ཧྥུན་ཏི་ལའེ་ཨིན་གྱིས་དགོས་གལ་ཡོད་པའི་སྐབས་སུ་ཨ་མེ་རི་ཁའི་སྒོ་ཁྲལ་སྲིད་ཇུས་ལ་རྒོལ་ལན་སྤྲོད་སྲིད་པའི་ཚུལ་བསྟན།

ཡོ་རོབ་གླིང་མནའ་འབྲེལ་ཨུ་ཡོན་ལྷན་ཁང་གི་ཀྲུའུ་ཞི་ཧྥུན་ཏི་ལའེ་ཨིན་གྱིས་ཟླ4བའི་ཚེས1ཉིན་ཧྥ་རན་སིའི་སི་ཐི་ལཱ་སི་པའོ་ནས་བསྡུས་པའི་ཡོ་རོབ་གླིང་གྲོས་ཁང་གི་ཚང་འཛོམས་གྲོས་ཚོགས་སྟེང་བསྟན་དོན། ཡོ་རོབ་གླིང་མནའ་འབྲེལ་ལ་ཤུགས་དང་ལྡན་པའི་ངོ་རྒོལ་འཆར་གཞི་ཡོད་པ་དང་། དགོས་གལ་ཡོད་པའི་སྐབས་སུ་ཨ་མེ་རི་ཁའི་སྒོ་ཁྲལ་སྲིད་ཇུས་ལ་རྒོལ་ལན་སྤྲོད་ངེས་ཡིན་ཟེར།

ཧྥུན་ཏི་ལའེ་ཨིན་གྱིས་བཤད་རྒྱུར། ཨ་མེ་རི་ཁས་སྒོ་ཁྲལ་ཁ་སྣོན་བྱེད་པའི་བྱེད་ཐབས་ནི་ནོར་འཆུག་གི་བྱ་སྤྱོད་ཅིག་ཡིན་པ་དང་། འགལ་བ་དེ་ཡོ་རོབ་གླིང་མནའ་འབྲེལ་གྱིས་བསླངས་པ་མིན། ཡོ་རོབ་གླིང་མནའ་འབྲེལ་གྱིས་ཨ་མེ་རི་ཁའི་བར་གྲོས་མོལ་བྱས་ནས་ཐག་གཅོད་ཇུས་གཞི་བཀོད་ཡོད། གལ་ཏེ་དགོས་པ་ཡོད་ན་ཡོ་རོབ་གླིང་མནའ་འབྲེལ་གྱིས་ནུས་པ་ལྡན་པའི་འཆར་གཞི་ལག་བསྟར་བྱས་ནས་ཨ་མེ་རི་ཁར་རྒོལ་ལན་སྤྲད་དེ། ཡོ་རོབ་གླིང་མནའ་འབྲེལ་གྱི་ཁེ་ལས་དང་མང་ཚོགས་ཀྱི་ཁེ་ཕན་ལ་སྲུང་སྐྱོབ་བྱེད་རྒྱུ་ཡིན་ཟེར།

ཁོ་མོས་བཤད་རྒྱུར། ང་ཚོར་མང་ཚོགས་དང་དར་རྒྱས་ལ་སྲུང་སྐྱོབ་བྱེད་པར་མཁོ་བའི་ཡོད་ཚད་ཡོད་ལ། ང་ཚོར་གྲོས་མོལ་བྱེད་པའི་སྟོབས་ཤུགས་ཡོད་པར་མ་ཟད་རྒོལ་ལན་སྤྲོད་པའི་སྟོབས་ཀྱང་ཡོད་ཟེར།

ཨ་མེ་རི་ཁའི་ཙུང་ཐུང་ཐི་ལིང་ཕུའུ་ཡིས་ཉེ་སྔོན་སྤྱི་སྒྲོག་བཀོད་དེ། ནང་འདྲེན་རླངས་འཁོར་གྱི་སྒོ་ཁྲལ་བརྒྱ་ཆའི་ཉེར་ལྔ་ཁ་སྣོན་བྱེད་རྒྱུ་ཡིན་པ་དང་། ཟླ4བའི་ཚེས3ཉིན་ནས་བཟུང་ལག་བསྟར་བྱེད་རྒྱུ་ཡིན་ཟེར། དེའི་སྔོན་ཁོས་རྣོ་ལྕགས་དང་ཧ་ཡང་ཐོན་རྫས་ནང་འདྲེན་བྱེད་པར་བརྒྱ་ཆའི་ཉེར་ལྔའི་སྒོ་ཁྲལ་བསྡུ་རྒྱུ་ཁྱབ་བསྒྲགས་བྱས་པ་ར་མ་ཟད། ཟླ4བའི་ཚེས2ཉིན་ནས་བཟུང་འདྲ་མཉམ་གྱི་སྒོ་ཁྲལ་ཁ་སྣོན་བྱེད་རྒྱུ་རེད། ཧྥུན་ཏི་ལའེ་ཨིན་གྱིས་བསྟན་དོན། སྐོར་ཐེངས་རྗེས་མའི་ཤུགས་རྐྱེན་ཐེབས་པའི་ལས་རིགས་ལ་སྨན་རྫས་དང་ཤིང་ཆ་སོགས་འདུས་ཟེར།

ཁོ་མོས་བཤད་རྒྱུར། སྒོ་ཁྲལ་ཁ་སྣོན་བྱས་ན་རྒྱལ་སྤྱིའི་ཉོ་ཚོང་གནས་བབ་སྔར་ལས་ཇེ་སྡུག་ཏུ་གཏོང་སྲིད། སྒོ་ཁྲལ་ལས་དངུལ་ལོར་ཚད་བརྒལ་འགྲེམ་པའི་སྣང་ཚུལ་ཇེ་སྡུག་ཏུ་གཏོང་སྲིད་ལ། དེ་ང་ཚོས་མངོན་འགྱུར་བྱེད་འདོད་ཡོད་པའི་དམིགས་འབེན་དང་རྒྱབ་འགལ་དུ་སོང་ཡོད། ཨ་མེ་རི་ཁའི་བཟོ་གྲྭས་ཡོ་རོབ་གླིང་གིས་ཐོན་སྐྱེད་བྱས་པའི་ལྷུ་ལག་ལ་སྔར་ལས་མཐོ་བའི་རིན་གོང་སྟེར་དགོས་པས། ལས་ཞུགས་ལས་གནས་ཇེ་ཉུང་དུ་འགྲོ་སྲིད་ཟེར།