ལིས་ཆང་གིས་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་ལ་མགོ་འཛིན་མཛད།

ཟླ3ཚེས28ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་གིས་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་ལ་མགོ་འཛིན་མཛད་དེ། རྒྱལ་མཚམས་ལས་བརྒལ་བའི་གློག་རྡུལ་ཚོང་དོན་ཕྱོགས་བསྡུས་ཚོད་ལྟའི་ཁུལ་འཛུགས་སྐྲུན་ལ་སྐུལ་འདེད་གཏོང་བའི་སྙན་ཞུར་གསན་པ་དང་། ཁེ་ལས་དངུལ་ཆད་བྱ་བ་མགྱོགས་མྱུར་སྒོས་གཙང་སེལ་བྱེད་པར་ཤུགས་སྣོན་པར་བཀོད་སྒྲིག་བྱས་ལ། ཞིང་འཕྲུལ་སྒྲིག་ཆས་སྤུས་ཚད་མཐོ་བའི་འཕེལ་རྒྱས་ཀྱི་འབྲེལ་ཡོད་བྱེད་ཐབས་ལ་ཞིབ་འཇུག་བྱེད་པར་སྐུལ་འདེད་བཏང་བ་དང་། 《གྲུ་ཁའི་སྒོ་འབྱེད་བཀོད་སྒྲིག་ཇེ་ལེགས་སུ་གཏོང་བའི་སྐོར་གྱི་བསམ་འཆར་འགའ》ལ་གྲོས་ཞིབ་བྱས་ནས་གྲོས་འཆམ་བྱུང་།

གྲོས་ཚོགས་ལས་བསྟན་དོན། རྒྱལ་མཚམས་ལས་བརྒལ་བའི་གློག་རྡུལ་ཚོང་དོན་འཕེལ་རྒྱས་ཀྱི་མྱུར་ཚད་མགྱོགས་པ་དང་སྦས་ཤུགས་ཆེ་ལ། སྐུལ་ཁྲིད་ནུས་པ་ཆེ་བས།    རང་རྒྱལ་གྱི་ཕྱི་ཕྱོགས་ཚོང་དོན་འཕེལ་རྒྱས་ཀྱི་སྟོབས་ཤུགས་གལ་ཆེན་ཞིག་ཏུ་གྱུར་ཡོད།     རེས་སྐོར་གསར་པའི་རྒྱལ་མཚམས་ལས་བརྒལ་བའི་གློག་རྡུལ་ཚོང་དོན་ཕྱོགས་བསྡུས་ཚོད་ལྟའི་ཁུལ་རྒྱ་བསྐྱེད་པའི་བྱ་བ་ཡག་པོར་སྒྲུབ་ནས་ཁྱབ་རྒྱ་སྔར་ལས་ཆེ་རུ་གཏོང་དགོས།     རྒྱལ་མཚམས་ལས་བརྒལ་བའི་གློག་རྡུལ་ཚོང་དོན་ཕྱོགས་བསྡུས་ཚོད་ལྟའི་ཁུལ་རིམ་སྤོར་འཛུགས་སྐྲུན་བྱེད་པར་སྐུལ་འདེད་གཏོང་བ་དང་། འགག་སྒོ་ལས་བརྒལ་བ་དང་ཁྲལ་དོན། ཕྱི་རྒྱལ་གྱི་དངུལ་ལོར། གཞི་གྲངས་འཁོར་རྒྱུགས་སོགས་ལྟ་སྐུལ་དོ་དམ་ཀྱི་གསར་གཏོད་ལ་སྐུལ་འདེད་བཏང་ནས། ཕྱི་ཕྱོགས་ཚོང་དོན་བརྟན་བརླིང་ལ་རྒྱབ་སྐྱོར་བྱེད་པའི་འབྲེལ་ཡོད་སྲིད་ཇུས་བེད་སྤྱོད་ཡག་པོ་བྱས་ཏེ། ཁེ་ལས་ཀྱིས་ཁྲོམ་ར་རྒྱ་བསྐྱེད་པ་དང་ཟོང་རྟགས་བསྐྲུན་པ། འཕེལ་རྒྱས་སྔར་ལས་ལེགས་པོ་བྱེད་པར་རོགས་རམ་བྱ་དགོས།

