མཚོ་ནུབ་ཀྱིས་མ་དངུལ་སྒོར་བྱེ་བ་བཞི་ཙམ་བཏང་ནས་ཞིང་ལས་ཐོན་སྐྱེད་དང་དེ་བཞིན་གནོད་འགོག་གནོད་སེལ་ལ་རྒྱབ་སྐྱོར་བྱས།

མཚོ་ནུབ་ཀྱིས་མ་དངུལ་སྒོར་བྱེ་བ་བཞི་ཙམ་བཏང་ནས་ཞིང་ལས་ཐོན་སྐྱེད་དང་དེ་བཞིན་གནོད་འགོག་གནོད་སེལ་ལ་རྒྱབ་སྐྱོར་བྱས།

ཟླ12པའི་ཚེས11ཉིན། གསར་འགོད་པས་མཚོ་ནུབ་སོག་རིགས་བོད་རིགས་རང་སྐྱོང་ཁུལ་ཞིང་འབྲོག་ཅུའུ་ནས་རྒྱུས་ལོན་བྱུང་བ་ལྟར་ན། 2024ལོ་ནས་མིག་སྔའི་བར་དུ། མཚོ་ནུབ་ཁུལ་རིམ་པའི་ནོར་སྲིད་ཀྱིས་མ་དངུལ་སྒོར་བྱེ་བ་གཉིས་དང་ས་ཡ་བརྒྱད་འབུམ་བརྒྱད་ཁྲི་དགུ་སྟོང་གཉིས་ཉིས་བརྒྱ་དངོས་འབེབས་དོན་འཁྱོལ་བྱས་པ་དང་། རྫོང་རིམ་པའི་ནོར་སྲིད་ཀྱིས་རྒྱུན་མཐུད་མ་དངུལ་སྒོར་བྱེ་བ་གཅིག་དང་འབུམ་དགུ་ཁྲི་གཉིས་སྟོང་གསུམ་བརྒྱད་བརྒྱ་བཏང་ཡོད་ཅིང་། ཁྱོན་བསྡོམས་མ་དངུལ་སྒོར་བྱེ་བ་གསུམ་དང་ས་ཡ་དགུ་འབུམ་བརྒྱད་ཁྲི་གཅིག་སྟོང་དྲུག་ལྷག་བཏང་ནས། མཚོ་ནུབ་ཁུལ་ཡོངས་ཀྱི་ཞིང་ལས་ཐོན་སྐྱེད་དང་གནོད་འགོག་གནོད་སེལ་ལས་དོན་ལ་ཆེད་དོན་རྒྱབ་སྐྱོར་བྱས།

མཚོ་ནུབ་ཁུལ་གྱིས་ཉེ་བའི་ལོ་འདི་དག་གི་རིང་ལ། ཞིང་ལས་སྐྱེ་དངོས་འདེབས་འཛུགས་ཀྱི་མ་གོང་མཐོ་རུ་ཕྱིན་པ་དང་ཞིང་ལས་ཐོན་རྫས་ཉོ་སྒྲུབ་ཀྱི་རིན་གོང་མར་འགྲིབ་པ་སོགས་ཀྱི་འགལ་རྐྱེན་ལ་ཁ་གཏད་ནུས་ལྡན་འཇལ་ཏེ། འབྲུ་རིགས་དང་བཟའ་སྣུམ། སྔོ་ཚལ་བཅས་ཀྱི་ཐོན་སྐྱེད་འགན་ལེན་སྲིད་ཇུས་རྒྱུན་ཆད་མེད་པར་འཐུས་སྒོ་ཇེ་ཚང་དུ་བཏང་བ་དང་། སྲིད་ཇུས་དྲིལ་སྒྲོག་དང་ལག་བསྟར་བྱེད་ཤུགས་ཆེ་རུ་བཏང་ཡོད་ལ། འདེབས་འཛུགས་ཀྱི་ཕན་འབྲས་ཆེ་རུ་བཏང་ཡོད། ཞིང་ལས་འགན་བཅོལ་གྱི་ཁ་གསབ་སྲིད་ཇུས་ཁྱབ་སྤེལ་ཤུགས་ཆེར་བཏང་སྟེ། ཞིང་ཁྱིམ་གྱི་རང་བྱུང་གནོད་འཚེ་འགོག་ནུས་ཆེ་རུ་བཏང་ནས། ཞིང་འབྲོག་མང་ཚོགས་ཀྱི་ཡོང་འབབ་འཕར་སྣོན་དང་ཐོན་སྐྱེད་ཀྱི་བརྩོན་སེམས་ལ་འགན་སྲུང་ནུས་ལྡན་བྱས་ཏེ། ས་ཁོངས་ཀྱི་ཞིང་ལས་ཐོན་སྐྱེད་བརྟན་པོའི་ངང་གོང་འཕེལ་འགྲོ་བར་འགན་ལེན་བྱས།

