ཧཱ་སག་སི་ཐན་དང་ཨུ་རུ་སིའི་མགོ་ཁྲིད་པས་རྒྱལ་ཁབ་གཉིས་ཀྱི་འཐབ་ཇུས་མཉམ་ལས་ལ་ཤུགས་སྣོན་བྱེད་རྒྱུའི་ཚུལ་བསྟན།

ཧཱ་སག་སི་ཐན་གྱི་ཙུང་ཐུང་ཐའོ་ཁཱ་ཡེ་ཧྥུའུ་དང་ཨུ་རུ་སིའི་ཙུང་ཐུང་ཕུའུ་ཅིན་གྱིས་ཚེས27ཉིན་ཧཱ་སག་སི་ཐན་གྱི་རྒྱལ་ས་ཨ་སི་ཐཱ་ནཱ་ནས་གྲོས་མོལ་བྱས། ཕྱོགས་གཉིས་ཀྱིས་བསྟན་དོན། ཧཱ་སག་སི་ཐན་དང་ཨུ་རུ་སི་ཡིས་འཐབ་ཇུས་མཉམ་ལས་ལ་ཤུགས་སྣོན་བྱེད་རྒྱུ་ཡིན་པ་དང་། དེ་དམ་ཟབ་ཀྱི་ལོ་རྒྱུས་རིག་གནས་སྦྲེལ་ཐག་ལ་བརྟེན་པར་མ་ཟད་རྒྱལ་ཁབ་གཉིས་ཀྱི་མ་འོངས་པའི་འཕེལ་རྒྱས་ཀྱི་ཐུན་མོང་འགན་འཁྲི་ལས་བྱུང་བ་ཡིན་ཟེར།

ཧཱ་སག་སི་ཐན་གྱི་ཙུང་ཐུང་བཞུགས་ཤག་གིས་སྤེལ་བའི་གནས་ཚུལ་ལྟར་ན། ཐའོ་ཁཱ་ཡེ་ཧྥུའུ་དང་ཕུའུ་ཅིན་གྱིས་གཙོ་བོ་རྡོ་སྣུམ་དང་རང་བྱུང་སོལ་རླངས་བཟོ་ལས་དང་། འཕྲུལ་ཆས་བཟོ་སྐྲུན། དངོས་ཟོང་སྐྱེལ་འདྲེན། དངུལ་ལོར། སྐྱེ་ཁམས་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་བྱེད་པའི་ཐད་ནས་གྲོས་བསྡུར་བྱས་ཟེར།

ཐའོ་ཁཱ་ཡེ་ཧྥུའུ་ཡིས་བསྟན་དོན། ཧཱ་སག་སི་ཐན་དང་ཨུ་རུ་སི་རྒྱལ་ཁབ་གཉིས་ཀྱི་མ་འོངས་པའི་མཉམ་ལས་འཕེལ་རྒྱས་ཐད་ཀྱི་གོམ་འགྲོས་གཅིག་མཐུན་ཡིན་ཞིང་། ཕྱོགས་གཉིས་ཀྱིས་གྲོས་མཐུན་སྣ་ཉི་ཤུ་འགོད་རྒྱུ་ཡིན་ལ། དེ་ལས་རྒྱལ་ཁབ་གཉིས་ཀྱིས་སྔར་ལས་ལྷག་པའི་སྒོ་ནས་མཛའ་མཐུན་ཁྱིམ་མཚེས་མཉམ་ལས་འབྲེལ་བ་འཕེལ་རྒྱས་སུ་གཏོང་བར་སྒུལ་ཤུགས་གསར་བ་འདོན་སྤྲོད་བྱེད་ཐུབ། ཧཱ་སག་སི་ཐན་ནི་ད་ལྟ་དང་མ་འོངས་པ་གང་ཡིན་ཡང་ཨུ་རུ་སིའི་བློ་གཏོད་རུང་བའི་འཐབ་ཇུས་གྲོགས་པོ་དང་མནའ་མཐུན་གྲོགས་པོ་ཡིན་ཟེར།

