད་ཚད་བཀོལ་ནས་དམངས་གཉེར་དཔལ་འབྱོར་གྱི་བདེ་ཐང་འཕེལ་རྒྱས་དང་སྤུས་ཚད་མཐོ་བའི་འཕེལ་རྒྱས་ལ་ཞབས་འདེགས་ཞུ་དགོས།

འགག་སྒྲོལ་འགུལ་སྐྱོད་ཀྱིས་གཙོ་བོ་སྲིད་ཇུས་དང་ཐོན་ལས། ཚན་རྩལ། ཞབས་ཞུ་བཅས་ཀྱིས་སྟོབས་ནུས་སྩོལ་བར་དམིགས་ནས། བྱ་བ་གཙོ་བོར་གཅིག་འདོམས་སྐུལ་འདེད་བཏང་བ་སྟེ། རྒྱུན་རྣམ་ཅན་གྱི་འབྲེལ་འདྲིས་བརྗེ་རེས་རྐྱེན་སྲོལ་དང་མགོ་ཁྲིད་ལས་བྱེད་པས་ཁེ་ལས་དང་འབྲེལ་བ་བྱེད་པའི་རྐྱེན་སྲོལ། རྒྱུན་རྣམ་ཅན་གྱི་ཁེ་ལས་ལ་རོགས་སྐྱོར་དྲོད་འཁོལ་སྐྱེལ་བའི་བྱ་བའི་རྐྱེན་སྲོལ། སྲིད་གཞུང་དང་སྤྱི་ཚོགས་ཀྱི་མ་རྩ་མཉམ་ལས་རྐྱེན་སྲོལ་གསར་བ་བཅས་རྐྱེན་སྲོལ་བཞི་འཐུས་ཚང་དུ་བཏང་ཞིང་། ཚོང་གཉེར་ཁོར་ཡུག་ལེགས་བཅོས་འགུལ་སྐྱོད་དང་ཁེ་ལས་གསོ་སྤེལ་འགུལ་སྐྱོད། སྒོ་བྱང་འགེལ་བའི་མཐོ་སྒང་འགུལ་སྐྱོད་དང་། ཁེ་ལས་ལ་ཕན་པའི་སྲིད་ཇུས་ཀྱི་འགུལ་སྐྱོད། ཁེ་ལས་ལ་རོགས་སྐྱོར་བྱེད་པའི་ཐོན་ཁུངས་སྦྲེལ་མཐུད་འགུལ་སྐྱོད། ཁེ་ལས་ཀྱི་ནུས་པ་ཇེ་ཆེར་འགྲོ་བར་སྐུལ་འདེད་གཏོང་བའི་འགུལ་སྐྱོད། ཁེ་ལས་འབྲེལ་བའི་ཁྲིམས་བསྟར་ཚད་ལྡན་འགུལ་སྐྱོད། མ་དངུལ་ཆད་འགྱངས་མེད་པར་གཏོང་བའི་འགུལ་སྐྱོད་བཅས་འགུལ་སྐྱོད་བརྒྱད་སྤེལ་བ་དང་། ཐོན་ལས་མཐུན་སྦྱོར་འཕེལ་རྒྱས་ལས་གཞི་དང་འཇོན་མི་སྐྱེད་སྲིང་ལས་གཞི། དམངས་གཉེར་ཁེ་ལས་པ་གསོ་སྐྱོང་ལས་གཞི་བཅས་ལས་གཞི་གསུམ་ལག་བསྟར་བྱས།

ངོ་སྤྲོད་བྱས་པ་ལྟར་ན། ཞིང་ཆེན་འཕེལ་རྒྱས་བཅོས་སྒྱུར་ཨུ་ཡོན་ལྷན་ཁང་གིས་ཇུས་གཞི་དོན་འཁྱོལ་དམ་འཛིན་ནན་མོ་བྱེད་པ་དང་། བྱ་བའི་འགན་འཁྲི་སྣ་ཚོགས་དངོས་འབེབས་བྱེད་ཅིང་། དམངས་གཉེར་དཔལ་འབྱོར་འཕེལ་རྒྱས་ཀྱི་བྱ་བ་གཅིག་འདོམས་མཐུན་སྦྱོར་དང་ཕྱོགས་བསྡུས་སྐུལ་འདེད་བཏང་སྟེ། དམངས་གཉེར་དཔལ་འབྱོར་གྱི་དངོས་ཡོད་དཀའ་ཁག་ནུས་ལྡན་སྒོས་ཐག་གཅོད་བྱེད་པ་དང་། དམངས་གཉེར་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ཀྱི་རྣམ་པ་གསར་བ་འབད་པས་བཏོད་རྒྱུ་རེད།