ཀྲའོ་ལི་ཅི་ཡིས་རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་ཟུར་ཞུགས་འཐུས་མི་དང་ལྷན་དུ་བཞུགས་མོལ་གནང་།

ཟླ11པའི་ཚེས6ཉིན་གྱི་སྔ་དྲོར། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཀྲའོ་ལི་ཅི་ཡིས་རྒྱལ་ཡོངས་དམངས་ཆེན་སྐབས་བཅུ་བཞི་པའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅུ་གཉིས་པར་ཟུར་ཞུགས་བྱས་པའི་རྒྱལ་ཡོངས་དམངས་ཆེན་གྱི་འཐུས་མི་དང་ལྷན་དུ་བཞུགས་མོལ་བརྗེ་རེས་གནང་། ཁོང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྒྱལ་ཡོངས་དམངས་ཆེན་བཙུགས་ནས་ལོ70འཁོར་བར་རྟེན་འབྲེལ་ཞུ་བའི་ཚོགས་ཆེན་སྟེང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་མཐར་ཕྱིན་བྱེད་པ་དང་དེར་གོ་བ་ནན་མོ་ལེན་དགོས་ལ། ཁྱོན་ཡོངས་ནས་ལག་བསྟར་དོན་འཁྱོལ་བྱས་ཏེ། ཆབ་སྲིད་ཀྱི་གོ་གནས་རྒྱུན་ཆད་མེད་པར་ཇེ་མཐོར་གཏོང་བ་དང་གཟི་བརྗིད་ལྡན་པའི་འགན་འཁྲི་ཁྲིམས་ལྟར་ཡག་པོར་སྒྲུབ་ནས། ཏང་དང་མི་དམངས་ཀྱི་མངགས་བཅོལ་ཟབ་མོ་སྟོང་ཟད་དུ་གཏོང་མི་རུང་ཞེས་ནན་གྱིས་གསུངས།

བཞུགས་མོལ་ཚོགས་འདུའི་སྟེང་དུ། འཐུས་མི་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱལ་ཡོངས་དམངས་ཆེན་བཙུགས་ནས་ལོ70འཁོར་བར་རྟེན་འབྲེལ་ཞུ་བའི་ཚོགས་ཆེན་སྟེང་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་མཐར་ཕྱིན་དང་ལག་བསྟར་གཏིང་ཟབ་བྱ་རྒྱུར་དམ་པོར་དམིགས་ཏེ། འཐུས་མིའི་བཅའ་ཁྲིམས་བཟོ་བཅོས་དང་འཐུས་ཚང་དུ་གཏོང་བ་སོགས་ཀྱི་སྐོར་ནས་བསམ་འཆར་དང་གྲོས་གཞི་བཏོན། ཀྲའོ་ལི་ཅི་ཡིས་ཞིབ་ཏུ་གསན་ནས་འཐུས་མི་ཚོ་དང་ལྷན་དུ་བརྗེ་རེས་ཟབ་མོ་གནང་། ཁོང་གིས་དམངས་ཆེན་གྱི་འཐུས་མི་ནི་ཁྲིམས་ཀྱིས་གཏན་འཁེལ་བྱས་པའི་གོ་གནས་ཤིག་ཡིན་པས། དེར་བླ་ན་མེད་པའི་ཆབ་སྲིད་ཀྱི་འགན་འཁྲི་ལྡན་ལ། དེ་བསྟུན་གྱི་ཚད་གཞི་དང་བླང་བྱ་ཡང་ངེས་ཅན་ཡོད། འཐུས་མིས་རང་རྟོགས་སྒོས་བསམ་བློ་ཆབ་སྲིད་འཛུགས་སྐྲུན་བྱ་རྒྱུ་དེ་གནས་བབ་མངོན་གསལ་སྟེང་བཞག་ནས། ཏང་གི་གསར་གཏོད་གཞུང་ལུགས་ཀྱིས་དྲག་ཆས་སྤྲས་ཚད་རྒྱུན་འཁྱོངས་ལྷོད་མེད་ངང་ཆེ་རུ་གཏོང་བ་དང་།　སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་དང་ཏང་ཀྲུང་དབྱང་གི་ཇུས་ཆོད་བཀོད་སྒྲིག་གལ་ཆེན་ལ་སློབ་སྦྱོང་དང་གོ་བ་ནན་ཏན་ལེན་པ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དམངས་ཆེན་ལམ་ལུགས་རྒྱུན་འཁྱོངས་དང་འཐུས་ཚང་དུ་གཏོང་དགོས་པའི་སྐོར་གྱི་དགོངས་པ་གལ་ཆེན་སློབ་སྦྱོང་དང་ལག་བསྟར་བྱ་རྒྱུ་དེ་ངེས་པར་དུ་སྦྱོང་དགོས་པའི་སློབ་ཚན་དང་གཞི་རྩའི་ཤེས་བྱར་བརྩིས་ནས། ཏང་གི་རྩ་བའི་གཞུང་ལུགས་དང་རྩ་བའི་ལམ་ཕྱོགས། རྩ་བའི་ཐབས་ཇུས་བཅས་ཁོང་དུ་ཆུད་པར་བྱེད་པ་དང་། རྒྱལ་ཁབ་ཀྱི་རྩ་བའི་ཆབ་སྲིད་ལམ་ལུགས་དང་གཞི་རྩའི་ཆབ་སྲིད་ལམ་ལུགས། རྩ་ཁྲིམས། འབྲེལ་ཡོད་བཅའ་ཁྲིམས་བཅས་ཁོང་དུ་ཆུད་པར་བྱས་ནས། ཆབ་སྲིད་ཀྱི་ནུས་པ་དང་བསམ་བློའི་གོ་རྟོགས། ཁྲིམས་ལྟར་འགན་འཁྲི་སྒྲུབ་པའི་ནུས་པ་བཅས་རྒྱུན་ཆད་མེད་པར་ཆེ་རུ་གཏོང་དགོས། དམངས་ཆེན་རྒྱུན་ལས་ཨུ་ཡོན་ལྷན་ཁང་ལས་ཁུངས་ཀྱིས་འཐུས་མིའི་སློབ་སྦྱོང་དང་གསོ་སྦྱོང་ལ་གཅིག་གྱུར་སྒོས་ཇུས་འགོད་དང་ནན་ཏན་སྒོས་རྩ་འཛུགས་ལེགས་པོ་བྱས་ཏེ། བསམ་བློའི་སྣེ་ཁྲིད་འབུར་ཐོན་ཡོང་བར་བྱེད་པ་དང་འགན་འཁྲི་ལག་བསྟར་བྱེད་པའི་རྨང་གཞིའི་ཤེས་བྱར་ཤུགས་སྣོན་པ། སློབ་སྦྱོང་དང་གསོ་སྦྱོང་གི་དམིགས་འབེན་རང་བཞིན་དང་དངོས་ཕན་རང་བཞིན་མངོན་སུམ་གྱིས་ཇེ་དྲག་ཏུ་གཏོང་བ་བཅས་བྱེད་དགོས་ཞེས་གསུངས།