གྲོས་ཚོགས་ལས《མགྱོགས་མྱུར་སྒོས་ཁེ་ལས་ཀྱི་རྩིས་དངུལ་ཆད་འགྱངས་གཙང་སེལ་ལ་ཤུགས་སྣོན་པའི་འགུལ་སྐྱོད་ཇུས་གཞིར》གྲོས་ཞིབ་བྱས་ནས་གྲོས་འཆམ་བྱུང་། གྲོས་ཚོགས་ལས་ནན་གྱིས་བསྟན་དོན། དུས་སྔོན་གྱི་བྱ་བའི་རྨང་གཞིའི་སྟེང་སྔར་ལས་ཤུགས་བསྣན་ཏེ། འགན་འཁྲི་གཟབ་ནན་དུ་གཏོང་བ་དང་རྐྱེན་སྲོལ་འཐུས་ཚང་དུ་གཏོང་བ། འབྲེལ་ཡོད་ཁྲིམས་ལུགས་ཁྲིམས་སྲོལ་འཐུས་ཚང་དུ་གཏོང་བ། མགོ་ཁུངས་བཅོས་སྐྱོང་དང་ཡིད་རྟོན་མེད་པའི་རིགས་ལ་ཆད་གཅོད་བྱེད་ཤུགས་ཆེ་རུ་བཏང་ནས། ཆད་དངུལ་གཙང་སྤྲོད་བྱ་བར་ཕན་འབྲས་དངོས་ཐོབ་པར་ཁག་ཐེག་བྱས་ནས། ཆད་འགྱངས་གསར་དུ་མི་སྣོན་པར་ཁག་ཐེག་བྱ་དགོས།

གྲོས་ཚོགས་ལས་བསྟན་དོན། ཞིང་འཕྲུལ་སྒྲིག་ཆས་ནི་རྒྱལ་ཁབ་ཀྱི་འབྲུ་རིགས་བདེ་འཇགས་འགན་སྲུང་དང་ཞིང་ལས་སྟོབས་ལྡན་རྒྱལ་ཁབ་འཛུགས་སྐྲུན་བྱེད་པའི་འདེགས་སྐྱོར་གལ་ཆེན་ཞིག་ཡིན།  ཞིང་ལས་ཀྱི་དགོས་མཁོར་ཁ་ཕྱོགས་པ་དང་གཙོ་གནད་ཁྱབ་ཁོངས་ལ་དམིགས་པ་རྒྱུན་འཁྱོངས་བྱས་ཏེ། རྨང་གཞིའི་ལག་རྩལ་ཚད་བརྒལ་གཏོང་བ་དང་གསར་གཏོད་མ་ལག་འཐུས་ཚང་དུ་གཏོང་བ། སྤུས་ལེགས་ཀྱི་ཁེ་ལས་གསོ་སྐྱོང་བྱེད་པ། ཐོན་ལས་ཁྱུ་ཚོགས་བསྐྲུན་པ་སོགས་ཀྱི་ཐད་ནས་ཕྱོགས་བསྡུས་ཇུས་འདོན་བྱས་ཏེ། མཚོན་རྟགས་རང་བཞིན་གྱི་ཐོན་རྫས་ཞིབ་འཇུག་གསར་བཟོ་དང་འགག་རྩའི་ལྟེ་བའི་ལག་རྩལ་འགག་སྒྲོལ་ཇེ་མགྱོགས་སུ་གཏོང་དགོས། ཞིང་ལས་འཕྲུལ་ཆས་ཉོ་བ་དང་ཉེར་སྤྱོད་ཁ་གསབ། གཞི་ཁྱོན་ཆེ་བའི་སྒྲིག་ཆས་གསར་བརྗེ་སོགས་སྲིད་ཇུས་ཀྱི་བྱེད་ཐབས་བེད་སྤྱོད་ཡག་པོ་དང་འདང་ངེས་བྱས་ཏེ། ཚོད་ལྟའི་ར་སྤྲོད་དང་བྱང་ཆ་ལྡན་པའི་བེད་སྤྱོད་ལ་ཤུགས་བསྣན་ནས། སྔོན་ཐོན་བཀོལ་བདེའི་ཞིང་འཕྲུལ་སྒྲིག་ཆས་ཁྲོམ་རར་རྒྱ་བསྐྱེད་རྒྱུར་སྐུལ་འདེད་གཏོང་དགོས། ཚད་གཞིའི་སྣེ་ཁྲིད་ནུས་པ་འདོན་སྤེལ་བྱས་ནས་གསལ་འབྱེད་དང་ཞིབ་དཔྱད་ཚད་ལེན་གྱི་ཁས་ལེན་དཔང་འདོན་ཡག་པོ་བྱས་ཏེ། སྤུས་ཚད་ལྟ་སྐུལ་དོ་དམ་བྱེད་ཤུགས་ཆེ་རུ་བཏང་ནས། ཞིང་འཕྲུལ་སྒྲིག་ཆས་ཐོན་རྫས་ཀྱི་རིམ་སྤོར་ཇེ་མགྱོགས་སུ་གཏོང་རྒྱུར་སྐུལ་འདེད་གཏོང་དགོས།

