པདྨ་ཚེ་བརྟན་ལགས་ཀྱི་དེབ་གསར་གཉིས་འགྲེམས་སྤེལ་བྱས་འདུག

པདྨ་ཚེ་བརྟན་ལགས་ཀྱི་དེབ་གསར་གཉིས་འགྲེམས་སྤེལ་བྱས་འདུག

རྒྱུས་ལོན་བྱུང་བ་ལྟར་ན། «ཨྱོན་གྱི་སོ»དང«ཕྱེད་ཙམ་ལས་མ་གླེང་པའི་གཏམ་རྒྱུད»གཉིས་ཀྱི་རྗེས་སུ། ཀྲུང་ཞིན་པར་སྐྲུན་ཁང་གིས་ཡང་བསྐྱར་པདྨ་ཚེ་བརྟན་གྱི་ཤུལ་བཞག་སྒྲུང་གཏམ་དེབ་གསར«གསོམ་ཤིང་གི་དྲི་བསུང»དང་། རྒྱ་ཡིག་ཏུ་བསྒྱུར་བའི«མི་རོ་རྩེ་སྒྲུང»གཉིས་པར་སྐྲུན་འགྲེམ་སྤེལ་གནང་འཆར་འདུག

«གསོམ་ཤིང་གི་དྲི་བསུང»ཞེས་པའི་དེབ་གསར་འདིའི་ཁྲོད་དུ་པདྨ་ཚེ་བརྟན་གྱི་སྒྲུང་གཏམ་གསར་རྙིང་བཅུ་གཉིས་ལྷག་འདུས་ཡོད་ལ། གཙོ་བོ་ཁོང་སྐུ་འཚོ་བཞུགས་སྐབས་བརྩམས་གནང་མཛད་པའི་སྒྲུང་གཏམ་གསར་པ«གསོམ་ཤིང་གི་དྲི་བསུང»དང་། ཁོང་གི་སྒྲུང་གཏམ་བརྩམས་ཆོས་ཐོག་མ«མི་དང་ཁྱི་རྒན» དེ་མིན་རྒྱ་ཡིག་ལམ་ནས་བརྩམས་པའི་སྒྲུང་གཏམ་གྲགས་ཅན«ཡུལ་གྱར་རྡུང་ལེན་པ»དང་གློག་བརྙན«འཚོལ»དང་ཁ་བྱང་གཅིག་པའི་སྒྲུང་གཏམ་སོགས་འདུས་ཡོད།

«གསོམ་ཤིང་གི་དྲི་བསུང»ཞེས་པའི་སྒྲུང་གཏམ་དེབ་གསར་འདི་ནི་པདྨ་ཚེ་བརྟན་གྱི་བུ་འཇིགས་མེད་འཕྲིན་ལས་ནས་ཁོའི་ཕ་ལགས་ཀྱི་སྒྲུང་གཏམ་སྔོན་མ་དག་ལས་ལེགས་འདེམས་ཁ་སྣོན་བྱས་ནས་གྲུབ་པ་མ་ཟད། འཇིགས་མེད་འཕྲིན་ལས་ནས་ཁོའི་ཕ་ལགས་ལ་བྲིས་པའི་རྗེས་དྲན་རྩོམ་ཡིག«ཨ་ཕ་ལགས་བདེ་བར་བཞུད་ཅིག»དང་། སྐུ་ཞབས་ཁྲིན་ཏན་ཆིན་ནས་བྲིས་པའི«སྙིང་ཉེ་བའི་པདྨ་ཚེ་བརྟན་ལགས»ཞེས་པ་གཉིས་མགོ་བརྗོད་དང་མཐའ་སྡོམ་གྱི་ཚུད་དུ་བདམས་ཡོད་འདུག

གཞན«མི་རོ་རྩེ་སྒྲུང»གི་དེབ་གསར་ནི་པདྨ་ཚེ་བརྟན་ལགས་ཀྱིས་སྔོན་ཆད་རོ་སྒྲུང་ལས་བདམས་གསེས་དང་ལོ་ཙཱ་བྱས་པ་དག་བསྡུ་སྒྲིག་བྱས་ཡོད་ལ། དེ་ནི་གསེར་དངུལ་དང་ནད་མེད་ཚེ་རིང་གི་དགོས་འདོད་ཅི་བཞིན་སྐོང་ཐུབ་པའི་རོ་དངོས་གྲུབ་ཀྱིས་བདེ་སྤྱོད་བཟང་པོར་བཤད་པའི་གནའ་གཏམ་གྱིས་བདེ་སྤྱོད་བཟང་པོའི་ཡིད་ཀྱི་བརྟན་པ་འཕྲོག་ཅིང་། ཁོས་ཡང་དང་བསྐྱར་དུ་རོ་དངོས་གྲུབ་ལ་ཨ་ལན་སྤྲད་པས་རོ་དངོས་གྲུབ་ཕྱིར་སྒྲུབ་ཁང་དུ་འཕུར་བའི་མཚར་སྒྲུང་སྟེ། བོད་ཀྱི་སྲོལ་རྒྱུན་རིན་ཐང་ལྟ་བ་གཟེངས་སུ་ཐོན་པའི་མཚར་སྒྲུང་དག་བསྡུས་ནས་གྲུབ་པ་ཞིག་རེད།

ཀརྨ་རྡོ་རྗེ་ཚེ་རིང་ལགས་ནས་བྲིས་པའི་དེབ་ཀྱི་བར་བཅུག་རི་མོ།

དེ་བཞིན་དུ«མི་རོ་རྩེ་སྒྲུང»གི་དེབ་འདིའི་ནང་དོན་འབུར་དུ་ཐོན་ཆེད། བོད་ཀྱི་རི་མོ་མཁན་སྐུ་ཞབས་ཀརྨ་རྡོ་རྗེ་ཚེ་རིང་ལགས་ནས་དེབ་འདིའི་བར་བཅུག་རི་མོ་བྲིས་ཤིང་། བོད་ཀྱི་གཏམ་དཔེ་ཡང་འོས་འཚམ་གྱིས་བཀོད་ཡོད།