ཞིང་ཆེན་སྲིད་གྲོས་ཀྱིས་ལག་བསྟར་བསམ་འཆར་བཏོན་ནས་ཨུ་ཡོན་གྱི་འགན་ནུས་སྒྲུབ་པའི་ནུས་པ་འདོན་སྤེལ་གང་ལེགས་བྱས།

མི་དམངས་སྲིད་གྲོས་ཀྱི་ལས་དོན་ལ་ཤུགས་སྣོན་དང་ལེགས་བཅོས་བྱ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་ལག་བསྟར་དོན་འཁྱོལ་གཏིང་ཟབ་བྱེད་ཆེད། ཉེ་ལམ་ཞིང་ཆེན་སྲིད་གྲོས་ཀྱིས《ཞིང་ཆེན་སྲིད་གྲོས་ཨུ་ཡོན་གྱི་འགན་ནུས་སྒྲུབ་པའི་ནུས་པ་འདོན་སྤེལ་གང་ལེགས་བྱ་རྒྱུའི་སྐོར་གྱི་སྲིད་གྲོས་མཚོ་སྔོན་ཞིང་ཆེན་ཨུ་ཡོན་ལྷན་ཁང་གི་ལག་བསྟར་བསམ་འཆར(ཚོད་ལྟའི་ལག་བསྟར)》(བསྡུས་མིང་ལ《ལག་བསྟར་བསམ་འཆར》ཞེས་བཀོད་ཡོད)བཟོས་ནས་པར་འགྲེམས་བྱས་ཏེ་སྔར་ལས་ལྷག་པའི་སྒོ་ནས་ཨུ་ཡོན་གྱི་འགན་འཁྲི་སྒྲུབ་པའི་གསོན་ཤུགས་འཕེལ་བ་དང་སྲིད་གྲོས་ཀྱི་བྱ་བའི་ཕན་ནུས་ཆེ་རུ་བཏང་སྟེ།  ཀྲུང་གོའི་ཁྱད་ཆོས་ཀྱི་དེང་རབས་ཅན་གྱི་མཚོ་སྔོན་གྱི་ལག་ལེན་ལ་སྐུལ་འདེད་གཏོང་ཆེད་སྲིད་གྲོས་ཀྱི་སྟོབས་ཤུགས་འབུལ་དགོས།

《ལག་བསྟར་བསམ་འཆར》ནང་ཐོག་མར་དར་ཆ་གསལ་སྒྲེང་གིས་ཆབ་སྲིད་ལ་མཐོང་ཆེན་བྱེད་པ་དང་། ཨུ་ཡོན་ཚོས་ངེས་པར་དུ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱས་ཏེ“འདུ་ཤེས་བཞི”ཇེ་དྲག་ཏུ་གཏོང་བ་དང་།“ཡིད་ཆེ་བཞི”ཇེ་བརྟན་དུ་གཏོང་བ།“སྲུང་སྐྱོང་གཉིས”བསྒྲུབ་ཐུབ་པ་བཅས་བྱས་ནས།   བསམ་བློ་དང་། ཆབ་སྲིད། བྱ་སྤྱོད་བཅས་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཀྲུང་གུང་ཀྲུང་དབྱང་དང་ཚད་མཐོའི་གཅིག་གྱུར་ཡོང་བར་འགན་ལེན་བྱེད་དགོས། “སྲིད་གྲོས་ཤེས་པ་དང་། གྲོས་མོལ་བྱེད་ཤེས་པ། སྲིད་གླེང་བྱེད་མཁས་པ། སྒྲིག་ཁྲིམས་ལ་བརྩི་སྲུང་དང་། ལུགས་སྲོལ་ལ་དང་དོད། སྤྱོད་ལམ་གཙིགས་འཛིན་”བཅས་བྱ་དགོས་པའི་བླང་བྱ་དོན་འཁྱོལ་དང་། རྩ་ཁྲིམས་དང་བཅའ་ཁྲིམས་སྲིད་གྲོས་ཀྱི་སྒྲིག་ཡིག་རང་རྟོགས་སྒོས་བརྩི་སྲུང་བྱེད་པ། སྤྱི་ཚོགས་རིང་ལུགས་ཀྱི་སྲོག་ཤིང་རིན་ཐང་ལྟ་བ་ཧུར་ཐག་སྒོས་ལག་ལེན་བཅས་བྱས་ཏེ།  རང་ཉིད་ཀྱི་བྱ་བ་དང་།  སྲིད་གྲོས་ཀྱི་བྱ་བས་རིགས་ཁོངས་ཀྱི་མང་ཚོགས་བཅས་ཀྱི་ཁྲོད་དུ་སྣེ་ཁྲིད་ཀྱི་ནུས་པ་འདོན་སྤེལ་བྱ་དགོས།

