ཁུལ་ཡོངས་ཀྱི་སྐྱེ་ཁམས་ཁོར་ཡུག་སྲུང་སྐྱོབ་ཚོགས་ཆེན་ཚོགས། ཤ་བོ་སྐྱབས་ཚོགས་འདུར་ཕེབས་པ་དང་འབྲེལ་གསུང་བཤད་གནང་ལ། ཀྲང་ཧྲིང་ཡོན་གྱིས་གཙོ་སྐྱོང་གནང་པ།

ཟླ11པའི་ཚེས22ཉིན། ཁུལ་ཡོངས་ཀྱི་སྐྱེ་ཁམས་ཁོར་ཡུག་སྲུང་སྐྱོབ་ཚོགས་ཆེན་ཚོགས། ཚོགས་འདུའི་ཐོག་རྒྱལ་ཡོངས་དང་ཞིང་ཆེན་ཡོངས་ཀྱི་སྐྱེ་ཁམས་ཁོར་ཡུག་སྲུང་སྐྱོབ་ཚོགས་ཆེན་དང་ཀྲུང་དབྱང་གི་སྐྱེ་ཁམས་ཁོར་ཡུག་སྲུང་སྐྱོབ་ལྟ་ཞིབ་ཚོ་ཆུང་ལྔ་པས་མཚོ་སྔོན་ཞིང་ཆེན་གྱི་བྱ་བའི་སྐུལ་སློང་ཚོགས་འདུའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ནས། ཁུལ་ཡོངས་ཀྱི་གོང་འོག་ཚང་མས་འགན་འཁྲི་འཁུར་ཕོད་པ་དང་བྱ་བ་དངོས་སྒྲུབ་རྒྱུར་སྐུལ་སློང་བྱས་ཏེ། མཛེས་སྡུག་ལྡན་པའི་མཚོ་བྱང་འཛུགས་སྐྲུན་གྱི་རྒྱང་སྐྱོད་ལམ་བུ་གསར་པ་ནུས་ཤུགས་ཡོད་རྒུས་བཏོད་དགོས། ཁུལ་ཨུའི་ཧྲུའུ་ཅི་ཤ་བོ་སྐྱབས་ཀྱིས་གསུང་བཤད་གནང་བ་དང་ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཧྲིང་ཡོན་གྱིས་གཙོ་སྐྱོང་གནང་། ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་དབྱང་ཧའེ་ལུང་དང་ཁུལ་སྲིད་གྲོས་ཀྱི་ཀྲུའུ་ཞི་པད་རྒྱལ་བཀྲ་ཤིས་ཚོགས་འདུར་ཞུགས།

ཤ་བོ་སྐྱབས་ཀྱིས་ཉེ་བའི་ལོ་ཤས་རིང་ཁུལ་ཡོངས་ཀྱི་གོང་འོག་ཚང་མས་མངགས་བཅོལ་ཡིད་ལ་བརྟན་པོར་བཅངས་ནས་སྐྱེ་ཁམས་དཔལ་ཡོན་གྱི་བཙན་ས་གཏོད་པའི་དམིགས་ཚད་ལ་དམིགས་ཏེ་ཁྱོན་ཡོངས་ལ་དམིགས་པ་དང་འགན་འཁྲི་ཡག་པོ་འཁུར་བ། སྐྱེ་ཁམས་བདེ་འཇགས་སྲུང་ཡོལ་རྒྱུན་མཐུད་ངང་བརྟན་དུ་གཏོང་བ། རྒྱལ་ཁབ་སྤྱི་གླིང་འཛུགས་སྐྲུན་ལ་གྲུབ་འབྲས་གཡུར་དུ་ཟ་བ་ཐོབ་པ། སྐྱེ་ཁམས་ཁོར་ཡུག་གི་སྤུས་ཚད་རྒྱུན་མཐུད་ངང་ཇེ་ལེགས་སུ་གཏོང་བ། སྐྱེ་ཁམས་དཔལ་ཡོན་ལམ་ལུགས་ཀྱི་མ་ལག་སྔར་ལས་འཐུས་ཚང་དུ་གཏོང་བ་བཅས་བྱས་པས་ཁུལ་ཡོངས་ཀྱི་སྐྱེ་ཁམས་དཔལ་ཡོན་འཛུགས་སྐྱོང་ལ་གྲུབ་འབྲས་མངོན་གསལ་དོད་པོ་ཐོབ་ཡོད་པར་བསྟན།

