མཚོ་སྔོན་སློབ་ཆེན་ཏང་ཨུའི་ཧྲུའུ་ཅི་ལིས་ལིས་རུང་དང་སློབ་གཙོ་ཧྲི་ཡོན་ཁྲུན་འཁོར་དང་བཅས་པ་མཚོ་བྱང་ཁུལ་དུ་བརྟག་ཞིབ་ཏུ་ཕེབས་པ།

ཟླ6པའི་ཚེས18ཉིན། མཚོ་སྔོན་སློབ་ཆེན་ཏང་ཨུའི་ཧྲུའུ་ཅི་ལིས་ལིས་རུང་དང་སློབ་གཙོ་ཧྲི་ཡོན་ཁྲུན་འཁོར་དང་བཅས་པ་མཚོ་བྱང་ཁུལ་དུ་བརྟག་ཞིབ་ཏུ་ཕེབས་ཤིང་། ཁུལ་ཨུའི་ཧྲུའུ་ཅི་ཤ་བོ་སྐྱབས་ཀྱིས་བརྟག་ཞིབ་ལ་ཕེབས་རོགས་བྱས་པ་དང་འབྲེལ་བཞུགས་མོལ་བརྗེ་རེས་གནང་པ།

ཤ་བོ་སྐྱབས་ཀྱིས་མཚོ་སྔོན་སློབ་ཆེན་གྱིས་དུས་ཡུན་རིང་པོའི་ནང་མཚོ་བྱང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐུགས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཤིང་། ཉེ་བའི་ལོ་ཤས་རིང་མཚོ་སྔོན་སློབ་ཆེན་གྱིས་ལག་བསྟར་བྱས་པའི་མདོ་ལའི་གསའ་ལུང་ཐང་ཕྱུགས་རྩྭ་འདེབས་འཛུགས་དང་མུ་རི་ས་ནག་ཐང་བཅོས་སྒྲིག བོད་ལུག“ལོ་གཉིས་སྦྲུམ་གསུམ” ནོར་གནག་གི་ཤ་ཤེད་སྤེལ་པ། བོད་ལུག་ཕན་ནུས་ཆེ་བའི་གསོ་སྤེལ། ཕྱུགས་རྩྭ་ཚན་རིག་དང་མཐུན་པའི་འདེབས་འཛུགས། གཟན་ཆས་སྡེབ་སྦྱོར་ཇེ་ལེགས་སུ་གཏོང་པ་སོགས་ཚན་ཞིབ་རྣམ་གྲངས་འབོར་ཆེན་ཞིག་མཚོ་བྱང་གི་ས་གཞི་ཆེན་མོར་གྲུབ་འབྲས་ཐོབ་པའི་ངང་ལག་ལེན་བྱས་ཡོད་ལ། “ལུག་གི་ཆེད་མཁས་པ”ཧོའུ་ཧྲིན་ཀྲིན་གྱིས་དུས་ཡུན་རིང་པོའི་ནང་བོད་ལུག་ཕན་ནུས་ཆེ་བའི་གསོ་སྤེལ་གྱི་ལས་ལ་གཞོལ་ནས་མཚོ་བྱང་ལ་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་ཚོང་བྱ་རྒྱུར་ལེགས་སྐྱེས་ཧུར་ཐག་ཕུལ་ཞིང་མཚོ་བྱང་སྐྱེ་ཁམས་སྲུང་སྐྱོབ་དང་ཁྱད་ལྡན་ཐོན་ལས་སོགས་བྱ་གཞག་ཁག་འཕེལ་རྒྱས་འགྲོ་རྒྱུར་སྐུལ་འདེད་ནུས་ལྡན་ཐེབས་ཡོད་པས་ལག་ལེན“དཔྱད་རྩོམ”དག་མཚོ་བྱང་གི་ས་གཞི་ཆེན་པོའི་ཐོག་བྲིས་ཡོད་ཅེས་བརྗོད་ཆོག་ཆོག་ཡིན་པར་བསྟན། ཤ་བོ་སྐྱབས་ཀྱིས་ཕྱོགས་གཉིས་ཀྱིས་རང་ངོས་ཀྱི་ལེགས་ཆར་གཞི་ཚུགས་ཏེ་དེ་བས་དམ་ཟབ་ཀྱི་མཉམ་ལས་འབྲེལ་བ་འཛུགས་པ་དང་། འཕེལ་རྒྱས་ཀྱི་གོ་སྐབས་མཉམ་སྤྱོད་བྱེད་པ། གཉིས་ཁེ་གཉིས་ཕན་ཡོང་བར་བྱེད་པ། སློབ་གྲྭ་དང་མཚོ་བྱང་ཕྱོགས་གཉིས་ཀྱི་འཐབ་ཇུས་མཉམ་ལས་སྒྲོམ་གཞིའི་གྲོས་མཐུན་འཇོག་རྒྱུར་སྐུལ་འདེད་གང་མགྱོགས་གཏོང་རྒྱུའི་རེ་བ་ཡོད་པ་དང་། མཚོ་སྔོན་སློབ་ཆེན་གྱིས་མཚོ་བྱང་མཐོ་སྒང་དེང་རབས་སྐྱེ་ཁམས་འབྲོག་ལས་ཚན་རྩལ་ཚོད་ལྟའི་དཔེ་སྟོན་གླིང་ལ་བརྟེན་ནས་ཚན་ཞིབ་ཚོགས་པའི་ལེགས་ཆ་འདོན་སྤེལ་གང་ལེགས་བྱས་ཏེ་བོད་ལུག་དང་ནོར་གནག་ཕན་ནུས་ཆེ་བའི་གསོ་སྤེལ་དང་། རྩྭ་རའི་ཐོན་ལས་རྟེན་གཞི་འཛུགས་སྐྲུན་དང་སྤུས་ལེགས་ཞིང་ལས་སྐྱེ་དངོས་འདེབས་འཛུགས། ཀྲུང་བོད་གསོ་རིག་སྨན་རྫས་རྟེན་གཞི་སྐྲུན་པ་སོགས་ཀྱི་ཁྱབ་ཁོངས་སུ་ཚན་ཞིབ་ཀྱི་རྒྱབ་སྐྱོར་བྱེད་པ་དང་འབྲེལ་མཚོ་སྔོན་སློབ་ཆེན་གྱི་ཐོན་ཁུངས་ལེགས་ཆ་སྤྱད་དེ་མཚོ་བྱང་གིས་ཁྲོམ་ར་གསར་འབྱེད་དང་སྤུས་རྟགས་འཛུགས་སྐྱོང་བྱེད་ཚད་ཇེ་མགྱོགས་སུ་བཏང་ནས་སྤུས་ལེགས་དངོས་པོ་རིན་གོང་མི་མཐོ་བ་སོགས་ཀྱི་གནད་དོན་ནུས་ཤུགས་ཡོད་རྒུས་ཐག་གཅོད་བྱ་རྒྱུའི་རེ་བ་ཡོད་པར་བསྟན་ལ། སྨོན་ལམ་མཐོན་པོ་སྐྱེ་ཁམས་གསར་བརྗེའི་ཞིབ་འཇུག་སློབ་སྦྱོང་རྟེན་གཞི་གཏོད་པར་བརྟེན་ནས་གསར་བརྗེའི་སློབ་གསོ་ལག་ལེན་སློབ་ཁྲིད་རྟེན་གཞི་བཙུགས་ཏེ་གསར་བརྗེའི་སློབ་གསོ་ཞིབ་འཇུག་སློབ་སྦྱོང་དང་། སློབ་མའི་དངོས་སྦྱོང་རྟེན་གཞི་འཛུགས་སྐྲུན། གསར་བརྗེའི་ཡུལ་སྐོར་ཐོན་ཁུངས་སྔོག་འདོན་སོགས་ཁྱབ་ཁོངས་ཀྱི་མཉམ་ལས་བརྗེ་རེས་གཏིང་ཟབ་ཏུ་བཏང་སྟེ“ཀྲུང་གོའི་རྡུལ་ཕྲན་མཁར”དེ་རྒྱལ་ཡོངས་སུ་སྙན་གྲགས་ཆེ་བའི་གསར་བརྗེའི་ཞིབ་འཇུག་སློབ་སྦྱོང་རྟེན་གཞི་ཞིག་ཏུ་གཏོད་རྒྱུ་དང་། སྐྱེ་ཁམས་དཔལ་ཡོན་གྱི་བཙན་ས་འཛུགས་སྐྲུན་བྱེད་པར་དམིགས་ཏེ་སྐྱེ་ཁམས་ཐོན་རྫས་ཀྱི་རིན་ཐང་མངོན་འགྱུར་དང་། སྐྱེ་ཁམས་བདེ་འཇགས་སྲུང་ཡོལ་སྐྲུན་པ། རྒྱལ་ཁབ་སྤྱི་གླིང་འཛུགས་སྐྲུན། སྐྱེ་དངོས་སྣ་མང་རང་བཞིན་སྲུང་སྐྱོབ་སོགས་ཐད་ཀྱི་མཉམ་ལས་ལ་ཤུགས་སྣོན་པ་དང་ལྷག་པར་གཏེར་ཁའི་ཞོམ་ཡུལ་དུ་འོད་ཤུགས་གློག་ཁང་བསྐྲུན་རྒྱུའི་ཐད་ཀྱི་བརྗེ་རེས་མཉམ་ལས་ལ་ཤུགས་བསྣན་ནས་སྐྱེ་ཁམས་ཁོར་ཡུག་བཅོས་སྐྱོང་གི་དཀའ་གནད་ཐག་གཅོད་ཏན་ཏིག་བྱེད་རོགས། མཚོ་སྔོན་སློབ་ཆེན་སློབ་གླིང་གི་ཤེས་ལྡན་མི་སྣ་དང་ཆེད་ལས་རིག་ཚན་གྱི་ལེགས་ཆ་འདོན་སྤེལ་བྱས་ནས་ཁམས་གསོ་དང་ལུས་ཕུང་བརྟག་དཔྱད། སྨན་ལུམས་ལྟེ་གནས་ཇེ་རྒྱས་ཇེ་ལེགས་སུ་གཏོང་བའི་ཐད་ཤེས་ལྡན་པ་དང་རིག་སྟོབས་ཀྱི་རྒྱབ་སྐྱོར་དེ་བས་མང་བ་མཁོ་འདོན་བྱེད་རོགས། ལྷག་པར། དམར་དམག་ནུབ་ལམ་དམག་དཔུང་གིས་མདོ་ལ་རུ་སྤེལ་བའི་བྱེད་སྒོའི་ལོ་རྒྱུས་རྒྱུ་ཆ་སྔོག་འདོན་ལེགས་སྒྲིག་ཐད་རིག་སྟོབས་ཀྱི་རྒྱབ་སྐྱོར་དེ་བས་མང་བ་མཁོ་འདོན་བྱས་ནས་མཚོ་བྱང་ལ་མདོ་ལ་ནས་བྱུང་བའི་དམར་དམག་ནུབ་ལམ་དམག་དཔུང་གི་གཏམ་རྒྱུད་ཡག་པོ་བཤད་རོགས་བྱེད་རྒྱུ་རེ་བ་ཡོད་པར་བསྟན།

ལིས་ལིས་རུང་དང་ཧྲི་ཡོན་ཁྲུན་གྱིས་མཚོ་བྱང་ཁུལ་ཨུ་དང་ཁུལ་སྲིད་གཞུང་གིས་ལོ་མང་རིང་མཚོ་སྔོན་སློབ་ཆེན་ལ་རྒྱབ་སྐྱོར་བྱས་པར་ཐུགས་རྗེ་ཆེ་ཞུས་ཤིང་། དུས་ཡུན་རིང་པོའི་ནང་མཚོ་སྔོན་སློབ་ཆེན་དང་མཚོ་བྱང་ཁུལ་གྱིས་སྐྱེ་ཁམས་ཁོར་ཡུག་སྲུང་སྐྱོབ་དང་ཞིང་ཕྱུགས་ལས་ཐོན་སྐྱེད། ཚན་རིག་ཞིབ་འཇུག་སོགས་ཕྱོགས་མང་པོའི་ཐད་མཉམ་ལས་བརྗེ་རེས་རྒྱ་ཁྱབ་བྱས་པར་གཡུར་ཟའི་གྲུབ་འབྲས་ཐོབ་ཡོད་ལ། ལྷག་པར་དུ་ཉེ་བའི་ལོ་ཤས་རིང་། ཚན་ཞིབ་རྟེན་གཞི་གསར་སྐྲུན་དང་ཚན་ཞིབ་སྟེགས་བུ་མཉམ་སྐྲུན། ཚན་ཞིབ་གྲུབ་འབྲས་ཁྱབ་གདལ་དཔེ་སྟོན་སོགས་ཀྱི་བྱ་བའི་ཐད་གྲུབ་འབྲས་གཡུར་དུ་ཟ་བ་ཐོབ་ཡོད་པར་བསྟན། སློབ་གྲྭ་དང་མཚོ་བྱང་གི་ཉམ་ལས་ནི་ཐོན་སྐྱེད་དང་སློབ་གསོ་མཉམ་འདྲེས་ལ་སྐུལ་འདེད་གཏོང་བའི་གསོན་ཉམས་དོད་པའི་ལག་ལེན་ཞིག་ཡིན་ལ། སློབ་གྲྭ་དང་མཚོ་བྱང་ཕྱོགས་གཉིས་ཀྱི་བརྗེ་རེས་མཉམ་ལས་གཏིང་ཟབ་བྱེད་པའི་གསར་གཏོད་ཀྱི་བྱ་ཐབས་ཤིག་ཀྱང་ཡིན་པས། མཚོ་སྔོན་སློབ་ཆེན་གྱིས་རྒྱལ་ཁབ་ཀྱི་འཐབ་ཇུས་གལ་ཆེན་ནང་རང་འགུལ་ངང་ཞུགས་ནས་ཚན་ཞིབ་དང་ཤེས་ལྡན་མི་སྣ་སོགས་ཀྱི་ལེགས་ཆ་འདོན་སྤེལ་གང་ལེགས་བྱས་ཏེ་སྔར་རྒྱུན་བཞིན་མཚོ་བྱང་ཁུལ་དང་མཉམ་ལས་བརྗེ་རེས་བྱ་རྒྱུར་ཁྱོན་ཡོངས་ནས་ཤུགས་བསྣན་ཏེ་མཚོ་བྱང་ཁུལ་གྱི་དཔལ་འབྱོར་དང་སྤྱི་ཚོགས་སྤུས་ཚད་མཐོན་པོའི་སྒོ་ནས་འཕེལ་རྒྱས་དང་། ལྷག་པར་གསར་བརྗེའི་ཞིབ་འཇུག་སློབ་སྦྱོང་དང་རྩྭ་ཐང་བཅོས་སྐྱོང་། ཕྱུགས་རྒྱུད་ལེགས་སྒྱུར། ཐོན་ལས་འཕེལ་རྒྱས། ཤེས་ལྡན་མི་སྣ་གསོ་སྐྱོང་སོགས་ཀྱི་ཐད་རིག་སྟོབས་ཀྱི་རྒྱབ་སྐྱོར་བྱ་རྒྱུ་ཡིན་པར་བཤད།

དེའི་རིང་། ལིས་ལིས་རུང་དང་ཧྲི་ཡོན་ཁྲུན་འཁོར་དང་བཅས་པ་སྨོན་ལམ་མཐོན་པོ་སྒར་འདེབས་རྟེན་གཞི་དང་སྨོན་ལམ་མཐོན་པོའི་མཁའ་དམག་གི་རྗེས་ཤུལ། རྐང་ཚའི་གསེར་ཉའི་གཞིས་ཁྱིམ། ཁུལ་མཐོ་སྒང་སྐྱེ་ཁམས་ཕྱུགས་ལས་ཚན་རྩལ་དཔེ་སྟོན་གླིང་། མདའ་བཞི་ཅིན་ཙང་སྐྱེ་ཁམས་མཐོ་སྒང་བོད་ལུག་གསོ་སྤེལ་ཆེད་ལས་མཉམ་ལས་ཁང་བཅས་སུ་བསྐྱོད་དེ་ཡུལ་དངོས་ནས་ཕན་ནུས་ཆེ་བའི་བོད་ལུག་གསོ་སྤེལ་རྟེན་གཞིར་ལྟ་ཞིབ་བྱས་ཏེ། མཚོ་བྱང་གིས་ལྗང་མདོག་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་གྱི་སྣེ་ཁྲིད་ཁུལ་དང་རྒྱལ་སྤྱིའི་སྐྱེ་ཁམས་ཡུལ་སྐོར་བྱ་ཡུལ་གཏོད་པ། བོད་ལུག་དང་ནོར་གནག་རྒྱུད་བཟང་གསོ་སྤེལ་མ་ལག སྦྲུམ་མང་བོད་ལུག་འདེམས་གསོ་བྱེད་པ། སྐྱེ་ཁམས་ཞིབ་འཇུག་སློབ་སྦྱོང་རྟེན་གཞི་འཛུགས་པ། ཚན་ཞིབ་དཔེ་སྟོན་རྟེན་གཞི་གཏོད་པ། ཕྱུགས་ལས་མཉམ་ལས་ཁང་གི་རྨང་གཞིའི་སྒྲིག་བཀོད་འཛུགས་སྐྲུན་སོགས་ཀྱི་བྱ་བར་རྒྱུས་ལོན་ཞིབ་ཕྲ་བྱས།

ཁུལ་དཔོན་གཞོན་པ་ཀརྨ་ཚེ་རིང་དང་། ཁུལ་ཞིང་ཕྱུགས་དང་ཚན་རྩལ་ཅུས། མདའ་བཞི་རྫོང་སྲིད་གཞུང་གི་འགན་འཁུར་བློ་མཐུན་གཙོ་བོ་བཅས་ཀྱིས་མཉམ་དུ་བརྟག་ཞིབ་ལ་ཕེབས་རོགས་གནང་།