ཏེན་ཞུའེ་ཞང་རྒྱལ་ཡོངས་ཀྱི་མཐོ་རིམ་སློབ་གྲྭའི་མཐར་ཕྱིན་སློབ་མ་སོགས་གཞོན་ནུའི་ལས་ཞུགས་ལས་སྐྲུན་བྱ་བའི་བརྙན་རིས་གྲོས་ཚོགས་སུ་ཞུགས།
ཟླ4པའི་ཚེས2ཉིན། རྒྱལ་ཡོངས་ཀྱི་མཐོ་རིམ་སློབ་གྲྭའི་མཐར་ཕྱིན་སློབ་མ་སོགས་གཞོན་ནུའི་ལས་ཞུགས་ལས་སྐྲུན་བྱ་བའི་བརྙན་རིས་གྲོས་ཚོགས་པེ་ཅིང་དུ་བསྡུས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཏེན་ཞུའེ་ཞང་གྲོས་ཚོགས་སུ་ཞུགས་པ་མ་ཟད་གསུང་བཤད་གནང་།
ཏེན་ཞུའེ་ཞང་གིས་བསྟན་དོན། མཐོ་རིམ་སློབ་གྲྭའི་མཐར་ཕྱིན་སློབ་མ་ནི་ཏང་དང་རྒྱལ་ཁབ་ཀྱི་འཇོན་མིའི་ཐོན་ཁུངས་རྩ་ཆེན་ཡིན་ལ། མཐོ་རིམ་སློབ་གྲྭའི་མཐར་ཕྱིན་སློབ་མ་སོགས་གཞོན་ནུའི་ལས་ཞུགས་ལས་སྐྲུན་བྱ་བ་དེ་ཁྱིམ་ཚང་ཁྲི་སྟོང་མང་པོར་འབྲེལ་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ནན་ཏན་སྒོས་ལག་བསྟར་གཏིང་ཟབ་བྱེད་པ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་ལག་བསྟར་གཏིང་ཟབ་བྱས་ཏེ། མཐོ་རིམ་སློབ་གྲྭའི་མཐར་ཕྱིན་སློབ་མ་སོགས་གཞོན་ནུའི་ཚོགས་སྤྱིའི་ལས་ཞུགས་ཏེ་གལ་ཆེན་ནང་འགངས་ཆེན་དུ་འཇོག་པ་རྒྱུན་འཁྱོངས་བྱས་ནས། གཞོན་ནུའི་ལས་ཞུགས་ཆུ་ཚད་སྤྱིའི་ཆ་ནས་བརྟན་པོ་ཡོང་བར་ཁག་ཐེག་བྱེད་དགོས།
ཏེན་ཞུའེ་ཞང་གིས་ནན་གྱིས་བསྟན་དོན། ཐབས་རྒྱ་ཇུས་སྟོང་གིས་ལས་ཞུགས་ལས་གནས་ཇེ་མང་དུ་གཏོང་དགོས་པ་དང་། ནུས་ཤུགས་ཡོད་རྒུས་མཐོ་རིམ་སློབ་གྲྭའི་མཐར་ཕྱིན་སློབ་མས་ལས་ཞུགས་ཡག་པོ་བྱེད་ཐུབ་པར་སྐུལ་འདེད་གཏོང་དགོས། གཙོ་གནད་ཁྱབ་ཁོངས་ལ་ཁ་ཕྱོགས་པ་དང་། གཙོ་གནད་ལས་རིགས་ཀྱི་ལས་གནས་རྒྱ་བསྐྱེད་པར་སྔར་ལས་གདེང་འཇོག་བྱས་ཏེ། ཐོན་ལས་འཕེལ་རྒྱས་ཁྲོད་ལས་ཞུགས་ཀྱི་འཕར་ཚད་གསར་སྣོན་བྱེད་པར་སྐུལ་འདེད་གཏོང་དགོས། མཁར་གྲོང་གི་གཞི་རིམ་ལས་གནས་བརྟན་པོ་དང་ལས་གནས་འཕར་སྣོན་བྱེད་ཚད་དམ་འཛིན་བཟང་