ཆོས་དབྱིངས་སྐྱིད་ཀྱིས་གོ་སྐབས་དེ་བས་མང་བ་མཐོང་བྱུང་ཟེར།

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན། རྩོམ་སྒྲིག་པ། གུ་རུ་སྐྱབས། 2023-10-11 17:30:43 ཀློག་གྲངས།451

ཆོས་དབྱིངས་སྐྱིད་ཀྱིས་གོ་སྐབས་དེ་བས་མང་བ་མཐོང་བྱུང་ཟེར།

ཁྱེད་ནི་ཁྱེད་ཀྱི་ཨ་ཕས་རླུང་རྟ་སྤུར་སྐབས་བར་སྣང་ན་འཕུར་བའི་ཆེས་མཐོ་ཤོས་དེ་ཡིན་ལ། ཁྱེད་ནི་ཁྱེད་ཀྱི་ཨ་མས་དགོ་དགོ་བཞོ་དུས་འགུགས་པའི་ཆེས་སྙན་པའི་བཞོ་དབྱངས་དེ་ཡང་ཡིན་ཞེས་པ་སྟེ། སྙན་ངག་པ་ཨ་ལྡོང་དཔལ་རྡོ་ཐར་གྱི2012ལོའི་སྙན་ངག་རྙིང་པ་ཞིག་ཉེ་ཆར་ཡང་བསྐྱར་དྲ་ལམ་ཁག་ཏུ་ཁྱབ་བཞིན་ཡོད།

དེའི་རྒྱུ་རྐྱེན་ནི་ལོ་ངོ་བཅུ་གཅིག་རྗེས་ཀྱི་སྟོན་ཁ་འདིར། སྙན་ངག་དེའི་ནང་གི་མི་སྣ་གཙོ་བོ་ཆོས་དབྱིངས་སྐྱིད་ལ་ལོན་ཏོན་ཨོ་རྩལ་འགྲན་ཚོགས་ཀྱི་སྐྱེས་མའི་སྤྱི་ལེ20ཡི་འདུར་རྒྱུག་འགྲན་བསྡུར་གྱི་གསེར་གྱི་རྟགས་མ་གསབ་སྤྲོད་བྱས་པས་རེད།

ཉེ་སྔོན། ཧང་ཀྲོའུ་ཡ་རྩལ་འགྲན་ཚོགས་ཐོག་ཡང་བསྐྱར་གསེར་གྱི་རྟགས་མ་བླངས་པའི་ཆོས་དབྱིངས་སྐྱིད་མཚོ་སྔོན་སྟོད་པ་རྒྱལ་ཁབ་མཐོ་སྒང་ལུས་རྩལ་སྦྱོང་བརྡར་རྟེན་གཞིའི་མཚོ་སྔོན་ཞིང་ཆེན་ལུས་རྩལ་ལས་དོན་རུ་ཆེན་དང་པོར་སླེབས་སྐབས། རུ་མི་ཚོས་འཚང་ཁ་ཤིག་ཤིག་ངང་མཉམ་དུ་དྲན་རྟེན་འདྲ་པར་ལེན་རྒྱུའི་རེ་བ་བཏོན།

ལོ16སྐབས་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་གྱི་འབྲོག་ཁྱིམ་དཀྱུས་མ་ཞིག་ཏུ་འཚོ་བ་སྐྱེལ་བཞིན་པའི་ཆོས་དབྱིངས་སྐྱིད་མཚོ་སྔོན་ཞིང་ཆེན་ལུས་རྩལ་སློབ་གྲྭར་འབྲིང་རྒྱུག་དང་རྒྱང་རྒྱུག་སྦྱོང་བརྡར་བྱེད་པར་བསྐྱོད་ཅིང་། འདུར་རྒྱུག་རུ་ཁག་གིས་རུ་མི་འདེམས་སྐབས་རུ་མི་ཚོས་ཁོང་མོ་སྦྱོང་བརྡར་བྱེད་རོགས་ལ་ཁྲིད། བསམ་ཡུལ་ལས་འདས་པ་ཞིག་ལ་དེ་ལས་ཀྲུང་གོའི་བོད་རིགས་ཨོ་རྩལ་འགྲན་ཚོགས་ཀྱི་གསེར་གྱི་རྟགས་མ་ཐོབ་མཁན་ཨང་དང་པོའི་འདུར་རྒྱུག་གི་འཚོ་བའི་མགོ་བརྩམས།

ང་ལ་མཚོན་ན། ཨོ་རྩལ་འགྲན་ཚོགས་ཀྱི་གསེར་གྱི་རྟགས་མར་དོན་སྙིང་དེ་ཙམ་ཆེན་པོ་མེད་ཅེས་བརྗོད་མོད། འོན་ཀྱང་གསེར་གྱི་རྟགས་མ་ལེན་སྐབས་ཆོས་དབྱིངས་སྐྱིད་སྔར་བཞིན་མིག་ཆུ་ཤོར་ཡོད་དེ། དུས་ཡུན་རིང་པོ་ཕྱིན་པས་མ་ཚད། ད་དུང་བློ་ཕམ་ཆེན་པོ་བྱུང་བས་ཡིན་ཞེས་བརྗོད།

