ཞིང་ཆེན་ཏང་ཨུའི་རྒྱུན་ལས་ཨུ་ཡོན་ལྷན་ཁང་གིས་གྲོས་ཚོགས་བསྡུས།

ཉེ་ལམ། ཞིང་ཆེན་ཏང་ཨུའི་ཧྲུའུ་ཅི་ཝུའུ་ཞའོ་ཅུན་གྱིས་མགོ་འཛིན་བྱས་ནས་ཞིང་ཆེན་ཏང་ཨུའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་བསྡུས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀོས་ཀྲོའུ་རུ་གཟིགས་ཞིབ་མཛད་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་དང་ཀྲུང་དབྱང་གི་འབྲེལ་ཡོད་གྲོས་ཚོགས་ཀྱི་དགོངས་དོན་སློབ་སྦྱོང་དང་བརྒྱུད་བསྒྲགས་བྱས་ཏེ། རང་ཞིང་གི་ལག་བསྟར་བསམ་འཆར་ལ་ཞིབ་འཇུག་བྱས།

གྲོས་ཚོགས་ལས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀོས་ཀྲོའུ་རུ་གཟིགས་ཞིབ་མཛད་སྐབས་གནང་བའི་གསུང་བཤད་གལ་ཆེན་གྱིས་མི་རིགས་ས་ཁུལ་གྱི་དཔལ་འབྱོར་སྤྱི་ཚོགས་ཀྱི་སྤུས་ཚད་མཐོ་བའི་འཕེལ་རྒྱས་ལ་ཐུགས་ཁུར་གཙིགས་ཆེན་དང་རེ་བ་ནན་མོ་བཅངས་པ་མཚོན་ལ། ཁོང་གིས་བཏོན་པའི་བླང་བྱ་གལ་ཆེན་དེས་མཚོ་སྔོན་གྱི་བྱ་བ་ལེགས་པོར་བསྒྲུབ་པར་མཛུབ་སྟོན་གྱི་དོན་སྙིང་གལ་ཆེན་ལྡན། སྤུས་ཚད་མཐོ་བའི་འཕེལ་རྒྱས་ཀྱི་ལས་འགན་གཙོ་བོ་དམ་འཛིན་ནན་མོ་བྱེད་པ་དང་། ཐོན་ལས་ཀྱི་གནས་བཞིའི་མཉམ་སྐུལ་མཉམ་འདྲེས་ལ་མུ་མཐུད་དུ་སྐུལ་འདེད་གཏོང་བ། ལྗང་མདོག་རྩིས་ནུས་འཕེལ་རྒྱས་གཏོང་བ། ཚོང་འགུག་དངུལ་འདྲེན་ལ་བརྟེན་ནས་སྒོ་འབྱེད་རྒྱ་སྐྱེད་དེ། ནུས་ཤུགས་ཡོད་རྒུས་མཚོ་སྔོན་གྱི་ཁྱད་ཆོས་ལྡན་པའི་དེང་རབས་ཅན་གྱི་ཐོན་ལས་མ་ལག་འཛུགས་དགོས། སྲུང་སྐྱོབ་ཀྱི་བརྒྱུད་རིམ་ཁྲོད་ནས་འཕེལ་རྒྱས་གཏོང་བ་དང་། འཕེལ་རྒྱས་ཀྱི་བརྒྱུད་རིམ་ཁྲོད་ནས་སྲུང་སྐྱོབ་བྱེད་པ་རྒྱུན་འཁྱོངས་བྱེད་པ། མཚོ་སྔོན་གྱི་སྐྱེ་ཁམས་ཁོར་ཡུག་སྲུང་སྐྱོབ་བཟང་པོ་བྱེད་པའི་སྔོན་འགྲོའི་འོག སྐྱེ་ཁམས་ཀྱི་དགེ་མཚན་དེ་འཕེལ་རྒྱས་ཀྱི་དགེ་མཚན་དུ་བསྒྱུར་བ་དང་།  མུ་མཐུད་དུ་རྒྱལ་སྤྱིའི་སྐྱེ་ཁམས་ཡུལ་སྐོར་གྱི་དམིགས་ས་བསྐྲུན་པ། ཞིང་ལས་དང་ལུས་རྩལ་རིག་གནས་ཡུལ་སྐོར་ཚོང་ལས་བཅས་མཉམ་འདྲེས་འཕེལ་རྒྱས་བཏང་སྟེ། རི་སྔོ་ཆུ་དྭངས་ནི་གསེར་རི་དངུལ་རི་ཡིན་པའི་བྱ་བ་ལེགས་པོར་བསྒྲུབ་དགོས། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོ་སྤེལ་བའི་དོན་སྙིང་གལ་ཆེན་རྟོགས་པར་བྱེད་པ་དང་། བསམ་བློ་དང་བྱ་སྤྱོད་གཉིས་ཏང་ཀྲུང་དབྱང་གི་ཇུས་ཆོད་བཀོད་སྒྲིག་སྟེང་གཅིག་གྱུར་བྱེད་ལ། ཚད་གཞི་ནན་མོ་དང་བླང་བྱ་ནན་མོས་སློབ་སྦྱོང་སློབ་གསོ་སྤེལ་བ་དང་། སྙིང་རུས་ཆེན་པོས་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་བྱས་ཏེ། སྤྱོད་ཚུལ་འཛུགས་སྐྲུན་གྱི་གྲུབ་འབྲས་གསར་བས་དེང་རབས་ཅན་གྱི་མཚོ་སྔོན་གསར་བའི་འཛུགས་སྐྲུན་ལ་འགན་སྲུང་སྟོབས་ལྡན་འདོན་སྤྲོད་བྱེད་དགོས།

