ཁ་ཆད་ལྟར་སྒོར་ཕྱིར་མ་འཕྲོད་ན་ཇི་ལྟར་བྱ།

ཁ་ཆད་ལྟར་སྒོར་ཕྱིར་མ་འཕྲོད་ན་ཇི་ལྟར་བྱ།

གྱོད་དཔེ།

2020ལོའི་ལོ་མགོར། བཀྲ་ཤིས་ཀྱིས་འབྲེལ་ཡོད་ལས་ཁུངས་ནས་ཐོ་འགོད་འགྲོ་ལུགས་བསྒྲུབས་ཏེ་བོད་ཟས་ཁང་ཆུང་ཆུང་ཞིག་གཉེར། 2020ལོའི་ཟླ12པའི་ཚེས1ཉིན། ཁོ་དང་དོན་འགྲུབ་གཉིས་ཀྱིས《མཉམ་སྡེབ་གྲོས་མཐུན་ཡི་གེ》བཞག་དོན། དོན་འགྲུབ་ཀྱིས་སྒོར་རྐྱང་ཁྲི40མ་དངུལ་འཇོག་རྒྱུ་དང་ཟ་ཁང་གི་མ་རྐང49%ཁོ་ལ་དབང་རྒྱུ་བྱས་ཤིང་། བཀྲ་ཤིས་ཀྱིས་གན་རྒྱ་བཞག་པའི་ཉིན་ནས་བཟུང་དོན་འགྲུབ་ལ་ཟླ་རེར་ཟ་ཁང་གི་ཁེ་སྤོགས་སྒོར་ཁྲི5ཡི་ཡན་སྟེར་རྒྱུའི་ཁས་བླངས་པ་དང་། ཟ་ཁང་ལ་གྱོང་གུད་ཅི་འདྲ་བྱུང་རུང་དོན་འགྲུབ་ལ་འབྲེལ་བ་ཅི་ཡང་མེད་པའི་ཁ་ཆད་བཞག དེ་དང་ཆབས་ཅིག་ཏུ་ཕན་ཚུན་ཕྱོགས་གཉིས་ཀས་བསྐྱར་དུ་བཀྲ་ཤིས་ཀྱིས་གན་རྒྱ་བཞག་པའི་ཉིན་ནས་བཟུང་ལོ་གཉིས་ཀྱི་ནང་དོན་འགྲུབ་ཀྱིས་བཏང་བའི་མ་དངུལ་ཡོད་ཚད་ཕྱིར་སྟེར་རྒྱུ་འགན་འཁུར་དགོས་པའི་ཁ་ཆད་བཞག ཁོ་གཉིས་ཀྱིས་གྲོས་མཐུན་ཡི་གེའི་སྟེང་མིང་རྟགས་བཀོད་པའི་ཕྱི་ཉིན། དོན་འགྲུབ་ཀྱིས་ཁ་ཆད་ལྟར་བཀྲ་ཤིས་ལ་སྒོར་ཁྲི40དངུལ་ཁང་བརྒྱུད་ནས་བསྐུར། 2023ལོའི་ཟླ12པའི་ཚེས1ཉིན། བཀྲ་ཤིས་ཀྱིས་དོན་འགྲུབ་ལ་ཁ་ཆད་ལྟར་སྒོར་ཁྲི40མ་འཕྲོད་པས། དོན་འགྲུབ་ཀྱིས་བཀྲ་ཤིས་མི་དམངས་ཁྲིམས་ཁང་དུ་ཞུ་གཏུག་བྱས།