འགན་སྒྲུབ་ནུས་པ་ཆེ་རུ་གཏོང་བའི་ཐད།  《ལག་བསྟར་བསམ་འཆར》ནང་ཨུ་ཡོན་ཚོས་སློབ་སྦྱོང་ལ་མཐོན་ཆེན་བྱེད་པའི་སྲོལ་རྒྱུན་བཟང་པོ་དར་སྤེལ་བཏང་ནས།  ཞིང་ཆེན་སྲིད་གྲོས་རྩ་འཛུགས་ཀྱི་དྲ་ཐོག་དང་དྲ་ཕྱིའི་སློབ་སྦྱོང་བྱེད་སྒོའི་ནང་ཧུར་ཐག་སྒོས་ཞུགས་དགོས། གསར་བསྐོས་ཨུ་ཡོན་རྣམས་སྐབས་བརྗེའི་སློབ་སྦྱོང་ཞིབ་གྲོས་འཛིན་གྲྭར་ཞུགས་དགོས་པ་དང་། ཨུ་ཡོན་ཚང་མ་སྐབས་རེ་རེའི་ནང་ཉུང་མཐར་ཡང་ཆེད་དོན་སློབ་སྦྱོང་ཞིབ་གྲོས་འཛིན་གྲྭའི་གསོ་སྦྱོང་ལ་ཐེངས་གཅིག་ཞུགས་དགོས། གཞན་ཡང་ཨུ་ཡོན་རྣམས་ཀྱིས་ཀྲུང་དབྱང་དང་ཞིང་ཆེན་ཏང་ཨུའི་ཚང་འཛོམས་གྲོས་ཚོགས་ཀྱི་དགོངས་དོན་ལ་དུས་ཐོག་ཏུ་སློབ་སྦྱོང་བྱས་ཏེ། རང་ངོས་ཀྱི་ཆབ་སྲིད་བྱང་ཚད་དང་འགན་འཁྲི་སྒྲུབ་པའི་ནུས་པ་རྒྱུན་ཆད་མེད་པར་མཐོར་འདེགས་གཏོང་དགོས།

གྲོས་མོལ་སྲིད་གླེང་ནི་སྲིད་གྲོས་ལས་དོན་གྱི་ནང་དོན་གལ་ཆེན་ཞིག་ཡིན།《ལག་བསྟར་བསམ་འཆར》ནང།  ཨུ་ཡོན་ཚོར་དམིགས་བསལ་གྱི་དོན་དག་མེད་ན་ཚང་མ་སྲིད་གྲོས་ཀྱི་ཚང་འཛོམས་ཚོགས་འདུ་དང་། རྒྱུན་ལས་ཨུ་ཡོན་ལྷན་ཁང་གི་ཚོགས་འདུ། དེ་བཞིན་གྲོས་མོལ་ཚོགས་འདུ་ཁག་ལ་ཞུགས་དགོས། གཟིགས་ཞིབ་དང་རྟོག་ཞིབ་ཀྱི་བྱེད་སྒོར་ཧུར་ཐག་སྒོས་ཞུགས་པ་དང་། དམིགས་སའི་རང་བཞིན་དང་བཀོལ་སྤྱོད་ཆོག་པའི་ཐབས་ཇུས་དང་གྲོས་མགོ་བཏོན་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བར་སྟོབས་ཤུགས་འབུལ་དགོས།