ཆོས་དབྱིངས་སྐྱིད་ཀྱི་ལུས་རྩལ་གྱི་རོགས་ཟླ་དང་འཚོ་བའི་གཏན་གྲོགས་ཡིན་པའི་ངོས་ནས། མཚོ་སྔོན་གྱི་འདུར་རྒྱུག་ལུས་རྩལ་པ་བཀྲ་ཤིས་གཡང་འབུམ་ཡང་དགའ་ངུ་ཤོར་བཞིན་དུ། ཁོང་མོའི་ཆེད་དུ་དགའ་སྤྲོ་སྐྱེས་བྱུང་། ང་ཚོའི་ངོས་ནས་བརྗོད་ན་ཁོང་མོ་ནི་ལུས་རྩལ་པ་རྩེ་གྲ་ཞིག་ཡིན། འོན་ཀྱང་ཁོང་མོར་མཚན་སྙན་ཅི་འདྲ་ཞིག་ཐོབ་རུང་ཉིན་གཉིས་པར་སྔར་རྒྱུན་བཞིན་མུ་མཐུད་འབད་པ་བྱེད་ངེས་ཞེས་བཤད།

མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་གྱི་ཁུལ་དཔོན་ཀྲང་ཧྲིང་ཡོན་གྱིས་ཆོས་དབྱིངས་སྐྱིད་ཀྱིས་འཛམ་གླིང་ལ་བོད་པའི་བུ་མོའི་བློ་བརྟན་འགྱུར་མེད་དང་རྩེར་སོན་བྱེད་ཕོད་པའི་སྙིང་སྟོབས་མངོན་པར་བྱས་ཡོད་ཅེས་གདེང་འཇོག་གནང་།

ཆོས་དབྱིངས་སྐྱིད་ཀྱིས་ཨོ་རྩལ་འགྲན་ཚོགས་ཀྱི་གསེར་གྱི་རྟགས་མ་དེ་ནི་མཚོ་སྔོན་ལུས་རྩལ་གྱི་རེ་སྒུག་གསར་པར་གྱུར་ཞིང་། ང་ཚོས་གོ་སྐབས་དེ་བས་མང་བ་མཐོང་བྱུང་ཞེས་བཤད།

མཚོ་སྔོན་ཞིང་ཆེན་ལུས་རྩལ་ལས་དོན་རུ་ཆེན་དང་པོའི་འབྲིང་རྒྱུག་དང་རྒྱང་རྒྱུག་རུ་ཁག་དང་པོའི་རྩལ་ཁྲིད་པ་གཙོ་བོ་དབྱིན་ཧྲུན་ཅིན་གྱིས་དེ་སྔོན་རུ་ཆེན་ནང་བོད་རིགས་ལུས་རྩལ་པ་བལྟོས་བཅས་ཀྱིས་ཉུང་བ་ཡོད། འོན་ཀྱང་ད་ལྟ་ཆོས་དབྱིངས་སྐྱིད་ཀྱི་སྐུལ་ལྕག་འོག བོད་རིགས་ལུས་རྩལ་པས་བཟུང་བའི་བསྡུར་གྲངས་མང་པོ་ཞིག་ཡོད། ཁོང་ཚོ་ས་བབ་མཐོ་སར་སྐྱེས་སྟབས་སྙུགས་ཤེད་ཆེ་བའི་རྣམ་གྲངས་ལ་འཚམ་པ་མ་ཟད། ཁོང་ཚོ་བབ་ཆགས་ལ་སྡུག་རུས་ཆེན་པོ་ཡོད་ཅེས་བཤད།

ད་ལྟ། རུ་ཆེན་ནང་གི་བཀྲ་ཤིས་གཡང་འབུམ་དང་ཀླུ་མོ་མཚོ། རིན་ཆེན་དོན་གྲུབ། མེ་ཙེང་པེའོ། ཅི་ཧའེ་དབྱིན་སོགས་འདུར་རྒྱུག་དང་འབྲིང་རྒྱང་རྒྱུག་གི་ལུས་རྩལ་པ་ཚང་མས་མཚོ་སྔོན་སྟོད་པ་རྒྱལ་ཁབ་མཐོ་སྒང་ལུས་རྩལ་སྦྱོང་བརྡར་རྟེན་གཞིར་སྦྱོང་བརྡར་བྱེད་བཞིན་ཡོད་པར་མ་ཟད། རིམ་གྱིས་རྒྱལ་ཁབ་ཕྱི་ནང་དུ་འཇོན་ཐང་ངོམ་བཞིན་ཡོད།

རྩོམ་གོང་མ། > ཆོས་དབྱིངས་སྐྱིད་ཀྱིས་གོ་སྐབས་དེ་བས་མང་བ་མཐོང་བྱུང་ཟེར།
རྩོམ་གཞུག་མ། > ཆོས་དབྱིངས་སྐྱིད“གསའ་སྲུང་སྐྱོབ་ཁྱབ་གདལ་གྱི་ཕོ་ཉར”གདན་ཞུ་བྱས།