ཤ་བོ་སྐྱབས་ཀྱིས་ཁུལ་ཡོངས་ཀྱི་རིམ་པ་སོ་སོ་དང་སྡེ་ཁག་སོ་སོས་དམིགས་བསལ་གྱི་སྐྱེ་ཁམས་ཁུལ་གྱི་གནས་ཚུལ་དངོས་ལ་གཞི་ཚུགས་ནས་ཞི་ཅིན་ཕིང་གི་སྐྱེ་ཁམས་དཔལ་ཡོན་གྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱས་ཏེ་གནད་དོན་བཅོས་སྒྲིག་དང་སྐྱེ་ཁམས་སླར་གསོ་བཅོས་སྐྱོང་། ལྗང་མདོག་གཞན་སྒྱུར་འཕེལ་རྒྱས་སོགས་ཀྱི་གཙོ་གནད་ལས་འགན་དོན་འཁྱོལ་བྱ་རྒྱུར་སྐུལ་འདེད་ཏན་ཏིག་གཏོང་དགོས་ཏེ། གཅིག་ནས་སྐྱེ་ཁམས་ཁོར་ཡུག་སྲུང་སྐྱོབ་ཀྱི་ཆབ་སྲིད་འགན་འཁྲི་བརྟན་པོ་འཁུར་བ་དང་། ཞིང་ཆེན་ཏང་ཨུའི་ཧྲུའུ་ཅི་ཁྲིན་ཀང་གིས་བསྟན་པའི་ཕྱོགས་དགུའི་སྐྱེ་ཁམས་ཁོར་ཡུག་གི་མངོན་གསལ་དོད་པའི་གནད་དོན་རང་འགུལ་ངང་ངོས་ལེན་དང་བཅོས་སྒྲིག་མཐའ་གཅིག་ཏུ་བྱེད་པ། ཀྲུང་དབྱང་གི་རེས་སྐོར་གཉིས་ཀྱི་ཁོར་ཡུག་སྲུང་སྐྱོང་ལྟ་ཞིབ་དང་རྨ་ཆུའི“དྲན་སྐུལ་གློག་བརྙན”ཐེངས་གཉིས་ཀྱི་ཚུར་ལན་གནད་དོན་བཅོས་སྒྲིག་བྱས་ཚུལ་ལ་ཁྱོན་ཡོངས་ནས་ཞིབ་བཤེར་བྱས་ཏེ་གནད་དོན་བཅོས་སྒྲིག་བསྐྱར་ལོག་དང་བསྐྱར་འབྱུང་མི་ཡོང་བར་འགན་ལེན་བྱེད་དགོས། གཉིས་ནས“རྒྱལ་ཁབ་སྤྱི་གླིང་གཉིས”ཀྱི་དཔེ་སྟོན་ཁུལ་བསྐྲུན་རྒྱུར་སྤུས་ཚད་མཐོན་པོས་སྐུལ་འདེད་གཏོང་བ་དང་། རྒྱལ་ཁབ་སྤྱི་གླིང་གི་སྐྱེ་ཁམས་སླར་གསོ་དང་མཛེས་ལྗོངས་ལེགས་གཏོང་སོགས་ཀྱི་ལས་གཞི་འཛུགས་སྐྲུན་དང་སྲིད་ཇུས་དོན་འཁྱོལ་ལ་སྤྱི་འདོམས་འཆར་འགོད་དང་སྐུལ་འདེད་གཏོང་བ། གཏེར་ལས་དབང་ཆ་ཕྱིར་འཐེན་དང་ལྗང་མདོག་གཏེར་རི་འཛུགས་སྐྲུན་སོགས་ཀྱི་ལས་འགན་སོ་སོར་གཙོ་གནད་ཐོག་དམ་འཛིན་ཡག་པོ་བྱེད་དགོས། གསུམ་ནས་སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་ཡག་པོ་བརྒྱབ་ནས་གྲོང་གསེབ་ཀྱི་མི་སྡོད་ཁོར་ཡུག་བཅོས་སྐྱོང་དང་ཇེ་ལེགས་སུ་གཏོང་བའི་བྱ་སྤྱོད་དང“གསང་སྤྱོད་དང་བཙོག་ཆུ། གད་སྙིགས”བཅས་ཀྱི་གསར་བརྗེ་ཆེན་པོ་གསུམ་མུ་མཐུད་སྤེལ་ནས་རྒྱལ་ཁབ་ཀྱི་སྐྱེ་ཁམས་དཔལ་ཡོན་འཛུགས་སྐྱོང་གི་དཔེ་སྟོན་ཁུལ་དང་འཇུ་ལག་རྫོང་གི“རི་བོ་གཉིས་ཀྱི་རྟེན་གཞི”དང་རྐང་ཚ་རྫོང་དང་མདའ་བཞི་རྫོང་གི་སྐྱེ་ཁམས་དཔལ་ཡོན་དཔེ་སྟོན་རྫོང་གཏོད་པའི་བྱ་བར་སྐུལ་འདེད་མགྱོགས་པོ་གཏོང་དགོས། བཞི་ནས་སྐྱེ་ཁམས་སླར་གསོ་བཅོས་སྒྲིག་ལ་ཤུགས་བསྣན་ནས་མཚོ་སྔོན་པོ་དང་མདོ་ལ་རི་བོ་སོགས་གཙོ་གནད་སྐྱེ་ཁམས་བཟོ་སྐྲུན་འཛུགས་སྐྲུན་གཏིང་ཟབ་བྱས་ཏེ“སྲུང་སྐྱོབ་ཆེན་པོ་བྱེད་པ་ལས་གསར་སྤེལ་ཆེན་པོ་མི་བྱེད་པའི”བླང་བྱ་དོན་འཁྱོལ་ནན་མོ་བྱས་ནས་ཁྲིམས་སྲོལ་ལྟར་ལས་གཞི་ལག་བསྟར་བྱ་རྒྱུ་རྒྱུན་འཁྱོངས་ཀྱིས་གསེར་དངུལ་མཚེའུ་ཡི་འདམ་རའི་སྤྱི་གླིང་འཛུགས་སྐྲུན་གྱི་ཕན་འབྲས་སྲ་བརྟན་དུ་གཏོང་དགོས། ལྔ་ནས་སྐྱེ་ཁམས་སྲུང་སྐྱོབ་ཀྱི་ཕུགས་ཕན་ལམ་སྲོལ་འཛུགས་པ་དང་འཐུས་ཚང་དུ་བཏང་ནས་ཆུ་མཚེའུ་དཔོན་ལམ་ལུགས་དང་ནགས་རྩྭ་དཔོན་ལམ་ལམ་ལུགས་རྒྱུན་མཐུད་ངང་གཏིང་ཟབ་ཏུ་གཏོང་བ། བར་དམ་ཆུ་བོ་དང་ཙོང་ཆུའི་འབབ་རྒྱུད་ཀྱི་ས་ཁོངས་སྒྲོལ་ནས་མཉམ་དུ་ཚོད་འཛིན་དང་མཉམ་འབྲེལ་བཅོས་སྐྱོང་བྱ་རྒྱུར་ཤུགས་བསྣན་ཏེ་ཁོར་ཡུག་གི་ཁྲིམས་འགལ་ཉེས་གསོག་བྱ་སྤྱོད་སྣ་ཚོགས་ལ་རྡུང་རྡེག་ཚ་ནན་གཏོང་དགོས། དྲུག་ནས་འཕེལ་རྒྱས་གཏོང་སྟངས་དེ་ལྗང་མདོག་ཕྱོགས་སུ་བསྒྱུར་རྒྱུར་སྐུལ་འདེད་མགྱོགས་སུ་བཏང་ནས“ཐོན་ལས་ཆེ་གྲས་ལྔའི”སྤུས་ཚད་མཐོར་གཏོང་དང་ཕན་འབྲས་ཆེར་གཏོང་། སྐྱེ་ཁམས་ཕྱུགས་ལས་ཀྱི“གཅིག་ཅན་བརྒྱད”ཀྱི་བཟོ་སྐྲུན་ཆ་ཚང་ལག་བསྟར། མཐོན་པོ་སྒང་གསར་བརྗེའི་ཉམས་ཞིབ་སློབ་སྦྱོང་རྟེན་གཞི་གཏོད་པ། “རླབས་ཕྲེང་དགུང་དུ་འཕྱུར་བའི”མཚོ་སྔོན་པོ་དང་མདོ་ལའི་འདབས་ཀྱི་ཕྱུགས་ར་བཟང་པོའི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ས་ཁོངས་ཀྱི་སྤྱི་སྤྱོད་ཆས་རྟགས་གཏོད་པ།“123”Aརིམ་པའི་མཛེས་ལྗོངས་ཁུལ་གཏོད་པ་སོགས་གཙོ་གནད་བྱ་བ་དོན་འཁྱོལ་བྱ་རྒྱུར་མུ་མཐུད་དམ་འཛིན་ཡག་པོ་བྱས་ཏེ་འོད་རླུང་གློག་སོགས་ནུས་རྒྱུ་གཙང་མའི་གཙོ་གནད་ལས་གཞི་གོ་རིམ་ལྡན་པའི་ངང་ལག་བསྟར་དོན་འཁྱོལ་བྱ་རྒྱུར་སྐུལ་འདེད་བཏང་སྟེ་སྐྱེ་ཁམས་སྔོན་ལ་འཇོག་པ་དང་གཙོ་གནད་ཐོན་ལས་འཕེལ་རྒྱས་གཏོང་དགོས། བདུན་ནས་སྐྱེ་ཁམས་ཁོར་ཡུག་གི་ཉེན་ཁ་འགོག་ཟོན་དང་སེལ་རྒྱུར་ཤུགས་བསྣན་ནས་མ་མཐའི་མཚམས་ཐིག་གི་བསམ་གཞིག་ལ་ཤུགས་སྣོན་པ། ཉེན་ཁ་སྔོན་འགོག་ཚོད་འཛིན་གྱི་ལམ་སྲོལ་འཐུས་ཚང་དུ་གཏོང་བ་བཅས་བྱས་ནས་སྐྱེ་ཁམས་ཁོར་ཡུག་སྲུང་སྐྱོབ་དང་སྦགས་བཙོག་འགོག་བཅོས། མཁོ་བསྟུན་འགན་ལེན་དང་ཐག་གཅོད་བཅས་ཀྱི་ནུས་པ་ཁྱོན་ཡོངས་ནས་ཆེ་རུ་གཏོང་དགོས་པ་ནན་གྱིས་བསྟན།

ཤ་བོ་སྐྱབས་ཀྱིས་ས་གནས་སོ་སོ་དང་སྡེ་ཁག་སོ་སོས་ཐུན་མོང་གི་ངོས་འཛིན་གཅིག་ཏུ་སྒྲིལ་ནས་བརྗོད་དོན་གཅིག་མཚུངས་ངང་ལན་འདེབས་པ་དང་མཉམ་ཤུགས་འགག་སྒྲོལ་བྱས་ཏེ་ཏང་སྲིད་མགོ་ཁྲིད་གཙོ་བོས“དངོས་སུ་བཞིའི”བླང་བྱ་དོན་འཁྱོལ་བྱེད་པ་དང་སྐྱེ་ཁམས་ཁོར་ཡུག་སྡེ་ཁག་གིས་སྤྱི་འདོམས་མཐུན་སྦྱོར་དང་ལྟ་སྐུལ་དོ་དམ་ལ་ཤུགས་སྣོན་པ། ལས་རིགས་སྡེ་ཁག་སོ་སོས་སྐྱེ་ཁམས་ཁོར་ཡུག་སྲུང་སྐྱོབ་ཀྱི་འགན་འཁྲིའི་གསལ་ཐོ་དོན་འཁྱོལ་ནན་ཏན་བྱེད་པ། སྒྲིག་བཤེར་ལྟ་ཞིབ་ལས་ཁུངས་ཀྱིས་ཀྲུང་དབྱང་དང་ཞིང་ཆེན། ཁུལ་ཨུའི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་མཐའ་གཅིག་ཏུ་མི་བྱེད་པ་དང་མཐར་ཕྱིན་བྱས་མེད་པའི་སྡེ་ཁག་དང་ས་ཁུལ་ལ་འགན་འཁྲི་བདའ་འདེད་ནན་མོ་གཏོང་དགོས་པའི་བླང་བྱ་བཏོན།

ཀྲང་ཧྲིང་ཡོན་གྱིས་ས་གནས་སོ་སོ་དང་སྡེ་ཁག་སོ་སོས་ངོས་འཛིན་ཟབ་ཏུ་གཏོང་བ་དང་བསམ་བློའི་རང་རྟོགས་ལ་ཤུགས་བསྣན་ཏེ་སྐྱེ་ཁམས་དཔལ་ཡོན་འཛུགས་སྐྲུན་གྱི་ཆབ་སྲིད་འགན་འཁྲི་མཐའ་གཅིག་ཏུ་ཁུར་ནས“རང་ལ་སྲུང་སྐྱོབ་བྱེད་པ”ནས“རང་གིས་སྲུང་སྐྱོབ་བྱེད་པའི”བར་གྱི་འདུ་ཤེས་ལ་འགྱུར་ལྡོག་བཏང་སྟེ་སྤུས་ཚད་མཐོན་པོས་བྱ་བའི་ལས་འགན་སོ་སོ་ལེགས་སྒྲུབ་བྱེད་དགོས། འགག་རྩའི་གནད་དོན་ལ་དམིགས་པ་དང་བྱ་ཐབས་དོན་འཁྱོལ་བྱ་རྒྱུར