མི་གཞི་སློབ་གསོ་གཙིགས་སུ་བཟུང་སྟེ་སློབ་བུ་སྐྱོང་།། གོམ་སྟབས་ཆེན་པོས་མཆོང་བརྒལ་འཕེལ་རྒྱས་ཕྱོགས་སུ་སྐྱོད།།

མི་གཞི་སློབ་གསོ་གཙིགས་སུ་བཟུང་སྟེ་སློབ་བུ་སྐྱོང་།། གོམ་སྟབས་ཆེན་པོས་མཆོང་བརྒལ་འཕེལ་རྒྱས་ཕྱོགས་སུ་སྐྱོད།།

ལྕགས་ཟམ་རྫོང་གིས་དཀར་མཛེས་ཁུལ་གྱི་སློབ་གསོའི་འཕེལ་ཁ་དར་ས་བཏོད་དེ་མི་དམངས་ཡི་རང་བའི་སློབ་གསོ་གཉེར་བའི་གནས་ཚུལ་དངོས་བྲིས།

སློབ་གསོ་སྔོན་ལ་འཕེལ་རྒྱས་གཏོང་བ་རྒྱུན་འཁྱོངས་ནས་དགེ་རྒན་ལ་བརྩི་བཀུར་དང་སློབ་གསོར་མཐོང་ཆེན་དར་སྲོལ་དུ་ཆགས།

2024ལོའི་ཟླ་བ9པའི་ཚེས9ཉིན་ལྕགས་ཟམ་རྫོང་ཐེན་པཱ་བརྒྱད་གཅིག་དམངས་གཅེས་སློབ་ཆུང་དུ་ཁུལ་སྲིད་གཞུང་གི་ཁུལ་དཔོན་གཞོན་པ། རྫོང་ཨུའི་ཧྲུའུ་ཅི་སུང་ཞའོ་ཅུན་དང་སློབ་གྲྭ་དེ་གའི་དགེ་རྒན་མཉམ་དུ་འཛོམས་ནས་དགེ་རྒན་དུས་ཆེན་ཐེངས40པར་རྟེན་འབྲེལ་ཞུས་ནས་བསམ་འཆར་ལ་ཉན་པ་དང་ཇུས་བཟང་འཚོལ་བ། སྟོབས་ཤུགས་གཅིག་སྒྲིལ། འཕེལ་རྒྱས་དོན་གཉེར་བཅས་ཀྱི་དམིགས་བསལ་དོན་སྙིང་ལྡན་པའི་དགེ་རྒན་དུས་ཆེན་བསུ་བ་རེད།