པོ་བྱས་ནས། སྲིད་ཇུས་ཀྱི་འགན་སྲུང་ཇེ་དྲག་ཏུ་གཏོང་བ་དང་། མཐོ་རིམ་མཐར་ཕྱིན་སློབ་མ་ཟབ་ཞུགས་བྱེད་ཐུབ་པ་དང་། སྡོད་ཐུབ་པ། བྱ་བ་ཡག་པོ་སྒྲུབ་ཐུབ་པ་བཅས་བྱེད་དགོས། ཧུར་ཐག་གིས་ཁེ་ལས་འབྲིང་ཆུང་ཕྲན་གསུམ་འཕེལ་རྒྱས་གཏོང་བར་རྒྱབ་སྐྱོར་བྱས་ནས། ལས་གནས་འདོན་སྤྲོད་བྱེད་ཚད་རྒྱ་བསྐྱེད་པ་དང་། ཁེ་ལས་ཀྱིས་མཐོ་རིམ་མཐར་ཕྱིན་སློབ་མ་བསྡུ་ལེན་བྱེད་པའི་ཧུར་བརྩོན་རང་བཞིན་དང་རང་འགུལ་རང་བཞིན་སྐུལ་སྤེལ་བྱེད་དགོས། སྲིད་ཇུས་ཀྱི་ཕྱོགས་བསྡུས་ནུས་པ་སྔར་ལས་འདོན་སྤེལ་ལེགས་པོ་བྱས་ཏེ། ལས་ཞུགས་སྲིད་ཇུས་སྣ་ཚོགས་སྔ་མོ་ནས་འདོན་པར་སྐུལ་སྤེལ་བྱེད་པ་དང་། སྲིད་ཇུས་རང་བཞིན་གྱི་ལས་གནས་གཞི་ཁྱོན་ཇེ་བརྟན་དུ་གཏོང་བ་དང་སྔ་མོ་ནས་ལས་མི་བསྡུ་བ་དང་མང་པོ་བསྡུ་དགོས། ལས་སྐྲུན་གྱི་གཟིགས་སྐྱོང་སྲིད་ཇུས་ཀྱི་རྒྱབ་སྐྱོར་དང་དངོས་འབེབ་ནུས་པ་ཇེ་ཆེར་བཏང་སྟེ། སློབ་ཆེན་སློབ་མས་ལས་སྐྲུན་བྱེད་པ་དང་ལས་ཞུགས་ལ་སྣེ་ཁྲིད་བྱེད་པར་སྐུལ་འདེད་གཏོང་དགོས།
ཏེན་ཞུའེ་ཞང་གིས་བསྟན་དོན། ལས་ཞུགས་མཛུབ་ཁྲིད་ཞབས་ཞུའི་བྱ་བ་ལྷག་བསམ་རྣམ་དག་གིས་བཟང་པོར་སྒྲུབ་དགོས་པ་དང་། མཐར་ཕྱིན་སློབ་མས་ལས་རིགས་བཟང་པོ་འདེམས་ཐུབ་པ་དང་མགྱོགས་མྱུར་སྒོས་ལས་ཞུགས་བྱེད་པར་རོགས་རམ་བྱེད་དགོས། བསམ་བློའི་ཆབ་སྲིད་སློབ་གསོར་ཤུགས་བསྣན་ནས། མཐར་ཕྱིན་སློབ་མས་རྒྱལ་ཁབ་འཕེལ་རྒྱས་ཀྱི་དགོས་མཁོ་དང་མི་སྒེར་གྱི་དོན་དངོས་ལ་གཞིགས་ནས་ཚུལ་མཐུན་དངོས་གཉེར་གྱི་ལས་རིགས་དང་ལས་གནས་འདེམས་པར་སྣེ་ཁྲིད་བྱེད་དགོས། ཁ་གཏད་རོགས་སྐྱོར་གྱི་འགན་འཁྲི་དོན་འཁྱོལ་དང་རོགས་སྐྱོར་གྱི་རྩིས་ཐོ་འཐུས་ཚང་དུ་བཏང་སྟེ། དཀའ་ངལ་ཡོད་པའི་མཐར་ཕྱིན་སློབ་མའི་རྣམས་སྔོན་ལ་བཞག་ནས་ཞབས་ཞུ་སྒྲུབ་དགོས། ལས་ཞུགས་ནུས་པའི་གསོ་སྦྱོང་ལ་ཤུགས་བསྣན་ཏེ། མཐར་ཕྱིན་སློབ་མ་སློབ་གྲྭ་ནས་ལས་ཞུགས་བར་གྱི་བར་བརྒལ་ནས་བདེ་བླག་ངང་བགྲོད་པར་རོགས་རམ་བྱ་དགོས།
