ཤ་བོ་སྐྱབས་ཀྱིས་ལོ་སར་དུས་ཆེན་གྱི་འཚམས་འདྲིའི་བྱེད་སྒོ་སྤེལ།

ཟླ1པོའི་ཚེས24ཉིན།  ཁུལ་ཨུའི་ཧྲུའུ་ཅི་ཤ་བོ་སྐྱབས་མཚོ་བྱང་ཡན་ལག་དམག་ཁུལ་དང་། མདའ་བཞི་རྫོང་སྒར་ཐོག་དགོན་དུ་བསྐྱོད་དེ་འཚམས་འདྲིའི་བྱེད་སྒོ་སྤེལ་ལ། ཞིང་ཆེན་དང་ཁུལ་གྱི“ཚོགས་ཆེན་གཉིས”ཀྱི་དགོངས་དོན་དྲིལ་སྒྲོག་བྱས་ཏེ། ཏང་དང་སྲིད་གཞུང་གི་ཐུགས་ཁུར་དང་ལོ་གསར་གྱི་སྨོན་འདུན་ཕུལ།    

མཚོ་བྱང་ཡན་ལག་དམག་ཁུལ་དུ་ཤ་བོ་སྐྱབས་ཀྱིས་མགོ་ཁྲིད་དཔོན་དམག་འཐུས་མི་དང་བྱམས་བརྩེའི་ངང་གླེང་མོལ་བྱས་ནས་དམག་ཁུལ་འཛུགས་སྐྲུན་དང་དཔོན་དམག་གི་སྦྱོང་བརྡར་འཚོ་བ་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་གནང་ནས་བསྟན་དོན། འདས་ཟིན་པའི་ལོ་གཅིག་ནང་མཚོ་བྱང་ཡན་ལག་དམག་ཁུལ་ས་གནས་འཛུགས་སྐྲུན་ནང་ཧུར་ཐག་སྒོས་ཞུགས་ནས་རྒྱབ་སྐྱོར་བྱས་པ་དང་། དམག་དམངས་མཉམ་འདྲེས་དང་སྐྱེ་ཁམས་སྲུང་སྐྱོབ། གྲོང་གསེབ་དར་སྤེལ། མི་རིགས་མཐུན་སྒྲིལ། བདེ་འཇགས་འཛུགས་སྐྲུན། དེ་བཞིན་མཚོ་བྱང་གི་གསར་བརྗེའི་ཐོན་ཁུངས་སྔོག་འདོན་དང་བསྡུ་རུབ་ལེགས་སྒྲིག་བཅས་ཀྱི་ཐད་གྲུབ་འབྲས་གཟེངས་སུ་ཐོན་པའི་བྱ་བ་གང་མང་བསྒྲུབས་པས། ཁུལ་ཡོངས་ཀྱི་དམག་སྲིད་དམག་དམངས་མཐུན་སྒྲིལ་གྱི་རྣམ་པ་བཟང་པོ་མུ་མཐུད་སྲ་བརྟན་དང་འཕེལ་རྒྱས་བཏང་བ་དང་། ཁུལ་ཡོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་བྱ་གཞག་སོ་སོར་ཐོབ་པའི་གྲུབ་འབྲས་ལ་བཅའ་སྡོད་བྱ་ཡུལ་གྱི་དམག་དཔུང་དང་དམངས་དམག་གྲ་སྒྲིག་དམག་ཞབས་མི་སྣ། དམག་ཁོངས་ནས་ཕྱིར་ལོག་པའི་དམག་མི་བཅས་ཀྱིས་དཀའ་སྤྱད་འབད་བརྩོན་དང་སྒེར་སེམས་མེད་པར་ལེགས་སྐྱེས་ཕུལ་ཡོད་ཟེར། ཡན་ལག་དམག་ཁུལ་གོང་འོག་ཡོངས་སུ། གཅིག་ནས་ཞི་ཅིན་ཕིང་གི་དམག་དཔུང་སྟོབས་ལྡན་དུ་གཏོང་བའི་དགོངས་པ་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྒྱལ་སྲུང་དང་དམག་དཔུང་འཛུགས་སྐྱོང་སྐོར་གྱི་རྒྱས་བཤད་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། དོ་དམ་ཁ་ཕྱོགས་དང་རྩ་བ་དམ་འཛིན་རྒྱུན་འཁྱོངས་བྱས་ཏེ། ཏང་ཀྲུང་དབྱང་དང་། ཀྲུང་དབྱང་དམག་དོན་ཨུ་ཡོན་ལྷན་ཁང་། ཞིང་ཆེན་ཏང་ཨུ་དང་ཁུལ་ཨུ་བཅས་ཀྱི་ཐབས་ཇུས་བཀོད་སྒྲིག་མཐའ་གཅིག་ཏུ་ལག་བསྟར་བྱས་ཏེ། ཏང་གིས་མི་དམངས་དམག་དཔུང་ལ་མགོ་ཁྲིད་བྱེད་པ་མཐའ་གཅིག་ཏུ་དོན་འཁྱོལ་བྱེད་དགོས། གཉིས་ནས“མདེལ་གཉིས་སྐར་གཅིག”གི་སྙིང་སྟོབས་དང“མཐོ་སྒང”གི་སྙིང་སྟོབས་རྒྱུན་འཛིན་དང་དར་སྤེལ་ཤུགས་ཆེན་བྱས་ཏེ། བསམ་བློ་དང་ཆབ་སྲིད་འཛུགས་སྐྱོང་ལ་ཤུགས་བསྣན་ཏེ་དམག་དོན་བྱང་ཚད་དང་དམག་འཐབ་ནུས་པ་ཆེ་རུ་གཏོང་བ་དང་། རྒྱལ་སྲུང་སྐུལ་སློང་དང་འཇིགས་སྐུལ་ལ་ངོ་རྒོལ་དང་བརྟན་ལྷིང་སྲུང་སྐྱོབ། ཉེན་སྐྱོབ་གེགས་སེལ་སོགས་འགན་ནུས་ལས་འགན་དང་དཔེ་བསྡུར་ཚད་འཛིན་བྱས་ཏེ། “ལྔ་བཅོ་ལྔའི”རྨང་གཞིའི་སྒྲིག་བཀོད་ལས་གཞི་འཆར་འགོད་ཡག་པོ་བྱས་ནས་ཞན་ཆ་ཁ་གསབ་བྱེད་དགོས། གསུམ་ནས་མཚོ་བྱང་གིས་སྙིང་སྟོབས་ཀྱི་བཙན་ས་བསྐྲུན་རྒྱུར་རོགས་རམ་བྱེད་པའི་ཐད་མུ་མཐུད་དུ་ནུས་ཤུགས་འདོན་དགོས་པ་དང་། གསར་བརྗེའི་ཐོན་ཁུངས་གཏིང་ཟབ་ཏུ་སྔོག་འདོན་བྱེད་པའི་ཐད་རང་འགུལ་ངང་བྱ་སྤྱོད་སྤེལ་ཏེ། 221རྟེན་གཞིའི་གནའ་ཤུལ་དང་བཅིངས་འགྲོལ་དམག་སྲུང་དམག་དཔུང་སྡེའི་དམག་དོན་གནའ་ཤུལ17སྲུང་སྐྱོང་བེད་སྤྱོད་བྱ་བའི་ནང་ཧུར་ཐག་ཞུགས་ནས་གསར་བརྗེའི་རིག་གནས་སློབ་གསོ་བེད་སྤྱོད་གང་ལེགས་བྱས་ནས་རྒྱ་ཆེའི་དཔོན་དམག་ལ་ཕུགས་བསམ་དང་དད་སེམས་བརྟན་པོ་དང་། འཐབ་འཛིང་གི་འདོད་སེམས་སྦྱོང་བརྡར།  འཐབ་འཛིང་གི་སྤྱོད་ཚུལ་སྦྱོང་བརྡར་བཅས་བྱེད་པར་ཁྲིད་སྟོན་བྱེད་པའི་རེ་བ་ཡོད་ཟེར།

མདའ་བཞི་རྫོང་སྒར་ཐོག་དགོན་དུ་ཤ་བོ་སྐྱབས་ཀྱིས་དགོན་པའི་དོ་དམ་ཨུ་ལྷན་གྱི་ཁོངས་མི་དང་། དགོན་པར་བཅའ་སྡོད་བྱེད་པའི་ལས་བྱེད་པ་དང་བྱམས་བརྩེའི་ངང་གླེང་མོལ་བྱས་ནས་དགོན་པའི་དོ་དམ་དང་དགེ་འདུན་པའི་སློབ་སྦྱོང་གནས་ཚུལ་ལ་རྒྱུས་ལོན་ཞིབ་ཕྲ་གནང་བར་མ་ཟད། གནས་པའི་གནད་དོན་དང་དཀའ་ངལ་ལ་དོ་ཁུར་དང་འདྲི་རྩད་བྱས་ཏེ། སྒར་ཐོག་དགོན་པས་དད་ལྡན་མང་ཚོགས་མཐུན་སྒྲིལ་དང་སྤྱི་ཚོགས་བརྟན་ལྷིང་སྲུང་སྐྱོབ།  དགོན་པའི་འགན་འཁྲི་ལག་བསྟར་སོགས་ཐད་སྤེལ་བའི་བྱ་བར་ཁས་ལེན་གང་ལེགས་གནང་ནས་ནན་གྱིས་བསྟན་དོན། གཅིག་ནས་ཆོས་ལུགས་ནན་སྐྱོང་བྱ་རྒྱུ་རྒྱུན་འཁྱོངས་བྱས་ཏེ། དགོན་པའི་དོ་དམ་ལྷན་ཁང་གི་རང་ངོས་འཛུགས་སྐྱོང་ལ་སྔར་ལས་ཤུགས་སྣོན་པ་དང་། དོ་དམ་ལམ་སྲོལ་ཁག་འཐུས་ཚང་དུ་གཏོང་བ། དགོན་པའི་ཚན་རིག་ཅན་དང་ཚད་ལྡན་ཅན། ཁྲིམས་སྐྱོང་ཅན་བཅས་ཀྱི་དོ་དམ་ལ་སྐུལ་འདེད་གཏོང་བ་དང་། དགོན་པའི་རང་བདག་དོ་དམ་གྱི་ཆུ་ཚད་མཐོ་རུ་གཏོང་དགོས། གཉིས་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་བ་གཙོ་ཐིག་ཏུ་བྱས་ནས་དགོན་པའི་དགེ་འདུན་པའི་བསམ་བློ་ཆབ་སྲིད་སློབ་གསོ་གཏིང་ཟབ་ཏུ་གཏོང་བ་དང་། ཆོས་ལུགས་དེ་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བས་སྣེ་ཁྲིད་བྱེད་པར་ཁྲིད་སྟོན་དང་རྒྱབ་སྐྱོར་བྱས་ཏེ“འདུ་ཤེས་གསུམ”གྱི་ལག་ལེན་སློབ་གསོའི་བྱེད་སྒོ་ཏན་ཏིག་ངང་སྤེལ་བ་དང་། ཆོས་ལུགས་ལས་རིགས་ཀྱི་མི་སྣ་དང་དད་ལྡན་མང་ཚོགས་ཀྱི“ངོས་འཛིན་གཅིག་མཐུན་ལྔ”རྒྱུན་ཆད་མེད་པར་གཏིང་ཟབ་ཏུ་གཏོང་དགོས། གསུམ་ནས་རྒྱལ་གཅེས་ཆོས་གཅེས་ཀྱི་སྲོལ་རྒྱུན་བཟང་པོ་རྒྱུན་འཁྱོངས་བྱས་ཏེ། ཞབས་དྲུང་དཀར་པོ་སྐུ་ཕྲེང་བརྒྱད་པའི་གཞིས་རྙིང་དང་སྒར་ཐོག་དགོན་པའི་བོད་བརྒྱུད་ནང་བསྟན་ཀྲུང་གོ་ཅན་གྱ་ཁ་ཕྱོགས་འགྲེམས་སྟོན་ཁང་གི་སློབ་གསོ་ལག་ལེན་གྱི་ནུས་པ་འདོན་སྤེལ་གང་ལེགས་བྱས་ཏེ། ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་ཕན་ཚུན་འཚམ་པར་སྐུལ་འདེད་ཧུར་ཐག་བཏང་ནས་ཆོས་ལུགས་ཀྲུང་གོ་ཅན་གྱི་ཁ་ཕྱོགས་ལ་སྐུལ་འདེད་གཏོང་བའི་ཐད་དཔེ་མཚོན་གཏོད་དགོས། བཞི་ནས་དགོན་པའི་རྨང་གཞིའི་སྒྲིག་བཀོད་འཛུགས་སྐྲུན་ལ་རྒྱུན་ཆད་མེད་པར་ཤུགས་སྣོན་དགོས་པ་དང་།  དགོན་པའི་མཐའ་འཁོར་གྱི་ཁོར་ཡུག་ཇེ་ལེགས་སུ་གཏོང་བ་དང་མཛེས་སུ་གཏོང་བ། མཚོ་སྔོན་པོ་དང་། སྨོན་ལམ་མཐོན་པོ་སྐྱེ་ཁམས་ཡུལ་སྐོར་དང་གསར་བརྗེའི་ཉམས་ཞིབ་རྟེན་གཞི། ཞབས་དྲུང་སྒར་ཐོག་དགོན་པའིAAརིམ་པའི་ལྗོངས་ཁུལ་བཅས་རིམ་སྤོར་བྱ་རྒྱུར་མཉམ་འགུལ་ངང་སྐུལ་འདེད་གཏོང་བ་དང་། མཚོ་སྔོན་པོའི་མཚོ་མཆོད་བྱེད་སྒོ་སྐྱེ་ཁམས་ཅན་དུ་གཅིག་གྱུར་འཆར་འགོད་དང་ཚད་ལྡན་དུ་གཏོང་བ། དགོན་པའི་རང་ཁ་རང་གསོའི་ཐོན་ལས་གསོ་སྐྱོང་ཤུགས་ཆེན་བྱེད་པ་དང་། དགེ་འདུན་པ་རྣམས་ལ་དངོས་སྤྱོད་རྩལ་ནུས་སློབ་སྦྱོང་བྱེད་པར་སྐུལ་ལྕག་བྱས་ནས་དགོན་པའི་རང་ཁ་རང་གསོའི་ནུས་པ་ཆེ་རུ་གཏོང་དགོས་ཟེར།    

ཁུལ་ཨུའི་ཧྲུའུ་ཅི་གཞོན་པ་ཀྲང་ཨའེ་ཧུང་དང་། ཁུལ་ཨུའི་རྒྱུན་ཨུའམ་དྲིལ་སྒྲོག་པུའི་པུའུ་ཀྲང་སུང་ཞུག་ཙུང་ཞུགས།