དུས་མཚུངས་སུ། དོན་འཁྱོལ་བྱས་པའི་ནོར་སྲིད་མ་དངུལ་གང་ལེགས་སྒོས་སྤྱད་དེ། མཚོ་ནུབ་ཁུལ་ཡོངས་ཀྱི་འབྲུ་རིགས་དང་སྣུམ་རྒྱུ། སྔོ་ཚལ་སོགས་ཞིང་ལས་སྐྱེ་དངོས་གལ་ཆེན་ཐོན་སྐྱེད་བྱེད་མཁན་གྱི་ཞིང་ཁྱིམ་ལ་ཁ་གསབ་མ་དངུལ་བྱིན་ནས། ཐོན་སྐྱེད་ཀྱི་མ་གོང་འཕར་བ་དང་ཞིང་ལས་ཐོན་རྫས་ཀྱི་རིན་གོང་མར་འགྲིབ་པ་ལས་བྱུང་བའི། ཞིང་པའི་དཔལ་འབྱོར་གྱི་གནོན་ཤུགས་ཕན་འབྲས་ལྡན་པའི་སྒོ་ནས་ཇེ་ཆུང་དུ་བཏང་ཡོད་ཅིང་། ཞིང་ལས་ཐོན་ལས་འཕེལ་རྒྱས་ཀྱི་རྨང་གཞི་སྔར་ལས་བརྟན་དུ་བཏང་སྟེ། མཚོ་ནུབ་ཏུ་ལྗང་མདོག་སྐྱེ་ལྡན་ཞིང་འབྲོག་ཐོན་རྫས་ཕྱིར་གཏོང་བྱེད་ཡུལ་བསྐྲུན་པ་དང་། གྲོང་གསེབ་དར་རྒྱས་ལ་ཁྱོན་ཡོངས་ནས་སྐུལ་འདེད་གཏོང་ཆེད་འདེགས་སྐྱོར་ནུས་ལྡན་མཁོ་འདོན་བྱས།

རྒྱུས་ལོན་བྱུང་བ་ལྟར་ན། མིག་སྔར་མཚོ་ནུབ་ཁུལ་གྱིས་ཞིང་ལས་ཐོན་སྐྱེད་དང་དེ་བཞིན་གནོད་འགོག་གནོད་སེལ་གྱི་ཁ་གསབ་མ་དངུལ་ཚང་མ་བྱིན་ཚར་ཡོད་ཅིང་། ཁུལ་ཡོངས་ཀྱི་ཞིང་ཁྱིམ་ཁྲི་གཅིག་དང་སྟོང་དགུ་བཞི་བརྒྱ་གྱ་བདུན་ལ་སྲིད་ཇུས་ཀྱི་ཕན་པ་ཐོབ་པ་དང་། ཁ་གསབ་རྒྱ་ཁྱོན་སྤྱི་ཆིང་ཁྲི་གཉིས་དང་སྟོང་དྲུག་སུམ་བརྒྱ་ལ་སླེབས་ཡོད།