གཞིས་ཀ་རྩེ་གྲོང་ཁྱེར་ས་སྐྱ་རྫོང་གི་གནོད་ཐེབས་ཁུལ་གྱི་མཐོང་ཐོས།

འདི་ནི་ཟླ1པོའི་ཚེས11ཉིན་པར་བླངས་པའི་ས་སྐྱ་རྫོང་རྨ་བྱ་ཤང་པུ་གྲོང་ཚོའི་བཀོད་སྒྲིག་བྱ་ཡུལ་གྱི་རྣམ་པ་རེད།

ཀྲུང་གོ་བོད་ཀྱི་དྲ་བའི་འཕྲིན། ས་སྐྱ་རྫོང་ཡང་ཐེངས་འདིའི་ས་ཡོམ་གྱི་གནོད་འཚེ་ཕོག་པའི་ས་ཁུལ་གྱི་གྲས་ཤིག་ཡིན། ཟླ1པོའི་ཚེས11ཉིན་གསར་འགོད་པ་ས་སྐྱ་རྫོང་རྨ་བྱ་ཤང་ལྷ་གདོང་གྲོང་ཚོར་སླེབས་པའི་ཚེ་མང་ཚོགས་ཚང་མ་རས་གུར་དུ་བསྡད་ཡོད་པ་དང་འཚོ་བའི་དངོས་ཟོག་འགན་ལེན་འདང་ངེས་ཡོད་པ་མཐོང་བྱུང་།   

ལྷ་གདོང་གྲོང་ཚོར་དུད་ཚང155དང་མི763ཡོད་པ་དང་ཐེངས་འདིའི་ས་ཡོམ་གྱི་ཤུགས་རྐྱེན་ཐེབས་པའི་དབང་གིས་ཁང་པ146གྱི་གྱང་རྡིབ་པ་དང་གས་སྲུབས་བྱུང་བ་སོགས་ཚད་མི་འདྲ་བའི་གནོད་སྐྱོན་བྱུང་ཡོད་པ་དང་། དེའི་ནང་དུད་ཚང5ཡི་ཁང་བར་གཏོར་སྐྱོན་བྱུང་བ་ཅུང་ཚབས་ཆེ་མོད་ཀྱང་གྲོང་ཚོའི་ནང་རྨས་སྐྱོན་ཕོག་མཁན་གཅིག་ཀྱང་མེད། གྲོང་ཚོའི་ཆུ་གློག་དང་གཞུང་ལམ་སོགས་ཐོག་མཐའ་བར་གསུམ་དུ་ཤར་བགྲོད་ཐུབ་པས་མང་ཚོགས་ཀྱི་འཚོ་བར་ཤུགས་རྐྱེན་ཆེན་པོ་ཐེབས་མེད། ལས་དོན་མི་སྣས་ཁང་པའི་གཞི་རྩའི་ཆ་འཕྲིན་ཐོ་འགོད་དང་། ཁང་པའི་རྒྱ་ཁྱོན་ཚད་འཇལ།  ཁང་པའི་གཏོར་སྐྱོན་ཐེབས་སར་ལྟ་ཞིབ་བྱེད་པ་དང་འབྲེལ་པར་ལེན་ཉར་ཚགས་བྱས་རྗེས།  《ཞིང་སྡེའི་སྡོད་ཁང་གི་བདེ་འཇགས་རང་བཞིན་གསལ་འབྱེད་ལག་རྩལ་མཛུབ་ཁྲིད》ཀྱི་འབྲེལ་ཡོད་ཚད་གཞི་ལྟར། “ཞིང་སྡེའི་སྡོད་ཁང་གི་བདེ་འཇགས་རང་བཞིན་ཞིབ་བཤེར་སྙན་ཞུའི”ནངABCDཡི་ཉེན་ཁའི་རིམ་པ་བཞི་ལ་དཔྱད་དཔོག་བྱས་ནས་དེ་མཚུངས་ཀྱི་གྲོས་འགོ་བཏོན་ཡོད།