ཀྲའོ་ལི་ཅི་ཡིས་དམངས་ཆེན་འཐུས་མིས་མི་དམངས་མང་ཚོགས་དང་འབྲེལ་བ་དམ་ཟབ་བྱེད་དགོས་པ་དེ་ནི།  འཐུས་མིས་ཁྲིམས་ལྟར་འགན་འཁྲི་སྒྲུབ་པ་དང་ནུས་པ་འདོན་སྤེལ་བྱེད་པའི་ཐབས་ལམ་དང་རྨང་གཞི་གལ་ཆེན་ཞིག་ཡིན། འཐུས་མི་ནི་མི་དམངས་ཀྱི་ཁྲོད་ནས་ཡོང་བ་དང་མི་དམངས་ཀྱི་ཁྲོད་དུ་རྩ་བ་ཚུགས་པ་ཞིག་ཡིན། དམངས་ཆེན་ལམ་ལུགས་ཀྱི་འཐུས་མིས་གཅིག་གྱུར་བཀོད་སྒྲིག་དང་རྩ་འཛུགས་གཞིར་བཟུང་ནས་གཟིགས་ཞིབ་དང་རྟོག་ཞིབ་སོགས་ཀྱི་བྱ་འགུལ་ནང་ཞུགས་ནས། རྒྱལ་ཁབ་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་ཤེས་རྟོགས་དང་མི་དམངས་མང་ཚོགས་ཀྱི་བསམ་བློ་གཏོང་ཕྱོགས་ཤེས་རྟོགས་བྱེད་དགོས། རྒྱུན་ལྡན་གྱི་ལས་ཀ་དང་འཚོ་བའི་ཁྲོད་དུ་མང་ཚོགས་ཀྱི་བསམ་འཆར་དང་གྲོས་གཞིར་ཉན་དགོས་པ་དང་། ཁྲིམས་བཀོད་འགན་འཁྲི་དང་འགན་འཁྲི་སྒྲུབ་པའི་དགོས་མཁོར་རྩེ་གཅིག་ཏུ་དམིགས་དགོས། འཐུས་མིས་མང་ཚོགས་དང་འབྲེལ་གཏུག་བྱེད་པར་གཙོ་བོ་ཟམ་པ་ལྟ་བུའི་ནུས་པ་དང་སྐུལ་སྤེལ་གྱི་ནུས་པ་འདོན་སྤེལ་བྱེད་དགོས། ལམ་ལུགས་དང་བཅའ་ཁྲིམས་ཀྱི་ཐད་ནས་ཕྱོགས་བསྡུས་སྒོས་དབྱེ་ཞིབ་དང་གྲོས་གཞི་ཞིབ་འཇུག་སྒོས་འདོན་རྒྱུར་དོ་སྣང་བྱས་ཏེ། མི་དམངས་ཀྱི་འདོད་བློ་དང་མི་དམངས་ཀྱི་བློ་རིག་འབྲེལ་ཡོད་གྲོས་གཞི་དང་གྲོས་ཞིབ་ཀྱི་ཁྲོད་ནས་མཚོན་པར་བྱེད་དགོས། དམངས་ཆེན་རྒྱུན་ལས་ཨུ་ཡོན་ལྷན་ཁང་གི་རིམ་པ་སོ་སོས་དམངས་ཆེན་འཐུས་མིར་འབྲེལ་གཏུག་བྱེད་པའི་ལམ་ལུགས་དང་ལམ་སྲོལ་སྔར་ལས་འཐུས་ཚང་དུ་བཏང་སྟེ། འཐུས་མིས་ཁྲིམས་ལྟར་དང་གོ་རིམ་ལྡན་པའི་སྒོ་ནས་ལས་འགན་སྒྲུབ་པ་དང་བྱེད་སྒོར་ཞུགས་པར་རྒྱབ་སྐྱོར་དང་འགན་སྲུང་བྱེད་དགོས་ཞེས་གསུངས།