ཏེན་ཞུའེ་ཞང་གིས་ས་ཁུལ་སོ་སོ་དང་སྡེ་ཁག་སོ་སོ། མཐོ་རིམ་སློབ་གྲྭ་སོ་སོས་རྩ་འཛུགས་མགོ་ཁྲིད་ལ་ཤུགས་བསྣན་ནས། བྱ་བའི་འགན་འཁྲི་གཟབ་ནན་དུ་གཏོང་བ་དང་། ལྟ་སྐུལ་ཞིབ་བཤེར་དང་གཞི་གྲངས་ལྟ་ཞིབ་ཚད་ལེགས་བྱེད་ཤུགས་ཇེ་དྲག་ཏུ་བཏང་ནས། མཐར་ཕྱིན་སློབ་མའི་ཁྲིམས་མཐུན་ཁེ་དབང་སྲུང་སྐྱོང་བྱེད་པ་དང་། གླེང་ཕྱོགས་ཀྱི་ཁོར་ཡུག་བཟང་པོ་བསྐྲུན་ནས། མཐོ་རིམ་སློབ་གྲྭའི་མཐར་ཕྱིན་སློབ་མའི་ལས་ཞུགས་ཏེ་རྒྱལ་ཁབ་ཀྱི་ཐབས་ཇུས་དང་དམངས་ཚིས་ལ་འབྲེལ་བའི་དོན་ཆེན་མཉམ་དུ་བཟང་པོར་སྒྲུབ་དགོས་པའི་བླང་བྱ་བཏོན།
རྒྱལ་སྲིད་ཨུ་ཡོན་ཧྲིན་དབྱི་ཆིན་གྲོས་ཚོགས་སུ་ཞུགས་པ་མ་ཟད་གཏམ་བཤད། ཀྲུང་དབྱང་དང་རྒྱལ་ཁབ་ལས་ཁུངས་ཀྱི་འབྲེལ་ཡོད་སྡེ་ཁག་དང་། འབྲེལ་ཡོད་མི་དམངས་ཚོགས་པ། ཀྲུང་དབྱང་དམག་དོན་ཨུ་ཡོན་ལྷན་ཁང་ལས་ཁུངས་ཀྱི་འབྲེལ་ཡོད་སྡེ་ཁག པེ་ཅིང་དུ་ཡོད་པའི་པུའུ་ཨུའི་ཐད་གཏོགས་ཀྱི་མཐོ་རིམ་སློབ་གྲྭའི་འགན་འཁུར་བློ་མཐུན་ཚོགས་ར་གཙོ་བོའི་གྲོས་ཚོགས་ཞུགས། ཞིང་ཆེན་དང་རང་སྐྱོང་ལྗོངས། ཐད་གཏོགས་གྲོང་ཁྱེར་སོ་སོའི་མི་དམངས་སྲིད་གཞུང་དང་། ཞིན་ཅང་ཐོན་སྐྱེད་འཛུགས་སྐྲུན་དམག་དཔུང་གི་འགན་ཁུར་བློ་མཐུན། དེ་མིན་འབྲེལ་ཡོད་སྡེ་ཁག་ལས་ཁུངས་ཀྱི་འགན་ཁུར་བློ་མཐུན་བཅས་ཡན་ལག་ཚོགས་ར་ནས་གྲོས་ཚོགས་སུ་ཞུགས། མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུའུ་དང་སློབ་གསོ་པུའུ། ཀྲེ་ཅང་ཞིང་ཆེན་མི་དམངས་སྲིད་གཞུང་། ཧུའུ་པེ་ཞིང་ཆེན་མི་དམངས་སྲིད་གཞུང་དང་ཧྲན་ཏུང་སློབ་ཆེན་གྱི་འགན་ཁུར་བློ་མཐུན་གཙོ་བོ། དེ་མིན་མཐོ་རིམ་སློབ་གྲྭའི་མཐར་ཕྱིན་སློབ་མི་འཐུས་བཅས་ཀྱིས་གྲོས་ཚོགས་སྟེང་གཏམ་བཤད།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注