ཐུར་ཁེའི་ཕྱི་འབྲེལ་བློན་ཆེན་གྱིས་སི་རི་ཡཱ་རུ་འཚམས་འདྲི་བྱས།

སི་རི་ཡཱའི་ཧྲ་མུའུ་བཅིངས་འགྲོལ་དྲག་ཆས་པའི་མགོ་ཁྲིད་པ་ཨེ་ཧཱ་མེད་ཏི་ཧྲ་ལཱ་ཡིས་ཚེས22ཉིན་སི་རི་ཡཱའི་རྒྱལ་ས་ཏཱ་མཱ་ཧྲི་ཀི་ནས་འཚམས་འདྲིར་ཡོང་བའི་ཐུར་ཁེའི་ཕྱི་འབྲེལ་བློན་ཆེན་ཧྥེ་ཏན་ལ་ཐུག་འཕྲད་བྱས། ཧྲ་ལཱ་ཡིས་སི་རི་ཡཱའི་ཕྱོགས་ཁག་སོ་སོའི་དྲག་ཆས་མེད་པར་གཏོང་དགོས་པའི་ཚུལ་བསྟན་པ་དང་། ཧྥེ་ཏན་གྱིས་རྒྱལ་སྤྱིའི་སྤྱི་ཚོགས་ཀྱིས་མྱུར་མོར་སི་རི་ཡཱའི་བཀག་སྡོམ་མེད་པར་གཏོང་དགོས་པའི་འབོད་སྐུལ་བཏང་།

ཐུག་འཕྲད་བྱས་རྗེས་སྤེལ་བའི་མཉམ་འབྲེལ་གྱི་གསར་འགྱུར་སྒྲོག་སྤེལ་ཚོགས་འདུའི་སྟེང་ཧྲ་ལཱ་ཡིས་བཤད་རྒྱུར། དྲག་ཆས་གང་ཡིན་ཡང་རྒྱལ་ཁབ་ཀྱི་ཚོད་འཛིན་ཁྱབ་ཁོངས་ལས་བརྒལ་མི་རུང་། དེ་ལྟ་མིན་ཚེ་རྒྱལ་ཁབ་ཀྱི་གཏན་འཇགས་ལ་གཏོར་བརླག་བྱེད་སྲིད་ལ། སི་རི་ཡཱ་ཡས་རྒྱལ་སྲུང་པུའུ་གསར་བའི་འགོ་ཁྲིད་འོག་ཏུ་དམག་དཔུང་གཅིག་གྱུར་བྱེད་དགོས་ཟེར།

ཧྲ་ལཱ་ཡིས་རྒྱལ་སྤྱིའི་སྤྱི་ཚོགས་ཀྱིས་གང་མགྱོགས་སྒོས་ཐུན་མོང་ལྟ་ཚུལ་བཀོད་དེ། སི་རི་ཡཱའི་མཐུན་སྒྲིལ་ལ་འགན་སྲུང་དང་སི་རི་ཡཱའི་མི་དམངས་ཀྱི་དཀའ་སྡུག་ཇེ་ཆུང་དུ་གཏོང་དགོས་པའི་འབོད་སྐུལ་བཏང་། ཁོས་ད་རུང་བསྟན་དོན། ཐུར་ཁེ་ནི་སི་རི་ཡཱའི་མི་དམངས་ཀྱི་གྲོགས་པོ་ཡིན་པས། ཕྱོགས་གཉིས་ཀྱིས་ས་ཁུལ་རང་གི་མ་འོངས་པའི་འཕེལ་རྒྱས་ལ་འཚམ་པའི་འཐབ་ཇུས་འབྲེལ་བ་འཛུགས་པར་འབད་འབུངས་བྱེད་དགོས་ཟེར།

ཧྥེ་ཏན་གྱིས་གསར་འགྱུར་སྒྲོག་སྤེལ་ཚོགས་འདུའི་སྟེང་རྒྱལ་སྤྱིའི་སྤྱི་ཚོགས་ཀྱིས་མྱུར་མོར་སི་རི་ཡཱའི་བཀག་སྡོམ་མེད་པར་གཏོང་དགོས་པའི་འབོད་སྐུལ་བཏང་། ཁོས་བསྟན་དོན། བཀག་སྡོམ་མེད་པར་གཏོང་བ་ནི་སི་རི་ཡཱ་བསྐྱར་འཛུགས་བྱེད་པའི་སྔོན་འགྲོའི་ཆ་རྐྱེན་ཡིན་ལ། སི་རི་ཡཱའི་སློབ་གསོ་དང་སྨན་བཅོས་སོགས་གཞི་རྩའི་ཞབས་ཞུ་སླར་གསོ་བྱེད་པར་སྟབས་བདེ་བཟོས་ཏེ། རྨང་གཞིའི་སྒྲིག་ཆས་སླར་གསོ་བྱེད་པར་སྐུལ་འདེད་གཏོང་དགོས་ལ། ཐུར་ཁེ་ཡིས་སི་རི་ཡཱའི་བསྐྱར་འཛུགས་ཐད་རོགས་རམ་བྱེད་འདོད་ཡོད་ཅིང་། དུས་ནམ་ཡང་སི་རི་ཡཱའི་རྨང་གཞིའི་སྒྲིག་ཆས་ཀྱི་བསྐྱར་འཛུགས་ལ་རོགས་འདེགས་བྱེད་རྩིས་ཡོད་པར་མ་ཟད་ཡུལ་འཁྱམས་བྱེད་པའི་སི་རི་ཡཱའི་མང་ཚོགས་ཚང་མ་ཕྱིར་རང་ཁྱིམ་ལ་ལོག་ཏུ་འཇུག་འདོད་ཡོད་ཟེར།

ཧྥེ་ཏན་གྱིས་ད་རུང་ཁྲིམས་སྐྱོང་དང་གྲངས་ཉུང་མི་རིགས་ཀྱི་ཁེ་དབང་ལ་སྲུང་སྐྱོབ་བྱེད་པ་དང་། དཀྱེལ་ཡངས་རང་བཞིན་གྱི་སྲིད་གཞུང་འཛུགས་སྐྲུན་བྱེད་པའི་གལ་ཆེན་རང་བཞིན་ནན་བཤད་བྱས། ཁོས་བཤད་རྒྱུར། སི་རི་ཡཱའི་མ་འོངས་པ་ངེས་པར་དུ་མི་དམངས་ཀྱིས་ཐག་གཅོད་བྱེད་དགོས་ལ། ཆོས་ལུགས་དང་རིགས་རྒྱུད་ཚོགས་ཁག་གང་ཡིན་ཡང་མཐའ་ལ་འདེད་མི་རུང་ཟེར།