དེབ་གསར«ཁྲི་དྲུང་བློ་བཟང་ཐུབ་བསྟན་གྱི་གསུང་བཏུས།»

དེབ་གསར«ཁྲི་དྲུང་བློ་བཟང་ཐུབ་བསྟན་གྱི་གསུང་བཏུས»ནི་ཁྲི་དྲུང་བློ་བཟང་ཐུབ་བསྟན་གྱིས་བརྩམས་པ་དང་ཟིན་བྲིས་བཀོད་པ་རྣམས་ཕྱོགས་གཅིག་བསྡུས་ཤིང་། བོད་ལྗོངས་ཕོ་བྲང་པོ་ཏཱ་ལའི་དོ་དམ་ཁྲུའུ་ཡི་ཁྲུའུ་ཀྲང་གཞོན་པ། རིག་དངོས་ཞིབ་འཇུག་པ་ཆེན་མོ་བསོད་ནམས་དབང་ལྡན་ལགས་ཀྱིས་གཙོ་སྒྲིག་མཛད་པ་དང་། སི་ཁྲོན་མི་རིགས་དཔེ་སྐྲུན་ཁང་གིས་དཔེ་སྐྲུན་འགྲེམ་སྤེལ་བྱས།

དེབ་འདིར་བོད་ཡུལ་རྒྱན་གཅིག་ཕོ་བྲང་པོ་ཏཱ་ལའི་བྱུང་རབས་ལོ་རྒྱུས་དང་འཛུགས་སྐྲུན་སྔ་ཕྱིའི་གནས་ཚུལ་མདོར་བསྡུས་དང་། ནོར་བུ་གླིང་ག་ཆགས་ཚུལ་དང་འབྲེལ་བའི་དཀར་ཆག །བོད་ལྗོངས་ས་ཁུལ་གྱི་ཐེངས་དང་པོའི་རིག་དངོས་ལས་དོན་བཞུགས་མོལ་ཚོགས་འདུའི་ཐོག་རིག་དངོས་ལས་དོན་སྐོར་ལ་གནང་བའི་དགོངས་འཆར། རྩོམ་པ་པོའི་ཆེད་རྩོམ་ཐོར་བུའི་སྐོར། བོད་ཀྱི་དགོན་སྡེ་གལ་ཆེན་ཁག་ཅིག་གི་ངོ་སྤྲོད་མདོར་བསྡུས། བོད་ཀྱི་ལོ་རྒྱུས་སྟེང་བྱུང་བའི་མི་སྣ་གྲགས་ཅན་འགའི་ངོ་སྤྲོད་མདོར་བསྡུས་སོགས་དང་། ལྷག་པར་དུ་ཕོ་བྲང་ཆེན་པོ་པོ་ཏཱ་ལའི་ཚོམས་ཆེན་ནུབ་སྲིད་ཞི་ཕུན་ཚོགས་ཀྱི་ལྡེབས་བྲིས་ཀྱི་གསལ་བཤད་ཞལ་བཤུས་ཞིབ་མོར་བཀོད་ཡོད་པས་ཕོ་བྲང་པོ་ཏཱ་ལའི་ལྡེབས་རིས་ཞིབ་འཇུག་དང་གསལ་རྟོགས་ལ་སྔ་ན་མ་མཆིས་པའི་རིན་ཐང་ལྡན་ཡོད།