ཀོས་ནན་རྫོང་གི་སྤུས་ལེགས་ལོ་སར་དངོས་ཟོག་རིགས220ལྷག་ཟི་ལིང་དུ་འགྲེམས་སྟོན་བྱས།

ཟླ1པོའི་ཚེས1ཉིན། “དྲི་ཞིམ་ཕྱོགས་བཞིར་འཐུལ་བའི་ཁྱད་ལྡན་ཞིམ་ཟས”ཞེས་པའི་མཚོ་ལྷོ་བོད་རིགས་རང་སྐྱོང་ཁུལ་གྱི2025ལོའི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཟི་ལིང་གི་ལོ་གསར་དངོས་ཟོག་ཚོགས་འདུའི(ཀོས་ནན་ས་ཚིགས)བྱེད་སྒོ་ཟི་ལིང་དུ་འཚོགས་པ་དང་། སྤུས་ལེགས་ཀྱི་ལོ་གསར་དངོས་ཟོག་རིགས220ལྷག་ཙམ་ཡུལ་དངོས་སུ་འགྲེམས་སྟོན་བྱས། 

ཤེས་གསལ་ལྟར་ན། ཀོས་ནན་རྫོང་གིས་རྫོང་ཁོངས་ཀྱི་གཙོ་ཁྲིད་ཐོན་ལས་གསོ་སྐྱོང་གང་ལེགས་བྱས་ཏེ། ལྗང་མདོག་དང་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་མཁོ་སྤྲོད་ནུས་པ་རྒྱུན་མཐུད་ངང་མཐོར་འདེགས་སུ་བཏང་སྟེ། ལུག་དང་ནོར་གནག ནས། སྐེ་ཚེ། གཙགས་དྲུབ། རྡོ་བརྐོས་སོགས་ཐོན་ལས་འཕེལ་རྒྱས་ཀྱི་ལེགས་ཆ་མངོན་གསལ་ཅན་དུ་བཏང་སྟེ། ཀོས་ནན་རྫོང་གི་ཞིང་ཕྱུགས་ལས་འཕེལ་རྒྱས་ལ་འགྱུར་ལྡོག་བཏང་བ་དང་འཕེལ་རྒྱས་སྤུས་ཚད་མཐོར་འདེགས་སུ་གཏོང་བ། འཕེལ་རྒྱས་ཕན་འབྲས་ཆེ་རུ་གཏོང་བ་བཅས་ལ་སྐུལ་འདེད་བཏང་།

བྱེད་སྒོའི་ཡུལ་དངོས་སུ་མང་ཚོགས་དང་ཚོང་ཟོག་མང་བར་མ་ཟད། སྤུས་ལེགས་ཚོང་ཟོག་བྲིན་འཚོང་བྱས་ཏེ། འཛད་སྤྱོད་ཀྱི་མཁོ་སྤྲོད་ཇེ་ལེགས་སུ་གཏོང་བ་དང་། འཛད་སྤྱོད་ཀྱི་མི་མངོན་པའི་སྟོབས་ཤུགས་མངོན་པ། འཛད་སྤྱོད་ཀྱི་གསོན་ཤུགས་ལ་སྐུལ་སྤེལ་བཅས་བྱ་ཆེད། ཐེངས་འདིའི་ལོ་གསར་དུས་ཆེན་སྟེང་ལོ་གསར་གྱི་དངོས་ཟོག་སྤུས་ལེགས་རིགས220ལྷག་འགྲེམས་སྟོན་བྱས། ཞིང་ཆེན་དང་ཀོས་ནན་རྫོང་གི་གློག་རྡུལ་ཚོང་དོན་སྟེགས་བུ་དང་། མིང་གྲགས་ཆེ་བའི་མགོ་འཛིན་པ། དྲ་དཔོན་སོགས་གདན་འདྲེན་ཞུས་ནས་མགྱོགས་འཕྲིན་དང་འཁྱུག་དབྱངས་སོགས་ཐད་གཏོང་སྟེགས་བུ་བརྒྱུད་དེ་འོས་སྦྱོར་བྱས།

ཐེངས་འདིའི་ལོ་སར་ཚོང་རྫས་འགྲེམས་སྟོན་བྱེད་སྒོའི་དུས་ཡུན་ཉིན5ཡིན་པ་དང་། དེའི་རིང་ལ་ལོ་སར་ཚོང་རྫས་ཉོ་སྒྲུབ་དང་བཟའ་བཏུང་ཞིམ་ཟས་མྱོང་རོལ།  གཟུགས་འདས་ཤུལ་བཞག་རིག་གནས་དང་གླུ་གར་གྱི་ལྟད་མོར་ལྟ་བ་སོགས་ཀྱི་བྱེད་སྒོ་སྤེལ་ནས། ཀོས་ནན་རྫོང་གི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་མཁོ་སྤྲོད་ཁུལ་འཛུགས་སྐྲུན་གྱི་གྲུབ་འབྲས་ཁྱོན་ཡོངས་ནས་འགྲེམས་སྟོན་བྱས་ཏེ། ཀོས་ནན་གྱི་སྤུས་ལེགས་ཐོན་རྫས་ཀྱི་སྐད་གྲགས་ཚད་དང་ཁྲོམ་རའི་འགྲན་རྩོད་ནུས་པ་སྔར་ལས་མཐོར་འདེགས་སུ་བཏང་། །