གྲོས་ཚོགས་ལས་ནན་གྱིས་བསྟན་དོན། ཏང་ཀྲུང་དབྱང་གི་མང་ཚོགས་ཉེ་འགྲམ་གྱི་སྤྱོད་ཚུལ་མི་ལེགས་པ་དང་རུལ་སུངས་གནད་དོན་གཅིག་བསྡུས་ལེགས་བཅོས་བྱེད་པའི་བཀོད་སྒྲིག་བླང་བྱ་དོན་འཁྱོལ་ནན་མོ་བྱེད་ལ། རྫོང་མན་གྱི་འགག་རྩའི་ལས་རིམ་དང་ཉམས་ཞན་ལས་རིམ་ལ་དམིགས་པ་དང་། བྱ་བའི་ལས་འགན་གཙོ་བོ་དང་མང་ཚོགས་ཀྱིས་ཚུར་སྣང་དྲག་པོ་བྱེད་པ་དང་། ཆེས་མངོན་གསལ་ཡིན་པའི་གནད་དོན་ལ་དམ་པོར་དམིགས་ནས། གནད་དོན་ལེགས་བཅོས་དམ་འཛིན་ལ་ལྟ་སྐུལ་བྱེད་པ་དང་། གྱོད་གཞི་ཞིབ་བཤེར་བྱས་ནས་བསྒྲུབ་པར་མུ་མཐུད་དུ་ཤུགས་སྣོན་པ། རུལ་སུངས་ལ་བཟོད་སྒོམ་མི་བྱེད་པར་དག་ཐེར་ཐག་གཅོད་བྱས་ཏེ། དངོས་འབྲས་ཕན་འབྲས་དང་མི་དམངས་མང་ཚོགས་ཀྱི་ཡིད་ཚིམ་ཚད་ལ་བརྟེན་ནས་ལེགས་བཅོས་བྱ་བའི་གྲུབ་འབྲས་ལ་ཚད་ལེན་བྱེད་དགོས།

གྲོས་ཚོགས་ལས་བསྟན་དོན། སྒྲིག་ཁྲིམས་ཞིབ་དཔྱོད་ལྟ་ཞིབ་བྱ་བ་ཚད་ལྡན་ཅན་དང་ཁྲིམས་སྐྱོང་ཅན་སྒྲིག་ལུགས་ཅན་བཅས་ཀྱི་འཛུགས་སྐྲུན་ལོའི་འགུལ་སྐྱོད་ཀྱི་དོན་སྙིང་གལ་ཆེན་ཤེས་རྟོགས་བྱེད་པ་དང་། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་ཟབ་མོ་བྱེད་པའི་སློབ་སྦྱོང་སློབ་གསོ་དང་ཟུང་འབྲེལ་བྱས་ཏེ། དབང་བཅོལ་དང་དབང་འཛིན་ཟུང་འབྲེལ་བྱེད་པ་རྒྱུན་འཁྱོངས་དང་། ལམ་ལུགས་འཛུགས་སྐྲུན་དེ་གཙོ་ཐིག་ཏུ་བྱེད་ལ། སྒྲིག་ཁྲིམས་སློབ་གསོའི་གསོ་སྦྱོང་ལ་ཤུགས་བསྣན་ནས། སྲོལ་མཐུན་སྒྲིག་མཐུན་ཁྲིམས་མཐུན་ལྟར་དབང་ཆ་ལག་བསྟར་ནུས་པ་ཇེ་ཆེར་གཏོང་བ་དང་། རང་ཞིང་གི་སྒྲིག་ཁྲིམས་ཞིབ་དཔྱོད་ལྟ་ཞིབ་བྱ་བའི་གསུམ་ཅན་གྱི་ཆུ་ཚད་སྤྱིའི་ཆ་ནས་ཇེ་མཐོར་འགྲོ་བར་སྐུལ་འདེད་གཏོང་དགོས།

