ཞི་ཅིན་ཕིང་དང་པོ་ཚི་ཝ་ནའི་ཙུང་ཐུང་གཉིས་ཀྱིས་ཀྲུང་གོ་དང་པོ་ཚི་ཝ་ནའི་བར་འབྲེལ་བ་བཙུགས་ནས་ལོ50འཁོར་བར་ཕན་ཚུན་ལ་རྟེན་འབྲེལ་ཞུ་བའི་གློག་འཕྲིན་བཏང་།

ཟླ1ཚེས6ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་པོ་ཚི་ཝ་ནའི་ཙུང་ཐུང་པོ་ཁི་གཉིས་ཀྱིས་ཕན་ཚུན་ལ་གློག་འཕྲིན་བཏང་ནས་རྒྱལ་ཁབ་གཉིས་བར་འབྲེལ་བ་བཙུགས་ནས་ལོ50འཁོར་བར་རྟེན་འབྲེལ་ཞུས།

ཞི་ཅིན་ཕིང་གིས་བསྟན་དོན། འབྲེལ་བ་བཙུགས་ནས་ལོ50རིང་ལ། རྒྱལ་སྤྱིའི་གནས་བབ་ལ་འགྱུར་ལྡོག་ཇི་ལྟར་བྱུང་རུང་ཀྲུང་གོ་དང་པོ་ཚི་ཝ་ནའི་འབྲེལ་བ་ཐོག་མཐའ་བར་གསུམ་དུ་འཕེལ་རྒྱས་བཟང་བོ་བྱུང་བ་དང་། འདྲ་མཉམ་ངང་ཕན་ཚུན་ལ་ལྟ་སྟངས་འཛིན་པའི་གྲོགས་པོ་བཟང་པོ་དང་ལག་གདང་སྦྲེལ་ནས་འཕེལ་རྒྱས་གཏོང་བའི་ཟླ་གྲོགས་བཟང་པོར་གྱུར་ཡོད། རྒྱལ་ཁབ་གཉིས་ཀྱིས་ལྷག་བསམ་ཟོལ་མེད་ངང་མཛའ་མཐུན་དང་མཐུན་སྒྲིལ་མཉམ་ལས་རྒྱུན་འཁྱོངས་བྱས་ཚེ་ཀྲུང་གོ་དང་པོ་ཚི་ཝ་ནའི་འབྲེལ་བའི་འཕེལ་རྒྱས་ཀྱི་མདུན་ལམ་སྔར་ལས་ཇེ་ཡངས་སུ་འགྲོ་ངེས་ཡིན་ལ། ཕྱོགས་གཉིས་ཀྱི་མཉམ་ལས་ཀྱི་མདུན་ལམ་སྔར་ལས་འོད་སྟོང་ལྡན་པར་ང་ལ་ཡིད་ཆེས་བརྟན་པོ་ཡོད། ད་ལོ་ནི་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་པེ་ཅིང་རྩེ་ཚོགས་ཀྱི་གྲུབ་འབྲས་དོན་འཁྱོལ་བྱེད་མགོ་བརྩམས་པའི་ལོ་ཡིན། མགོ་འཛུགས་ས་གསར་པའི་སྟེང་ངས་སྐུ་ཞབས་ཙུང་ཐུང་དང་མཉམ་དུ་འབད་བརྩོན་བྱས་ཏེ་ཕྱོགས་གཉིས་ཀྱི་ཆབ་སྲིད་ཀྱི་ཡིད་ཆེས་སྔར་ལས་ཇེ་ཟབ་ཏུ་གཏོང་བ་དང་། ཕན་ཚུན་གྱི་དོ་ཁུར་གལ་ཆེན་ལ་བློ་བརྟན་འགྱུར་མེད་ཀྱིས་རྒྱབ་སྐྱོར་བྱེད་པ། ལག་གདང་སྦྲེལ་ནས་རང་སོ་སོའི་དེང་རབས་ཅན་གྱི་བྱ་གཞག་ལ་སྐུལ་འདེད་བཏང་སྟེ་ཀྲུང་གོ་དང་པོ་ཚི་ཝ་ནའི་འཐབ་ཇུས་རོགས་རེས་འབྲེལ་བའི་ལེའུ་གསར་པ་གཏོད་འདོད་ཡོད།

པོ་ཁི་ཡིས་བསྟན་དོན། འབྲེལ་བ་བཙུགས་ནས་ལོ50འཁོར་བ་ནི་པོ་ཚི་ཝ་ན་དང་ཀྲུང་གོའི་འབྲེལ་བའི་ལམ་ཚད་རྡོ་རིང་གལ་ཆེན་ཞིག་ཡིན། ངས་འདས་ཟིན་པའི་ལོ50རིང་ཀྲུང་གོ་ཕྱོགས་ཀྱིས་པོ་ཚི་ཝ་ན་ལ་བརྩེ་དུང་ཟབ་མོ་བཅངས་པ་དང་མཐུན་སྒྲིལ་མཉམ་ལས་གནང་བར་ལྷག་བསམ་ཟོལ་མེད་ཀྱིས་ཐུགས་རྗེ་ཆེ་ཞུས་པ་ཡིན། ཀྲུང་གོའི་སྤྱིར་བཏང་མིན་པའི་འཕེལ་རྒྱས་གྲུབ་འབྲས་ལས་པོ་ཙི་ཝ་ན་ཕྱོགས་ལ་སྐུལ་མ་ཆེན་པོ་ཐོབ་པ་དང་། རྒྱལ་ཁབ་གཉིས་ཀྱི་འཐབ་ཇུས་རོགས་རེས་འབྲེལ་བས་པོ་ཙི་ཝ་ནའི་བསྟུན་མཁས་རང་བཞིན་གྱི་འཕེལ་རྒྱས་ལ་གོ་སྐབས་བསྩོལ་ཐུབ་པར་ཡིད་ཆེས་ཡོད། ང་ཚོས་ཀྲུང་གོ་གཅིག་གི་སྲིད་ཇུས་ལ་རྒྱབ་སྐྱོར་བརྟན་པོ་བྱེད་པ་དང་། ཕན་ཚུན་ལ་ཡིད་ཆེས་དང་བརྩི་འཇོག་བྱེད་པའི་རྨང་གཞིའི་སྟེང་པོ་ཚི་ཝ་ན་དང་ཀྲུང་གོའི་འབྲེལ་བར་སྔར་ལས་ཤུགས་སྣོན་རྒྱག་པ་དང་། ལག་གདང་སྦྲེལ་ནས་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་པེ་ཅིང་རྩེ་ཚོགས་ཀྱི་གྲུབ་འབྲས་དོན་འཁྱོལ་བྱས་ཏེ་མཉམ་དུ་འཕེལ་རྒྱས་དང་དར་རྒྱས་མངོན་འགྱུར་བྱེད་པར་རེ་སྒུག་བྱེད་བཞིན་ཡོད།