ལིས་ཆང་གིས་ཡ་གླིང་གསར་སྤེལ་དངུལ་ཁང་གི་མགོ་གཙོ་ལ་མཇལ་འཕྲད་གནང་།

 རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་གིས་ཚེས24ཉིན་པེ་ཅིང་དུ་ཡ་གླིང་གསར་སྤེལ་དངུལ་ཁང་གི་མགོ་གཙོ་ཧྲིན་ཐེན་ཀྲིན་རིན་ལ་མཇལ་འཕྲད་གནང་།

ལིས་ཆང་གིས་བསྟན་དོན། འཛམ་གླིང་དཔལ་འབྱོར་སླར་གསོ་དལ་ཞིང་། བརྟན་འཇགས་མིན་པ་དང་གཏན་འཁེལ་མིན་པའི་རང་བཞིན་ཆེ་རུ་འགྲོ་བའི་རྒྱབ་ལྗོངས་འོག ཡ་གླིང་གི་རྒྱལ་ཁབ་ཀྱིས་མཐུན་སྒྲིལ་རོགས་རེས་ལ་ཤུགས་སྣོན་དང་། ཕྱོགས་མང་རིང་ལུགས་རྒྱུན་འཁྱོངས་བྱས་ཏེ་ཁུལ་ཁོངས་དཔལ་འབྱོར་གཞི་གཅིག་ཅན་ལ་ཧུར་ཐག་གིས་སྐུལ་འདེད་གཏོང་བ་དང་། སྤྱི་ཁོག་སྲིད་ཇུས་མཐུན་སྦྱོར་ལ་ཤུགས་སྣོན་བྱེད་པ། ཚན་རྩལ་གསར་སྐྲུན་ཐད་བརྗེ་རེས་མཉམ་ལས་གཏིང་ཟབ་ཏུ་གཏོང་བ། རིགས་སོ་སོའི་ཉེན་ཁར་སྔར་ལས་སྔོན་འགོག་བྱས་ཏེ་ལག་རྡང་སྦྲེལ་ནས་ཐུན་མོང་འཕེལ་རྒྱས་མངོན་འགྱུར་བྱེད་འོས། ཀྲུང་གོས་བརྟན་འཇགས་དང་བདེ་ཐང་གི་དཔལ་འབྱོར་འཕར་སྣོན་དང་། དགེ་མཚན་ལྡན་པའི་སྒོ་འབྱེད་མཉམ་ལས་ལ་བརྟེན་ནས་ཡ་གླིང་དང་འཛམ་གླིང་འཕེལ་རྒྱས་ཐད་སྔར་ལས་མང་པོའི་བརྟན་འཇགས་རང་བཞིན་ཁ་སྣོན་བྱ་རྒྱུ་ཡིན། ཀྲུང་གོ་ཕྱོགས་ཀྱིས་ཡ་གླིང་གསར་སྤེལ་དངུལ་ཁང་དང་མཉམ་དུ་མ་དངུལ་དང་ཤེས་བྱ་སོགས་ཕྱོགས་ཡོངས་མཉམ་ལས་སྔར་ལས་རྒྱ་བསྐྱེད་དེ། ཕྱོགས་གཉིས་ཀྱི་རོགས་རེས་འབྲེལ་བ་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་གཏོང་འདོད་ཡོད།

ཧྲིན་ཐེན་ཀྲིན་རིན་གྱིས་བསྟན་དོན། ཀྲུང་གོས་དཔལ་འབྱོར་བརྟན་འཇགས་དང་བདེ་ཐང་ངང་འཕར་སྣོན་འབྱུང་བ་མངོན་འགྱུར་བྱས་ཏེ། ཡ་གླིང་དང་གོ་ལ་ཧྲིལ་བོའི་དཔལ་འབྱོར་འཕར་སྣོན་ལ་སྐུལ་འདེད་གཏོང་བར་བྱས་རྗེས་གལ་ཆེན་བཞག་ཡོད། ཡ་གླིང་གསར་སྤེལ་དངུལ་ཁང་གིས་ཀྲུང་གོ་ཕྱོགས་དང་ཤེས་བྱ་གསར་སྐྲུན་དང་ལྗང་མདོག་འཕེལ་རྒྱས་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་བྱེད་པར་ཚད་མཐོའི་མཐོང་ཆེན་བྱས་ཏེ་ཡ་གླིང་དང་ཞི་བདེ་རྒྱ་མཚོ་ཆེན་མོའི་ས་ཁུལ་གྱི་འཕེལ་རྒྱས་ལ་སྐུལ་འདེད་གཏོང་འདོད་ཡོད་ཟེར།