མཚན་བསྐྱལ་ནས་མཆིན་པར་གནོད་པ་དེ་སྨན་གྱིས་སེལ་ལམ།
འགྲོས་མྱུར་བའི་ད་ལྟའི་འཚོ་བའི་ཁྲོད་དུ། མཚན་སྐྱེལ་བ་ནི་མི་མང་པོ་ཞིག་ལ་རྒྱུན་ལྡན་དུ་གྱུར་འདུག སྣང་ཚུལ་དེ་ལས་མཆིན་པར་གནོད་པ་ཤེས་རྗེས། ཁོ་ཚོས་གནོད་པ་སེལ་ཐབས་ཀྱི་མཆིན་སྨན་ཞིག་ལ་རེ་ལྟོས་བྱེད་མོད། མཚན་སྐྱེལ་བའི་མི་ལ་ཕན་པའི་སྨན་མཆོག་དེ་འདྲ་ཞིག་ཡོད་དམ།
ནད་ཐོག་ཏུ་སྤྱོད་པའི་མཆིན་སྨན་ནི་གཙོ་བོ་མཆིན་པའི་ཕྲ་ཕུང་གི་བརྗེ་ཚབ་ལེགས་བཅོས་གཏོང་བ་དང་། མཆིན་པའི་ཕྲ་ཕུང་བསྐྱར་གསོ་འབྱུང་བར་བྱེད་པ། མཆིན་པའི་དུག་སེལ་ནུས་པ་ཇེ་དྲག་ཏུ་གཏོང་བ་བཅས་ལས། མཆིན་པའི་ནད་འགྱུར་དང་བྱེད་ནུས་སླར་གསོ་ཡོང་བར་བྱེད་པ་དམིགས་ཡུལ་དུ་འཛིན་པ་ཞིག་ཡིན། མཆིན་པའི་སྨན་ནི་སྨན་ཐོ་དགོས་པའི་སྨན་དུ་གཏོགས་ལ། འགའ་ཞིག་ཁོང་བསྟེན་དང་འགའ་ཞིག་སྨན་ཁབ་ཀྱི་རིགས་ཡིན། གཙོ་བོ་མཆིན་ཚད་སྣ་ཚོགས་དང་མཆིན་པའི་དུག་རྨ་དང་ཚིལ་འགྱུར། མཆིན་པ་སྲ་འགྱུར་སོགས་གསོ་བྱེད་ཀྱི་གཞོགས་འདེགས་སྨན་བཅོས་སུ་སྤྱོད། དེ་ཡང་ངེས་པར་སྨན་པའི་བརྟག་དཔྱད་བརྒྱུད་ནད་ཀྱི་གནས་ཚུལ་ལྟར་བསྟེན་དགོས་པ་ཡིན།
ཀྲུང་སྨན་གྱི་མཆིན་བདེ་སྨན་ནི་ཟི་ར་སེར་པོ་དང་ཨ་ཀྲོང་། རམས་རྩད། ད་ཏྲིག ཕག་མཆིན་རྡུལ་བྱེ། སྲན་ལྗང་བཅས་ཀྱིས་བཟོས་པ་ཡིན་ལ། མཆིན་སེལ་རླུང་རྒྱུ་དང་འཚེར་བདེ་ཟས་འཇུའི་ནུས་པ་ལྡན་པར་མ་ཟད་ཨན་བསྒྱུར་རྩབས་ཇེ་དམར་གཏོང་བའི་ནུས་པའང་ལྡན་པས། མཆིན་ཚད་དང་མཆིན་པ་སྲ་འགྱུར་གསར་བྱུང་བཅོ་བར་ཕན། ཡིན་ནའང་། དེ་ཡང་རང་འདོད་དུ་བསྟེན་མི་རུང་བར་སྨན་པའི་ངག་བཞིན་བསྟེན་དགོས།
མིག་སྔར། ཚོང་རའི་ཐོག་གི་མཆིན་སྨན་མང་ཆེ་བ་ནི་ཟས་ཀྱི་ཁ་གསབ་རྫས་སུ་གཏོགས་ལ། མཆིན་བདེ་སྨན་གྱི་གྲུབ་ཆ་གཙོ་བོ་ནི་སྤྱང་ཚེར་ཡིན། སྤྱང་ཚེར་གྱི་འབྲས་བུ་དང་ས་བོན་མཆིན་མཁྲིས་ཀྱི་སྨན་དུ་སྤྱོད་པའི་ལོ་རྒྱུས་སྔ་མོ་ནས་ཡོད་ཀྱང་། མིག་སྔར་སྤྱང་ཚེར་གྱིས་མི་ལུས་ལ་ཕན་པ་ཡོད་མེད་སྐོར་གྱི་ནད་ཐོག་གི་བདེན་དཔང་ཡང་དག་ཅིག་ད་དུང་རྙེད་མེད། སྤྱང་ཚེར་གྱིས་མཆིན་ནད་གསོ་བའི་ནད་ཐོག་གི་ཚོད་ལྟའི་མཇུག་འབྲས་ནི་ཕན་ནུས་མེད་པ་ཞིག་ཏུ་མངོན་ཡང་། སྨན་གྱི་གྲུབ་ཆའི་སྡེབ་ཚད་དང་སྡེབ་སྦྱོར་ལག་རྩལ་སོགས་ཀྱིས་ཀྱང་མཇུག་འབྲས་ལ་ཤན་ཤུགས་ཐེབས་སྲིད་པས་ད་དུང་དཔྱད་རུང་།
རྒྱལ་ནང་དུ་ཡང་སྤྱང་ཚེར་གྱི་གྲུབ་ཆས་བྱས་པའི་སྨན་ཡོད་ཀྱང་། མང་ཆེ་བ་ཟས་ཀྱི་ཁ་གསབ་རྫས་ལྟ་བུར་གཏོགས་པས། སྨན་རྫས་བཞིན་གྱི་དོ་དམ་ནན་མོ་ཐེབས་མེད་པས། ཐོན་རྫས་མི་འདྲ་བའི་གྲུབ་ཆ་དང་སྡེབ་སྦྱོར། བཟོ་རྩལ་སོགས་ཀྱང་འདྲ་མི་སྲིད་པས། གང་འདོད་དུ་བསྟེན་མི་རུང་།
མཚན་བསྐྱལ་ན་མཆིན་པ་མ་ཟད་ལུས་ཀྱི་དོན་སྣོད་གཞན་དག་ལའང་གནོད་པ་ཆེ། སྨན་དང་བཅུད་རྫས་ཀྱིས་ངལ་གསོ་དང་གཉིད་ཀྱི་ཚབ་བྱེད་མི་རུང་། མཆིན་པ་རྒྱུན་ལྡན་ཡིན་པའི་མི་ལ་མཚོན་ན་མཆིན་བདེའི་སྨན་བསྟེན་པ་ནི་ཚན་རིག་དང་མཐུན་པ་ཞིག་མ་ཡིན། གལ་ཏེ་ནད་དང་སྨན་དང་དུག་སོགས་ཀྱི་དབང་གིས་མཆིན་པ་ལ་གནོད་འཚེ་ཐེབས་པ་ཡིན་ན། ནད་ཀྱི་རྒྱུ་རྐྱེན་ལ་བལྟས་ནས་གསོ་བཅོས་གང་ལེགས་བྱེད་དགོས་ལ། མཆིན་བདེ་སྨན་བསྟེན་སྐབས་སྨན་པའི་ངག་ལ་བསྟུན་དགོས། །
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注