མི་དམངས་ཁྲིམས་ཁང་གིས་གྱོད་དོན་འདིར་འདྲི་གཅོད་བརྒྱུད་ནས། མཉམ་སྡེབ་འབྲེལ་བ་ནི་མཉམ་སྡེབ་མཁན་མི་གཉིས་ཡན་གྱིས་ཐུན་མོང་གི་ལས་དོན་ཞིག་དམིགས་ཡུལ་དུ་བཟུང་ཐོག ཁེ་སྤོགས་མཉམ་སྤྱོད་དང་གྱོང་གུད་མཉམ་ཁུར་བྱ་རྒྱུར་མོས་མཐུན་བྱུང་ནས་བཞག་པའི་གྲོས་མཐུན་གན་རྒྱ་ཞིག་ཡིན་པར་ངོས་བཟུང་། མཉམ་སྡེབ་ཀྱི་ཁྱད་ཆོས་གཙོ་བོ་ནི་མཉམ་ལས་དེར་ཞུགས་མཁན་གྱིས་ཁེ་སྤོགས་མཉམ་སྤྱོད་དང་གྱོང་གུད་མཉམ་ཁུར་བྱེད་པ་ཞིག་ཡིན།

གོང་གི་གྱོད་དོན་འདིའི་ཁྲོད་དུ། 《མཉམ་སྡེབ་གྲོས་མཐུན་ཡི་གེ》རུ། དོན་འགྲུབ་ཐད་ཀར་ཟ་ཁང་གི་ཚོང་གཉེར་དོ་དམ་ལ་ཟབ་ཞུགས་བྱས་མེད་པ་དང་། གྱོང་གུད་འགན་ཅི་ཡང་མི་འཁུར་བར་ཁེ་སྤོགས་རྐྱང་རྐྱང་ལེན་པའི་ཁ་ཆད་བཞག་ཡོད་པ་སྟེ། གྲོས་མཐུན་འདིར་ཕན་ཚུན་ཕྱོགས་གཉིས་ཀས་གྱོང་གུད་མཉམ་འཁུར་བྱེད་པའི་གནས་ཚུལ་བཀོད་མེད། དེར་བརྟེན། ཁོ་གཉིས་ཀྱིས་བཞག་པའི《མཉམ་སྡེབ་གྲོས་མཐུན་ཡི་གེ》ཡི་ནང་དོན་གཙོ་བོ་ནི་མ་དངུལ་འཁོར་རྒྱུག་ལ་དམིགས་པ་མ་གཏོགས། ཐུན་མོང་སྒོས་ཚོང་ལས་གཉེར་བ་དང་ངལ་རྩོལ་བྱེད་པའི་གཅིག་མཐུན་གྱི་བསམ་བློ་མེད་པ་མཚོན་ཐུབ། དོན་འགྲུབ་ཀྱི་བསམ་དོན་དངོས་ནི་སྒོར་མོ་དེ་བཀྲ་ཤིས་ལ་ཕར་བསྐྱི་རྒྱུ་དེ་རེད། དེའི་རྒྱུ་མཚན་གྱིས་ཁྲིམས་ཁང་གིས་དོན་འགྲུབ་དང་བཀྲ་ཤིས་གཉིས་ཀྱིས་བཞག་པའི་གྲོས་མཐུན་འདི་ནི་བསྐྱིས་སྒོར་གན་རྒྱ་ཞིག་ཡིན་པ་དང་། དོན་འགྲུབ་ཀྱིས་བཏང་བའི་མ་དངུལ་སྒོར་ཁྲི40འདི་ནི་དོན་ངོ་མ་བཀྲ་ཤིས་ལ་བསྐྱིས་པའི་སྒོར་མོ་ཡིན་ཞིང་། ཟླ་རེར་དོན་འགྲུབ་ལ་ཁེ་སྤོགས་སྒོར་ཁྲི5སྟེར་བ་ནི་དོན་ངོ་མ་དེའི་སྐྱེད་ཀ་ཡིན་པའི་ངོས་བཟུང་། མཇུག་མཐར་གྱོད་དོན་འདི་ནི་མི་དམངས་ཁྲིམས་ཁང་གིས་དམངས་ཁྲོད་ནས་ཕན་ཚུན་ལ་སྒོར་མོ་གཡར་སྐྱི་བྱས་པའི་གྱོད་དོན་ཞིག་ལ་ངོས་བཟུང་ནས་ཐག་བཅད།