ཉེ་བའི་ལོ་ཤས་རིང་། ལྕགས་ཟམ་རྫོང་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱས་པ་རྒྱུན་འཁྱོངས་ཏེ། སློབ་གསོ་དེ་དམངས་འཚོའི་ལས་གྲྭ་ཆེ་ཤོས་སུ་བརྩིས་ནས་སློབ་གསོ་སྔོན་ལ་འཕེལ་རྒྱས་གཏོང་བའི་གནས་བབ་ཏུ་བཞག་སྟེ། ཉམས་ཞན་སྟོབས་ཆེར་གཏོང་བ་དང་ཞན་ཆ་གསབ་པ། སྤུས་ཚད་མཐོར་གཏོང་བཅས་བྱས་ནས་མང་ཚོགས་ཀྱི་སྤུས་ལེགས་སློབ་གསོའི་དགོས་མཁོ་ཧུར་ཐག་བསྐངས་ཡོད། མགོ་ཁྲིད་གཙོ་བོ་སློབ་གྲྭར་བརྟག་ཞིབ་ཏུ་ཐེངས་མང་ཕྱིན་ཏེ། ལྕགས་ཟམ་རྫོང་གི་སློབ་གསོའི་མི་འདང་སར་འཚོལ་ཞིབ་དང་གསེད་སྒྲིག་བྱས་ནས་ལྕགས་ཟམ་རྫོང་གི་སློབ་གསོའི་ཁ་ཕྱོགས་གཏན་ལ་ཕབ་ཡོད། 2021ལོར་ཚད་གཞི་མཐོན་པོའི་སྒོ་ནས་ལྕགས་ཟམ་རྫོང་གི་སློབ་གསོ་འཕེལ་རྒྱས་ཚོགས་ཆེན་འཚོགས་ཏེ། 《སློབ་གསོའི་ལས་དོན་ལ་སྔར་བས་ཤུགས་སྣོན་སྐོར་གྱི་བསམ་འཆར》བཏོན་པ་དང་། ཁུལ་ཡོངས་ཀྱི་སྤུས་ལེགས་སློབ་གསོའི་ལྟེ་གནས་བསྐྲུན་པ་དང་ཁུལ་ཡོངས་ཀྱི་སློབ་གསོའི་འཕེལ་ཁ་དར་སའི་དམིགས་འབེན་ལས་འགན་ཁ་གསལ་བཏོན་ཏེ། ལྕགས་ཟམ་རྫོང་གི་སློབ་གསོ་འཕེལ་རྒྱས་སྤུས་ཚད་མཐོན་པོ་གོང་དུ་ཕྱིན་པ་རེད། 2022ལོར་ཚོགས་སྒྲིག་རྣམ་པའི་རོགས་སྐྱོར་བྱེད་འགོ་བཙུགས་རྗེས་རྫོང་ཨུ་དང་རྫོང་སྲིད་གཞུང་གིས་དུས་དཔག་བབ་བསྟུན་གྱིས་ལྕགས་ཟམ་རྫོང་གི་སློབ་གསོའི་ཉམས་ཞན་གྱི་གནད་ཐུག་ས་ལ་དམིགས་ཏེ། 《ལྕགས་ཟམ་རྫོང་གིས་མཐོ་རིམ་སློབ་འབྲིང་དཀྱུས་མའི་འཕེལ་རྒྱས་ཆུ་ཚད་ཕྱོགས་ཡོངས་ནས་མཐོ་རུ་གཏོང་བའི་ལག་བསྟར་ཇུས་གཞི》ཞིབ་འཇུག་བྱས་ནས་བཏོན་པ་དང་། བློ་གཤོགས་ཆེན་པོས་མ་ལག་ཅན་གྱི་སློབ་གསོ་བསྒྱུར་བཅོས་མཐར་ཕྱིན་བཏང་སྟེ། བྱ་ཐབས་ནུས་ལྡན་རབ་དང་རིམ་པ་བཏོན་ནས་སློབ་གསོ་བསྒྱུར་བཅོས་འཕེལ་རྒྱས་ཀྱི་འཆར་གཞི་ཇུས་འགོད་ཕྱོགས་ཡོངས་ནས་བྱས་པ་རེད།

ལྕགས་ཟམ་རྫོང་གིས་ཐེབས་རྩ་མ་དངུལ་སྒོར་ཁྲི100བཏང་ནས་དགེ་རྒན་ལ་བསྔགས་སྐུལ་དང་བྱ་དགའ་སྤྲོད་པའི་ལམ་སྲོལ་འཐུས་ཚང་དུ་བཏང་བ་དང་། མཐོ་རིམ་སློབ་འབྲིང་གི་ལས་སྒྲུབ་གྲོན་དངུལ་མང་དུ་བཏང་སྟེ། མ་དངུལ་སྒོར་ཁྲི250བཏང་ནས་སློབ་ཁྲིད་སྤུས་ཚད་བྱ་དགའ་སྤྲད་པ་དང་། ལོ་རེར་སྒོར་ཁྲི115བཏང་ནས་དམའ་རིམ་དང་མཐོ་རིམ་སློབ་གྲྭའི་གཞི་གཅིག་ཅན་གྱི་སློབ་གཉེར་ལ་རྒྱབ་སྐྱོར་བྱས་ཏེ། སློབ་གསོ་དང་རྩལ་ནུས་ཀྱི་ཁྱད་ཆོས་སློབ་གསོ་ཕུལ་བྱུང་གསོ་སྦྱོང་བྱས། ལོ་རེར་མ་དངུལ་སྒོར་ཁྲི70བཏང་ནས་དགེ་རྒན་གྱི་ཆེད་ལས་ནུས་པ་མཐོར་འདེགས་གསོ་སྦྱོང་དང་སློབ་ཁྲིད་ཞིབ་བསྡུར་ལས་དོན་ལ་རྒྱབ་སྐྱོར་བྱས་པ་རེད།