ཉིང་ཁྲི་གྲོང་ཁྱེར་སྡོད་ཁང་གྲོང་གསེབ་འཛུགས་སྐྲུན་ཅུའུ་ཡི་ཏང་ཙུའུ་ཧྲུའུ་ཅི་ཐན་མིང་ཆོན་གྱིས་ངོ་སྤྲོད་བྱས་པ་ལྟར་ན། ས་ཡོམ་བྱུང་རྗེས། ཉིང་ཁྲི་གྲོང་ཁྱེར་ཨུ་ལྷན་དང་གྲོང་ཁྱེར་སྲིད་གཞུང་གི་མཛུབ་སྟོན་ལྟར། ཉིང་ཁྲི་གྲོང་ཁྱེར་སྡོད་ཁང་གྲོང་གསེབ་འཛུགས་སྐྲུན་ཅུའུ་ཡིས་རང་སྐྱོང་ལྗོངས་སྡོད་ཁང་གྲོང་གསེབ་འཛུགས་སྐྲུན་ཐིང་གི་བླང་བྱ་གཞིར་བཟུང་། དུས་ཐོག་ཏུ་གཞིས་ཀ་རྩེ་གྲོང་ཁྱེར་སྡོད་ཁང་གྲོང་གསེབ་འཛུགས་སྐྲུན་ཅུའུ་དང་འབྲེལ་གཏུག་བྱས་ཏེ། ཡོམ་འགོག་གེགས་སེལ་གྱི་དགོས་མཁོ་དང་གནོད་ཐེབས་ཁུལ་གྱི་ཁང་པར་ཚད་གཞི་མི་འདྲ་བའི་གནོད་འཚེ་ཕོག་པ་དང་།  ཆེད་ལས་མི་སྣས་ཡུལ་དངོས་སུ་བརྟག་དཔྱད་དང་ཐག་གཅོད་བྱེད་དགོས་པ་ཤེས་རྟོགས་བྱུང་།

དེར་བརྟེན། ཉིང་ཁྲི་གྲོང་ཁྱེར་སྡོད་ཁང་གྲོང་གསེབ་འཛུགས་སྐྲུན་ཅུའུ་ཡིས་མགྱོགས་མྱུར་སྒོས་ཁང་པའི་སྤུས་ཚད་བདེ་འཇགས་ཞིབ་དཔྱད་ཆེད་མཁས་པ14སྒྲིག་འཛུགས་བྱས་ཏེ། ཟླ1པོའི་ཚེས8ཉིན་གྱི་ཕྱི་དྲོར་འཕྲལ་མར་འདུ་འཛོམས་བྱས་ནས་རོགས་སྐྱོབ་བྱས་པ་དང་ཉིན་གཉིས་པའི་ཐོ་རེངས་ཆུ་ཚོད2པར་གཞིས་ཀ་རྩེར་འབྱོར་ནས་ལས་འགན་གྱི་ལས་བགོས་གཞིར་བཟུང་། ཉིན་དེའི་ཕྱི་དྲོར་ས་སྐྱ་རྫོང་རྨ་བྱ་ཤང་དུ་ཡོང་ནས་ཞིབ་བཤེར་བྱས་པ་རེད།   ཟླ1པོའི་ཚེས11ཉིན་བར་བསྡོམས་པས་རྨ་བྱ་ཤང་གི་གྲོང་ཚོ4ཡི་དུད་ཚང374དང་སྤྱི་པའི་བཟོ་བཀོད30ལ་ཞིབ་བཤེར་ལེགས་གྲུབ་བྱུང་། སྔོན་དཔག་བྱས་པ་ལྟར་ན་གཟའ་འཁོར་གཅིག་ནང་ཞིབ་བཤེར་ལས་དོན་ཚང་མ་མཇུག་འགྲིལ་ཐུབ་པ་དང་འབྲེལ་ཞིབ་བཤེར་སྙན་ཞུ་བཟོས་ནས། རྗེས་མར་གནོད་ཕྱིའི་བསྐྱར་སྐྲུན་གྱི་ཇུས་གཞི་བཟོ་རྒྱུར་ལག་རྩལ་གྱི་རྒྱབ་སྐྱོར་མཁོ་འདོན་བྱེད་ཐུབ།   