ཕུའུ་ཅིན་གྱིས་བསྟན་དོན། ཨུ་རུ་སི་ནི་ཧཱ་སག་སི་ཐན་གྱི་ཆེས་ཆེ་བའི་དཔལ་འབྱོར་ཉོ་ཚོང་གྲོགས་པོ་ཡིན། ཕྱོགས་གཉིས་ཀྱི་ཉོ་ཚོང་འབོར་གྲངས་རྒྱུན་ཆད་མེད་པར་ཇེ་མང་དུ་སོང་བ་དང་། ན་ནིང་མེ་སྒོར་ཐེར་ཆེན་གཉིས་དང་ཐེར་འབུམ་བརྒྱད་དུང་ཕྱུར་ལྔ་ལ་བསླེབས། ཨུ་རུ་སིའི་ཧཱ་སག་སི་ཐན་གྱི་དཔལ་འབྱོར་དངུལ་གཏོང་ལོ་རེ་བཞིན་ཇེ་མང་དུ་སོང་ཡོད་ལ། མིག་སྔར་དངུལ་གཏོང་འབོར་གྲངས་མེ་སྒོར་ཐེར་ཆེན་གཅིག་དང་ཐེར་འབུམ་གསུམ་ཡིན། དེ་ལས་གཞན་ཕྱོགས་གཉིས་ཀྱིས་སློབ་གསོ་དང་ཚན་རིག རིག་གནས་སོགས་ཁྱབ་ཁོངས་ནས་འབྲེལ་བའི་འཕེལ་རྒྱས་ལ་སྐུལ་འདེད་གཏོང་བར་ལྷག་ཏུ་མཐོང་ཆེན་བྱེད་བཞིན་ཡོད་ཟེར།

ཉིན་དེར་རྒྱལ་ཁབ་གཉིས་ཀྱི་ཙུང་ཐུང་གིས་འཛམ་གླིང་ཡོངས་ཀྱི་སྒྲིག་ལམ་གསར་བའི་ཁྲོད་འཐབ་ཇུས་གྲོགས་པོའི་འབྲེལ་བ་ཇེ་ཟབ་ཏུ་གཏོང་བའི་མཉམ་འབྲེལ་གསལ་སྒྲོག་བཀོད། གསལ་སྒྲོག་ལས་བཤད་རྒྱུར། ཕྱོགས་གཉིས་ཀྱིས་རྒྱལ་ཁབ་རང་གི་དངོས་ཟོང་བེད་སྤྱད་ནས་ཕན་ཚུན་ཉོ་ཚོང་བྱེད་པར་རྒྱབ་སྐྱོར་བྱེད་རྒྱུ་ཡིན་ལ། དེ་རྒྱང་རིང་ལ་དམིགས་ཚེ་རྒྱལ་ཁབ་གཉིས་ཀྱི་དངུལ་ལོར་བདག་དབང་ལ་ཤུགས་སྣོན་བྱེད་པར་ཕན་ཐོགས་ཡོད། དེ་ལས་གཞན་ཕྱོགས་གཉིས་ཀྱིས་སྔར་ལས་ལྷག་པའི་སྒོ་ནས་རང་བྱུང་སོལ་རླངས་ཁྱབ་ཁོངས་ཀྱི་གྲོགས་པོའི་འབྲེལ་བར་ཤུགས་སྣོན་བྱས་ཏེ། རྒྱལ་ཁབ་གཞན་པར་རང་བྱུང་སོལ་རླངས་སྐྱེལ་འདྲེན་བྱེད་འདོད་ཡོད། མཉམ་ལས་ལས་གཞི་ལག་བསྟར་བྱས་ནས་ཨེ་ཤ་ཡཱ་དབུས་མ་ས་ཁུལ་གྱི་གཏན་འཇགས་དང་ནུས་ཁུངས་བདེ་འཇགས་ལ་ཤུགས་སྣོན་བྱེད་པ་དང་། ཧཱ་སག་སི་ཐན་དང་ཨུ་རུ་སིའི་བཟོ་ལས་འཕེལ་རྒྱས་ལ་སྐུལ་འདེད་གཏོང་བ། ཚོང་གཉེར་ཁོར་ཡུག་ལེགས་བཅོས་བྱས་ནས་མི་དམངས་ཀྱི་འཚོ་བའི་ཆུ་ཚད་མཐོར་འདེགས་བྱེད་དགོས་ཟེར།

ཕུའུ་ཅིན་གྱིས་ཚེས27ཉིན་ནས་བཟུང་ཧཱ་སག་སི་ཐན་ལ་དུས་ཡུན་ཉིན་གཉིས་ཀྱི་རྒྱལ་དོན་འཚམས་འདྲི་བྱེད་མགོ་བརྩམས་པ་དང་། ཚེས28ཉིན་ཨ་སི་ཐཱ་ནཱ་ནས་བསྡུ་རྒྱུ་ཡིན་པའི་ཐུན་མོང་བདེ་འཇགས་ཆིངས་ཡིག་རྩ་འཛུགས་ལས་འཛིན་ལྷན་ཚོགས་ཀྱི་གྲོས་ཚོགས་ལ་ཞུགས་རྒྱུ་རེད།