གཞི་སྲ་རྨང་བརྟན་རྒྱུན་འཁྱོངས་ནས་སློབ་གསོའི་མཁོ་སྤྲོད་རྒྱུན་མཐུད་ངང་ལེགས་སུ་བཏང་།

ཉེ་བའི་ལོ་ཤས་རིང་། ལྕགས་ཟམ་རྫོང་གིས་སློབ་གསོ་སྔོན་ལ་འཕེལ་རྒྱས་གཏོང་བའི་བཀོད་སྒྲིག་མུ་མཐུད་ནས་ལེགས་སུ་བཏང་བ་དང་། སྤུས་ལེགས་སློབ་གསོའི་ཐོན་ཁུངས་མཁོ་སྤྲོད་བྱེད་ཤུགས་ཆེ་རུ་བཏང་ཞིང་། སློབ་གསོའི་རྨང་གཞིའི་འཛུགས་སྐྲུན་ལ་ཤུགས་བསྣན་པ། ཐོན་ཁུངས་བཀོད་སྒྲིག་སྔར་བས་ལེགས་སུ་གཏོང་བ་བཅས་བྱས་པ་རེད།

2024ལོའི་ཟླ་བ9པར་གདན་ཐོག་གྲོང་རྡལ་ལྟེ་གནས་སློབ་གྲྭའི་སློབ་ཁྲིད་ཐོག་ཁང་གསར་པ་དངོས་སུ་སྤྱོད་འགོ་ཚུགས་པ་དང་། སློབ་མ400ལྷག་ཡངས་ཤིང་རྒྱ་ཆེ་ལ་གསལ་ཆ་དོད་ཅིང་། སྒྲིག་ཆས་ཆ་ཚང་བའི་སློབ་ཁང་གསར་པར་སྤོས་པ་རེད། “9•5”ལྕགས་ཟམ་རྫོང་དུ་བྱུང་བའི་ས་ཡོམ་ཁྲོད་གནོད་འཚེ་ཆེས་ཚབས་ཆེན་ཕོག་པའི་སློབ་གྲྭ་དེ་ལོ་གཅིག་གི་རིང་ལ་བསྐྱར་དུ་བསྐྲུན་པ་དང་། མ་དངུལ་སྒོར་ཁྲི1300བཏང་ནས་སློབ་ཁྲིད་ཐོག་ཁང་གསར་པ་བསྐྲུན་ནས་སློབ་གྲྭའི་ཆ་རྐྱེན་བཟང་དུ་བཏང་བས་མ་ཚད་ད་དུང་ས་ཡོམ་འགོག་པའི་བརྩེགས་རིམ་ཞིག་ཀྱང་མང་དུ་ཕྱིན་ཏེ། འཛུགས་སྐྲུན་ཧྲིལ་པོའི་ཡོམ་འགོག་ནུས་པ་ཆེ་རུ་ཕྱིན་ནས་དགེ་སློབ་ཚོའི་ཚེ་སྲོག་ཉེན་མེད་ལ་འགན་ལེན་ནུས་ལྡན་ཐུབ་ཡོད་པ་རེད། སློབ་གྲྭའི་ཁོར་ཡུག་གསར་རྐྱང་བྱུང་ནས་སློབ་ཁྲིད་ཀྱི་ཆ་རྐྱེན་ཡོངས་སུ་ཚང་ཞིང་། ལོ་ལྔའི་རིང་ལྕགས་ཟམ་རྫོང་གིས་རིམ་རྩིས་བྱས་ན་མ་དངུལ་སྒོར་དུང་ཕྱུར14.42བཏང་ནས་སློབ་གསོའི་གཙོ་གནད་རྣམ་གྲངས11ལེགས་འགྲུབ་བྱུང་ཞིང་། སློབ་གྲྭ11གསར་སྐྲུན་དང་རྒྱས་སྐྲུན་བྱས་ཤིང་། སློབ་གྲྭ7ཟླ་སྒྲིལ་བཏང་། གསར་སྐྲུན་སློབ་གྲྭ4སྔ་རྗེས་སུ་བེད་སྤྱོད་བྱས། གནོད་འཚེ་ཕོག་པའི་སློབ་གྲྭ9ཡི་སློབ་གྲྭའི་ཉལ་ཁང་བསྐྱར་སྐྲུན་དང་ཉམས་གསོ་བསྒྱུར་བཀོད་ལེགས་སྒྲུབ་བྱུང་ཡོད་པ་རེད།

