མཁལ་མ་དང་གཅིན་འདྲེན་སྦུ་གུའི་རྡེའུ་སྐྲན།

རྒྱུ་རྐྱེན། 

རྡེའུ་སྐྲན་ནི་ལུས་པོའི་སྤྱིན་གཟུགས་དང་སྟར་གཟུགས་ཀྱི་འཕོ་ལེན་འཁྲུགས་པས་བསྐྱེད་པ་དང་། རེད་པ། འཚོ་བཅུད་འཕོ་ལེན་གྱི་ནུས་པ་འཁྲུགས་པ། གཅིན་འགགས་པ་དང་ཁོར་ཡུག ནམ་ཟླ་སོགས་ལ་ཡང་འབྲེལ་བ་ཟབ་མོ་ཡོད།

ནད་རྟགས།

གློ་བུར་དུ་ན་ཟུག་དྲག་པོ(ཟུག་གཟེར)འབྱུང་བ། ལྡང་དུབ་ཀྱིས་ན་བ་དང་ན་གཞོགས་ཀྱི་རྐེད་པ་ནས་མགོ་བརྩམས་ཏེ་ཐུར་དུ་རྐེད་སྨད་དང་བརླའི་ནང་གཞོགས། རླིག་འབྲས་སམ་མཚན་ཁ་རུ་འཕྲོས་པ་དང་། སྐར་མ་འགའ་ནས་དུས་ཚོད་ཁ་ཤས་སོགས་ཡུན་ངེས་མེད་དུ་ན། སྐབས་རེར་དེ་དང་མཉམ་དུ་སྐྱུག་མེར་ལངས་པ་དང་། སྐྱུགས་པ། གྲང་རྔུལ་བཞུར་བ་སོགས་ཡོད། གཅིན་ལ་ཁྲག་རྣག་འདྲེས་པ་དང་མང་ཆེ་བ་མིག་གིས་མཐོང་ཐུབ་པ་ཡིན།

སྔོན་འགོག

ལྒང་བའི་ཚ་བ་དུས་ཐོག་ཏུ་བཅོས་པ་དང་། རོ་མངར་ཞིང་ནུས་པ་ལྕི་ལ་བསིལ་བའི་ཟས་སྐོམ་རིགས་ཉུང་ཙམ་བསྟེན་པ་དང་བརླན་གཤེར་ཆེ་བའི་ཡུལ་དུ་ཡུན་རིང་ཉལ་བའམ་འདུག་པ་སོགས་སྤང་དགོས།

གསོ་ཐབས།

1 ཆུ་མང་དུ་འཐུང་བ་དང་གཅིན་མང་དུ་བཏང་སྟེ་རྡེའུ་སྐྲན་ཕྱིར་འབེབ་པར་གྲོགས་བྱེད་པ་དང་། ན་ཟུག་ཅུང་ལྕི་ན། ཟུག་འཇོག་པའི་སྨན་བསྟེན་ཆོག

2 གལ་ཏེ་ན་ཟུག་ཤིན་ཏུ་ཆེ་བ་དང་བདེ་རུ་འབེབས་མི་ཐུབ་ན། སྨན་ཁང་གི་ཕྱི་ནད་ཚན་ཁག་ཏུ་སོང་ནས་བརྟག་དཔྱོད་བྱེད་དགོས།

3 བོད་ལུགས་གསོ་རིག་ལྟར་ན། སྨན་ལ་ཐོག་མར་ན་ཟུག་གཅོག་པ་དང་ཞོར་དུ་རྡེའུ་སྐྲན་ཞུ་བའི་ཐབས་ལ་སུག་སྨེལ་བཅུ་པ་དང་ཨ་རུ་བཅུ་པ། སྤྱི་འཇོམས་རྡོ་རྗེ། སཱར་ཁྱུང་དང་སྐྲན་འཇོམས་བཙོ་ཐལ་ཁ་ཚར་ཅན། ཞི་བྱེད་ཉེར་དགུ་སོགས་ནད་ཁམས་དང་ན་ཚོད་ལ་སྦྱར་ནས་གང་ལ་གང་འཚམས་གཏོང་དགོས།

4 ཟས་སྤྱོད་ཀྱིས་བཅོས་པ་ལ། ཕྱི་ལུགས་གསོ་རིག་ལྟར་ན། འོ་མ་དང་ཕྱུར་བ། སྲན་ལས་བཟོས་པའི་ཟས་རིགས། ལོ་མ་སྔོན་པོའི་སྔོ་ཚོད་སོགས་མི་འཕྲོད་པས་སྤང་བའམ་ཉུང་དུ་ཟ་བ་དང་། ཤ་སྣ་ཚོགས་དང་སྒོ་ང་། ཉ་ཤ བྱ་ཤ་སོགས་འཕྲོད་པས་གང་འཚམ་བསྟེན་པ་དང་། དུས་རྒྱུན་དུ་ཆུ་ཁོལ་མང་དུ་འཐུང་བ་དང་། རྩོལ་བ་རན་ཙམ་བཅག་ན་རྡེའུ་གཅིན་ལམ་ནས་ཕྱིར་ཕུད་པའི་གནས་ཚུལ་ཀྱང་ཡོད་སྲིད་པ་ཡིན།