ཕུའུ་ཅིན་གྱིས་ཝུའུ་ཁི་ལན་གྱི་དམག་དཔུང་གིས་ཁུའུ་ཨར་སི་ཁི་མངའ་སྡེ་རུ་འཇབ་རྒོལ་བྱས་པ་ནི་གཞི་རྒྱ་ཆེ་བའི་དཀྲུག་འཕེན་བྱ་སྤྱོད་ཅིག་ཡིན་པའི་ཚུལ་བསྟན།

ཕུའུ་ཅིན་གྱིས་ཝུའུ་ཁི་ལན་གྱི་དམག་དཔུང་གིས་ཁུའུ་ཨར་སི་ཁི་མངའ་སྡེ་རུ་འཇབ་རྒོལ་བྱས་པ་ནི་གཞི་རྒྱ་ཆེ་བའི་དཀྲུག་འཕེན་བྱ་སྤྱོད་ཅིག་ཡིན་པའི་ཚུལ་བསྟན།

ཨུ་རུ་སིའི་ཙུང་ཐུང་ཕུའུ་ཅིན་གྱིས་ཚེས7ཉིན་བསྟན་དོན། ཝུའུ་ཁི་ལན་གྱི་དམག་དཔུང་གིས་ཨུ་རུ་སིའི་ལྷོ་ཕྱོགས་ཀྱི་ཁུའུ་ཨར་སི་ཁི་མངའ་སྡེ་རུ་འཇབ་རྒོལ་བྱས་པ་ནི་ཡང་བསྐྱར་གཞི་རྒྱ་ཆེ་བའི་དཀྲུག་འཕེན་བྱ་སྤྱོད་ཅིག་རེད་ཟེར།

བསྒྲགས་པ་ལྟར་ན། ཕུའུ་ཅིན་གྱིས་ཉིན་དེར་ཨུ་རུ་སིའི་སྲིད་གཞུང་གི་ཁོངས་མི་དང་། དྲག་ཆས་སྡེ་ཁག་གི་འགན་ཁུར་བ་སོགས་བསྡུས་ནས་གྲོས་ཚོགས་བསྡུས་ཏེ། ཁུའུ་ཨར་སི་ཁི་མངའ་སྡེའི་གནས་བབ་ལ་གྲོས་བསྡུར་བྱས། ཕུའུ་ཅིན་གྱིས་ཚོགས་ཐོག་ནས་བཤད་རྒྱུར། ཝུའུ་ཁི་ལན་གྱི་དམག་དཔུང་གིས་མཚོན་ཆ་རིགས་སྣ་ཚོགས་བེད་སྤྱོད་བྱས་ཏེ་ཁུའུ་ཨར་སི་ཁི་མངའ་སྡེ་རུ་ཁྱད་མེད་ཀྱི་འཇབ་རྒོལ་བྱ་སྤྱོད་སྤེལ་བ་དང་། དེའི་ནང་འཕུར་མདའ་བཀོལ་ནས་དམངས་སྤྱོད་བཟོ་བཀོད་ལ་འཇབ་རྒོལ་བྱས་པ་སོགས་ཀྱང་འདུས་ཡོད་ཟེར། ཕུའུ་ཅིན་གྱིས་ཨུ་རུ་སིའི་ས་ཁུལ་སོ་སོ་ཁུའུ་ཨར་སི་ཁི་མངའ་སྡེ་ལ་རྒྱབ་སྐྱོར་གང་ལེགས་བྱེད་དགོས་པའི་རེ་བ་བཏོན།

ཨུ་རུ་སིའི་དྲག་ཆས་སྟོབས་ཤུགས་ཀྱི་སྤྱི་ཁྱབ་ཇུས་འདོན་དཔོན་པོ་ཀི་ལཱ་ཞི་མའོ་ཧྥུའུ་ཡིས་ཉིན་དེར་བརྙན་རིས་བརྒྱུད་དེ་འབྲེལ་ཡོད་གྲོས་ཚོགས་ལ་ཞུགས་སྐབས་བསྟན་དོན། ཝུའུ་ཁི་ལན་གྱི་དམག་དཔུང་གིས་ཚེས6ཉིན་ནས་བཟུང་ཁུའུ་ཨར་སི་ཁི་མངའ་སྡེ་རུ་དཔུང་འཇུག་བྱས་པ་དང་། དེའི་དམིགས་ཡུལ་ནི་ཨུ་རུ་སིའི་མངའ་ཁོངས་བཙན་བཟུང་བྱེད་རྩིས་རེད། ཨུ་རུ་སིའི་ས་ངོས་དམག་དཔུང་དང་མཁའ་དམག་གིས་ཝུའུ་ཁི་ལན་གྱི་དམག་དཔུང་གིས་ཁུའུ་ཨར་སི་ཁི་ཕྱོགས་དཔུང་འཇུག་བྱེད་པར་བཀག་འགོག་བྱས་ཡོད། ཝུའུ་ཁི་ལན་གྱི་དམག་དཔུང་གིས་འགུལ་སྐྱོད་སྤེལ་སྐབས། མི་བརྒྱ་བསད་པ་དང་མི་ཉིས་བརྒྱ་དང་བཅོ་ལྔར་རྨས་ཕོག ཐན་ཁི་འཁོར་ལོ་བདུན་འདུས་པའི་དྲག་ཆས་ཁྲབ་ལྡན་འཁོར་ལོ་ང་བཞིར་གཏོར་བཤིག་བཏང་ཡོད་ཟེར།

