མཚོ་སྔོན་པོའི་གསེར་ཉའི་ཐོན་ཁུངས་སྲུང་སྐྱོབ་འགུལ་སྐྱོད་ཀྱི་སྐུལ་སློང་བཀོད་སྒྲིག་ཚོགས་འདུ་འཚོགས་པ།

མཚོ་སྔོན་པོའི་གསེར་ཉའི་ཐོན་ཁུངས་སྲུང་སྐྱོབ་འགུལ་སྐྱོད་ཀྱི་སྐུལ་སློང་བཀོད་སྒྲིག་ཚོགས་འདུ་འཚོགས་པ།

ཟླ9པའི་ཚེས25ཉིན། མཚོ་སྔོན་པོའི་གསེར་ཉའི་ཐོན་ཁུངས་སྲུང་སྐྱོབ་ལ་འགུལ་སྐྱོད་བྱེད་པའི་སྐུལ་སློང་བཀོད་སྒྲིག་ཚོགས་འདུ་མཚོ་སྔོན་པོ་གླང་ཆེན་མཆེ་བ་གྲོས་ཚོགས་ལྟེ་གནས་སུ་འཚོགས་ཤིང་། ཞི་ཅིན་ཕིང་གི་སྐྱེ་ཁམས་དཔལ་ཡོན་གྱི་དགོངས་པ་ལག་བསྟར་དོན་འཁྱོལ་དང་མཚོ་རྒྱ་བསྡམས་ནས་ཉ་གསོ་བའི་སྲིད་ཇུས་དོན་འཁྱོལ་བྱས་ཏེ་གཙོ་གནད་ལས་འགན་བཀོད་སྒྲིག་བྱས། ཞིང་ཆེན་ཏང་ཨུའི་རྒྱུན་ཨུའམ་ཧྲིན་ཀྲང་གཞོན་པ་ཚེ་རིང་ཐར་གྱིས་ཚོགས་འདུ་གཙོ་སྐྱོང་བྱས་ཏེ་གསུང་བཤད་གནང་། ཧྲིན་ཀྲང་གཞོན་པ་ལི་ཧོང་ཡ་ཡིས་མཚོ་སྔོན་པོའི་གསེར་ཉ་དང་འབྲེལ་བའི་ཁྲིམས་འགལ་ཉེས་གསོག་ལ་རྡུང་རྡེག་གཏོང་བར་ཞིབ་ཕྲའི་བླང་བྱ་བཏོན།　

ཚོགས་འདུའི་ཐོག མཚོ་སྔོན་པོའི་གསེར་ཉ་ནི་མཚོ་སྔོན་པོའི་སྐྱེ་ཁམས་སྦྲེལ་མཐུད་ཁྲོད་ཀྱི་གནད་འགག་གི་རིགས་དངོས་ཤིག་ཡིན་ཞིང་། རང་ཞིང་གི་ཐུན་མིན་གྱི་དངོས་རིགས་ཐོན་ཁུངས་ཤིག་ཡིན་པས། གསེར་ཉའི་ཐོན་ཁུངས་ལ་སྲུང་སྐྱོབ་བྱེད་པ་དེས་མཚོ་སྔོན་པོའི་སྐྱེ་ཁམས་ཁོར་ཡུག་སྲུང་སྐྱོབ་དང་མཚོ་སྔོན་པོའི་སྐྱེ་ཁམས་མ་ལག་སྲུང་སྐྱོང་བྱེད་པའི་ཐད་དོན་སྙིང་གལ་ཆེན་ལྡན་པར་བསྟན།

