ཞི་ཅིན་ཕིང་བཟའ་ཟླ་གཉིས་ཀྱིས་ཡོ་ནན་གུང་ཁྲན་ཏང་ཀྲུང་དབྱང་གི་སྤྱི་ཁྱབ་ཧྲུའུ་ཅི་རོན་ཧྥུའུ་ཀྲུང་བཟའ་ཟླ་གཉིས་ལ་ཞལ་གྱེས་གསུང་གླེང་གནང་།
ས་དེའི་དུས་ཚོད་ཟླ12པའི་ཚེས13ཉིན་གྱི་ཕྱི་དྲོར། ཡོ་ནན་ལ་རྒྱལ་དོན་འཚམས་འདྲི་མཛད་ནས་ཕྱིར་རྒྱལ་ནང་དུ་ལོག་ལ་ཉེ་བའི་སྐབས་སུ། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་ལྕམ་མོ་ཕིན་ལིས་ཡོན་གཉིས་ཀྱིས་ཡོ་ནན་གུང་ཁྲན་ཏང་ཀྲུང་དབྱང་གི་སྤྱི་ཁྱབ་ཧྲུའུ་ཅི་རོན་ཧྥུའུ་ཀྲུང་དང་ལྕམ་མོ་ཝུའུ་ཧྲི་མེན་གཉིས་ལ་ཞལ་གྱེས་གསུང་གླེང་གནང་།
རོན་ཧྥུའུ་ཀྲུང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཐེངས་འདིའི་འཚམས་འདྲི་བདེ་བླག་ངང་ཡོངས་འགྲུབ་བྱས་པར་རྟེན་འབྲེལ་ཞུས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཐེངས་འདིའི་འཚམས་འདྲིའི་ཉིན་རིམ་ལ་བྲེལ་བ་ཆེ་ཞིང་ནང་དོན་ཕུན་སུམ་ཚོགས་ལ། དོན་སྙིང་ལྡན་པ་དང་། ཕྱོགས་གཉིས་ཀྱི་མཉམ་ལས་ཡིག་ཆ་བཅུ་ལྷག་བཀོད་པར་བདེན་དཔང་གནང་བར་མ་ཟད། དེ་ལས་ཀྱང་གལ་ཆེ་བ་ནི་ང་ཚོས་ཕན་ཚུན་བར་གྱི་རྒྱུས་ལོན་དང་ཡིད་ཆེས་སྔར་ལས་ཇེ་དྲག་ཏུ་བཏང་བ་དང་། འཐབ་ཇུས་དོན་སྙིང་ལྡན་པའི་ཡོ་ནན་དང་ཀྲུང་གོའི་ལས་སྐལ་གཅིག་མཐུན་ཚོགས་པ་འཛུགས་རྒྱུ་ཐག་བཅད་ལ། དེ་མ་འོངས་པའི་རྒྱལ་ཁབ་གཉིས་ཀྱི་འབྲེལ་བར་ཐག་གཅོད་རང་བཞིན་གྱི་དོན་སྙིང་ལྡན། ད་སོ་མར་ང་ཚོས་ད་རུང་རྒྱལ་ཁབ་གཉིས་ཀྱི་མཛའ་མཐུན་མི་སྣ་དང་ན་གཞོན་འཐུས་མི་ལ་ཐུག་འཕྲད་བྱས་ཏེ་ཁོ་ཚོས་ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་དམ་པོར་བཅངས་དགོས་པའི་སྐུལ་མ་གནང་བ་དང་། ཁོ་ཚོས་ང་ཚོ་རྒྱལ་ཁབ་གཉིས་ཀྱི་བློ་མཐུན་དང་སྤུན་ཟླའི་འབྲེལ་བའི་སྲོལ་རྒྱུན་མཛའ་བརྩེ་རྒྱུན་འཛིན་བྱས་ནས་ཡོ་ནན་དང་ཀྲུང་གོའི་མཛའ་མཐུན་ལས་དོན་དར་སྤེལ་བྱེད་པའི་ཡིད་ཆེས་ཡོད་ཅེས་བསྟན།
ཞི་ཅིན་ཕིང་གིས་ཀྲུང་གུང་ཚོགས་ཆེན་ཉི་ཤུ་པ་བདེ་བླག་ངང་བསྡུས་རྗེས། ངས་དེ་མ་ཐག་སྤྱི་ཁྱབ་ཧྲུའུ་ཅི་རོན་ཧྥུའུ་ཀྲུང་གིས་ཀྲུང་གོར་འཚམས་འདྲི་གནང་རྒྱུར་གདན་ཞུ་བྱས་པ་དང་། ཐེངས་འདིར་ངས་ཡང་བསྐྱར་ཡོ་ནན་ལ་རྒྱལ་དོན་འཚམས་འདྲི་བྱས་པ་འདིས་ད་ལོའི་ཀྲུང་གོའི་ཕྱི་འབྲེལ་བདེ་བླག་ངང་མཇུག་བསྡུས་པ་ཡིན་ལ། དེར་དོན་སྙིང་གལ་ཆེན་ལྡན། ཀྲུང་གོ་དང་ཡོ་ནན་ཏང་གཉིས་ཀྱི་འགོ་ཁྲིད་པས་ཏང་གཉིས་དང་རྒྱལ་ཁབ་གཉིས་ཀྱི་འབྲེལ་བའི་འཕེལ་རྒྱས་ལ་དངོས་སུ་འཆར་འགོད་བྱེད་རྒྱུ་དེ་ང་ཚོའི་སྲོལ་རྒྱུན་བཟང་བོ་ཞིག་ཡིན། ཐེངས་འདིའི་འཚམས་འདྲིའི་སྐབས་སུ། ང་ཚོས་འཐབ་ཇུས་དོན་སྙིང་ལྡན་པའི་ལས་སྐལ་གཅིག་མཐུན་ཚོགས་པ་བསྐྲུན་རྒྱུ་མཉམ་དུ་ཁྱབ་བསྒྲགས་བྱས་ཏེ་ཀྲུང་གོ་དང་ཡོ་ནན་གྱི་འབྲེལ་བ་ལོ་རྒྱུས་ཀྱི་འགོ་རྩོམ་ས་གསར་པ་ཞིག་ཏུ་སླེབས་པར་བྱས་པ་དང་། དེས་ཀྲུང་གོ་དང་ཡོ་ནན་གྱི་འབྲེལ་བ་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་གཏོང་ངེས་ཡིན་ཞེས་གསུངས།
ཞི་ཅིན་ཕིང་གིས་ཐེངས་འདིའི་འཚམས་འདྲིའི་སྐབས་སུ་ངའི་སེམས་དྲོ་བར་བྱས་པ་དང་སེམས་འགུལ་ཐེབས་སུ་བཅུག་སོང། ང་ལ་བག་ཆགས་ཆེས་ཟབ་པ་ནི་སྤྱི་ཁྱབ་ཧྲུའུ་ཅི་རོན་ཧྥུའུ་ཀྲུང་གིས་ཡང་དང་བསྐྱར་དུ་ཡོ་ནན་དང་ཀྲུང་གོ་གཉིས་ཀྱི་མཛའ་བརྩེ་ཟབ་མོ་དང་བློ་མཐུན་དང་སྤུན་ཟླའི་འབྲེལ་བ་ནན་སྟོན་གནང་བ་དེ་ཡིན་ལ། དེ་ནི་ཀྲུང་གོ་དང་ཡོ་ནན་གྱི་འབྲེལ་བའི་འགོ་རྩོམ་ས་དང་རྨང་གཞི་ཡིན། ང་ཚོ་བགྲོད་ལམ་འདི་བརྒྱུད་དེ་བློ་བརྟན་འགྱུར་མེད་ངང་མདུན་དུ་བསྐྱོད་ན། ཀྲུང་གོ་དང་ཡོ་ནན་གཉིས་ཀྱི་འབྲེལ་བར་འཕེལ་རྒྱས་གསར་པ་འབྱུང་ངེས་པ་དང་རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་བསྐྲུན་ངེས། སྤྱི་ཁྱབ་ཧྲུའུ་ཅི་རོན་ཧྥུའུ་ཀྲུང་དང་ལྕམ་མོ་གཉིས་ཀྱིས་ཐེངས་འདིར་ངེད་བཟའ་ཟླ་གཉིས་ལ་གཟབ་རྒྱས་ལྡན་ཞིང་སྤྲོ་སེམས་ཆེན་པོའི་སྣེ་ལེན་གནང་བར་བཀའ་དྲིན་ཞུས་པ་ཡིན་ལ། ང་ཚོས་དེ་ཡིད་ལ་དམ་པོར་བཅངས་ངེས། ངས་སྤྱི་ཁྱབ་ཧྲུའུ་ཅི་རོན་ཧྥུའུ་ཀྲུང་དང་མཉམ་དུ་བྱེད་ཐབས་སྣ་མང་བརྒྱུད་དེ་འབྲེལ་འདྲིས་ཟབ་མོ་སྲུང་འཛིན་བྱེད་འདོད་ཡོད་ཅེས་གསུངས།
ཚའེ་ཆི་དང་ཝང་དབྱི། ཝང་ཞའོ་ཧུང་སོགས་གོང་གི་བྱེད་སྒོར་ཞུགས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注