ཀྲའོ་ལི་ཅི་ཡིས་དམངས་ཆེན་འཐུས་མིས་དཔེ་སྟོན་སྣེ་ཁྲིད་ཀྱི་ནུས་པ་འདོན་སྤེལ་བྱས་ཏེ། འཐུས་མིའི་གོ་གནས་ལ་ལྡབ་འགྱུར་གྱིས་གཅེས་འཛིན་བྱེད་པ་དང་། རྩ་ཁྲིམས་དང་བཅའ་ཁྲིམས་ལ་བརྩི་སྲུང་བྱེད་པའི་མིག་དཔེ་སྟོན་པ། སྤྱི་ཚོགས་རིང་ལུགས་ཀྱི་སྲོག་ཤིང་རིན་ཐང་ལྟ་བ་ལག་བསྟར་བྱེད་པ། རང་འཁྲིའི་ལས་གནས་ཀྱི་སྟེང་དུ་བྱས་རྗེས་འཇོག་པ་དང་འབད་འབུངས་ཡར་བརྩོན་བཅས་བྱེད་དགོས། ཀུན་གྱི་སྣེ་ཁྲིད་དེ་ཚོགས་སྲོལ་དང་རྩོམ་སྲོལ་བཟང་པོ་དར་སྤེལ་གཏོང་བ་དང་། དམངས་ཆེན་གྲོས་ཚོགས་ཀྱི་སྒྲིག་ཁྲིམས་དང་གཏན་འབེབས་སོ་སོར་བརྩི་སྲུང་ནན་མོ་བྱེད་པ་དང་རང་འགན་ནན་སྒྲུབ་བྱེད་པ། སྤྱོད་གཙང་སྤྱི་གཞོལ་བཅས་བྱེད་དགོས། ཚད་གཞི་སྔར་ལས་མཐོ་བའི་སྒོ་ནས་རང་ཉིད་ལ་བླང་བྱ་ནན་མོ་འདོན་པ་དང་། རང་རྟོགས་དང་ལྷག་བསམ་རྣམ་དག་གི་སྒོ་ནས་ལྟ་སྐུལ་དང་ལེན་བྱས་ཏེ། དམངས་ཆེན་འཐུས་མིའི་སྣང་བརྙན་བཟང་པོ་བསྐྲུན་དགོས་ཞེས་ནན་གྱིས་གསུངས།

ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ་ལིས་ཧུང་ཀྲུང་གིས་བཞུགས་མོལ་ཚོགས་འདུར་འགོ་འཛིན་བྱས།