ཁུའུ་ཨར་སི་ཁི་མངའ་སྡེའི་ཁུལ་དཔོན་ཚབ་མ་སི་མུས་ཨར་ནོའུ་ཧྥུའུ་ཡིས་ཚེས7ཉིན་དྲ་ཐོག་ཏུ་སྤེལ་བའི་གནས་ཚུལ་ལྟར་ན། ས་གནས་སྲིད་གཞུང་གིས་སྡོད་དམངས་ཉིས་བརྒྱ་ལྷག་འཇབ་རྒོལ་ཐེབས་སའི་ས་ཁུལ་ནས་ཕྱིར་འཐེན་བྱེད་དུ་བཅུག་པ་དང་། གན་ཡང་མི་སྟོང་ཕྲག་མང་བོས་སྒེར་གྱི་འགྲིམ་འགྲུལ་ཡོ་བྱད་བཀོལ་ནས་ཕྱིར་འཐེན་བྱས་ཡོད་ཟེར།

ཨུ་རུ་སིའི་འཕྲོད་བསྟེན་པུའུ་ཡི་པུའུ་ཀྲང་ལས་རོགས་པ་ཁུའུ་ཙི་ནེ་ཙོ་ཧྥུའུ་ཡིས་ཚེས7ཉིན་སྨྱན་བྱད་ལ་བཤད་རྒྱུར། ཝུའུ་ཁི་ལན་གྱི་དྲག་ཆས་དམག་དཔུང་གིས་ཚེས6ཉིན་ཁུའུ་ཨར་སི་ཁི་མངའ་སྡེ་རུ་འཇབ་རྒོལ་བྱས་ཏེ་མི་ཉེར་བཞིར་རྨས་ཕོག དེའི་ནང་བྱིས་པ་དྲུག་འདུས་ཟེར། གཞན་ཡང་ཐཱ་སི་གསར་འགྱུར་ཁང་གིས་བསྒྲགས་པ་ལྟར་ན། འཇབ་རྒོལ་དེ་ལས་མི་མང་བོར་ཤི་རྨས་བཟོས་ཡོད་ཟེར།

ཨུ་རུ་སིའི་རྒྱལ་སྲུང་པུའུ་ཡིས་ཚེས6ཉིན་སྤྱི་སྒྲོག་སྤེལ་ཏེ། ཉིན་དེའི་སྔ་དྲོར། ཝུའུ་ཁི་ལན་གྱི་དམག་དཔུང་གི་འཕྲུལ་ཆས་ཅན་གྱི་སྟོང་ཤོག་ཉེར་གཉིས་པའི་དྲག་ཆས་མི་སྣ་སུམ་བརྒྱ་ཙམ་གྱིས་ཐན་ཁི་འོར་ལོ་བཅུ་གཅིག་དང་ཁྲབ་ལྡན་འཁོར་ལོ་ཉི་ཤུ་ལྷག་གི་རོགས་སྐྱོར་འོག ཨུ་རུ་སིའི་དམག་དཔུང་གིས་ཁུའུ་ཨར་སི་ཁི་མངའ་སྡེའི་ཨུ་རུ་སི་དང་ཝུའུ་ཁི་ལན་གྱི་མཐའ་མཚམས་ས་ཁུལ་དུ་བཀོད་སྒྲིག་བྱས་པའི་མཐའ་སྲུང་གཡུལ་སར་དཔུང་འཇུག་བྱས། ཨུ་རུ་སིའི་དམག་དཔུང་གིས་མཐའ་མཚམས་ས་ཁུལ་བརྒལ་བའི་ཝུའུ་ཁི་ལན་གྱི་དམག་དཔུང་དང་ཝུའུ་ཁི་ལན་གྱི་སུའུ་མཱེ་མངའ་སྡེའི་ཝུའུ་ཁི་ལན་གྱི་དམག་དཔུང་ལ་ཆམ་ཕབ་བཏང་སྟེ། ཝུའུ་ཁི་ལན་གྱི་དམག་དཔུང་གི་ཐན་ཁི་འཁོར་ལོ་དང་ཁྲབ་ལྡན་འཁོར་ལོ་རེ་འགའ་གཏོར་བཤིག་བཏང་ཡོད་ཟེར།

མིག་སྔར་ཝུའུ་ཁི་ལན་ཕྱོགས་ཀྱིས་ཨུ་རུ་སིའི་ཁུའུ་ཨར་སི་ཁི་མངའ་སྡེ་རུ་འཇབ་རྒོལ་བྱས་པའི་དོན་རྐྱེན་ཐད་ནས་དངོས་གཞིའི་རྣམ་འགྱུར་ཅི་ཡང་བསྟན་མེད་ཟེར།