ཀུན་སྤྱོད་བཟང་ལ་འཇོན་ཐང་ཆེ་བ་རྒྱུན་འཁྱོངས་ནས་དགེ་རྒན་དཔུང་ཁག་གི་གསོན་ཤུགས་རྒྱས།

དགེ་རྒན་དཔུང་ཁག་ལེགས་སུ་གཏོང་བའི་དགོས་མཁོར་དམིགས་ནས་སྣ་མང་ཤེས་ལྡན་མི་སྣ་ནང་འདྲེན་གྱི་ལམ་སྲོལ་གསར་དུ་བཏོད། ལོ་ལྔའི་ནང་རིམ་རྩིས་བྱས་ན་དགེ་རྒན82གདན་ཞུ་བྱས་པ་དང་། དགོས་མཁོ་ཆེ་ལ་དཀོན་པའི་སློབ་གསོའི་རིགས་ཀྱི་མཐོ་རིམ་ཤེས་ལྡན་མི་སྣ47ནང་འདྲེན་བྱས། གྲོང་སྡེ་གཅིག་ལ་བྱིས་སློབ་ཁང་གཅིག་གི་ཟུར་ཁྲིད་པ140གདན་ཞུ་བྱས་པ་དང་། དགེ་རྒན་གྲགས་ཅན་གསོ་སྐྱོང་དང་འདེམས་འཛུགས་འདུ་འགོད་ལག་ལེན་བསྟར་ནས་སློབ་གཙོ་གྲགས་ཅན་དང་ཚད་ལྡན་དགེ་རྒན་ལས་སྒྲུབ་ཁང16བཙུགས་ཏེ། ཁུལ་དང་རྫོང་གི་རྐང་འཛིན་དགེ་རྒན45གསོ་སྦྱོང་བྱེད་སར་བསྐྱོད། དགེ་རྒན37ལ་རྒྱལ་ཁབ་དང་ཞིང་ཆེན། ཁུལ་བཅས་ཀྱི་གཟེངས་བསྟོད་ཐོབ་པ་རེད།

དགེ་རྒན་འཚར་ལོངས་ཀྱི་བྱང་ཚད་དགོས་མཁོར་དམིགས་ནས་རྒྱབ་ཁབ་རིམ་པ་དང་ཞིང་ཆེན་རིམ་པའི་གསོ་སྦྱོང་རྣམ་གྲངས་ལག་ལེན་བསྟར་བ་དང་། ཁུལ་རིམ་པ་དང་རྫོང་རིམ་པའི་གསོ་སྦྱོང་ལེགས་སུ་གཏོང་བ།ལས་གནས་དང་མཉམ་དུ་སློབ་སྦྱོང་བྱེད་པ་དང་གྲོང་གསེབ་ཏུ་སློབ་ཁྲིད་བྱེད་སར་སྐྱོད་པ། སྤུས་ལེགས་སློབ་ཚན་འགྲེམ་སྟོན་དང་དཔྱད་སྡུར་བྱེད་པ། གྲོང་ཡུལ་སློབ་གྲྭ་མཐུན་སྦྱོར་འཕེལ་རྒྱས་གཏོང་བ་སོགས་དགེ་རྒན་ཡོངས་ཀྱི་གསོ་སྦྱོང་འཆར་གཞི་ཁྱོན་ཡོངས་ནས་ཁེབས་ཡོད། ལོ་ལྔའི་རིང་རིམ་རྩིས་བྱས་ན་དགེ་རྒན5600ལྷག་ལ་གསོ་སྦྱོང་བྱས་པ་དང་། དགེ་རྒན་བསྡུས་ནས་ཕྱིར་རྟོག་ཞིབ་དང་སློབ་སྦྱོང་བྱེད་སར་སྐྱོད་མཁན800ལྷག་ལ་ཟིན་པ་རེད།

