ཞི་ཅིན་ཕིང་གིས་ཀྲུང་གོ་དང་ཅིར་ཅི་སི་སི་ཐན། ཝུའུ་ཙི་པེ་ཁི་སི་ཐན་བཅས་ཀྱི་ལྕགས་ལམ་ལས་གཞི་མགོ་རྩོམ་པའི་མཛད་སྒོར་རྟེན་འབྲེལ་འཕྲིན་ཡིག་བསྐུར།
ཟླ12པའི་ཚེས27ཉིན། ཀྲུང་གོ་དང་ཅིར་ཅི་སི་སི་ཐན། ཝུའུ་ཙི་པེ་ཁི་སི་ཐན་བཅས་ཀྱི་ལྕགས་ལམ་ལས་གཞི་མགོ་རྩོམ་པའི་མཛད་སྒོ་ཅིར་ཅི་སི་སི་ཐན་གྱི་ཅཱ་ལ་ལཱ་པ་ཏི་གྲོང་ཁྱེར་དུ་འཚོགས། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་མགོ་རྩོམ་མཛད་སྒོར་རྟེན་འབྲེལ་འཕྲིན་ཡིག་བསྐུར་བ་དང་། ཅིར་ཅི་སི་སི་ཐན་གྱི་ཙུང་ཐུང་ཀྲ་ཕ་ལུའོ་ཧྥུའུ་བྱེད་སྒོར་ཞུགས་ལ། ཝུའུ་ཙི་པེ་ཁི་སི་ཐན་གྱི་ཙུང་ཐུང་མུས་ཨར་ཅི་ཡུའེ་ཡེ་ཧྥུའུ་ཡིས་རྟེན་འབྲེལ་འཕྲིན་ཡིག་བསྐུར།
ཞི་ཅིན་ཕིང་གིས་བསྟན་དོན། ཀྲུང་གོ་དང་ཅིར་ཅི་སི་སི་ཐན། ཝུའུ་ཙི་པེ་ཁི་སི་ཐན་བཅས་ཀྱི་ལྕགས་ལམ་འཛུགས་སྐྲུན་བྱ་རྒྱུ་ནི་རྒྱལ་ཁབ་གསུམ་གྱི་སྲིད་གཞུང་གིས་ས་ཁོངས་འབྲེལ་མཐུད་དང་ས་ཁུལ་དར་རྒྱས་བརྟན་བརླིང་ལ་སྐུལ་འདེད་གཏོང་བར་དམིགས་ནས་བཏོན་པའི་འཐབ་ཇུས་ཀྱི་ཇུས་ཆོད་ཞིག་ཡིན་ཞིང་། རྒྱལ་ཁབ་གསུམ་པོའི་མི་དམངས་ཀྱིས་འཐབ་ཇུས་ཀྱི་བགྲོད་ལམ་དེ་ཤར་གཏོང་བྱེད་པའི་མཛེས་སྡུག་གི་རེ་འདུན་མངོན་ཡོད། མགོ་རྩོམ་མཛད་སྒོ་བསྡུས་པ་དེས་ལས་གཞི་དེ་བསམ་བཀོད་ལྟར་ལག་ལེན་བྱས་ནས་རླངས་འཁོར་ཤར་གཏོང་གི་དམིགས་འབེན་གྱི་ཕྱོགས་སུ་འགག་རྩའི་གོམ་པ་ཞིག་སྤོས་པ་མཚོན།
ཞི་ཅིན་ཕིང་གིས་ནན་གྱིས་བསྟན་དོན། རྒྱལ་ཁབ་གསུམ་གྱི་འབྲེལ་ཡོད་སྡེ་ཁག་དང་ཁེ་ལས་ཀྱིས་ནུས་ཤུགས་གཅིག་སྒྲིལ་བྱས་ཏེ། ཚད་གཞི་མཐོ་བ་དང་སྤུས་ཚད་མཐོ་བའི་སྒོ་ནས་བཟོ་སྐྲུན་འཛུགས་སྐྲུན་ལ་སྐུལ་འདེད་གཏོང་བ་དང་། ཀྲུང་ཅི་ཝུའུ་ལྕགས་ལམ་དེ“རྒྱུད་གཅིག་ལམ་གཅིག”མཉམ་སྐྲུན་མཉམ་ལས་ཀྱི་དཔེ་སྟོན་ལས་གཞི་གསར་པ་ཞིག་ཏུ་ཧུར་ཐག་གིས་བསྐྲུན་ནས། ལམ་རྒྱུད་ས་ཁུལ་གྱི་དཔལ་འབྱོར་སྤྱི་ཚོགས་འཕེལ་རྒྱས་དང་དམངས་འཚོའི་བདེ་སྐྱིད་ཇེ་ལེགས་སུ་གཏོང་རྒྱུར་རོགས་རམ་སྔར་ལས་ལེགས་པོ་བྱས་ཏེ། སྔར་ལས་དམ་ཟབ་གྱི་ཀྲུང་གོ་དང་ཨེ་ཤེ་ཡ་དབུས་མའི་ལས་སྐལ་གཅིག་མཐུན་ཚོགས་པ་འཛུགས་རྒྱུར་སྒུལ་ཤུགས་གསར་པ་སྣོན་པའི་རེ་བ་ཡོད།
ཀྲ་ཕ་ལུའོ་ཧྥུའུ་ཡིས་བསྟན་དོན། ཀྲུང་གོ་དང་ཅིར་ཅི་སི་སི་ཐན། ཝུའུ་ཙི་པེ་ཁི་སི་ཐན་བཅས་ཀྱི་ལྕགས་ལམ་ནི་འགྲིམ་འགྲུལ་སྐྱེལ་འདྲེན་བར་ཁྱམས་ཤིག་ཡིན་པར་མ་ཟད། ཤར་ཕྱོགས་དང་ནུབ་ཕྱོགས་འབྲེལ་མཐུད་བྱེད་པའི་འཐབ་ཇུས་ཀྱི་བགྲོད་ལམ་ཞིག་ཀྱང་ཡིན། ལས་གཞི་འདིས་ཅིར་ཅི་སི་སི་ཐན་གྱི་འགྲིམ་འགྲུལ་ལྟེ་གནས་ཀྱི་གནས་བབ་ཆེ་རུ་གཏོང་བ་དང་ལས་ཞུགས་ལས་གནས་འབོར་ཆེན་བསྐྲུན་པ། དཔལ་འབྱོར་ཚོང་དོན་དང་ཡུལ་སྐོར། བཟོ་ལས་སོགས་ཁྱབ་ཁོངས་འཕེལ་རྒྱས་ལ་སྐུལ་འདེད་གཏོང་རྒྱུ་རེད། རྒྱལ་ཁབ་གསུམ་གྱིས་སྤུས་ཚད་མཐོ་བའི་སྒོ་ནས་ལྕགས་ལམ་འཛུགས་སྐྲུན་ལེགས་གྲུབ་བྱས་ཏེ། རང་ས་ཁུལ་གྱི་ཐུན་མོང་འཕེལ་རྒྱས་ལ་ཡངས་ཤིང་རྒྱ་ཆེ་བའི་མདུན་ལམ་གསར་པ་གཏོད་ཐུབ་པའི་ཡིད་ཆེས་ཡོད།
མུས་ཨར་ཅིས་ཡུའེ་ཡེ་ཧྥུའུ་ཡིས་བསྟན་དོན། ཀྲུང་གོ་དང་ཅིར་ཅི་སི་སི་ཐན། ཝུའུ་ཙི་པེ་ཁི་སི་ཐན་བཅས་ཀྱི་ལྕགས་ལམ་ལས་གཞི་དངོས་སུ་མགོ་ཚུགས་པ་ནི་རྒྱལ་ཁབ་གསུམ་གྱི་གཙོ་འཛིན་གྱི་ཐུན་མོང་ངོས་འཛིན་དོན་འཁྱོལ་དང་། གཉིས་ཕན་མཉམ་ལས་ལ་སྐུལ་འདེད་གཏོང་བ། “རྒྱུད་གཅིག་ལམ་གཅིག”མཉམ་དུ་འཛུགས་སྐྲུན་ལ་སྐུལ་འདེད་གཏོང་བ་བཅས་ཀྱི་བྱེད་ཐབས་གལ་ཆེན་ཞིག་ཡིན་པས་ལོ་རྒྱུས་ཀྱི་དོན་སྙིང་གལ་ཆེན་ལྡན། ལྕགས་ལམ་དེས་ས་ཁུལ་གྱི་ཉོ་ཚོང་དང་གཞི་གཅིག་ཅན་ལ་སྐུལ་འདེད་གཏོང་བ་དང་། མི་སྣ་འགྲོ་འོང་དང་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་ཀྱི་འབྲེལ་བར་སྐུལ་འདེད་གཏོང་བ། དཔལ་ཡོན་ཕན་ཚུན་དཔྱད་གཞིར་འཛིན་པའི་ཟམ་པ་གལ་ཆེན་བསྐྲུན་ནས་ས་ཁུལ་གྱི་རྒྱལ་ཁབ་དང་མི་དམངས་ལ་བདེ་སྐྱིད་བསྐྲུན་རྒྱུར་ཕན་ཐོགས་ཡོད།
ཀྲུང་གོ་དང་ཅིར་ཅི་སི་སི་ཐན། ཝུའུ་ཙི་པེ་ཁི་སི་ཐན་བཅས་ཀྱི་ལྕགས་ལམ་ལས་གཞི་མགོ་རྩོམ་མཛད་སྒོ་ནི་ཀྲུང་གོའི་རྒྱལ་ཁབ་འཕེལ་རྒྱས་བཅོས་སྒྱུར་ཨུ་ཡོན་ལྷན་ཁང་དང་། ཅིར་ཅི་སི་སི་ཐན་འགྲིམ་འགྲུལ་དང་འཕྲིན་གཏོང་པུའུ། ཝུའུ་ཙི་པེ་ཁི་སི་ཐན་འགྲིམ་འགྲུལ་པུའུ་བཅས་ཀྱིས་མཉམ་འབྲེལ་སྒོས་བསྒྲུབས་པ་རེད།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注