རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་གསུམ་པའི་གྲོས་གཞི་རྩིས་སྤྲོད་ཚོགས་འདུ་པེ་ཅིན་དུ་འཚོགས།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་གསུམ་པའི་གྲོས་གཞི་རྩིས་སྤྲོད་ཚོགས་འདུ་ཉིན25པེ་ཅིན་དུ་འཚོགས། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་ནམ་རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་ཧྲི་ཐའེ་ཧྥིན་ཚོགས་འདུར་ཞུགས་པ་མ་ཟད་གཏམ་བཤད་གནང་།

ཧྲི་ཐའེ་ཧྥིན་གྱིས་བསྟན་དོན། ཀྲུང་གུང་ཀྲུང་དབྱང་གི་མགོ་ཁྲིད་བརྟན་པོའི་འོག རྒྱལ་ཡོངས་སྲིད་གྲོས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་དམངས་སྲིད་གྲོས་ཀྱི་ལས་དོན་ལེགས་བཅོས་དང་ལ་ཤུགས་སྣོན་བྱེད་པའི་སྐོར་གྱི་དགོངས་པ་གལ་ཆེན་མཐའ་གཅིག་ཏུ་ལག་བསྟར་བྱས་ཏེ། “གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ཤེས་རྟོགས་གཏིང་ཟབ་བྱས་ཏེ། “འདུ་ཤེས་བཞི”ཇེ་དྲག་དང“ཡིད་ཆེས་བཞི”སྲ་བརྟན།  “སྲུང་སྐྱོང་གཉིས”སྒྲུབ་ཐུབ་པར་བྱས་ནས། དར་ཆ་མཐོན་པར་བསྒྲེངས་ནས་ཆབ་སྲིད་གླེང་བ་དང་བདེན་སྲུང་གསར་གཏོད་ཀྱིས་སྤུས་ཀ་དང་ཕན་འབྲས་མཐོར་འདེགས་གཏོང་བ་དེ་བྱ་བའི་གཙོ་ཐིག་ཏུ་བཟུང་སྟེ། སྐུལ་སྒྲུབ་ཀྱི་དངོས་ཕན་ཇེ་ཆེར་གཏོང་བ་དང་། གྲོས་གཞི་སྒྲུབ་པའི་ལམ་ལུགས་འཐུས་ཚང་དུ་བཏང་ནས། གྲོས་གཞི་ཐག་གཅོད་ཀྱི་སྤུས་ཚད་དང་ཕན་ནུས་སྔར་བས་མཐོ་རུ་གཏོང་བ་དང་། གྲོས་གཞིས་མཚོན་པའི་སྤྱི་ཚོགས་ཀྱི་སྣང་ཚུལ་དང་དམངས་ཀྱི་འདོད་བློ། ཚན་རིག་གི་ཇུས་ཆོད་ལ་ཞབས་ཞུ་སྒྲུབ་པའི་ནུས་པ་མཐོར་འདེགས་སུ་གཏོང་དགོས། 

ཧྲི་ཐའེ་ཧྥིན་གྱིས་བསྟན་དོན། ཆབ་སྲིད་ཀྱི་ལངས་གནས་མཐོར་འདེགས་དང་བྱ་བའི་ནང་རྐྱེན་འཐུས་ཚང་དུ་གཏོང་བ། བྱེད་ཐབས་བྱེད་ཕྱོགས་གསར་སྐྲུན་བྱེད་པ། ལས་སྒྲུབ་ཀྱི་འགན་འཁྲི་གཟབ་ནན་དུ་གཏོང་བ། ལས་སྒྲུབ་ཀྱི་གཙོ་གནད་འབུར་དུ་བཏོད་པ། གྲོས་མོལ་མཐུན་སྦྱོར་ལ་ཤུགས་སྣོན་པ་བཅས་ཀྱིས་ལས་སྒྲུབ་ཀྱི་སྤུས་ཚད་དང་ཕན་འབྲས་ལ་སྔར་བས་མཐོང་ཆེན་བྱེད་དགོས་ཤིང་། གྲོས་གཞིའི་དབྱེ་ཞིབ་དང་ཞིབ་འཇུག་ལ་ཤུགས་བསྣན་ནས། ལུགས་མཐུན་བསམ་འཆར་བསྡུ་ལེན་ཧུར་ཐག་བྱེད་པ་དང་། ཚན་རིག་ལྟར་བྱེད་ཐབས་ཀྱི་ཐབས་ཇུས་བཏོན་ནས། གྲོས་གཞི་འདོན་པ་དང་གནད་དོན་ཐག་གཅོད་བར་ཕན་ཚུན་སྐུལ་འདེད་བྱེད་པ་དང་། སྤུས་ཚད་མཐོ་བའི་གྲོས་གཞི་ཐག་གཅོད་ཀྱིས་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱས་ནས། བཅོས་སྒྱུར་སྔར་བས་ཁྱོན་ཡོངས་ནས་གཏིང་ཟབ་ཏུ་གཏོང་བ་དང་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་ཁྲོད་ཀྱི་སྲིད་གྲོས་གྲོས་གཞིའི་ནུས་པ་སྔར་ལས་ལེགས་པར་འདོན་སྤེལ་བྱེད་དགོས།

རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་དྲུང་ཡིག་ཆེན་མོ་ཝང་ཏུང་ཧྥིན་གྱིས་ཚོགས་འདུར་མགོ་འཛིན་བྱས། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་དབྱང་ཀྲེན་ཚོགས་འདུར་ཞུགས། ཀྲུང་གུང་ཀྲུང་དབྱང་གཞུང་སྒྲུབ་ཐིན་དང་རྒྱལ་སྲིད་སྤྱི་ཁྱབ་ཁང་གི་གཞུང་སྒྲུབ་ཐིན་གྱི་འབྲེལ་ཡོད་སྡེ་ཁག་གི་འགན་འཁུར་བློ་མཐུན་དང་། རྒྱལ་ཡོངས་སྲིད་གྲོས་གཞུང་སྒྲུབ་ཐིན་དང་ཆེད་དོན་ཨུ་ཡོན་ལྷན་ཁང་ཁག་གི་འབྲེལ་ཡོད་འགན་འཁུར་བློ་མཐུན། གྲོས་གཞི་སྒྲུབ་གཉེར་ལས་ཁུངས་ཁག་ཅིག་གི་འབྲེལ་ཡོད་འགན་འཁུར་བློ་མཐུན་སོགས་ཚོགས་འདུར་ཞུགས་ཡོད། །