བསྒྱུར་བཅོས་ཟབ་ཏུ་སྤེལ་བ་རྒྱུན་འཁྱོངས་ནས་སློབ་གསོ་སློབ་ཁྲིད་ཀྱི་སྤུས་ཚད་དང་ཕན་འབྲས་ཆེ་རུ་བཏང་།

2024ལོའི་ཟླ་བ6པའི་ཚེས23ཉིན་སི་ཁྲོན་ཞིང་ཆེན་གྱི་མཐོ་རྒྱུགས་སྦྱངས་འབྲས་བསྒྲགས་པ་རེད། ལོ་སྔོན་མའི་མཐོ་རྒྱུགས་གྲུབ་འབྲས་ཕུལ་བྱུང་ཐོབ་པའི་རྨང་གཞིའི་ཐོག་ལྕགས་ཟམ་སློབ་འབྲིང་གི2024ལོའི་མཐོ་རྒྱུགས་ལ་སླར་ཡང་གྲུབ་འབྲས་བཟང་པོ་ཐོབ་པ་དང་། ས་གནས་རང་གི་སློབ་མ་གསོ་སྐྱོང་བྱེད་པའི་མཐོ་རྒྱུགས་ཀྱི་དངོས་གཞི་ཚན་ཁག་ཏུ་ཞུགས་མཁན353ལ་ཟིན་ཡོད། དཀྱུས་མའི་རིགས་མི་གྲངས260དང་རྩལ་ནུས་དང་ལུས་རྩལ་གཉིས་ཀར་ཞུགས་པའི་མི་གྲངས93ལ་ཟིན་པས། དེ་ལོ་སྔོན་མ་ལས་བརྒྱ་ཆ209ཡིན་ཞིང་། དངོས་གཞིའི་ཚན་ཁག་ནང་ཞུགས་ཚད་བརྒྱ་ཆ70.6ལ་ཟིན་པས་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད་པ་རེད།

ཉེ་བའི་ལོ་ཤས་རིང་། ལྕགས་ཟམ་རྫོང་གིས་སློབ་གསོ་སློབ་ཁྲིད་ཀྱི་ཆུ་ཚད་མཐོ་རུ་གཏོང་བ་དང་ཆབས་ཅིག། ཀུན་སྤྱོད་ལ་བརྟེན་ནས་མི་སྣ་གསོ་སྐྱོང་བྱེད་པའི་རྩ་བའི་ལས་འགན་ལ་དམིགས་ཏེ། སློབ་གསོ་ལྔ་མཉམ་དུ་སྤེལ་བ་སྤྱི་འདོམས་བྱས་ནས་བྱང་ཚད་སློབ་གསོར་མུ་མཐུད་ནས་ཤུགས་བསྣན་པར་གྲུབ་འབྲས་བཟང་པོ་ཐོབ་པ་རེད། རྫོང་ཡོངས་སུ་རྐང་རྩེད་སྤོ་ལོ་དང་སླེ་གྲུག་གི་ཁྱད་ཆོས་སློབ་གྲྭ5བསྐྲུན་པ་དང་། ལྕགས་ཟམ་སློབ་འབྲིང་གི་སློབ་མ་དཀར་མཛེས་ཁུལ་ལུས་རྩལ་འགྲན་ཚོགས་སྐབས་བཞི་པར་གསེར་གྱི་རྟགས་མ49བླངས། མཆོང་རྒྱུག་འཕེན་གསུམ་རྣམ་གྲངས་ཀྱི་གསེར་གྱི་རྟགས་མ་བརྒྱ་ཆ77བླངས། 2024ལོར་ཁུལ་ཡོངས་ཀྱི་སློབ་གྲྭ་ཆུང་འབྲིང་གི་སློབ་མའི་ལུས་རྩལ་འགྲན་ཚོགས་སུ་ལྕགས་ཟམ་རྫོང་གི་སློབ་མས་བྱ་དགའ་རྟགས་མ19བླངས་པ་རེད།། （བདེ་ཆེན་དབང་མོས་བྲིས།）