་མཐོང་ཆེན་བྱེད་པ། གཙོ་གནད་གནད་དོན་སྣ་ཚོགས་དང་གཙོ་གནད་བྱ་བར་མགྱོགས་མྱུར་སྐུལ་འདེད་གཏོང་བ་བཅས་བྱས་ནས་ལས་འགན་སོ་སོར་མི་དང་བྱ་བ། འགན་འཁྲི། ཕན་འབྲས་བཅས་ཐོན་རྒྱུའི་འགན་ལེན་བྱེད་དགོས། མཐུན་སྦྱོར་མཉམ་འགུལ་གྱིས་ཞིང་ཆེན་ཡོངས་ཀྱི་སྐྱེ་ཁམས་ཁོར་ཡུག་སྲུང་སྐྱོབ་ཀྱི་མངོན་གསལ་དོད་པའི་སྤྱི་ཡོངས་ཀྱི་གནད་དོན་ལ་དམིགས་ཏེ་ཟུར་བསྟན་ལེབ་མཐོང་དང་། ཕྱོགས་ཡོངས་ནས་རང་བཤེར་བྱེད་པ། དག་ཐེར་ནན་ཏན་བཅས་བྱེད་དགོས་པའི་བླང་བྱ་བཏོན།

ཚོགས་འདུའི་ཐོག་རེས་སྐོར་གསུམ་པའི་ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོང་ལྟ་ཞིབ་དང་ཞིབ་བཤེར་བྱ་བ་ཡག་པོ་བསྒྲུབ་རྒྱུའི་ཐད་སྐུལ་སློང་དང་བཀོད་སྒྲིག་བྱས་ལ། ས་གནས་སོ་སོ་དང་སྡེ་ཁག་སོ་སོས་ཆབ་སྲིད་ཀྱི་ལངས་ཕྱོགས་མཐོ་རུ་གཏོང་བ་དང་འགན་འཁྲི་འཁུར་ཤུགས་ཆེ་རུ་གཏོང་བ། ཚད་གཞི་མཐོ་ཤོས་དང་བླང་བྱ་ནན་ཤོས་ཀྱི་ཐོག་ནས་བྱ་བ་སོ་སོ་བཀོད་སྒྲིག་ཡག་པོ་དང་དོན་འཁྱོལ་ཡག་པོ་བྱས་ཏེ་ནུས་ཤུགས་ཡོད་རྒུས་ཀྲུང་དབྱང་ཁོར་ཡུག་སྲུང་སྐྱོབ་ལྟ་ཞིབ་ཚོ་ཆུང་གི་མཚོ་བྱང་གི་བྱ་བའི་ཐད་ལ་རྒྱབ་སྐྱོར་དང་གཞོགས་འདེགས་ཡག་པོ་བྱས་ནས་ལྟ་ཞིབ་བྱ་བ་བདེ་བླག་ངང་སྤེལ་ཐུབ་པའི་འགན་ལེན་བྱེད་དགོས་པའི་བླང་བྱ་བཏོན།

ཁུལ་དཔོན་གཞོན་པ་མ་རུའུ་ཞང་གིས2023ལོའི་ཁུལ་ཡོངས་ཀྱི་སྐྱེ་ཁམས་ཁོར་ཡུག་བྱ་བའི་གནས་ཚུལ་བརྡ་ཁྱབ་བཏང་ཞིང་། འཇུ་ལག་རྫོང་དང་རྐང་ཚ་རྫོང་། ཁུལ་ནགས་ཚལ་དང་རྩྭ་ཐང་ཅུས། ཁུལ་ཞིང་ཕྱུགས་ཅུས་སོགས་ས་ཁུལ་དང་ལས་ཁུངས8ཀྱིས་བརྗེ་རེས་གཏམ་བཤད་བྱས། 

ཚོགས་འདུ་བརྙན་ལམ་རྣམ་པའི་ཐོག་ནས་རྫོང་རིམ་པ་དང་པོར་སྤེལ་ཞིང་། ཁུལ་གྱི་མགོ་ཁྲིད་ཝང་ཡུང་ཁྲང་དང་ལའེ་མེན། ཚོ་ཅི་ཆང་། ཧ་ཝུན་ཞུག ཁུལ་ཨུའི་སྡེ་ཁག་སོ་སོ། ཁུལ་སྲིད་གཞུང་གི་ལས་ཁུངས་སོ་སོ། མང་ཚོགས་ཚོགས་པའི་རྩ་འཛུགས་སོ་སོ་བཅས་ཀྱི་འགན་འཁུར་བློ་མཐུན་གཙོ་བོ་ཚོགས་ར་གཙོ་བོའི་ཚོགས་འདུར་ཞུགས།