གྲོས་ཚོགས་ལས་བསྟན་དོན། གྲུ་ཁའི་སྒོ་འབྱེད་བཀོད་སྒྲིག་ཇེ་ལེགས་སུ་གཏོང་བ་ནི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་། ཆུ་ཚད་མཐོ་བའི་སྒོ་འབྱེད་པའི་བྱེད་ཐབས་གལ་ཆེན་ཞིག་ཡིན། ངེས་གནས་གསལ་བོ་བྱེད་པ་དང་བྱེད་ནུས་གསབ་རེས་བྱས་ཏེ་མཚོ་རྒྱུད་དང་མཐའ་མཚམས། མཁའ་འགྲུལ། ནང་ལོག་གི་གྲུ་ཁའི་འགག་སྒོ་བསྐྲུན་རྒྱུ་དང་། གཙོ་གནད་ལྟེ་གནས་དང་ས་ཁོངས་ཀྱི་སྦྲེལ་ཚིགས་དང་འགག་སྒོ་འཛུགས་སྐྲུན་ཇེ་མགྱོགས་སུ་གཏོང་བ། མཐའ་མཚམས་ཀྱི་འགག་སྒོའི་ནུས་པ་དང་སྤུས་ཚད་རྒྱ་ཆེར་གཏོང་རྒྱུར་སྐུལ་འདེད་གཏོང་བ། ཆེད་ལས་གྲུ་ཁའི་ནུས་པ་རྒྱ་བསྐྱེད་པ། ལེགས་བསྡུས་ཞིབ་གཉེར་གྱི་རིག་ནུས་གྲུ་ཁ་འཛུགས་སྐྲུན་ལ་སྐུལ་འདེད་གཏོང་བ།  སྔར་ལས་ལྷག་པའི་སྒོ་ནས་གྲུ་ཁའི་སྟབས་བདེ་ཚད་ཆེ་རུ་གཏོང་བ་དང་། ཕྱོགས་ཡོངས་ནས་གྲུ་ཁའི་དཔལ་འབྱོར་ཕན་འབྲས་དང་སྤྱི་ཚོགས་ཀྱི་ཕན་འབྲས། བདེ་འཇགས་ཀྱི་ཕན་འབྲས་བཅས་མཐོ་རུ་བཏང་སྟེ། གྲུ་ཁའི་རྒྱལ་ནང་དང་རྒྱལ་སྤྱིའི་འཁོར་སྐྱོད་ཀྱི་ནུས་པ་སྔར་ལས་ཆེ་བ་འདོན་སྤེལ་བྱེད་དུ་འཇུག་དགོས།

གྲོས་ཚོགས་ལས་ད་དུང་དོན་དག་གཞན་དག་ལ་ཞིབ་འཇུག་བྱས།


གསར་ཤོས།

སྐད་འཕྲིན་སྤྱི་སྟེགས་ཨང་གྲངས།

微信扫一扫加关注

返回
顶部
移动端 公众号 抖音号 快手号