བསམ་བློ་དང་ཆབ་སྲིད་ཀྱི་ཁྲིད་སྟོན་ལ་ཤུགས་སྣོན་བྱེད་པའི་ཐད།  《ལག་བསྟར་བསམ་འཆར》ནང་ཨུ་ཡོན་ཚོས་ཞིང་ཆེན་སྲིད་གྲོས་ཏང་ཙུའུ་ཁོངས་མིའི་ཕན་ཚུན་སེམས་གཏམ་བཤད་པ་དང་ཆེད་དོན་ཨུ་ཡོན་ལྷན་ཁང་གི་ཡན་ལག་ཏང་ཙུའུ་ཁོངས་མིས་ཏང་ཕྱིའི་ཨུ་ཡོན་དང་འབྲེལ་གཏུག་བྱེད་པ་སོགས་ཀྱི་བྱ་བའི་ཁྲོད་ཧུར་ཐག་སྒོས་ཞུགས་ཏེ། འབྲེལ་གཏུག་བརྗེ་རེས་ལ་ཤུགས་སྣོན་དང་ཕན་ཚུན་སློབ་སྦྱོང་དང་དཔྱད་གཞིར་འཛིན་རེས་བྱེད་དགོས་པའི་བླང་བྱ་བཏོན་ཡོད། རིགས་སོ་སོའི་མང་ཚོགས་དང་འབྲེལ་འདྲིས་བྱེད་པའི་བྱེད་སྒོ་ཧུར་ཐག་སྒོས་སྤེལ་བ་དང་། མང་ཚོགས་ཀྱི་སེམས་གཏམ་ལ་ཉན་པ། མང་ཚོགས་ཀྱི་རེ་འདུན་ཡར་ཞུ་བྱེད་པ། མང་ཚོགས་ལ་མཐུན་སྒྲིལ་བཅས་བྱས་ཏེ།  ཏང་གི་བཀའ་ལ་ཉན་པ་དང་ཏང་གི་རྗེས་སུ་འབྲངས་པ།  ཨུ་ཡོན་གྱིས་འགན་འཁྲི་སྒྲུབ་པའི་“དམངས་ལ་ཞབས་འདེགས་ཞུ་བའི་”བྱེད་སྒོར་ཧུར་ཐག་སྒོས་ཞུགས་པ་བཅས་བྱས་ཏེ་རང་ངོས་ཀྱི་བཟང་ཆ་འདོན་སྤེལ་བྱས་ཏེ་མི་དམངས་མང་ཚོགས་ལ་དོན་དངོས་སྒྲུབ་དགོས།

ཇུས་འདོན་སྲིད་སྐྱོང་ནི་སྲིད་གྲོས་ཨུ་ཡོན་གྱི་འགན་འཁྲི་གལ་ཆེན་ཞིག་ཡིན།《ལག་བསྟར་བསམ་འཆར》ནང་ཨུ་ཡོན་གྱིས་སྐྱེ་ཁམས་དཔལ་ཡོན་གྱི་མཐོ་ས་དང་། ཐོན་ལས་ཀྱི“གནས་བཞིའི”འཛུགས་སྐྲུན། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ་སོགས་དཔལ་འབྱོར་དང་སྤྱི་ཚོགས་འཕེལ་རྒྱས་དང་འབྲེལ་བ་ཡོད་པའི་གནད་དོན་གལ་ཆེན་ལ་དམིགས་ནས་སྤུས་ཚད་མཐོ་བའི་གྲོས་གཞི་འབུལ་དགོས།  དུས་མཚུངས་སུ་དམིགས་སའི་རང་བཞིན་ཆེ་བ་དང་དུས་ནུས་ཆེ་བའི་སྤྱི་ཚོགས་ཀྱི་གནས་ཚུལ་དང་མི་དམངས་ཀྱི་བསམ་འདུན་མཚོན་པའི་ཆ་འཕྲིན་ཕུལ་ནས་ཏང་ཨུ་དང་སྲིད་གཞུང་གིས་ཚན་རིག་དང་མཐུན་ཞིང་།  དམངས་གཙོ་ལྡན་པའི་སྒོ་ནས་ཇུས་ཐག་གཅོད་པར་དཔྱད་གཞི་འདོན་སྤྲོད་བྱེད་དགོས། ཚོགས་ཆེན་སྟེང་གཏམ་བཤད་བྱེད་སྐབས་ཆབ་སྲིད་ཀྱི་ཁ་ཕྱོགས་ཡང་དག་པ་རྒྱུན་འཁྱོངས་བྱས་ཏེ་སྤྱོད་གོ་ཆོད་པའི་གྲོས་མགོ་འདོན་དགོས། སྲིད་གྲོས་ཀྱི་རིགས་པའི་གཞུང་ལུགས་ཞིབ་འཇུག་བྱེད་པའི་ཁྲོད་ཧུར་ཐག་སྒོས་ཞུགས་ཏེ་སྲིད་གྲོས་ཀྱི་བྱ་གཞག་གོང་འཕེལ་དུ་གཏོང་བར་བློ་གྲོས་འབུལ་དགོས།

