སྐབས་གཉིས་པའི་རྒྱལ་ཡོངས་ཀྱི་སློབ་ཆེན་སློབ་མའི་ལས་རིགས་ཇུས་འགོད་འགྲན་ཚོགས་ཆེན་མོ་སྤེལ་མགོ་བརྩམས་པ།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། སློབ་གསོ་པུའུ་ཡིས་ཉེ་ལམ་བརྡ་སྦྱོར་དཔར་འགྲེམ་བྱས་ཏེ། སྐབས་གཉིས་པའི་རྒྱལ་ཡོངས་ཀྱི་སློབ་ཆེན་སློབ་མའི་ལས་རིགས་ཇུས་འགོད་འགྲན་ཚོགས་ཆེན་མོ་སྤེལ་མགོ་བརྩམས། འགྲན་བསྡུར་ཆེན་མོ་དེས་རྒྱལ་ཡོངས་ཀྱི་མཐོ་རིམ་སློབ་གྲྭ་དཀྱུས་མའི་སློབ་མར་འཚར་ལོངས་འགྲན་ལམ་དང་ལས་ཞུགས་འགྲན་ལམ་བཀོད་སྒྲིག་བྱ་རྒྱུ་རེད། དེའི་ནང་འཚར་ལོངས་འགྲན་ལམ་དེ་གཙོ་བོ་དངོས་གཞིའི་ཚན་ཁག་དང་ཆེད་ལས་ཚན་ཁག་གི་ལོ་རིམ་འབྲིང་དམའི་སློབ་མར་ཕྱོགས་ནས་དེས་ལུགས་མཐུན་ངང་ལས་རིགས་དམིགས་ཚད་བཟོ་བ་དང་དམིགས་ཚད་ལ་དམིགས་ནས་མུ་མཐུད་འགུལ་སྐྱོད་སྤེལ་བ་དང་འབྲེལ་རྒྱུན་ཆད་མེད་པར་ལེགས་སྒྲིག་བྱེད་པའི་འཚར་ལོངས་བརྒྱུད་རིམ་ལ་རྟོག་ཞིབ་བྱ་རྒྱུ་དང་། ལས་ཞུགས་འགྲན་ལམ་དེ་དངོས་གཞིའི་ཚན་ཁག་དང་ཆེད་ལས་ཚན་ཁག་གི་ལོ་རིམ་མཐོ་བའི་ལས་འཚོལ་སློབ་མ་དང་ཞིབ་འཇུག་སློབ་མར་ཁ་ཕྱོགས་ཏེ། ཁོང་ཚོའི་ལས་འཚོལ་གྱི་དངོས་འཐབ་ནུས་པར་རྟོག་ཞིབ་བྱེད་བཞིན་ཡོད། འགྲན་བསྡུར་གྱིས་འགྲན་བསྡུར་ནང་ཞུགས་པའི་བདམས་ཐོན་པའི་ཆེད་ལས་རྒྱབ་ལྗོངས་དང་། དམིགས་ཚད་ལས་རིགས། དེ་བཞིན་ཁོངས་གཏོགས་ལས་རིགས་སོགས་དང་ཟུང་འབྲེལ་བྱས་ནས་འགྲན་ར་དབྱེ་རྒྱུ་དང་ཁེ་ལས་གདན་དྲངས་ཏེ། ཡུལ་དངོས་སུ་དངོས་སྦྱོང་ངམ་ཡང་ན་ལས་ཞུགས་ཀྱི་འདོད་མཐུན་སྤྲད་དེ་ཤེས་ལྡན་མི་སྣའི་མཁོ་སྤྲོད་སྦྲེལ་མཐུད་ནུས་ལྡན་ཐུབ་པར་སྐུལ་འདེད་གཏོང་རྒྱུ་རེད།

འགྲན་བསྡུར་ཆེ་མོ་དེ2024ལོའི་ཟླ10པ་ནས2025ལོའི་ཟླ4པའི་བར་སྤེལ་རྒྱུ་དང་། སློབ་གྲྭའི་འགྲན་བསྡུར་དང་ཞིང་ཆེན་འགྲན་བསྡུར། རྒྱལ་ཡོངས་ཀྱི་རྟིང་རྩོད་འགྲན་བསྡུར་བཅས་ཀྱི་རིམ་པ་གསུམ་གྱི་འགྲན་བསྡུར་ལམ་ལུགས་སྤྱོད་རྒྱུ་དང་། འགྲན་བསྡུར་ཆེན་མོ་དེ་2024ལོའི་ཟླ10ཚེས22ཉིན་ནས་བཟུང་མིང་ཐོ་འགོད་རྒྱུ་དང་། འགྲན་བསྡུར་ནང་ཞུགས་པའི་སློབ་མས་རྒྱལ་ཡོངས་ཀྱི་སློབ་ཆེན་སློབ་མའི་ལས་རིགས་ཇུས་འགོད་ཀྱི་འགྲན་བསྡུར་ཆེན་མོའི་སྟེགས་བུ(དྲ་ཚིགས། zgs.chsi.com.cn)བརྒྱུད་མིང་ཐོ་འགོད་ཆོག་པ་རེད། འགྲན་བསྡུར་བྱེད་པའི་རིང་ས་གནས་སོ་སོའི་མཐོ་རིམ་སློབ་གྲྭ་ཁག་གིས་སློབ་གྲྭ་དང་ཁེ་ལས་ཀྱི་མཁོ་སྤྲོད་སྦྲེལ་མཐུད་དང་། ལས་རིགས་མྱོང་རོལ། སློབ་ཚན་སློབ་ཁྲིད་ཞིབ་བསྡུར་སྤེལ་རེས་སོགས་ཀྱི་དུས་མཚུངས་བྱེད་སྒོ་རབ་དང་རིམ་པ་སྤེལ་རྒྱུ་རེད།