ས་ཡོམ་བྱུང་རྗེས། ལྷ་གདོང་གྲོང་ཚོའི་ཏང་ཡོན་ལས་བྱེད་པ་དང་གྲོང་ཚོའི་བཅའ་སྡོད་ལས་དོན་རུ་ཁག་གིས་ཀྱང་དུས་ཐོག་ཏུ་མང་ཚོགས་གནས་སྤོ་བཀོད་སྒྲིག་བྱས་ནས། གྱོན་ཆས་དང་ཟས་རིགས་སོགས་དངོས་ཟོག་འགྲེམ་གཏོང་སོགས་ཀྱི་བྱ་བར་མཐུན་སྦྱོར་ཧུར་ཐག་བྱས། ཉིན་འགའི་རིང་ལྷ་གདོང་གྲོང་ཚོའི་ཏང་ཡོན་ལས་བྱེད་པའི་ལས་འགན་གཙོ་བོ་ནི་དངོས་ཟོག་བགོས་འགྲེམ་དང་། གུར་ཕུབ་པ།  མེ་བཀོལ་དང་གློག་སྤྱོད་པའི་བདེ་འཇགས་ལ་སྐོར་ཞིབ།  རྫོང་དང་ཤང་།  གྲོང་ཚོ་བཅས་རིམ་པ་གསུམ་པའི་སྨན་ཁང་ལ་གཞོགས་འདེགས་བྱས་ཏེ་མང་ཚོགས་ཀྱི་བདེ་ཐང་བརྟག་དཔྱད་དང་སེམས་ཁམས་སེམས་གསོ་བྱ་རྒྱུ་བཅས་རེད།   

ས་སྐྱ་རྫོང་གི་སྤྱིའི་གནོད་འཚེའི་གནས་ཚུལ་ཅི་འདྲ་ཡིན་པའི་ཐད། ས་སྐྱ་རྫོང་ཨུའི་ཧྲུའུ་ཅི་གཞོན་པ་ཡུས་ཀྲི་ཧྭ་ཡིས་གསར་འགོད་པར“ཟླ1པོའི་ཚེས10ཉིན་གྱི་ཉིན་གུང་བར་རྫོང་ཡོངས་ཀྱི་གནོད་འཚེ་ཕོག་པ་ཚབས་ཆེ་ཤོས་ཀྱི་ཤང་དང་གྲོང་རྡལ4ཡི་མང་ཚོགས3ལ་རྨས་སྐྱོན་ཡང་མོ་བྱུང་ཡོད་ལ།  ཞིབ་བཤེར་བྱས་པར་གཞིགས་ན་ཚད་མི་འདྲ་བའི་གནོད་སྐྱོན་ཕོག་པའི་ཁང་པ3957ཡོད་པ་དང་།  དུད་ཚང53གྱི་ཁང་བའི་ཆ་ཤས་རྡིབ་པ། ཕྱུགས་རིགས་ཤི་རྨས་བྱུང་མེད་པ་བཅས་སོ། རྫོང་ཡོངས་སུ་བསྡོམས་པས་གཅིག་བསྡུས་བཀོད་སྒྲིག་བྱ་ཡུལ26ཡོད་པ་དང་མང་ཚོགས་གཞན་དག་རང་སོ་སོའི་གྲོང་ཚོར་ཁ་ཐོར་བཀོད་སྒྲིག་བྱས་ཡོད་ལ། དུད་ཚང་རེར་རས་གུར་གཅིག་གཞི་རྩའི་ཆ་ནས་མངོན་འགྱུར་བྱུང་བ་དང་རྗེས་མཐུད་དངོས་ཟོག་ད་དུང་སྐྱེལ་འདྲེན་བྱེད་བཞིན་ཡོད་ཅེས་བཤད།  

གསར་འགོད་པས་ད་དུང་རྒྱུས་ལོན་བྱུང་བར་གཞིགས་ན། ས་སྐྱ་རྫོང་གི་ས་ཡོམ་གནོད་ཐེབས་ཁུལ་གྱི་སྐོར་དང་པོའི་སྟབས་བདེའི་ཁང་པ་བསྐྲུན་ཚར་ཡོད། །