གྲོས་ཚོགས་ལས་ཞིང་ཆེན་ཡོངས་ཀྱི་དཔལ་འབྱོར་འཁོར་རྒྱུག་བཀོད་གཏོང་བྱ་བའི་ཇུས་གཞིར་གྲོས་ཞིབ་བྱས་ཏེ། ད་ལོའི་དཔལ་འབྱོར་བྱ་བ་ཡག་པོར་བསྒྲུབ་པར་གལ་འགངས་ཆེ་བ་དང་། དམིགས་འབེན་གྱི་ཁྲིད་ཕྱོགས་དང་གནད་དོན་གྱི་ཁྲིད་ཕྱོགས། མཇུག་འབྲས་ཀྱི་ཁྲིད་ཕྱོགས་བཅས་རྒྱུན་འཁྱོངས་བྱེད་ལ། ལོ་ཧྲིལ་བོའི་དམིགས་འབེན་ལས་འགན་ལ་དམིགས་པ་དང་། ཐོན་ལས་འཕེལ་རྒྱས་དང་རྒྱུ་རྐྱེན་གྱི་འགན་སྲུང་། ཚོང་འགུག་དངུལ་འདྲེན། ཁེ་ལས་ཀྱི་གསོ་སྦྱོང་དང་གྲོང་ཁྱེར་དང་ཁུལ་གཙོ་བོ་བཅས་ལ་དམིགས་ནས། ཟླ་རེར་དབྱེ་ཞིབ་དང་དུས་ཚིགས་རེར་དབྱེ་ཞིབ། ཟླ་རེར་བཀོད་གཏོང་བཅས་བྱེད་ལ། བཀོད་གཏོང་གྲུབ་འབྲས་དེ་འཕེལ་རྒྱས་ཀྱི་དངོས་འབྲས་ཁྲོད་མངོན་པར་བྱེད་དགོས། རིམ་པ་སོ་སོའི་འགན་འཁྲི་དང་འགན་ཁུར་བློ་མཐུན་གཙོ་བོའི་འགན་འཁྲི་གཙོ་བོ་དངོས་འབེབས་ནན་མོ་བྱེད་པ་དང་། ཚོང་འགུག་དངུལ་འདྲེན་གྱི་ལས་གཞི་གཙོ་བོ་དོན་འཁྱོལ་ལེགས་པོ་བྱེད་ལ། ཞབས་ཞུ་ཁྲོམ་རའི་སྤུས་ནུས་མུ་མཐུད་དུ་མཐོར་འདེགས་བཏང་སྟེ། ནུས་ཤུགས་ཡོད་རྒུས་ཐོན་སྐྱེད་ལ་སྐུལ་འདེད་དང་དགོས་མཁོ་རྒྱ་བསྐྱེད་པ། སྔོན་དཔག་བརྟན་པོ་བཅས་བྱེད་པ་དང་། ལོ་ཧྲིལ་བོའི་དམིགས་འབེན་ལས་འགན་དང་ལོ་ལྔའི་འཆར་འགོད་བཅུ་བཞི་པའི་དམིགས་འབེན་ལས་འགན་ལེགས་འགྲུབ་འབྱུང་བར་ཁག་ཐེག་བྱེད་དགོས་པ་ནན་གྱིས་བསྟན།

གྲོས་ཚོགས་ལས2025ལོའི་ཞིང་ཆེན་ཏང་ཨུའི་གཞུང་ལུགས་སློབ་སྦྱོང་ལྟེ་གནས་ཚན་ཆུང་གི་སློབ་སྦྱོང་བཀོད་སྒྲིག་ཇུས་གཞིར་གྲོས་ཞིབ་བྱས་ཏེ། ཐོག་མཐའ་བར་གསུམ་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པར་སློབ་སྦྱོང་བྱེད་རྒྱུ་དེ་ལས་འགན་གཙོ་བོར་བརྩི་བ་དང་། ཞིང་ཆེན་ཏང་ཨུའི་བྱ་བ་གཙོ་བོར་དམིགས་ནས། གནད་དོན་ཞིབ་འཇུག་དང་ཐག་གཅོད་བྱེད་རྒྱུ་དེ་མགོ་རྩོམ་ས་དང་རྐང་འཛུགས་སར་བྱེད་ལ། སློབ་སྦྱོང་གི་ཕན་འབྲས་དེ་བྱ་བར་སྐུལ་འདེད་གཏོང་བའི་བསམ་བློའི་བྱེད་ཐབས་དངོས་སུ་བསྒྱུར་དགོས་པ་བསྟན།