ཀྲུང་གོ་དང་ཨར་པ་ནི་ཡའི་བར་འབྲེལ་བ་བཙུགས་ནས་ལོ་དོན་ལྔ་འཁོར་བའི་རིག་གཞུང་བགྲོ་གླེང་ཚོགས་འདུ་ཐི་ར་ན་རུ་བསྡུས།

ཀྲུང་གོ་དང་ཨར་པ་ནི་ཡའི་བར་འབྲེལ་བ་བཙུགས་ནས་ལོ་དོན་ལྔ་འཁོར་བའི་རིག་གཞུང་བགྲོ་གླེང་ཚོགས་འདུ་དེ་ཚེས11ཉིན་ཨར་པ་ནི་ཡའི་རྒྱལ་ས་ཐི་ར་ན་རུ་བསྡུས། ཀྲུང་གོའི་ཨར་པ་ནི་ཡར་སྡོད་པའི་གཞུང་ཚབ་ཆེན་མོ་ཕང་ཁྲུན་ཞུའེ་དང་། ཨར་པ་ནི་ཡའི་ཕྱི་འབྲེལ་དཔོན་པོ་གཞོན་པ་ཧྥེ་ནོ། ཨར་པ་ནི་ཡ་དང་ཀྲུང་གོའི་མཛའ་འབྲེལ་མཐུན་ཚོགས་ཀྱི་ཀྲུའུ་ཞི་ནཱ་ནོ་དང་། ཀྲུང་གོ་དང་ཨར་པ་ནི་ཡ་རྒྱལ་ཁབ་གཉིས་ཀྱི་ཆེད་མཁས་པ་སོགས་མི་བརྒྱ་ལྷག་ཚོགས་འདུར་ཞུགས།

ཕང་ཁྲུན་ཞུའེ་ཡིས་ཤིས་ཚིག་འབུལ་སྐབས་བསྟན་དོན། འབྲེལ་བ་བཙུགས་ནས་ལོ་དོན་ལྔ་འཁོར་བའི་རིང་། ཀྲུང་གོ་དང་ཨར་པ་ནི་ཡ་རྒྱལ་ཁབ་གཉིས་ཀྱིས་ཕན་ཚུན་བརྩི་བཀུར་དང་འདྲ་མཉམ་གྱི་སྤྱོད་ཚུལ་འཛིན་པ། གཉིས་ཕན་མཉམ་རྒྱལ་བཅས་ཀྱི་རྩ་དོན་རྒྱུན་འཁྱོངས་བྱས་ཏེ། ཕྱོགས་གཉིས་ཀྱི་འབྲེལ་བ་བརྟན་བརླིང་འཕེལ་རྒྱས་འགྲོ་བར་སྐུལ་འདེད་བཏང་། མ་འོངས་པར། ཀྲུང་གོའི་ཕྱོགས་ཀྱིས་ཨར་པ་ནི་ཡ་ཕྱོགས་དང་མཉམ་དུ་འབད་བརྩོན་བྱས་ནས། ཆབ་སྲིད་ཀྱི་ཡིད་རྟོན་སྔར་ལས་ཇེ་དྲག་ཏུ་གཏོང་བ་དང་། དངོས་གཉེར་མཉམ་ལས་རྒྱ་བསྐྱེད་ཅིང་། མི་གཞུང་བརྗེ་རེས་ལ་སྐུལ་འདེད་བཏང་སྟེ། ཀྲུང་གོ་དང་ཨར་པ་ནི་ཡའི་སྲོལ་རྒྱུན་མཛའ་བརྩེ་ལ་དུས་སྐབས་གསར་བར་སྔར་ལས་གསོན་ཤུགས་རྒྱས་སུ་འཇུག་འདོད་ཡོད་ཟེར།

ཧྥེ་ནོ་ཡིས་ཤིས་ཚིག་འབུལ་སྐབས་བསྟན་དོན། ཨར་པ་ནི་ཡ་དང་ཀྲུང་གོའི་བར་འབྲེལ་བ་བཙུགས་ནས་ལོ་དོན་ལྔ་འཁོར་བ་ནི་རྒྱལ་ཁབ་གཉིས་ཀྱི་སྲོལ་རྒྱུན་མཛའ་མཐུན་ལོ་རྒྱུས་ཁྲོད་ཀྱི་དུས་སྐབས་དམིགས་བསལ་ཞིག་རེད། ཨར་པ་ནི་ཡའི་ཕྱོགས་ཀྱིས་དེ་གོ་སྐབས་སུ་བརྩིས་ནས། ཀྲུང་གོའི་ཕྱོགས་དང་མཉམ་དུ་རྒྱུས་ལོན་ཟབ་མོ་དང་མཉམ་ལས་དམ་ཟབ་བྱེད་པ་དང་། ལག་རྡང་སྦྲེལ་ནས་འགྲན་སློང་ལ་ཁ་གཏད་འཇལ་ཏེ། རྒྱལ་ཁབ་གཉིས་ཀྱི་མི་དམངས་ལ་སྔར་ལས་བདེ་སྐྱིད་བསྐྲུན་འདོད་ཡོད་ཟེར།

ཚོགས་ཞུགས་སྐུ་མགྲོན་རྣམས་ཀྱིས་ཀྲུང་གོ་དང་ཨར་པ་ནི་ཡའི་བར་འབྲེལ་བ་བཙུགས་ནས་ལོ་དོན་ལྔ་འཁོར་བའི་རིང་གི་རྒྱལ་ཁབ་གཉིས་ཀྱི་འབྲེལ་བའི་འཕེལ་རྒྱས་ལ་ཚད་མཐོན་པོས་གདེང་འཇོག་བྱས་ཏེ། རྒྱལ་ཁབ་གཉིས་ཀྱི་མཉམ་ལས་མདུན་ལྗོངས་ཡངས་པོར་རྒྱང་ལྟ་བྱས།