ཚོགས་འདུའི་ཐོག ཞི་ཅིན་ཕིང་གི་སྐྱེ་ཁམས་དཔལ་ཡོན་གྱི་དགོངས་པ་ལག་བསྟར་གཏིང་ཟབ་དང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་བྱ་བའི་བླང་བྱ་དོན་འཁྱོལ་བྱས་ཏེ། ཆབ་སྲིད་ཀྱི་ལངས་ཕྱོགས་མཐོན་པོ་དང་གསེར་ཉའི་ཐོན་ཁུངས་ཀྱི་ཡུན་རིང་རང་བཞིན་དང་རྙོག་འཛིང་རང་བཞིན། དཀའ་ཚེགས་རང་བཞིན་བཅས་ལ་སྲུང་སྐྱོབ་བྱེད་པའི་ངེས་ཤེས་གང་ལེགས་ཡོད་པར་བྱས་ཏེ། བྱ་བའི་རང་རྟོགས་དང་རང་འགུལ་རང་བཞིན་མཐོར་འདེགས་སུ་བཏང་ནས་གསེར་ཉའི་ཐོན་ཁུངས་སྲུང་སྐྱོབ་ལ་སྐུལ་འདེད་གཏོང་དགོས་ཤིང་། གཙོ་གནད་ལས་འགན་དང་གཙོ་གནད་ས་ཁོངས། གནད་འགག་གི་གོ་རིམ་བཅས་ལ་དམིགས་ཏེ། ཆེད་དོན་རྒོལ་རྡུང་བཅོས་སྒྲིག་ཟབ་སྤེལ་དང་མཉམ་འཛིན་མཉམ་བཅོས་ཀྱི་རྒོལ་རྡུང་བྱ་བའི་རྣམ་པ་འཐུས་ཚང་དུ་གཏོང་བ། ཁུངས་སྣེ་རྩད་ཞིབ་ཤུགས་དྲག་ཏུ་བཏང་ནས། མགོ་ཁུངས་ནས་གསེར་ཉའི་ཐོན་ཁུངས་སྲུང་སྐྱོབ་བྱེད་པའི་བདེ་འཇགས་འགོག་སྲུང་འཛུགས་དགོས། ཡུན་ཕན་སྒྲིག་སྲོལ་འཐུས་ཚང་དུ་གཏོང་བ་དང་མཉམ་འགོག་མཉམ་བཅོས་དྲ་བ་སྒྲིག་འཛུགས། ཞུ་གཏུག་བྱ་དགའི་སྒྲིག་སྲོལ་སྒྲིག་འཛུགས། ཁྲིམས་ལུགས་ལག་བསྟར་ཆད་གཅོད་སྒྲིག་སྲོལ་བཅས་འཐུས་ཚང་དུ་བཏང་ནས་ལྟ་སྐུལ་དོ་དམ་ཤུགས་དྲག་དང་དྲིལ་སྒྲོག་བྱས་ཏེ། སྤྱི་ཚོགས་ཡོངས་ཀྱི་མི་ཚང་མ་དེའི་ཁྲོད་དུ་ཞུགས་ཏེ་མི་རེ་རེས་སྲུང་སྐྱོབ་བྱེད་པའི་ཁོར་ཡུག་ཅིག་ཆགས་སུ་འཇུག་དགོས་པ་ནན་གྱིས་བསྟན། 

ཚོགས་འདུའི་ཐོག ཞིང་ཆེན་ཞིང་ལས་ཞིང་སྡེ་ཐིང་གི་འབྲེལ་ཡོད་འགན་ཁུར་བས《2023ལོའི་མཚོ་སྔོན་པོའི་གསེར་ཉའི་ཐོན་ཁུངས་སྲུང་སྐྱོབ་བྱེད་པའི་འགུལ་སྐྱོད་ཇུས་གཞི》སྒྲོག་འདོན་བྱས་ཤིང་། ཞིང་ཆེན་སྤྱི་བདེ་ཐིང་དང་ཞིང་ཆེན་ཁྲོམ་ར་ལྟ་སྐུལ་དོ་དམ་ཅུས། འབྲེལ་ཡོད་ཁུལ་དང་རྫོང་། ཡུལ་ཚོ་དང་གྲོང་རྡལ། སྡེ་བའི་འགན་ཁུར་བ། ལྗོངས་ཁུལ་བཟའ་བཏུང་ཚོང་གཉེར་གཙོ་གཞི། མང་ཚོགས་འཐུས་ཚབ་པ་བཅས་སོ་སོའི་གཏམ་བཤད་གནང་།