《ལག་བསྟར་བསམ་འཆར》ནང་ཨུ་ཡོན་ཚོས་རང་ངོས་ཀྱི་ལེགས་ཆ་འདོན་སྤེལ་བྱས་ཏེ་ཧུར་ཐག་སྒོས་མཚོ་སྔོན་གྱི་གཏམ་རྒྱུད་བཤད་དགོས། དཔེར་ན་སྲིད་གྲོས་ཀྱི་ཕྱི་ཕྱོགས་འགྲོ་འོང་གི་བྱེད་སྒོའི་ནང་ཞུགས་པ་དང་མཛའ་བརྩེའི་འགྲོ་འོང་བྱེད་པ། སྲིད་གྲོས་ཀྱི་སྒྲོག་འགྲེལ་དང་རིག་གནས་ལོ་རྒྱུས་ཀྱི་དཔྱད་གཞིའི་རྒྱུ་ཆའི་བྱ་བའི་ཁྲོད་ཞུགས་པ། ཆེད་ལས་ཀྱི་ལེགས་ཆ་འདོན་སྤེལ་བྱས་ཏེ་ཏང་དང་རྒྱལ་ཁབ་ཀྱི་སྲིད་དོན་གལ་ཆེན་གྱི་བྱེད་ཕྱོགས་དྲིལ་བསྒྲགས་དང་ངོ་སྤྲོད་བྱེད་པ། རིག་གནས་ལོ་རྒྱུས་ཀྱི་དཔྱད་གཞིའི་ཡིག་ཆ་འབྲི་བའི་ལས་དོན་ནང་ཞུགས་པ། སྲིད་གྲོས་ཀྱི་རིག་གནས་ལོ་རྒྱུས་ཀྱི་དཔྱད་གཞིའི་ཡིག་ཆའི་དགེ་མཚན་ལྡན་པའི་ནུས་པ་འདོན་སྤེལ་བྱེད་དགོས། གཞན《ལག་བསྟར་བསམ་འཆར》ནང་ཨུ་ཡོན་གྱི་འགན་འཁྲི་སྒྲུབ་པའི་དོ་དམ་བྱ་ཐབས་ཁ་གསལ་བཟོས་ཡོད། 

《ལག་བསྟར་བསམ་འཆར》ནང་རྩ་འཛུགས་ཀྱི་མགོ་ཁྲིད་ལ་ཤུགས་སྣོན་བྱེད་པ་དང་། བྱ་བའི་ལམ་སྲོལ་འཐུས་ཚང་དུ་གཏོང་བ། ཆེད་དོན་ཨུ་ཡོན་ལྷན་ཁང་གི་རྨང་གཞིའི་རང་བཞིན་གྱི་ནུས་པ་འདོན་སྤེལ་བྱེད་པ། གནས་ཚུལ་ཤེས་རྟོགས་དང་སྲིད་དོན་གསལ་བཟོའི་ལས་སྟེགས་འཛུགས་སྐྲུན་ཡག་པོ་བྱེད་པ། རྒྱུན་རྣམ་ཅན་གྱི་སྒོ་ནས་སྲིད་གྲོས་ཨུ་ཡོན་གྱི་བསམ་འཆར་དང་གྲོས་མགོར་ཉན་པ་བཅས་བྱས་ཏེ་ཨུ་ཡོན་གྱིས་འགན་འཁྲི་སྒྲུབ་པར་ཆ་རྐྱེན་བཟང་པོ་བསྐྲུན་དགོས་པ་ནན་བཤད་བྱས་ཡོད།

གསར་ཤོས།

སྐད་འཕྲིན་སྤྱི་སྟེགས་ཨང་གྲངས།

微信扫一扫加关注

返回
顶部
移动端 公众号 抖音号 快手号